1, 2. (1) ?Wanem ol trabol we plante man oli kasem? ?Wanem i kamaot from? (2) ?Olsem wanem Aesea 41:10, 13 i leftemap tingting blong yumi?

WAN sista we i mekem wok blong fultaem paenia mo hasban blong hem i wan elda, i talem se: “Nating se mi traehad blong gat wan gudfala program blong stadi, be blong plante yia mi kasem plante samting we oli mekem mi mi wari. Mi no save slip gud, mi sik, mi no fren gud wetem ol narafala mo samtaem mi harem se mi wantem lego evri samting nomo.”

² Ating samtaem yumi tu yumi gat sem filing olsem sista ya. Sore tumas, yumi stap kasem plante trabol from we yumi laef long rabis wol blong Setan. Ol wari blong yumi oli bigwan mo oli mekem se yumi no moa wantem gohed. Hemia i olsem wan angka we i mekem se bot i no save muv. (Ol Proveb 12:25) ?Wanem i mekem se yu wari? Maet yu harem nogud from wan famle we i ded, no yu gat wan strong sik, no wan man i mekem i nogud long yu. No maet i had blong kasem mane blong lukaot long famle blong yu. Ol samting ya oli save mekem se sloslo, yu no moa gat paoa blong gohed mo tu yu no moa glad. Be, yu save gat strong tingting se God  i rere blong givhan long yu.​—Ridim Aesea 41:10, 13.

3, 4. (1) ?Baebol i yusum tok ya “han” blong minim wanem? (2) ?Wanem i save mekem se han blong yumi i slak?

³ Plante taem Baebol i yusum ol haf blong bodi blong tokbaot ol defdefren fasin mo ol samting we man i mekem. Eksampol, tok ya han i kamaot plante taem long Baebol. Taem Baebol i yusum tok ya mekem han i strong, hem i save minim wan man we narafala i leftemap tingting blong hem, i mekem hem i strong mo hem i rere blong mekem samting. (1 Samuel 23:16; Esra 1:6) Mo tu, hem i save minim man we i gat stret tingting mo i gat hop.

⁴ Samtaem, Baebol i yusum tok ya letem han i slak, blong minim wan man we tingting blong hem i foldaon mo hem i no gat hop. (2 Kronikel 15:7; Hibrus 12:12) Taem yu harem nogud, yu taed, mo yu harem se yu no moa fren gud wetem Jehova, maet yu harem se i moa gud we yu lego evri samting. ?Hu i save leftemap tingting blong yu? ?Wanem i save givhan long yu blong yu glad mo stanap strong?

5. (1) ?Yumi save harem olsem wanem taem yumi kasem trabol? ?Be yumi mas tingbaot wanem? (2) ?Bambae yumi tokbaot wanem?

⁵ Ridim Sefanaea 3:16, 17. Taem yumi kasem trabol, yumi save fraet mo tingting blong yumi i save foldaon, be yumi no mas letem samting ya i hapen. Jehova we i Papa blong yumi, i wantem se yumi putum ol trabol blong yumi long han blong hem. (1 Pita 5:7) Jehova i lukaotgud long yumi olsem we hem i mekem long neson blong Isrel. Hem i talem long olgeta se: “I nogud yufala i stap ting se Hae God i no gat paoa, mo hem i no save sevem yufala.” Oltaem hem i rere blong sevem ol man blong hem. (Aesea 59:1) Long stadi ya, bambae yumi tokbaot tri eksampol long Baebol, we oli soemaot se Jehova i wantem, mo i save givim paoa long ol man blong hem nating se oli kasem trabol. I gud yumi luk olsem wanem ol eksampol ya oli save givhan long yumi.

6, 7. ?Faet blong ol laen blong Amalek wetem ol man Isrel i tijim yumi long wanem?

⁶ Smol taem afta we ol man Isrel oli kam fri long Ijip, ol laen blong Amalek oli kam mekem faet wetem olgeta. Josua i wan man we i no fraet, taswe Moses i talem long hem blong i lidim ol man Isrel long faet ya. Nao Moses i tekem Eron mo Huru, oli go antap long wan hil we i stap klosap. Long ples ya, trifala i save luk olgeta we oli stap faet. ?Trifala ya oli ronwe from we oli fraet? !Nogat!

⁷ Moses i folem wan plan we i givhan long ol man Isrel blong winim faet ya. Hem i holem wokingstik we God i talem long hem blong i holem mo i leftemap han blong hem. Taem Moses i mekem samting ya, Jehova i givim paoa long ol man Isrel blong oli win. Be taem han blong Moses i kam slak mo i stat blong godaon, ol man Amalek oli stat blong win. Eron mo Huru tufala i givhan long Moses kwiktaem. Baebol i talem se: “Tufala i karem wan ston i kam, nao Moses i sidaon long hem, mo tufala i stap stanap long saed blong hem, tufala i stap holem han blong hem antap blong i no muv. Tufala i stap holem olsem gogo kasem we san i godaon.” Ol man Isrel oli winim faet ya from we God i yusum paoa blong  hem blong givhan long olgeta.​—Eksodas 17:8-13.

8. (1) ?Asa i mekem wanem taem ol soldia blong Itiopia oli kam blong mekem faet long olgeta? (2) ?Olsem wanem yumi save folem fasin blong Asa?

⁸ Long taem blong King Asa, Jehova i rere blong yusum paoa blong hem blong givhan long ol man blong hem. I gat plante grup blong ol soldia we Baebol i tokbaot, be wan grup we i bigwan moa hemia grup blong Sera, wan man Itiopia. Hem i gat wan milian soldia we oli tren gud. Ol soldia blong hem oli plante moa long ol soldia blong King Asa. ?Olsem wanem? ?Asa i wari, i fraet, no tingting blong hem i foldaon? ?Hem i letem han blong hem i slak? !Nogat! Kwiktaem nomo Asa i askem long Jehova blong i givhan long hem. I luk olsem se Asa i no save winim faet ya. Be Baebol i talem se: “God i save mekem olgeta samting.” (Matiu 19:26) God i yusum bigfala paoa blong hem mo i ‘mekem Asa wetem ol soldia blong hem oli winim ol man Itiopia.’ Mo ‘oltaem long laef blong Asa, tingting blong hem i stap strong long Jehova.’​—2 Kronikel 14:8-13; 1 King 15:14.

9. (1) ?Wanem i save mekem tingting blong Nehemaea i foldaon mo i no moa bildim stonwol? (2) ?Olsem wanem God i ansa long prea blong hem?

⁹ ?Nehemaea i luk wanem taem hem i go long Jerusalem? Hem i luk we ol enemi oli stap spolem ol man Jiu, nao oli no moa gohed blong bildim stonwol blong Jerusalem. I no gat wan samting we i protektem olgeta mo tingting blong olgeta i foldaon. ?Olsem wanem long Nehemaea? ?Tingting blong hem tu i foldaon mo i letem han blong hem i slak? !Nogat! Oltaem Nehemaea i trastem Jehova olsem Moses, Asa, mo ol narafala man blong Jehova. Long taem ya tu, Nehemaea i prea blong Jehova i givhan long hem mo Jehova i ansa long hem. God i yusum ‘paoa blong hem mo strong han blong hem’ blong givhan long ol man Jiu. (Ridim Nehemaea 1:10; 2:17-20; 6:9.) ?Yu yu ting se tede Jehova i save yusum ‘paoa blong hem mo strong han blong hem’ blong givhan long ol man blong hem?

10, 11. (1) ?Olsem wanem Setan i traem blong mekem se han blong yumi i slak? (2) ?Jehova i yusum wanem blong givim paoa long yumi? (3) ?Wanem gudfala samting we yu yu kasem long ol tijing blong Jehova?

¹⁰ Yumi save se bambae Setan i neva letem han blong hem i slak. Bambae hem i gohed blong spolem yumi mo spolem ol wok we yumi mekem blong Jehova. Hem i yusum ol giaman toktok, ol gavman, ol lida blong skul, mo ol man blong apostasi. ?Wanem mak blong hem? Hem i wantem stopem yumi blong no talemaot gud nius blong Kingdom. Be Jehova i rere blong givhan long yumi mo i givim tabu spirit blong hem blong mekem  yumi strong. (1 Kronikel 29:12) I impoten tumas we yumi askem long God blong i givim tabu spirit blong yumi naf blong winim Setan. (Ol Sam 18:39; 1 Korin 10:13) Mo tu, yumi glad long ol advaes blong Jehova long Baebol. Yu traem tingbaot ol samting we yumi lanem long ol buk mo ol magasin blong yumi evri manis. Ol tok blong Sekaraea 8:9, 13 (ridim) i kamaot taem oli stap bildim bakegen haos tempol long Jerusalem. Mo ol tok ya oli save givhan yet long yumi tede.

¹¹ Jehova i yusum ol miting, ol asembli, mo ol skul we ogenaesesen blong hem i stanemap blong givim paoa long yumi. Ol tijing we yumi kasem oli givhan long yumi blong mekem wok blong Jehova wetem stret tingting, mo yumi gohed blong putum ol mak, mo blong lukaot gud long ol wok we Jehova i givim long yumi. (Ol Sam 119:32) ?Olsem wanem? ?Yu yu wantem tumas se ol tijing blong Jehova oli givhan long yu?

12. ?Yumi mas mekem wanem blong kasem paoa blong Jehova?

¹² Jehova i givhan long ol man blong hem blong oli winim ol man Amalek mo ol man Itiopia. Mo tu, hem i givim paoa long Nehemaea mo ol man Jiu blong oli finisim stonwol blong Jerusalem. Long sem fasin, bambae Jehova i givim paoa long yumi blong gohed blong prij nating se yumi wari, ol man oli agensem yumi, mo ol narafala oli no intres long yumi. (1 Pita 5:10) Jehova bambae i no mekem wan merikel blong tekemaot ol problem blong yumi. Be yumi mas mekem sam samting. ?Wanem ol samting ya? Yumi mas ridim Baebol evridei, yumi rerem mo go long ol miting oltaem, yumi gohed blong mekem prapa stadi blong yumi mo famle wosip, mo yumi prea oltaem long Jehova. Yumi neva mas letem wan samting i blokem yumi long ol samting we Jehova i givim blong mekem yumi kam strong mo leftemap tingting blong yumi. Sipos yu no moa gohed blong mekem ol samting ya, i gud yu askem long Jehova blong i givhan long yu. Nao bambae yu luk olsem wanem spirit blong God i ‘stap wok long laef blong yu, blong mekem yu glad blong obei long hem, mo blong givim paoa long yu blong wok.’ (Filipae 2:13) ?Olsem wanem? ?Yu save mekem ol narafala oli strong?

13, 14. (1) ?Olsem wanem wan brata i harem gud bakegen afta we woman blong hem i ded? (2) ?Olsem wanem yumi save givhan long narafala blong i kam strong?

¹³ Jehova i givim ol gudfala brata mo sista blong oli leftemap tingting blong yumi. Aposol Pol i talem se: “Sipos ni blong yufala i stap seksek, yufala i mas mekem i kam strong bakegen. Oltaem yufala i mas wokbaot long gudfala rod nomo.” (Hibrus 12:12, 13) Hemia nao samting we ol fas Kristin oli mekem long ol brata mo sista blong olgeta. Tede tu i sem mak. Yu traem tingbaot. Wan brata we waef blong hem i ded mo i kasem sam narafala trabol, i talem se: “Mi lanem se yumi no save jusum ol trabol we yumi kasem, no hamas taem yumi kasem. Be taem mi prea mo mi stadi mi wan, hemia i olsem wan laef jaket we mi werem blong mi no save draon. Mo ol samting we ol brata mo sista oli mekem blong givhan long mi, i leftemap tingting blong  mi. Mi luksave se i impoten blong fren gud wetem Jehova bifo we mi kasem trabol.”

¹⁴ Eron mo Huru i givhan long Moses blong holem han blong hem i stap antap, taem ol soldia blong ol man Isrel oli faet agensem ol laen blong Amalek. Tede tu, yumi save faenem sam rod blong givhan long ol narafala. Sam brata mo sista oli harem nogud from we oli olfala, oli sik, ol famle blong olgeta oli agensem olgeta, oli stap olgeta wan, no wan famle blong olgeta i ded. Mo tu, maet i gat sam yangfala we ol narafala oli traem pulum olgeta blong mekem samting we i no stret, no blong oli harem gud long wol ya. Be i gud yumi givhan long olgeta. (1 Tesalonaeka 3:1-3; 5:11, 14) I gud yu tingbaot sam rod blong soemaot se yu intres long ol narafala maet taem yu stap long Haos Kingdom, long wok blong prij, long haos blong narafala, mo taem yu toktok wetem olgeta long telefon.

15. ?Wanem i save kamaot taem yumi talem ol gudfala toktok long narafala?

¹⁵ Afta we Asa i winim ol soldia blong Itiopia, profet Asaria i leftemap tingting blong hem mo ol man blong hem i se: “Be yufala i mas stanap strong, we tingting blong yufala bambae i no foldaon. Ol wok ya we yufala i stap mekem, bambae yufala i kasem pei long hem.” (2 Kronikel 15:7) Tok ya i pulum Asa blong stanemap tru wosip bakegen. Long sem fasin, ol gudfala toktok i save leftemap tingting blong narafala mo givhan long  hem blong mekem wok blong Jehova. (Ol Proveb 15:23) Mo i gud yu tingbaot se taem yu givim ol gudfala ansa long miting, hemia i save leftemap tingting blong ol brata mo sista.

16. (1) ?Olsem wanem ol elda oli save folem eksampol blong Nehemaea? (2) ?Olsem wanem ol brata mo sista oli givhan long yu?

¹⁶ Jehova i givim paoa long Nehemaea mo ol man Jiu blong mekem olgeta oli strong. !Oli finisim stonwol blong Jerusalem long 52 dei nomo! (Nehemaea 2:18; 6:15, 16) Nehemaea i no stanap blong lukluk nomo, be hem i joen blong givhan long wok ya. (Nehemaea 5:16) Long sem fasin, plante elda oli givhan blong bildim no lukaot gud long ol Haos Kingdom. Mo tu, oli givhan long ol brata mo sista we oli wari, taem oli visitim olgeta mo prij wetem olgeta.​—Ridim Aesea 35:3, 4.

17, 18. ?Olsem wanem Jehova i save givhan long yu taem yu kasem trabol?

¹⁷ Taem yumi wok tugeta wetem ol brata mo sista, hemia i mekem yumi joen gud moa. Mo tu, hemia i givhan long yumi blong fren gud wetem ol narafala mo yumi trastem ol promes blong God we bambae oli kamtru i no longtaem. Taem yumi givhan long ol narafala blong oli stanap strong mo tingbaot gudfala hop long fiuja, hemia i olsem we yumi mekem han blong olgeta i strong. Mo tu, hemia i givhan long yumi, blong yumi gat paoa mo yumi putum tingting blong yumi long fiuja.

¹⁸ Taem yumi tingbaot olsem wanem Jehova i lukaotgud long ol man blong hem bifo, bambae bilif blong yumi i kam strong moa. Taswe, taem yu kasem ol trabol mo yu wari, yu ‘no letem han blong yu i slak.’ Sipos yu prea long Jehova, bambae hem i givim paoa long yu mo i lidim yu blong kasem ol blesing blong Kingdom long fiuja.​—Ol Sam 73:23, 24.