1, 2. ?Samtaem maet ol yangfala Kristin oli save tingbaot wanem? ?Baebol i givim wanem advaes?

WAN studen i jikim wan yangfala sista long Briten se: “Yu yu gat save, be yu no waes from yu bilif long God.” Wan brata long Jemani i raetem se: “Long tingting blong ol tija blong mi, stori blong Baebol we i tokbaot taem ya we God i wokem olgeta samting, hem i wan kastom stori nomo. Mo oli sapotem ol studen blong oli bilif long evolusen.” Wan yangfala sista long Franis i talem se: “Ol tija long skul blong mi oli sapraes se i gat sam studen we oli bilif yet long Baebol.”

² Plante man tede oli no bilif se God i mekem yumi. Sipos yu yu wan yangfala Kristin we yu mekem wok blong Jehova no yu stap stadi, maet samtaem yu stap tingbaot olsem wanem blong pruvum se God nao i wokem olgeta samting. Baebol i givhan long yumi blong tingting gud long ol samting we yumi harem no ridim, mo blong yumi traem kasemsave long hem. Baebol i talem se: “Fasin ya we yu luksave ol samting mo we yu savegud ol mining blong hem, hem bambae i stap lukaot long yu.” ?Olsem wanem fasin ya i save lukaotgud long yu? Taem yu savegud  mining blong ol samting, hemia bambae i givhan long yu blong blokem ol giaman tingting mo i mekem bilif blong yu i strong moa.​—Ridim Ol Proveb 2:10-12.

3. ?Bambae yumi tokbaot wanem long stadi ya?

³ Sipos yumi wantem se bilif blong yumi i strong, yumi mas savegud Jehova. (1 Timoti 2:4) Taswe, taem yu stadi long Baebol mo ol buk blong yumi, i impoten blong stop smol mo tingting dip long ol samting we yu stap ridim. Yu traem kasemsave long samting we yu stap ridim. (Matiu 13:23) Sipos yu folem fasin ya blong stadi, bambae yu faenem ol pruf we oli soemaot se Jehova i Man ya we i wokem olgeta samting mo Baebol i kamaot long hem. (Hibrus 11:1) I gud yumi tokbaot olsem wanem yumi save mekem olsem.

4. ?Wan man we i bilif long evolusen i sem mak olsem wanem long wan man we i bilif long God? ?Yumi evriwan i mas mekem wanem?

⁴ Maet samfala oli talem long yu se: “Mi mi bilif long evolusen, from we ol saentis oli talem se hem i tru. Be, ?olsem wanem yu yu save bilif long God ya we i no gat wan man i luk hem samtaem?” Plante man oli gat tingting olsem. I tru, i no gat man i luk God no i wajem hem taem hem i stap wokem ol samting. (Jon 1:18) Be, ?olsem wanem long ol man we oli bilif long evolusen? Olgeta tu oli stap bilif long wan samting we oli no luk. I no gat wan saentis no wan narafala man we i luk olsem wanem wan laef samting i jenis i kam wan narafala samting. Eksampol, i no gat wan man we i wajem wan mangki i jenis i kam wan man. (Job 38:1, 4) Taswe, yumi evriwan i mas lukaot ol pruf, tingting gud long hem, mo tingbaot mining blong hem. Plante man oli lukluk ol samting we oli stap raonabaot long olgeta mo oli “faenemaot” se i gat wan God. Oli luk “klia” nomo se hem i mekem ol samting ya, hem i gat bigfala paoa mo hem i gat plante gudfala fasin.​—Rom 1:20.

5. ?Wanem ol tul we oli save givhan long yumi blong lanem moa long saed blong ol samting we God i wokem?

⁵ Taem yumi luk ol samting raonabaot long yumi mo yumi tingting dip long olgeta, yumi luk we oli naes tumas. Baebol i  talem se taem ‘yumi stap bilif strong, yumi luksave’ se i gat wan Man we i wokem olgeta samting, nating se yumi no luk hem. Mo yumi luksave se hem i gat ol gudfala fasin mo i waes we i waes. (Hibrus 11:3, 27) Taem yumi ridim ol samting we ol saentis oli faenemaot, yumi lanem moa long ol samting we God i wokem. Sam long ol save ya i stap long video ya, The Wonders of Creation Reveal God’s Glory, long tufala buklet ya, Was Life Created? mo The Origin of Life—Five Questions Worth Asking, mo buk ya Is There a Creator Who Cares About You? Plante taem long Wekap!, i gat wan haf we oli askem kwestin long ol saentis mo ol narafala man blong oli eksplenem from wanem naoia oli bilif long God. Mo wan narafala haf hemia “?I Gat Wan Man We i Wokem Samting Ya?” we i tokbaot ol anamol, ol narafala samting raonabaot long yumi, mo tu olsem wanem ol saentis oli traem blong kopi fasin blong ol samting ya.

6. ?Olsem wanem ol tul we yumi gat oli save givhan long yu?

⁶ Wan brata long Yunaeted Stet we i gat 19 yia, i tokbaot tufala buklet ya we yumi jes tokbaot se: “Tufala buklet ya i givhan bigwan long mi. Mi stadi long tufala plante taem.” Wan sista long Franis i raetem se: “Mi sapraes tumas taem mi ridim ol haf ya ‘?I Gat Wan Man We i Wokem Samting Ya?’ Ol haf ya oli soemaot ol samting we ol saentis oli luk raonabaot long yumi mo oli traem blong wokem wan samting we i sem mak olsem, be oli neva mekem i sem mak.” Papa mo mama blong wan gel long Saot Afrika we i gat 15 yia, tufala i talem se: “Fas samting we gel blong mitufala i ridim long Wekap! hemia haf ya we oli stap askem kwestin long ol saentis.” Ol buk ya oli save givhan long yu tu blong luk ol pruf we i soemaot se i gat wan Man we i wokem olgeta samting, mo bambae yu naf blong luksave mo blokem ol giaman tijing. Bambae bilif blong yu i kam strong moa olsem wan tri we rus blong hem i holemtaet graon, nao taem strong win i blu, be tri ya i stanap strong nomo.​—Jeremaea 17:5-8.

7. ?From wanem God i wantem se yu traem olgeta samting fastaem?

⁷ ‘?From wanem mi bilif long samting we Baebol i talem?’ ?Yu ting se i rong blong askem wan kwestin olsem? Nogat. Jehova i no wantem se yu bilif long wan samting nomo, from we ol narafala oli bilif olsem. Hem i wantem se yu “traem olgeta samting fastaem,” blong faenemaot ol pruf we i soemaot se Baebol i kamaot long God mo blong yu savegud Baebol. Bambae bilif blong yu i kam strong moa taem yu savegud samting we hem i talem. (Ridim 1 Tesalonaeka 5:21; 1 Timoti 2:4.) Wan rod blong savegud Baebol hemia blong stadi long wan topik we yu wantem save moa long hem.

8, 9. (1) ?Wanem sam samting we samfala oli laekem blong stadi long hem? (2) ?Wanem sam gudfala samting we man i kasem taem i tingting dip?

⁸ Samfala oli laekem blong stadi long ol profet tok blong Baebol. No maet oli laekem blong skelem ol stori blong Baebol wetem samting we ol man blong histri, ol saentis, mo ol man blong digim graon oli talem. Yu traem tingbaot profet tok ya long Jenesis 3:15. Jehova i talemaot impoten profet tok ya, afta we Adam mo Iv i agensem hem mo hae rul blong hem. Hemia faswan profet tok we i givhan long yumi blong kasemsave olsem wanem Kingdom blong God bambae i soemaot se fasin blong God blong rul i nambawan, mo bambae hem i mekem se ol man oli no moa harem nogud.  ?Olsem wanem yu save stadi long Jenesis 3:15? Yu mekem wan lis blong ol vas we oli tokbaot olsem wanem profet tok ya bambae i kamtru. Biaen, yu traem faenemaot wetaem oli raetem ol vas ya mo yu putum long oda folem ol yia we oli raetem. Nao bambae yu luksave se ol man we oli raetem Baebol oli laef long ol defdefren taem, be wanwan long olgeta i raetem ol samting we i joen blong mekem profet tok ya i kam klia moa. Hemia i save givhan long yu blong kasemsave se tabu spirit blong Jehova i stap lidim olgeta.​—2 Pita 1:21.

⁹ Wan brata long Jemani i talem se: “Ol wanwan buk long Baebol oli tokbaot Kingdom, nating se samwe long 40 man oli raetem Baebol. Mo plante long olgeta oli laef long defdefren taem mo oli no save olgeta.” Wan sista long Ostrelia i stap stadi long wan haf blong Wajtaoa mo i lanem olsem wanem Lafet blong Pasova i joen wetem Jenesis 3:15 mo Mesaea. ^[1] (Yu luk ol not, pej 25.) Hem i raetem se: “Stadi ya i mekem mi kasem save se Jehova i gud tumas. Taem mi luk olsem wanem wan man i stanemap wan plan blong ol man Isrel oli folem mo blong i kamtru long Jisas, hemia i mekem mi harem gud. Mi stop smoltaem mo tingbaot olsem wanem Lafet blong Pasova i nambawan tumas.” ?From wanem sista ya i harem olsem? Hem i tingting dip long samting we i ridim mo i kasem save long hem. Hemia i mekem bilif blong hem i kam strong moa mo i kam klosap moa long Jehova.​—Matiu 13:23.

10. ?Olsem wanem ol man blong raetem Baebol oli mekem yumi bilif strong long Baebol?

¹⁰ I gud yumi tingbaot se, ol man we oli raetem Baebol oli no giaman. Oltaem oli tok tru mo oli no fraet. Plante man blong raetem ol buk bifo, oli tokbaot nomo ol gudfala samting long saed blong kantri mo ol lida blong olgeta. Be ol profet blong Jehova oli no raetem nomo ol gudfala samting, be oli raetem tu ol nogud samting we ol man Isrel mo ol king blong olgeta oli mekem. (2 Kronikel 16:9, 10; 24:18-22) Mo tu, oli tokbaot ol mastik blong olgeta mo blong ol narafala man blong God. (2 Samuel 12:1-14; Mak 14:50) Wan yangfala brata long Briten i talem se: “I no plante man we oli stap tok tru olsem. Hemia i mekem tingting blong yumi i strong se Baebol i kamaot long Jehova.”

11. ?Olsem wanem ol advaes blong Baebol oli mekem yumi sua se Baebol i kamaot long God?

¹¹ Taem ol man oli letem ol advaes blong Baebol i lidim olgeta, bambae oli harem gud long laef blong olgeta. Hemia i mekem olgeta oli sua se Baebol i kamaot long God. (Ridim Ol Sam 19:7-11.) Wan yangfala sista long Japan i talem se: “Taem famle blong mi i folem ol advaes we Baebol i talem, mifala i hapi, mifala i gat pis, mifala i joen gud mo mifala i lavlavem mifala.” Baebol i givhan long plante man blong oli luksave se sam samting we oli bilif long hem oli no tru. (Ol Sam 115:3-8) Baebol i lidim ol man blong oli trastem Jehova, God ya we i gat olgeta paoa, mo tu hem i tokbaot wan gudfala fiuja. Be sam man oli talem se i no gat God, nao oli mekem ol samting we i stap raonabaot long olgeta i kam god blong olgeta. Sam narafala oli talem se ol man oli save mekem we yumi gat wan gudfala fiuja, be taem yumi luk ol samting we oli mekem finis, yumi luksave se oli no naf blong finisim ol trabol long wol ya.​—Ol Sam 146:3, 4.

12, 13. ?Olsem wanem yumi save tokbaot Baebol mo ol samting we God i wokem wetem ol narafala?

¹² Taem yu tokbaot Baebol no ol samting we God i wokem wetem ol narafala,  fastaem yu mas faenemaot samting we olgeta oli bilif long hem. I gud yu tingbaot se sam man we oli bilif long evolusen, oli bilif tu long God. Oli talem se God i yusum evolusen blong wokem olgeta laef samting. Samfala oli bilif se long evolusen, from we oli lanem long skul. Mo sam narafala oli no moa bilif long God from we oli no glad long ol jos. Taswe, fastaem yu askem long man se hem i bilif long wanem mo from wanem hem i bilif olsem. Biaen, yu lesin gud long samting we hem i talem. Sipos yu mekem olsem, maet bambae hem i glad moa blong lesin long yu.​—Taetas 3:2.

¹³ Sipos wan man i talem long yu se, i krangke nomo blong yu bilif se i gat wan Man we i wokem olgeta samting, ?bambae yu yu ansa olsem wanem? I gud yu askem hem wetem respek, blong i eksplenem olsem wanem laef i stat. Yu save talem se, sipos evolusen i tru, hemia i min se faswan samting we i laef, i mas naf blong mekem ol pikinini we oli sem mak olsem hem. Wan man blong hae save i talem se wan laef samting olsem i nidim ol samting olsem: (1) wan samting olsem skin blong protektem hem, (2) hem i naf blong kasem paoa mo yusum, (3) ol save we bodi i nidim blong i gru mo i luk naes mo (4) hem i naf blong yusum save ya bakegen mo bakegen. Hem i gohed se: “Nating se wan smol laef samting we i luk olsem se i isi nomo blong mekem, be i gat plante samting we i hapen blong mekem hem i laef, taswe yumi no naf blong eksplenem.”

14. ?Olsem wanem yu save pulum tingting blong man blong i bilif?

¹⁴ Taem yu stap tokbaot ol samting we God i wokem, i gud yu talem wan samting blong mekem man i tingting. Hemia nao samting we aposol Pol i mekem, hem i se: “Evri haos i gat man we i wokem, be God i wokem olgeta samting we i stap.” (Hibrus 3:4) I tru, blong wan haos i stanap, wan man i mas droem plan blong hem mo i mas bildim. Blong talem stret, ol laef samting oli had moa blong kasemsave long olgeta i bitim wan haos, taswe i stret nomo we i mas gat wan man we i mekem plan blong olgeta mo i wokem olgeta. Mo tu, yu save yusum ol buk blong yumi. Wan sista i toktok wetem wan man we i no bilif long God. Hem i givim tufala buklet we yumi tokbaot finis, mo wan wik biaen, man ya i talem se: “Naoia mi bilif long God.” Man ya i stadi mo biaen i kam wan brata.

15, 16. Bifo we yumi eksplenem se Baebol i kamaot long God, ?yumi mas mekem wanem? ?Mo oltaem yumi mas tingbaot wanem?

¹⁵ ?Olsem wanem blong givhan long man we i gat tu tingting long saed blong Baebol? Olsem we yumi tokbaot finis, fastaem yu askem se hem i bilif long wanem. Mo tu, yu faenemaot topik we hem i laekem. (Ol Proveb 18:13) Sipos hem i laekem saens, i gud yu talem sam eksampol long Baebol we i soemaot se oltaem Baebol i tok tru long saed blong saens. Sipos hem i laekem histri, yu save tokbaot wan stori we ol buk blong histri oli tokbaot mo yu soemaot olsem wanem Baebol i tokbaot stori ya longtaem finis. Samfala maet oli lesin long yu  sipos yu soem ol advaes we Baebol i talem blong givhan long olgeta, olsem ol advaes we Jisas i talem long Bigfala Toktok blong hem antap long Hil.

¹⁶ Yumi mas tingbaot se yumi no wantem rao wetem ol man. Yumi wantem se oli glad blong storian wetem yumi mo lanem samting long Baebol. Taswe taem yu askem kwestin, yu mas soemaot respek mo biaen yu lesin gud long hem. Yu mas soemaot ol gudfala fasin taem yu stap talemaot bilif blong yu, speseli long man we i olfala moa long yu. Sipos yu respektem ol narafala, bambae olgeta tu oli respektem yu. Mo bambae oli glad from we yu tingting gud long ol samting we yu bilif long hem, nating se yu wan yangfala nomo. I tru, sipos wan man i wantem rao no i wantem jikim yu, i no nid blong yu givim ansa long hem.​—Ol Proveb 26:4.

17, 18. (1) ?Wanem i save givhan long yu blong bilif strong long Baebol? (2) ?Long nekis stadi bambae yumi tokbaot wanem?

¹⁷ Maet yumi save ol stamba tijing blong Baebol, be yumi nidim moa save blong mekem bilif yumi i strong. Yumi mas lukaotem mo faenemaot ol dip trutok long Baebol, olsem we yumi stap lukaotem ol sas ston we man i berem. (Ol Proveb 2:3-6) Wan nambawan rod blong mekem bilif blong yu i strong moa, hemia blong ridim Baebol fulwan. Maet yu save traem blong ridim Baebol fulwan long wan yia. Hemia samting we i givhan long wan eria elda blong i kam klosap moa long Jehova taem hem i yangfala. Hem i talem se: “Wan samting we i givhan long mi blong luk Baebol se i Tok blong God, hemia taem mi ridim fulwan. Ol stori blong Baebol we mi lanem taem mi smol nomo oli kam klia moa long tingting blong mi.” Mo tu, yu save yusum ol tul we yu gat long lanwis blong yu, blong kasemsave moa long samting we yu ridim. Maet yu gat Watchtower Library long DVD, Wajtaoa LAEBRI LONG INTENET, Watch Tower Publications Index, no Buk Blong Mekem Risej.

¹⁸ Ol papa mo mama, yufala nao i mas tijim ol pikinini blong yufala blong oli save Jehova. Taswe, ?olsem wanem blong givhan long olgeta blong oli gat strong bilif? Long nekis stadi bambae yumi tokbaot sam samting we yufala i save mekem blong givhan long olgeta.