1. ?Wanem i mekem yu yu bilif se Tok blong God i gat paoa? (Yu luk pija long stat blong stadi.)

OL MAN blong Jehova oli bilif strong se tok blong hem “i laef i stap mo paoa blong hem i stap wok.” (Hibrus 4:12) Yumi luk olsem wanem Baebol i gat paoa long laef blong yumi, mo long laef blong plante narafala man. Bifo we samfala oli kam Witnes, oli stil, tekem drag, mo slip olbaot. Sam narafala oli gat haenem long wol mo plante mane, be oli harem yet se laef blong olgeta i sot long wan samting. (Prija 2:3-11) I gud tumas se plante man we oli harem nogud mo oli lusum rod, naoia oli faenem hop mo oli wokbaot long rod blong kasem laef. Long ol Wajtaoa, yumi harem gud blong ridim ol laef stori long haf ya, “Baebol i Jenisim Laef Blong Man.” Mo yumi luk se afta we wan man i kam Kristin, hem i mas gohed nomo blong stadi long Baebol, blong hem i save fren moa wetem Jehova.

2. Long taem blong ol fas Kristin, ?olsem wanem Tok blong God i gat paoa long ol man?

² Yumi no sapraes se plante man oli mas mekem ol bigfala  jenis taem oli kasem save long trutok. Long taem blong ol fas Kristin, plante brata mo sista we oli gat hop blong laef long heven oli mekem ol bigfala jenis olsem. (Ridim 1 Korin 6:9-11.) Afta we Pol i tokbaot ol nogud fasin we man i mas jenisim blong kasem Kingdom, hem i se: “Bifo sam long yufala oli olsem nao.” Tok blong God mo tabu spirit i givhan long olgeta blong oli jenis. Be sam long olgeta we oli kam Kristin, oli mekem ol bigfala mastik bakegen, nao oli no moa fren wetem Jehova. Baebol i tokbaot wan brata we tabu spirit i makemaot, we kongregesen i mas putumaot hem. Biaen, hem i mekem ol jenis blong i save kambak insaed long Kristin kongregesen bakegen. (1 Korin 5:1-5; 2 Korin 2:5-8) I gud tumas se Tok blong God i gat paoa long ol brata mo sista ya, nao oli naf blong mekem plante bigfala jenis.

3. Long stadi ya, ?bambae yumi tokbaot wanem?

³ Tok blong God i gat bigfala paoa. Jehova i givim Tok ya long yumi, taswe yumi mas yusum gud. (2 Timoti 2:15) Long stadi ya, bambae yumi tokbaot olsem wanem Baebol i save gat paoa (1) long laef blong yumi, (2) long wok blong prij, mo (3) long ol tok we yumi givim long miting. Samting we yumi lanem bambae i givhan long yumi, blong yumi soemaot se yumi lavem Papa blong yumi long heven, mo blong yumi talem tangkiu long hem. Hem nao i stap tijim yumi blong givhan long yumi.—Aesea 48:17.

4. (1) Sipos yumi wantem se Tok blong God i gat paoa long yumi, ?yumi mas mekem wanem? (2) ?Yu stap ridim Baebol wetaem?

⁴ Sipos yumi wantem se Tok blong God i gat paoa long yumi, yumi mas ridim oltaem. Yumi sud ridim Baebol evri dei. (Josua 1:8) Bighaf blong yumi i bisi we i bisi, be yumi no mas letem wan samting, nating se i wan impoten wok, i blokem yumi blong yumi no ridim Baebol. (Ridim Efesas 5:15, 16.) Maet yumi tekem smol taem long eli moning, long dei, o long naet. Yumi agri wetem ol tok blong man we i raetem Sam ya se: “Hae God. Mi mi laekem Loa blong yu tumas, mi stap tingting long hem i stat long moning, gogo kasem sapa.”—Ol Sam 119:97.

5, 6. (1) ?From wanem yumi mas tingting dip? (2) ?Olsem wanem blong tingting dip? (3) ?Yu kasem wanem gudfala samting, taem yu ridim Baebol mo tingting dip long hem?

⁵ Be i no naf blong ridim Baebol nomo. Yumi mas tingting dip long samting we yumi ridim. (Ol Sam 1:1-3) Sipos yumi tingting dip, bambae yumi naf blong folem ol waes blong Baebol long laef blong yumi. Taswe, nating se yumi ridim Baebol long wan buk, long tablet, o long mobaelfon, yumi mas letem Tok blong hem i jenisim yumi, mo i pusum yumi blong mekem wan samting.

 ⁶ ?Olsem wanem blong tingting dip? Taem yu stap ridim Baebol, yu mas stop smol mo tingbaot ol kwestin ya: ‘?Ol tok ya i soemaot wanem long saed blong Jehova? ?Mi stap folem ol tok ya olsem wanem long laef blong mi? ?Wanem ol jenis we mi mas mekem yet?’ Sipos yu tingting dip long Tok blong God mo tokbaot samting we yu ridim long prea, bambae yu wantem folem ol tok ya. Long rod ya nao, Baebol i save gat paoa long laef blong yu.—2 Korin 10:4, 5.

7. ?Olsem wanem yumi save yusum gud Tok blong God long wok blong prij?

⁷ Taem yumi prij mo tijim ol man, i impoten we yumi yusum Tok blong God oltaem. Wan brata i talem se: “Sipos yu stap prij wetem Jehova, ?bambae yu nomo yu toktok, no bambae yu letem Jehova tu i toktok?” Taem yumi ridim wan vas blong Baebol long wan man, yumi stap letem Jehova i toktok. Wan gudfala vas i gat moa paoa i bitim eni toktok we yumi save talem. (1 Tesalonaeka 2:13) ?Olsem wanem? Taem yu stap prij, ?yu tekem evri janis blong ridim wan vas blong Baebol long ol man?

8. ?From wanem i no naf blong ridim wan vas blong Baebol nomo long ol man?

⁸ Be i no naf blong ridim wan vas blong Baebol nomo long ol man. Bighaf blong ol man oli no kasem save long ol tok blong Baebol. I sem mak long taem blong ol aposol. (Rom 10:2) Yumi no mas ting se man i kasem save long ol tok we yumi ridim long hem. I gud yumi talem bakegen ol impoten tok o tingting long vas ya, mo eksplenem. Long rod ya, Tok blong God i save kasem tingting mo hat blong hem.—Ridim Luk 24:32.

9. ?Olsem wanem ol tok we yumi talem bifo we yumi ridim wan vas, i save givhan long man? Talem wan eksampol.

⁹ Ol tok we yumi talem bifo we yumi ridim wan vas, i save givhan long man tu blong i respektem Baebol. Maet yumi talem se: “Bae yumi luk samting we God i talem.” Sipos yumi stap toktok long wan man we i no Kristin, maet yumi talem se: “Bae yumi luk samting we wan Tabu Buk i talem.” Sipos yumi toktok long wan man we i no intres long ol skul, yumi save askem se: “?Yu bin harem ol olfala tok ya samtaem?” Sipos yumi tingbaot se ol man wanwan oli gat defdefren bilif mo laef blong olgeta i defdefren, bambae yumi mekem bes blong yumi blong talem ol fastok we i pulum tingting blong olgeta.—1 Korin 9:22, 23.

10. (1) Tokbaot stori blong olfala man ya we wan brata i stap go luk hem. (2) Tokbaot wan samting we i hapen long yu long wok blong prij, we i soemaot se Tok blong God i gat paoa.

¹⁰ Plante brata mo sista oli luk se Tok blong God i save gat bigfala paoa long ol man we oli prij long olgeta. Traem tingbaot wan olfala man we i ridim ol magasin plante yia finis. Wan dei, brata we i stap go luk hem, i givim wan Wajtaoa long hem, mo i ridim wan vas tu. Vas ya, hemia 2 Korin 1:3, 4, we i talem se: ‘Papa we i gat sore, mo God ya we i mekem  olgeta samting blong leftemap tingting blong man, hem i stap givhan long yumi long olgeta trabol blong yumi, blong mekem yumi harem gud.’ Ol tok ya oli tajem hat blong olfala man ya, nao hem i askem long brata blong i ridim bakegen. Afta, man ya i talem se hem mo woman blong hem i nidim tumas ol tok ya blong leftemap tingting. Vas ya nomo i mekem se hem i wantem save moa long Baebol. !Tru ya, Tok blong God i save gat bigfala paoa long ol man we yumi prij long olgeta!—Ol Wok 19:20.

11. ?From wanem ol brata we oli givim ol tok oli mas tinghevi long wok ya?

¹¹ Yumi laekem tumas ol miting mo ol asembli. Bigfala risen from wanem yumi go long olgeta, i blong wosipim Jehova. Be yumi lanem plante gudfala samting tu. Ol brata oli gat bigfala blesing blong givim ol tok mo tijim yumi. Be hemia wan wok we oli mas tinghevi long hem tu. (Jemes 3:1) Oli mas meksua se ol tijing we oli givimaot oli stanap long Tok blong God. Sipos yu yu wan brata, ?olsem wanem yu save yusum Baebol long fasin we i gat paoa long ol man?

12. ?Olsem wanem wan brata i save mekem tok blong hem i stanap long Baebol?

¹² Ol vas blong Baebol oli moa impoten i bitim ol narafala samting long tok blong yu. (Jon 7:16) Taswe, yu mas lukaot gud se ol tok blong Baebol i pulum  tingting blong ol man moa, i bitim ol stori mo pijatok, mo fasin blong yu blong givim tok ya. Mo tu, yu mas tingbaot se, ridim Baebol i no sem mak long tijim ol man long Baebol. Blong talem stret, sipos yu ridim tumas vas, ol man oli no save holemtaet evriwan long tingting blong olgeta. Taswe, yu mas jusum gud ol vas. Nao yu tekem taem blong ridim, eksplenem, talem pijatok, mo tokbaot olsem wanem blong folem ol tok ya. (Nehemaea 8:8) Taem yu kasem wan pepa we i gat plan blong tok long hem finis, yu mas stadi gud long ol tok mo ol vas long plan ya. Traem kasem save olsem wanem ol vas oli joen wetem ol tok ya. Nao yu yusum sam long ol vas ya blong tijim ol man long ol bigfala poen long plan ya. (Yu luk ol gudfala advaes long Poen 21, 22, mo 23 long buk ya Tiokratik Skul i Save Givhan Long Yu Long Wok Blong God.) Mo tu, i impoten tumas we yu prea long Jehova blong askem help blong hem, taem yu tokbaot ol nambawan tingting blong hem long Baebol.—Ridim Esra 7:10; Ol Proveb 3:13, 14.

13. (1) ?Olsem wanem vas we wan sista i harem long miting i gat paoa long hem? (2) Tokbaot olsem wanem wan samting we yu harem long miting mo i stanap long Baebol, i gat paoa long yu.

¹³ Taem wan sista long Ostrelia i smol, plante nogud samting i hapen long hem. Biaen, hem i kasem save long Jehova, be hem i no ting se Jehova i save lavem hem. Nao wan dei, hem i harem wan vas long miting we i tajem hat blong hem.  Hem i tingting dip long vas ya, mo taem hem i mekem risej hem i faenem plante narafala vas bakegen. Nao bilif blong hem i kam strong se Jehova i lavem hem. * ?Olsem wanem? ?Yu bin harem wan vas long miting o asembli, we i gat paoa long yu long sem fasin?—Nehemaea 8:12.

14. ?Olsem wanem yumi soemaot se yumi lavem Tok blong Jehova mo yumi tinghevi long hem?

¹⁴ ?Olsem wanem? ?Yu yu glad se Jehova i givim Tok blong hem Baebol, long yumi? Hem i promes se tok ya bambae i stap olwe, mo hem i stap holem promes ya. (1 Pita 1:24, 25) Taswe, yumi mas ridim Baebol oltaem, folem long laef blong yumi, mo yusum blong givhan long ol narafala. Taem yumi mekem olsem, yumi soemaot se yumi lavem nambawan presen ya mo yumi tinghevi long hem. Samting we i moa impoten, yumi soemaot se yumi lavem Man ya we i givim Baebol long yumi, hemia Jehova.