Kwestin
?Wanem ya “tok blong God” we Hibrus 4:12 i talem se “i laef, mo i stap wok”?
Plante taem ol buk blong yumi oli tokbaot vas blong Hibrus 4:12 se, Baebol i gat paoa blong jenisim laef blong man, mo hemia i tru. Be i gud blong kasem save samting we Pol i stap tokbaot long vas ya. Hem i leftemap tingting blong ol Kristin long taem ya, blong oli wok folem stamba tingting blong God. Plante long ol tingting ya oli stap long ol tabu hanraet we ol Kristin long taem ya oli gat. Pol i yusum eksampol blong ol man Isrel we God i mekem olgeta oli fri long Ijip. Olgeta ya oli gat janis blong harem gud mo spel, taem oli go long promes lan, we ‘graon blong hem i gud tumas, mo oltaem i karem fulap kakae.’—Eksodas 3:8; Dutronome 12:9, 10.
Hemia nao stamba tingting blong God. Be ol man Isrel oli no wantem obei long Jehova mo oli no bilif long hem. Taswe, plante long olgeta oli no kasem spel ya. (Namba 14:30; Josua 14:6-10) Nating se i olsem, Pol i talem se yumi gat janis yet from we ‘God i givim promes long yumi blong yumi save kasem spel blong hem.’ (Hibrus 3:16-19; 4:1) I klia nomo se “promes” ya, i wan haf blong stamba tingting blong God. Olsem ol Kristin bifo, yumi tu yumi save lanem mo wok folem stamba tingting blong God. Pol i talem bakegen sam tok blong Jenesis 2:2 mo Ol Sam 95:11, blong makemgud se promes ya i kamaot long Baebol.
Yumi glad tumas blong save se God i promes blong yumi kasem spel blong hem, mo promes ya i stap yet. Yumi trastem ol samting we Baebol i tijim long saed blong spel blong God, mo yumi stap mekem sam samting blong kasem spel ya. ?Olsem wanem? ?Hemia i min se yumi mas folem Loa blong Moses, no yumi mas mekem ol gudfala fasin? Nogat. Bilif we yumi gat long God, i mekem se yumi glad blong gohed blong wok folem stamba tingting blong hem. Plante man oli stap stadi Baebol mo oli lanem stamba tingting blong God. Hemia i pulum olgeta blong oli jenisim laef blong olgeta, oli bilif, mo oli baptaes. Ol jenis we oli mekem i pruvum se, “tok blong God i wan samting we i laef, mo i stap wok.” Stamba tingting blong God we Baebol i tokbaot, i jenisim laef blong yumi finis, mo bambae i gohed blong wok long laef blong yumi.
