1, 2. (1) ?Wanem impoten wok we Solomon i kasem? (2) ?From wanem Deved i wari?

SOLOMON i kasem wan spesel wok. Jehova i jusum hem blong i lukaot long wok blong bildim haos tempol long Jerusalem. !Wok ya i moa impoten i bitim ol narafala wok long taem ya! Bambae tempol ya i “wan nambawan haos,” mo ol man bambae oli save haos ya we i flas tumas. Samting we i moa impoten, se hem i “haos blong Hae God.”—1 Kronikel 22:1, 5, 9-11.

² King Deved i save se God bambae i sapotem Solomon. Be Solomon i “wan yang man nomo, mo i no mekem wan bigfala wok olsem yet.” ?Bambae tingting blong Solomon i strong se hem i save mekem wok ya blong bildim haos tempol, no bambae hem i fraet from we hem i yang mo i neva mekem wan wok olsem bifo? Solomon i mas gat strong tingting mo wok had.

3. ?Plante samting we Deved i mekem i save tijim Solomon long wanem?

³ Plante samting we Deved i mekem i save tijim Solomon  blong i gat strong tingting. Taem Deved i yangfala nomo, hem i kilim ol wael anamol we oli kam blong kakae ol sipsip blong papa blong hem. (1 Samuel 17:34, 35) Mo hem i gat strong tingting taem hem i faet agensem bigfala dabolbun ya, Golaeat, we i wan strong man blong faet. God i givhan long Deved blong i kilim Golaeat i ded, wetem wan ston nomo we i raon gud.—1 Samuel 17:45, 49, 50.

4. ?From wanem Solomon i mas gat strong tingting?

⁴ Yumi kasem save from wanem Deved i stret man blong talem long Solomon se hem i mas gat strong tingting mo wok had blong bildim haos tempol. (Ridim 1 Kronikel 28:20.) Sipos Solomon i no gat strong tingting, bambae hem i fraet nao i no save mekem wan samting, ating i no save statem wok ya tu. Hemia i mowas i bitim we hem i statem wok ya be i no naf blong finisim.

5. ?From wanem yumi mas gat strong tingting?

⁵ Olsem Solomon, yumi nidim help blong Jehova, blong yumi save gat strong tingting mo mekem wok we hem i givim long yumi. Taswe, i gud yumi tokbaot sam man long taem bifo we oli gat strong tingting. Afta, yumi save tingbaot olsem wanem yumi tu yumi save soemaot strong tingting mo finisim wok we Jehova i givim long yumi.

6. ?From wanem yu sapraes long strong tingting blong Josef?

⁶ Josef i soemaot se hem i gat strong tingting taem woman blong Potifa i traem pulum hem blong slip wetem hem. Josef i save se sipos hem i no folem tingting blong woman ya, hem i save ded from. Nating se i olsem, hem i gat strong tingting, mo wantaem nomo, hem i talem ‘no.’—Jenesis 39:10, 12.

7. ?Olsem wanem Rehab i soemaot strong tingting? (Yu luk pija long stat blong stadi.)

⁷ Rehab tu i soemaot strong tingting, taem tufala spae blong Isrel i kam long haos blong hem long Jeriko. I isi blong hem i fraet, mo i talem long tufala se hem i no save givhan long tufala. Be hem i no mekem olsem. Hem i trastem Jehova, nao i haedem tufala, mo i givhan long tufala, blong tufala i save gobak sef. (Josua 2:4, 5, 9, 12-16) Rehab i bilif se Jehova i trufala God, mo se hem bambae i givim kantri ya long ol man Isrel. Hem i no letem fraet long man, no fraet long king blong Jeriko mo ol man blong hem, i holem hem, nao i no mekem wan samting. From we hem i soemaot strong tingting, hem i sevem hem wan mo ol famle blong hem.—Josua 6:22, 23.

8. ?Olsem wanem strong tingting blong Jisas i givhan long ol aposol?

⁸ Ol aposol blong Jisas tu oli gat strong tingting. Oli luk se Jisas i gat strong tingting, mo hemia i givhan long olgeta, blong oli mekem sem mak. (Matiu 8:28-32; Jon 2:13-17; 18:3-5) Taem ol Sadusi oli traem blong blokem ol aposol ya blong oli no moa tijim ol man long Jisas, oli no lesin long olgeta.—Ol Wok 5:17, 18, 27-29.

9. Folem 2 Timoti 1:7, ?wanem i mekem tingting i strong?

 ⁹ Josef, Rehab, Jisas, mo ol aposol, oli wantem tumas blong mekem samting we i stret. Oli gat strong tingting ya from we oli trastem Jehova, be i no from we oli trastem olgeta bakegen. Taem yumi nidim strong tingting, yumi tu yumi mas trastem Jehova, i no yumi. (Ridim 2 Timoti 1:7.) Bambae yumi tokbaot sam taem long laef blong yumi we yumi nidim strong tingting, long famle mo long kongregesen.

10. ?From wanem ol yangfala Kristin oli nidim strong tingting?

¹⁰ Plante taem ol yangfala Kristin oli nidim strong tingting, blong oli save gohed blong mekem wok blong Jehova. Oli save folem eksampol blong Solomon mo strong tingting we hem i gat, taem hem i mekem ol waes desisen blong finisim haos tempol. I tru, ol papa mo mama oli save lidim ol yangfala blong olgeta, mo oli mas mekem olsem. Be ol yangfala tu oli gat ol impoten desisen blong mekem. (Ol Proveb 27:11) Tingbaot ol desisen we oli mas mekem long saed blong ol fren mo pleplei, olsem wanem blong stap klin long ol fasin blong olgeta, mo wetaem blong baptaes. Oli nidim strong tingting, blong mekem ol waes desisen ya, mo blong agensem Setan, we i stap tok nogud long God.

11, 12. (1) ?Olsem wanem Moses i soemaot strong tingting? (2) ?Olsem wanem ol yangfala oli save folem eksampol blong Moses?

¹¹ Wan impoten desisen we ol yangfala oli mas mekem, se bambae oli mekem wanem long laef blong olgeta. Long sam kantri, ol man oli pulum ol yangfala blong oli go long yunivesiti, mo blong kasem wan wok we i givim bigfala pei. Long sam pua kantri, ol yangfala oli harem se oli mas faenem gudfala wok blong givhan long famle. Nating se ol man long kantri blong yu oli rij no oli pua, be yu save tingbaot eksampol blong Moses. From we gel blong Fero i lukaot long hem, hem i save gat tingting blong kam rijman mo gat haenem. !Traem tingbaot olsem wanem ol man Ijip, ol tija, mo ol advaesa blong hem oli pulum hem! Be Moses i gat strong tingting blong stap wetem ol man blong God. Ale, hem i aot long Ijip mo ol rij samting blong hem, mo i trastem Jehova fulwan. (Hibrus 11:24-26) From samting ya, Jehova i blesem hem bigwan, mo bambae hem i blesem hem moa long fiuja.

¹² Sipos ol yangfala oli gat strong tingting blong mekem wok blong Jehova mo putum Kingdom i stap long fasples long laef blong olgeta, bambae hem i blesem olgeta. Bambae hem i halpem olgeta blong oli kasem samting we famle i nidim. Long taem blong ol aposol, yangfala Timoti i putum tingting blong hem i stap strong long wok blong God, mo yu tu yu save mekem sem mak. *—Ridim Filipae 2:19-22.

13. ?Olsem wanem strong tingting i givhan long wan yangfala sista, blong hem i kam wan fultaem paenia?

¹³ Wan sista long Alabama, Amerika, i nidim strong tingting blong i save kam wan fultaem paenia. Hem i talem se: “Taem mi wan yangfala, mi sem we mi sem. I had blong mi mi talem halo long wan brata o sista long Haos Kingdom.  I had moa blong noknok long doa blong ol strenja.” Papa mo mama blong hem wetem samfala long kongregesen oli givhan long hem, nao hem i naf blong kam wan fultaem paenia. Hem i se: “Wol blong Setan i pulum yumi blong skul gud, kasem haenem, mane, mo plante sas samting.” Be hem i luksave se bighaf blong ol man oli no naf blong kasem ol samting ya, mo taem oli traehad blong kasem, oli wari tumas mo oli harem nogud. Hem i gohed se: “Wok blong Jehova i givim bigfala glad we ol narafala samting oli no save givim, mo mi harem gud blong mekem wok ya.”

14. ?Wetaem ol Kristin papa mo mama oli nidim strong tingting?

¹⁴ Ol Kristin papa mo mama tu oli nidim strong tingting. Tingbaot sipos bos blong yu i askem, blong yu yu wok ovataem long ol dei we yufala i mekem famle wosip, go prij, mo go long ol miting. Yu mas gat strong tingting blong yu save talem ‘no’ mo soemaot gudfala eksampol long ol pikinini blong yu. Mo tu, maet sam papa mo mama long kongregesen oli letem pikinini blong olgeta i mekem sam samting, we yu no wantem se pikinini blong yu i mekem. Sipos oli askem long yu from wanem yu no wantem, ?bambae yu gat strong tingting blong eksplenem risen ya wetem respek?

15. ?Olsem wanem Ol Sam 37:25 mo Hibrus 13:5 i save givhan long ol papa mo mama?

¹⁵ Ol papa mo mama oli nidim strong tingting blong givhan long pikinini, blong i traehad blong kasem sam mak long wok  blong God. Maet sam papa mo mama oli fraet blong pulum pikinini blong mekem wok blong paenia, go long ples we i nidim moa pablisa, wok long Betel, o bildim ol Haos Kingdom mo Haos Asembli. Maet oli fraet se pikinini bambae i no save lukaot long olgeta taem oli kam olfala. Be ol papa mo mama we oli waes, oli gat strong tingting mo oli trastem Jehova se bambae hem i holem promes blong hem. (Ridim Ol Sam 37:25; Hibrus 13:5.) Taem oli gat strong tingting olsem mo oli trastem Jehova, oli stap givhan long pikinini tu blong i mekem sem mak.—1 Samuel 1:27, 28; 2 Timoti 3:14, 15.

16. ?Olsem wanem sam papa mo mama oli pulum ol pikinini blong oli mekem wok blong God? ?Wanem blesing we ol pikinini oli kasem?

¹⁶ Wan papa mo mama long Yunaeted Stet i pulum ol pikinini blong oli mekem wok blong Jehova. Papa ya i talem se: “Bifo we ol pikinini oli save wokbaot mo toktok, mitufala i stap tokbaot glad we oli save kasem long wok blong paenia mo insaed long kongregesen. Naoia oli stap traehad blong kasem ol mak ya.” Hem i talem tu se taem ol pikinini oli gohed gud long wok blong God, i isi moa blong oli faet agensem ol samting long wol blong Setan, mo blong oli putum tingting i stap nomo long wok blong Jehova. Wan brata we i gat tu pikinini i talem se: “Plante papa mo mama oli wok had mo spenem plante mane blong halpem pikinini blong i kam man blong spot, plei miusik, o skul gud. Be i moa gud blong yusum taem mo mane blong yumi, blong halpem pikinini blong i mekem wok blong Jehova mo i gat gudnem wetem hem. Mitufala i glad tumas we tufala pikinini blong mitufala i mekem wok blong God, i olsem we mitufala tu i kasem bigfala blesing wetem tufala.” Yu save sua se Jehova bambae i glad long ol papa mo mama we oli pulum pikinini blong i mekem wok blong hem.

17. Tokbaot sam long Kristin kongregesen we oli soemaot strong tingting.

¹⁷ Yumi nidim strong tingting tu long kongregesen. Ol elda oli nidim strong tingting taem wan long kongregesen i mekem bigfala sin, mo taem wan i kasem bigfala sik no aksiden nao laef blong hem i stap long denja. Sam elda oli go stadi wetem ol presina mo oli mekem miting long kalabus. ?Olsem wanem long ol sista we oli no mared? Olgeta tu oli save gat strong tingting blong mekem wok blong Jehova. Oli save joen long wok blong paenia, muv i go long ples we i nidim moa pablisa, wok wetem LDC, mo go long Skul Blong Ol Man Blong Talemaot Kingdom. Sam long olgeta oli go long Skul Blong Gilead.

18. ?Olsem wanem ol olfala sista oli save soemaot strong tingting?

¹⁸ !Yumi lavem ol olfala sista, mo yumi glad we oli stap long kongregesen! Nating se sam long olgeta oli no moa save mekem plante wok, be oli save soemaot strong tingting yet mo mekem wok. (Ridim Taetas 2:3-5.) Wan olfala sista bambae i nidim strong tingting sipos ol elda oli askem long hem blong i toktok long wan yangfala sista long saed blong klos blong hem. Bambae hem i no tok kros long sista ya, be long kaen fasin, bambae hem i givhan long hem blong i tingbaot ol narafala mo tingting we oli save gat long klos blong hem. (1 Timoti 2:9, 10) Taem ol olfala sista oli soemaot lav olsem, oli save mekem kongregesen i kam strong moa.

19. (1) ?Olsem wanem ol brata we oli baptaes oli save soemaot strong tingting? (2) ?Olsem wanem Filipae 2:13 mo 4:13 i save givhan long ol brata ya?

 ¹⁹ Ol brata we oli baptaes finis, olgeta tu oli mas gat strong tingting mo wok. Taem oli glad blong mekem wok blong man blong givhan mo elda, oli givhan bigwan long kongregesen. (1 Timoti 3:1) Be samfala oli fraet. Maet wan brata i mekem wan mastik long ol yia we i pas, nao hem i harem se i no stret we hem i mekem wok blong man blong givhan o elda. Maet wan narafala brata i harem se hem i no naf blong mekem wok ya. Sipos yu gat tingting olsem, Jehova i save givhan long yu blong yu no moa fraet. (Ridim Filipae 2:13; 4:13.) Traem tingbaot Moses. Hem tu i harem se hem i no naf blong mekem samting we Jehova i talem. (Eksodas 3:11) Be Jehova i givhan long hem blong i no moa fraet, mo hem i naf blong mekem samting we Jehova i wantem. ?Olsem wanem wan brata we i baptaes i save gat strong tingting olsem? Hem i save prea long Jehova mo ridim Baebol evri dei. I gud hem i tingting dip long eksampol blong ol man long Baebol we oli soemaot strong tingting. Mo tu, hem i save mekem tingting i stap daon mo askem long ol elda blong oli trenem hem. Hem i save talem long olgeta se hem i glad blong mekem eni samting blong givhan long kongregesen. !I gud olgeta brata we oli baptaes finis oli gat strong tingting mo oli wok had long kongregesen!

20, 21. (1) ?Deved i talem wanem long Solomon? (2) ?Yu save sua long wanem samting?

²⁰ King Deved i talem long Solomon se, Jehova bambae i stap wetem hem gogo i finisim haos tempol. (1 Kronikel 28:20) Yumi save se Solomon i mas tingting dip long ol tok ya, nao hem i no ting se hem i yangfala tumas mo i no gat save blong mekem wok ya. Be hem i soemaot strong tingting, mo Jehova i givhan long hem blong i finisim nambawan haos tempol ya long seven yia haf.

²¹ Jehova i givhan long Solomon, mo i save givhan long yu tu, blong yu gat strong tingting mo yu mekem wok blong yu insaed long famle mo long kongregesen. (Aesea 41:10, 13) Sipos yu yu gat strong tingting blong mekem wok blong Jehova, yu save sua se bambae hem i blesem yu naoia mo long fiuja. Taswe, ‘tingting blong yu i mas strong mo yu mas wok.’