1, 2. ?From wanem ol Witnes blong Jehova oli jusum gud ol klos we oli werem? (Yu luk pija long stat blong stadi.)

WAN niuspepa blong Netalan i tokbaot fasin blong werem klos we ol lida blong skul oli putum, blong go long ol jos seves. Niuspepa ya i talem se: “Ol man oli werem eni kaen klos nomo, speseli taem ples i hot.” Be hem i talem se, ol Witnes blong Jehova oli no jenis olsem, blong go long asembli blong olgeta. Ol boe mo ol man oli werem kot mo nektae, ol gel mo ol woman oli werem sket we i naes mo i no pulum ae. Plante taem ol man oli talem gudfala toktok long ol Witnes blong Jehova, from fasin blong olgeta blong werem klos. Aposol Pol i talem se ol Kristin oli mas werem ol klos we “i stret nomo, i no blong pulum ae blong man, mo i no blong flas,” mo hemia nao stret samting we ol man blong God oli folem. (1 Timoti 2:9, 10) Nating se Pol i stap tokbaot ol woman, be advaes ya i go tu long ol man.

² Ol man blong God oli tingbaot fasin blong jusum ol klos, olsem wan samting we i impoten long olgeta, mo long Jehova tu. (Jenesis 3:21) Baebol i soemaot klia se Jehova,  Hae King blong heven mo wol, i gat ol rul we hem i wantem se ol man blong hem oli folem taem oli werem klos. Taswe, yumi no jusum ol klos nomo we yumi laekem, be yumi wantem mekem Jehova Hae King blong heven mo wol i glad.

3. ?Loa we God i givim long ol man Isrel i tijim yumi long wanem?

³ Long Loa blong Moses, i gat ol rul we oli protektem ol man Isrel blong oli no folem rabis fasin blong ol neson raonabaot long olgeta. Loa i soemaot se Jehova i no laekem nating ol klos we i mekem i had blong man i luksave weswan i man mo weswan i woman. Tede, ol man oli wokem ol stael blong klos we i blong man, be woman tu i save werem mo ol klos blong woman we man tu i save werem. (Ridim Dutronome 22:5.) Loa ya i tijim yumi se Jehova i no laekem ol klos we i mekem se man i luk olsem woman mo woman i luk olsem man, no i had blong luksave.

4. ?Wanem i save givhan long ol Kristin blong jusum gud klos blong olgeta?

⁴ Ol rul blong Baebol oli save givhan long yumi blong jusum gud ol klos blong yumi. Nomata se yu stap long wanem kantri, ples i hot no i kolkol, yu gat wanem kalja, be ol rul ya oli stret long yumi evriwan. Yumi no nidim wan longfala lis blong talem wanem kaen klos i stret mo wanem kaen klos i no stret. Be yet, ol rul blong Baebol oli givhan long yumi blong jusum ol stael klos we yumi laekem. I gud yumi tokbaot sam rul blong Baebol we i save givhan long yumi blong “jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem,” taem yumi stap jusum klos blong yumi.​—Rom 12:1, 2.

5, 6. ?Klos blong yumi i save pulum man blong mekem wanem?

⁵ Tabu spirit i pulum aposol Pol blong tokbaot impoten rul we i stap long 2 Korin 6:4. (Ridim.) Ol klos we yumi werem oli soemaot se yumi wanem kaen man, mo taem ol man oli luk yumi, oli save gat plante defren tingting. (1 Samuel 16:7) Yumi ol man blong wok blong God, taswe yumi no jes werem ol klos we yumi nomo i laekem. Taem yumi folem ol rul blong Baebol, hemia i givhan long yumi blong no werem ol klos we oli taet tumas, oli soemaot bodi, no oli pulum ol narafala blong tingbaot seks. Hemia i min se yumi no mas werem klos we i soemaot tabu haf blong bodi blong yumi, no i mekem narafala i sem.

⁶ Taem klos mo hea blong yumi i stret mo i klin, ol man bambae oli respektem yumi mo oli luksave se yumi ol man blong wok blong Jehova. Mo maet bambae oli wantem save God we yumi wosipim, oli gat moa respek long  ogenaesesen blong yumi, mo maet oli wantem lesin long mesej we yumi stap talemaot.

7, 8. ?Wetaem yumi mas werem ol klos we oli stret?

⁷ Yumi wosipim wan God we i tabu, yumi gat ol gudfala brata mo sista long kongregesen, mo yumi wantem we ol man oli lesin long mesej we yumi talemaot. Taswe, yumi mas werem ol klos we oli leftemap nem blong Jehova. (Rom 13:8-10) I impoten moa blong tingbaot ol klos we yumi werem, taem yumi go long ol miting mo taem yumi go prij. Ol klos we yumi werem oli mas soemaot se yumi ol man blong God. (1 Timoti 2:10) I tru, maet sam klos we yumi werem oli stret blong go long wan ples, be maet oli no stret blong go long wan narafala ples. Taswe, nomata weples yumi stap long hem, i nogud yumi mekem narafala i foldaon from klos we yumi werem.

⁸ Ridim 1 Korin 10:31. Taem yumi go long ol asembli, ol klos blong yumi oli mas stret. Yumi no mas kopi stael blong klos we plante man blong wol oli stap werem. Mo tu, yumi no mas werem ol klos  we oli olbaot, bifo no afta long asembli, mo taem yumi go insaed no yumi kamaot long wan hotel. Olsem nao, bambae yumi praod blong talemaot se yumi Witnes blong Jehova, mo yumi rere blong prij enitaem.

9, 10. ?Olsem wanem Filipae 2:4 i givhan long yumi blong jusum ol klos we yumi werem?

⁹ Ridim Filipae 2:4. ?Ol klos blong yumi oli save mekem wanem long ol Kristin brata mo sista? ?From wanem yumi mas tingbaot samting ya? Wan risen hemia se ol man blong God oli traehad blong folem advaes ya se: “Yufala i mas kilimaot ol fasin ya blong yufala, we oli blong wol ya nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas.” (Kolosi 3:2, 5) Sam brata mo sista oli lego rabis fasin blong seks we oli gat bifo, be maet oli stap faet yet agensem ol nogud tingting ya. Sipos yumi no lukaot gud, fasin blong yumi blong werem klos i save mekem i had moa long olgeta blong oli folem ol advaes blong Baebol, mo blokem ol nogud tingting. (1 Korin 6:9, 10) Yumi no wantem mekem i had moa long olgeta blong winim faet ya.

¹⁰ Taem yumi stap wetem ol brata mo sista, ol klos we yumi werem oli protektem yumi long ol man we oli gat rabis fasin. Hemia i tru tumas, taem yumi joen tugeta long miting no long wan narafala ples. Nating se yumi fri blong jusum klos blong yumi, be yumi mas tingbaot blong werem ol klos we i givhan long narafala blong i stap klin long tingting, toktok, mo fasin blong hem. (1 Pita 1:15, 16) Baebol i talem se, man we i lavem narafala, ‘hem i no save mekem ol fasin we man i sek nogud long hem, mo i no save tingbaot hem nomo.’​—1 Korin 13:4, 5.

11, 12. ?Olsem wanem Prija 3:1, 17 i givhan long yumi blong jusum gud ol klos blong yumi?

¹¹ Taem ol man blong God oli jusum klos blong werem, oli save se i gat “taem blong olgeta samting, mo olgeta wok.” (Prija 3:1, 17) Ol klos we yumi werem oli defdefren, maet from ples blong yumi i hot no i kolkol, yumi pua no yumi rij, mo ol samting we oli hapen long laef blong yumi oli no sem mak. Be, ol rul blong Jehova oli stap sem mak nomo.​—Malakae 3:6.

¹² I no isi blong jusum ol klos we i soem respek mo i stret, speseli taem ples i hot. Be, ol brata mo sista oli glad moa, taem yumi no werem ol klos we oli taet tumas no oli slak tumas, we oli soemaot bodi blong yumi. (Job 31:1) Mo tu, sipos yumi go long solwota no long swiming pul, ol klos blong swim we yumi werem oli mas stret. (Ol Proveb 11:2, 20) Nating sipos plante man long wol oli werem ol klos blong swim we i soemaot bodi blong olgeta, be yumi mas meksua se  klos we yumi jusum i leftemap tabu God blong yumi, Jehova.

13. ?Olsem wanem advaes long 1 Korin 10:32, 33 i givhan long yumi blong jusum gud ol klos blong yumi?

¹³ Yumi mas lukaot gud se ol klos blong yumi oli no mekem trabol long ol narafala. Hemia wan narafala impoten rul we yumi mas tingbaot, taem yumi jusum ol klos blong yumi. (Ridim 1 Korin 10:32, 33.) Yumi mas tingbaot blong jusum ol klos we oli givhan long ol brata mo sista, mo olgeta we oli no wosipim Jehova. Aposol Pol i talem se: “Yumi mas tingbaot ol fasin we ol Kristin brata mo sista blong yumi oli wantem, nao yumi mas mekem i gud long olgeta, blong mekem olgeta oli strong moa long bilif blong olgeta.” Pol i talem risen from wanem yumi mas mekem olsem, hem i se: “From we Kraes i no folem ol fasin we hem nomo i wantem.” (Rom 15:2, 3) Yumi folem eksampol blong Jisas, taem yumi mekem samting we God i wantem mo yumi givhan long ol narafala. Hemia nao samting we i impoten blong mekem, i bitim we yumi tingbaot samting we yumi nomo i wantem. Taswe, bambae yumi no jusum ol stael blong klos we yumi nomo i laekem, we i save blokem ol man blong oli no lesin long yumi taem yumi prij.

14. ?Olsem wanem ol papa mo mama oli save tijim pikinini blong i soem respek long God?

¹⁴ Ol Kristin papa mo mama oli gat wok blong tijim pikinini blong olgeta blong folem ol rul blong Baebol. Hemia i min se oli mas meksua se klos mo hea blong olgeta mo blong pikinini blong olgeta, i stret mo i mekem God i glad. (Ol Proveb 22:6; 27:11) ?Olsem wanem ol papa mo mama oli save tijim pikinini blong i respektem God mo ol rul blong hem? Ol papa mo mama oli mas soemaot gudfala eksampol long ol pikinini blong olgeta. Mo oli mas tijim gud pikinini blong i jusum ol klos we oli stret. Ol pikinini oli no mas jusum ol klos we olgeta nomo oli laekem, be oli mas jusum ol klos we i leftemap nem blong Jehova.

15. ?Wanem i save givhan long yumi blong mekem ol waes desisen?

¹⁵ Baebol i givhan long yumi blong mekem ol waes desisen we oli leftemap nem blong Jehova. Be yet, ol klos we yumi werem oli soemaot samting we yumi laekem. Ol stael blong klos we yumi laekem mo yumi naf blong pem, maet oli defren long stael we narafala i jusum. Be oltaem ol klos blong yumi oli mas klin mo oli mas stret. Mo oli mas stret long ples we yumi wantem go long hem, mo tu ol manples oli glad long hem.

16. ?From wanem i no blong nating nomo we yumi jenis gud?

¹⁶ I no isi blong faenem ol klos we oli stret. Plante stoa oli salem nomo ol klos we plante man oli laekem blong werem. Taswe, i nidim moa taem blong lukaot ol sket, ol dres, ol sot blong ol woman, no jusum ol traoses mo ol kot we oli no taet tumas. Be taem yumi traehad blong werem ol klos we oli naes mo oli stret, bambae ol brata mo sista oli luksave mo oli glad long yumi from. Mo tu, yumi glad tumas se yumi stap leftemap nem blong Papa blong yumi long heven, nao yumi no tingbaot ol traehad we yumi mekem blong lukaot ol klos.

17. ?From wanem sam brata oli lego mustas blong olgeta?

 ¹⁷ ?I stret blong wan brata i lego mustas blong hem? Folem Loa blong Moses, i stret nomo blong ol man oli lego mustas blong olgeta. Be tede ol Kristin oli no moa stap aninit long Loa blong Moses. (Levitikas 19:27; 21:5; Galesia 3:24, 25) Long kalja blong sam kantri, i oraet nomo blong ol man oli lego mo katem gud mustas blong olgeta, mo hemia i no blokem ol man blong oli lesin long gud nius. Sam brata we oli lidim wok blong kongregesen, oli lego mustas blong olgeta. Nating se i olsem, i gat sam brata we oli jusum blong sevemaot mustas blong olgeta. (1 Korin 8:9, 13; 10:32) Long sam narafala kantri, i no fasin blong ol man blong oli lego mustas blong olgeta mo i no stret blong wan Kristin i lego mustas blong hem. Taswe, sipos wan brata i lego mustas blong hem, maet ol man bambae oli “gat rabis poen long hem” mo hemia i no leftemap nem blong God.​—1 Timoti 3:2, 7; Rom 15:1-3.

18, 19. ?Maeka 6:8 i givhan long yumi olsem wanem?

¹⁸ Yumi glad tumas se Jehova i no givim wan longfala lis long yumi, blong talem wanem stael blong klos mo hea we i stret, no i no stret. Be hem i letem yumi blong jusum samting we yumi wantem, folem ol rul blong Baebol. Taswe, nomata wanem stael blong klos mo hea we yumi jusum, be yumi mas soemaot se yumi gat tingting daon taem yumi stap wosipim God.​—Maeka 6:8.

¹⁹ Yumi luksave se Jehova i klin, i tabu mo ol rul blong hem oli save lidim gud yumi. Sipos yumi gat tingting daon, bambae yumi folem ol rul blong hem long laef blong yumi. Mo taem yumi gat tingting daon, hemia bambae i givhan long yumi blong respektem tingting mo filing blong ol narafala.

20. ?Klos mo hea blong yumi i save mekem wanem long narafala?

²⁰ Ol klos blong yumi oli mas soemaot klia se yumi ol man blong wok blong Jehova. Ol rul blong hem oli gud tumas mo yumi glad blong folem. I gud yumi talem ol gudfala toktok long ol brata mo sista from ol naes klos we oli werem mo ol gudfala fasin we oli gat. Ol klos we oli werem, i pulum ol man blong oli save trutok mo oli leftemap nem blong God mo mekem hem i glad. Taem yumi mekem ol waes desisen long saed blong klos we yumi werem, bambae yumi gohed blong leftemap ‘hae nem blong Jehova mo paoa blong hem,’ we i olsem klos blong hem.​—Ol Sam 104:1, 2.