1, 2. (1) ?From wanem i no isi blong papa mo mama i tijim pikinini blong i gat bilif? ?Wanem i save givhan long papa mo mama? (2) ?Wanem fo samting we bambae yumi tokbaot naioa?

WAN papa mo mama long Franis tufala i talem se: “Mitufala i bilif long Jehova, be hemia i no min se bae pikinini blong mitufala tu i bilif. Ol pikinini oli no bon wetem fasin ya blong bilif. Mo i tekem taem blong oli gat bilif.” Wan brata long Ostrelia i raetem se: “I no isi blong halpem pikinini blong i gat bilif. Maet yu ansa finis long kwestin blong pikinini, be biaen hem i askem sem kwestin bakegen. Ol ansa we yu givim tede oli stret, be maet tumora hem i wantem save moa.” Maet papa mo mama i givim ansa finis long kwestin we pikinini i askem, be taem pikinini i stap kam bigwan, oli luk se oli mas givim moa save long pikinini blong eksplenem sem samting ya. Mo oli mas yusum sam defren rod blong tijim ol pikinini blong oli lavem Jehova.

² Ol papa mo mama, ?samtaem yufala i tingbaot sipos  yufala i naf blong tijim pikinini blong i bilif long Jehova taem hem i kam bigwan? Blong talem stret, yumi no naf blong mekem wok ya wetem prapa save blong yumi. (Jeremaea 10:23) Taswe, yumi mas dipen long Jehova blong i givhan long yumi. Mo hem i givim plante advaes blong lidim ol papa mo mama. ?Olsem wanem yu save givhan long pikinini blong yu? (1) Savegud pikinini blong yu. (2) Tijim hem long samting we yu lanem. (3) Yusum ol pijatok. (4) Prea from tabu spirit mo gat longfala tingting.

3. ?Olsem wanem ol papa mo mama oli save folem eksampol blong Jisas?

³ Plante taem Jisas i askem tingting blong ol disaepol blong hem. (Matiu 16:13-15) Yu save folem eksampol blong hem. Taem yu stap storian wetem pikinini blong yu, no yutufala i stap mekem wan samting, i gud yu askem hem blong i talemaot ol tingting blong hem. ?Olsem wanem? ?Samtaem oli no sua long wan samting? Wan yangfala brata blong Ostrelia we i gat 15 yia i talem se: “Plante taem papa i askem tingting blong mi long samting we mi bilif long hem. Mo hem i givhan long mi blong mi tingting dip. Hem i askem se: ‘?Baebol i talem wanem? ?Yu bilivim samting we hem i talem? ?From wanem yu bilivim?’ Hem i wantem se mi ansa long prapa toktok blong mi, be mi no ripitim toktok blong hem no blong mama. Taem mi kam bigwan, mi mas eksplenem gud ol ansa blong mi.”

4. ?From wanem yu no mas ting nating long kwestin blong pikinini blong yu? Yu talem wan eksampol.

⁴ Yu mas gat longfala tingting, nating se pikinini blong yu i no bilif kwiktaem long samting we Baebol i talem. I gud yu givhan long hem blong faenem ansa blong ol kwestin blong hem. Wan papa i talem se: “Yu no mas ting nating long kwestin blong pikinini blong yu, nating sipos hem i askem wan kwestin we i mekem yu sem.” Blong talem stret, i gud we pikinini blong yu i askem ol kwestin, from we hemia i min se hem i wantem kasem save wan samting. Jisas tu i askem ol kwestin taem hem i yangfala. (Ridim Luk 2:46.) Wan yangfala long Denmak i talem se: “Taem mi askem long papa mo mama blong mi, sipos mifala i stap long trufala skul, tufala i no kros, nating se tufala i wari long mi. Tufala i yusum Baebol blong ansa long olgeta kwestin blong mi.”

5. ?Ol papa mo mama oli mas mekem wanem nating se pikinini i go prij mo i go long miting?

⁵ Yu mas savegud pikinini blong yu. Yu no mas ting se hem i bilif long Jehova from we hem i go prij mo i go long miting. ?Wanem tingting we hem gat long Jehova, mo long Baebol? I gud yu traem faenemaot sam samting we i mekem se i no isi blong hem i obei long Jehova. Yu tokbaot Jehova long hem evridei taem yutufala i stap mekem samting tugeta. Yu prea from pikinini blong yu, taem yu stap wetem hem mo taem yu stap yu wan.

6. ?Olsem wanem ol papa mo mama oli save tijim gud pikinini blong olgeta?

⁶ Ol man oli glad blong lesin long Jisas from we hem i lavem Jehova mo hem i savegud Baebol. Mo tu, oli haremsave se hem i lavem olgeta, nao oli lesin gud long hem. (Luk 24:32; Jon 7:46) Long sem fasin, taem pikinini i luk se papa mo mama tufala i lavem Jehova, hemia i givhan long hem tu blong i lavem Jehova. (Ridim Dutronome 6:5-8; Luk 6:45.) Taswe, i gud yu gohed blong stadi gud long Baebol mo ridim ol buk blong yumi oltaem. Yu traem savegud ol samting we Jehova i wokem. (Matiu 6:26, 28) Taem yu savegud Jehova, bambae yu save tijim gud pikinini blong yu.​—Luk 6:40.

7, 8. ?Yu save mekem wanem taem yu kasem save wan samting long saed blong Jehova? ?Sam papa mo mama oli mekem wanem?

⁷ Taem yu kasem save wan samting long saed blong Jehova, i gud yu tokbaot long pikinini blong yu. Yu mekem olsem enitaem, i no long taem we yufala i rerem ol miting nomo, no long famle wosip. Hemia nao samting we wan papa mo mama long Yunaeted Stet i mekem. Tufala i tokbaot Jehova long ol pikinini blong tufala, taem oli luk wan naesfala samting no taem oli kakae wan naesfala kakae. Tufala i se: “Mitufala i mekem ol pikinini oli tingbaot lav we Jehova i soemaot mo ol gudfala samting we hem i stap givim long yumi.” Wan papa mo mama long Saot Afrika i laekem blong tokbaot long ol pikinini blong tufala, ol samting we Jehova i wokem. Taem oli stap wok long garen, maet oli tokbaot olsem wanem wan sid i kam wan tri. Tufala i talem se: “Mitufala i wantem se tufala gel blong mitufala i tinghae long laef mo ol nambawan samting we Jehova i wokem.”

⁸ Wan papa long Ostrelia i tekem boe blong hem we i gat samwe long ten yia, i go long wan musium. Papa ya i wantem tekem janis ya blong mekem bilif blong boe blong hem i strong mo blong pruvum se Jehova nao i Wokem olgeta samting. Hem i talem se: “Mitufala i luk sam anamol blong solwota we oli kolem ammonoids mo trilobites, we oli laef bifo. Mitufala i sapraes blong luk se ol anamol ya oli naes tumas, mo oli gat evri samting finis olsem ol anamol blong tede. Taswe, sipos i tru we laef i stat long wan smol samting mo i stap kamgud moa kasem tede, ?from wanem ol anamol ya blong bifo oli sem mak olsem ol anamol blong tede? Hemia wan samting we mi glad tumas blong save mo mi tokbaot long boe blong mi.”

9. ?From wanem i gud blong yusum ol pijatok? ?Wanem wan pijatok we wan mama i yusum?

⁹ Plante taem Jisas i yusum ol pijatok. Hem i talem wan stori no i givim wan eksampol, blong tokbaot wan samting we i impoten. (Matiu 13:34, 35) Taem yu talem wan pijatok, i gud yu letem pikinini i yusum tingting blong hem. Hemia bambae i givhan long hem blong i tingting gud long samting we yu wantem tijim  long hem, blong i kasem save klia, mo i no fogetem. Mo tu, bambae pikinini i glad moa blong lanem samting. Wan mama long Japan i wantem tijim tufala boe blong hem se, Jehova i tingbaot yumi taem hem i wokem wol ya. Wan long tufala i gat eit yia mo narawan i gat ten yia. Taswe, hem i yusum wan pijatok we i isi blong tufala i kasemsave. Hem i givim melek, suga, mo kofe long tufala, mo i talem long tufala blong mekem wan kofe blong hem. Hem i talem se: “Tufala i lukaotgud blong no spolem kofe ya. Taem mi askem long tufala from wanem tufala i mekem olsem, tufala i talem se tufala i wantem se mi laekem kofe ya. Ale mi eksplenem se, long sem fasin taem God i miksimap ol gas long wol ya, hem i lukaotgud, from we hem i wantem mekem yumi harem gud.” Tufala boe i glad tumas blong lanem samting ya, mo tufala i neva fogetem.

10, 11. (1) ?Wanem pijatok we yu save yusum blong pruvum se i gat wan man we i Wokem olgeta samting? (Yu luk pija long stat blong stadi.) (2) ?Wanem ol pijatok we yu yu yusum?

¹⁰ ?Wanem pijatok we yu save yusum blong soemaot long pikinini se i mas gat wan man we i Wokem olgeta samting? Maet yu wetem pikinini blong yu i save folem wan resepi blong kukum wan kek. Yu eksplenem from wanem i impoten blong folemgud resepi ya. Biaen yu givim wan apol no wan narafala frut long pikinini blong yu, mo yu askem se: “?Yu save se i gat wan resepi blong apol ya?” Afta, yu katem apol ya long medel mo yu givim wan sid blong apol ya long hem. Yu eksplenem se, sid ya i olsem wan resepi. Insaed long hem i gat ol save we oli eksplenem olsem wanem blong mekem wan apol. Be hemia i had moa i bitim lis blong mekem wan kek. Yu save talem se: “I gat wan man we i raetem resepi blong wan kek. Taswe, ?hu i raetem resepi blong wan apol?” Sipos pikinini blong yu i bigwan lelebet, yu save eksplenem se ol save blong mekem wan tri blong apol i stap long DNA long sid blong apol. Mo tu, maet yu save soem ol pija mo ol eksampol we oli stap long pej 10 kasem 20, long buklet ya The Origin of Life​—Five Questions Worth Asking.

¹¹ Plante papa mo mama oli yusum haf ya, “?I Gat Wan Man We i Wokem Samting Ya?” we i kamaot long Wekap, blong storian wetem ol pikinini blong olgeta. Sipos pikinini i smol nomo, papa mo mama i save eksplenem ol save ya long fasin we i isi. Wan papa mo mama long Denmak, i tokbaot wan plen mo wan  pijin. Tufala i se: “Ol plen oli olsem ol pijin nomo. Be, ?yu ting se ol plen oli save gat eg mo bonem ol smol plen? ?Yu ting se ol pijin oli nidim wan epot? ?Yu laekem noes blong plen no blong pijin? Taswe, yu ting se hu i waes moa, ?man we i mekem plen no man we Mekem ol pijin?” Taem yu askem ol kwestin blong mekem pikinini i tingting, yu stap givhan long hem blong i yusum tingting blong hem mo mekem bilif blong hem i strong long Jehova.​—Ol Proveb 2:10-12.

12. ?Olsem wanem yu save yusum ol pijatok blong soemaot se Baebol i kamaot long Jehova?

¹² Yu save yusum ol pijatok blong givhan long pikinini blong i save se samting we Baebol i talem i tru. Maet yu save ridim Job 26:7. (Ridim.) Yu no talem nomo long pikinini se save ya i kamaot long Jehova. Be yu givhan long hem blong i yusum tingting blong hem. Yu save talem se ol man long taem blong Job oli no bilif se wol i hang nomo long open ples. Oli save se wan samting olsem balong no ston i no save hang olsem nomo. Long taem ya, i no gat man i save pruvum yet se wol i stap hang long open ples, from we i no gat ol spesel masin blong lukluk i go antap long spes. Yumi lanem se, nating we oli raetem Baebol longtaem finis, be oltaem hem i tok tru from we hem i kamaot long Jehova.​—Nehemaea 9:6.

13, 14. ?Olsem wanem papa mo mama i save tijim pikinini blong i obei long samting we Baebol i talem?

¹³ I impoten tu blong tijim pikinini se sipos hem i obei long samting we Baebol i talem, bambae hem i glad. (Ridim Ol Sam 1:1-3.) Yu talem long pikinini se sipos hem i go stap long wan aelan. Hem i mas jusum sam man blong oli stap wetem hem. Yu askem se, “sipos yu wantem se evriwan oli joen gud, ?bambae yu jusum wanem kaen man?” Biaen, yu ridim Galesia 5:19-23 blong luk wanem kaen man we Jehova i wantem se oli laef long niufala wol.

¹⁴ Long rod ya bambae yu tijim pikinini long tu impoten samting. Faswan se, Jehova i tijim yumi olsem wanem blong gat wan gudfala laef naoia mo blong joen gud wetem ol narafala. Sekenwan se, hem i tijim yumi olsem wanem blong laef long niufala wol. (Aesea 54:13; Jon 17:3) Mo tu, yu save soem long hem olsem wanem Baebol i givhan long ol brata mo sista. Yu save yusum wan laef stori long ol buk blong yumi, maet long haf ya “Baebol i Jenisim Laef Blong Man,” we i stap kamaot long Wajtaoa. Sipos no, yu save askem wan long kongregesen blong yu blong tokbaot, olsem wanem Baebol i givhan long hem blong mekem samting we Jehova i wantem.​—Hibrus 4:12.

15. ?Wanem bambae i givhan long yu blong tijim pikinini blong yu?

¹⁵ Yu mas tingting gud long ol samting we yu wantem tijim long pikinini blong yu, blong mekem hem i glad blong lanem samting. Yu traem tingbaot ol defren rod we yu save yusum blong givhan long hem, blong i save Jehova mo i kam klosap long hem. Mo yu mas gohed blong mekem olsem taem hem i stap kam bigwan. Wan papa i talem se: “Yu no mas kam taed blong fanemaot ol niufala rod blong tokbaot ol samting we yu tokbaot finis wetem pikinini.”

16. ?From wanem i impoten blong gat longfala tingting taem yu tijim pikinini? ?Olsem wanem sam papa mo mama oli soemaot fasin ya?

¹⁶ Tabu spirit i save givhan long pikinini blong i gat strong bilif. (Galesia 5:22, 23) Be bambae i tekem taem blong bilif blong pikinini i kam strong. Taswe, yu mas gat longfala tingting mo yu gohed blong tijim pikinini blong yu. Wan papa long Japan we i gat wan gel mo wan boe, i talem se: “Mi mo waef blong mi, mitufala i toktok wetem ol pikinini evridei. Stat taem tufala i smol, mi stadi wetem tufala blong 15 minit evridei, be mifala i no stadi long dei we i gat miting. Mifala i harem se 15 minit i no longwan tumas.” Wan eria elda i talem se: “Taem mi yangfala, mi gat plante kwestin mo tingting blong mi i fasfas mo i had blong mi tokbaot. Taem ol yia oli pas, mi kasem ol ansa blong kwestin ya long ol miting, long taem blong famle wosip, mo long taem we mi stadi mi wan. Taswe, i impoten blong ol papa mo mama oli gohed blong tijim pikinini blong olgeta.”

17. ?From wanem i impoten blong ol papa mo mama oli mekem bilif blong olgeta i strong? ?Olsem wanem wan papa mo mama i givhan long gel blong tufala?

¹⁷ I tru, pikinini i save lanem plante samting taem hem i luk se yu bilif strong long Jehova. Hem i stap lukluk ol samting we yu mekem. Taswe, yu mas gohed blong mekem bilif blong yu i kam strong moa. I gud yu mekem se pikinini i luksave se yu yu trastem Jehova fulwan. Taem wan papa mo mama long Bemuda tufala i wari long sam samting, tufala i prea wetem ol pikinini, mo askem Jehova blong i lidim olgeta. Mo tu, tufala i leftemap tingting blong ol pikinini blong oli prea olgeta nomo. Tufala i talem long bigfala gel blong tufala se: “‘Yu mas trastem Jehova fulwan, mo yu bisi long wok blong prij, mo yu no wari tumas.’ Taem hem i luk ol blesing we mifala i kasem, hem i save se Jehova i stap givhan long mifala. Hemia i givhan long hem blong hem i bilif long God mo long Baebol.”

18. ?Oltaem ol papa mo mama oli mas tingbaot wanem?

¹⁸ Ol papa mo mama, oltaem yufala i mas tingbaot se yufala i no save fosem pikinini blong i bilif. Yufala i planem mo yufala i wotarem, be Jehova nomo i mekem i gru. (1 Korin 3:6) Taswe, yufala i mas wok had blong tijim gud pikinini blong yufala long saed blong Jehova mo yufala i prea blong tabu spirit i halpem pikinini blong i gat bilif. Mo bambae Jehova i blesem ol had wok blong yufala.​—Efesas 6:4.