1-2. (1) ?From wanem Amagedon i wan gudfala nius? (2) ?Wanem ol kwestin we bambae yumi tokbaot?

?YU YU harem sam man oli talem se “Amagedon” i wan bigfala faet o wan bigfala disasta we bambae i spolem fulwol? !Baebol i talem samting we i defren! !Hem i talem se Amagedon i wan gudfala nius, wan samting we yumi save glad long hem! (Rev. 1:3) !Faet blong Amagedon bambae i no spolem evri man, be bambae i sevem sam man! ?Olsem wanem bambae i hapen?

² Baebol i soemaot se faet blong Amagedon bambae i finisim rul blong ol man. Bambae hem i sevem ol gudfala man mo spolem ol rabis man. Mo tu, bambae hem i blokem ol man blong oli no moa spolem wol blong yumi. (Rev. 11:18) Blong kasem save moa, bambae yumi tokbaot fo kwestin: ?Wanem ya Amagedon? ?Wanem bambae i hapen bifo long Amagedon? ?Yu mas mekem wanem blong stap sef long Amagedon? ?Olsem wanem blong stanap strong taem en i kam klosap moa?

3. (1) ?Tok ya “Amagedon” i minim wanem? (2) Folem Revelesen 16:14, 16, ?from wanem Amagedon i no wan prapa ples long wol?

³ Ridim Revelesen 16:14, 16. Tok ya “Amagedon” i stap wan taem nomo long Baebol, mo i kamaot long wan Hibru tok we i minim “Bigfala Hil Blong Megido.” (Rev. 16:16, futnot) Megido i wan taon long Isrel bifo. (Jos. 17:11) Be Amagedon i no minim wan prapa ples long wol. Blong talem stret, Amagedon i minim samting we bambae i hapen taem ol king blong wol oli joen blong agensem Jehova. (Rev. 16:14) Long  stadi ya, bambae yumi yusum tok ya Amagedon tu, blong tokbaot bigfala faet we bambae i kamaot taem ol king ya oli agensem Jehova. ?Olsem wanem yumi save se Amagedon i wan pija nomo? Fas samting se, i no gat wan prapa hil we nem blong hem Megido. Seken samting se, ples ya Megido i smol tumas blong ‘ol king blong evri ples long wol’ oli kam hivap long hem, wetem ol ami mo ol tul blong faet blong olgeta. Namba tri samting se, faet blong Amagedon bambae i stat taem “ol king” blong wol oli girap agensem ol man blong God long evri ples long wol. Bambae yumi tokbaot samting ya biaen.

4. ?From wanem Jehova i joenem bigfala faet blong hem wetem Megido?

⁴ ?From wanem Jehova i joenem bigfala faet blong hem wetem Megido? I gat plante faet long Megido mo long bigfala levelples blong Jisrehel we i klosap. Jehova i givhan long ol man blong hem blong oli winim sam faet long ples ya. “Klosap long springwota ya long Megido,” God i halpem Jaj Barak blong Isrel blong winim ami blong Kenan we Siseraha i lidim. Barak mo woman profet ya Debora, tufala i presem Jehova from we hem i mekem merikel blong winim ol enemi. Tufala i singsing se: ‘Ol sta long skae tu oli faet agens long Siseraha olgeta. Kison Reva i stap ron bigwan, i brumumaot olgeta.’—Jaj. 5:19-21.

5. ?Olsem wanem faet blong Amagedon i defren long hemia blong Barak?

⁵ Long en blong singsing ya, Barak mo Debora i talem se: “Hae God. Prea blong mitufala, we olgeta enemi blong yu bambae oli ded . . . mo we ol fren blong yu bambae oli saen olsem san we i jes kamaot long moning.” (Jaj. 5:31) Sem mak long Amagedon, God bambae i spolem ol enemi blong hem, mo bambae i sevem olgeta we oli lavem hem. Be i gat wan samting we i no sem mak long saed blong tufala faet ya. Long Amagedon, ol man blong God bambae oli no faet. !Bambae oli no karem ol tul blong faet tu! Bambae ‘oli stap kwaet mo trastem’ Jehova mo ol ami blong hem long heven, nao hem bambae i mekem olgeta oli strong.—Aes. 30:15; Rev. 19:11-15.

6. ?Olsem wanem Jehova bambae i winim ol enemi blong hem long Amagedon?

⁶ ?Olsem wanem God bambae i winim ol enemi blong hem long Amagedon? Hem i save yusum plante samting, olsem graon i seksek bigwan, ol ston blong aes, mo bigfala laetning. (Job 38:22, 23; Esik. 38:19-22) Maet hem i mekem se ol enemi oli kilkilim olgeta bakegen. (2 Kron. 20:17, 22, 23) Mo hem i save yusum tu, ol enjel blong hem blong kilim ol rabis man oli ded. (Aes. 37:36) Nomata wanem samting we God i yusum, be bambae hem i win fulwan. Olgeta enemi blong hem bambae oli lus. Mo ol gudfala man bambae oli sef.—Prov. 3:25, 26.

7-8. (1) Folem 1 Tesalonaeka 5:1-6, ?wanem narakaen nius we ol lida blong wol bambae oli talemaot? (2) ?From wanem giaman tok ya i denja?

⁷ Bifo long “dei blong Jehova,” ol lida blong wol bambae oli talemaot se “i gat pis mo seftaem.” (Ridim 1 Tesalonaeka 5:1-6.) Long 1 Tesalonaeka 5:2, “dei blong Jehova” i minim taem blong “bigfala trabol.” (Rev. 7:14) ?Wanem bambae i hapen bifo we bigfala trabol ya i stat? Baebol i tokbaot wan narakaen nius we bambae i kamaot. Hemia wan saen se bigfala trabol bambae i stat.

⁸ Bambae ol lida blong wol oli talemaot se “i gat pis mo seftaem.” ?From wanem oli talem olsem? Yumi no save stret. ?Ol lida blong skul tu bambae oli joen wetem olgeta? Maet. Nating se i olsem wanem, ol giaman tok ya i rili  kamaot long ol rabis spirit. Mo hem i denja tumas, from we i mekem ol man oli ting se oli sef. Be samting we i tru se bigfala trabol, we i bigwan moa i bitim ol narafala trabol bifo, bambae i faerap. Yes, “bambae oli sek we bigfala trabol i kam wantaem nomo blong spolem olgeta . . . olsem soa we wan woman i harem taem hem i rere blong bonem pikinini.” ?Olsem wanem long ol gudfala man blong Jehova? Maet olgeta tu oli sek taem dei blong Jehova i faerap wantaem nomo, be oli rere finis.

9. ?Jehova bambae i spolem ol samting long wol blong Setan wantaem? Eksplenem.

⁹ Jehova bambae i no finisim ol samting long wol blong Setan wantaem, olsem hem i mekem long taem blong Noa. Be bambae hem i spolem wan haf fastaem, afta narafala haf. Fastaem, bambae hem i spolem Bigfala Babilon, hemia olgeta giaman skul long wol. Biaen, long faet blong Amagedon, bambae hem i spolem politik, ol ami mo ol tul blong faet, mo ol bigfala bisnes. I gud yumi tokbaot ol impoten samting ya.

10. Folem Revelesen 17:1, 6 mo 18:24, ?from wanem Jehova bambae i spolem Bigfala Babilon?

¹⁰ “Jajmen blong bigfala woman blong rod.” (Ridim Revelesen 17:1, 6; 18:24.) Bigfala Babilon i stap sakem doti long nem blong God. Hem i tijim ol giaman toktok long saed blong God. Hem i mekem olsem wan woman blong rod taem hem i wok wetem ol lida blong wol. Hem i holem ol man aninit long paoa blong hem mo i tekemaot mane blong olgeta. Mo hem i kilim plante man i ded, wetem sam man blong God tu. (Rev. 19:2) ?Olsem wanem Jehova bambae i spolem Bigfala Babilon?

11. ?“Wael anamol ya we i red we i red” i pija blong wanem? ?Olsem wanem God bambae i yusum anamol ya blong spolem Bigfala Babilon?

¹¹ Jehova bambae i yusum “ol ten hon” blong “wael anamol we i red we i red” blong spolem “bigfala woman blong rod” ya. Wael anamol ya i pija blong Yunaeted Nesen. Ol ten hon oli pija blong ol gavman we oli sapotem Yunaeted Nesen. Long stret taem we God i makemaot, ol gavman ya bambae oli girap  agensem bigfala woman blong rod ya. Bambae ‘oli tekemaot olgeta samting we hem i gat, mo livim hem i stap neked.’ Bambae oli mekem olsem, taem oli tekemaot mane blong hem mo soemaot ol nogud fasin blong hem. (Rev. 17:3, 16) Ol man we oli sapotem woman blong rod ya, bambae oli sek taem hem i lus kwiktaem, olsem long wan dei nomo, from we hem i tokflas longtaem finis, i se: “Mi mi wan kwin we mi stap sidaon long bigfala jea blong mi.”—Rev. 18:7, 8.

12. ?Bambae Jehova i no letem ol nesen oli mekem wanem? ?From wanem?

¹² Be God bambae i no letem ol nesen oli spolem ol man blong hem. Olgeta oli karem nem blong hem, mo oli obei finis long tok blong God se oli mas kamaot long Bigfala Babilon. (Wok 15:16, 17; Rev. 18:4) Mo oli wok had blong givhan long ol narafala blong olgeta tu oli kamaot long hem. Taswe ol man blong Jehova bambae oli no ‘kasem ol trabol we Bigfala Babilon i kasem.’ Nating se i olsem, ol trabol ya bambae i traem bilif blong olgeta.

13. (1) ?Hu ya King Gogo? (2) Folem Esikel 38:2, 8, 9, ?wanem bambae i pulum King Gogo i go kasem Amagedon?

¹³ King Gogo bambae i girap agensem ol man blong God. (Ridim Esikel 38:2, 8, 9.) Afta we ol giaman skul oli lus, ol man blong God bambae oli olsem wan tri we hem wan nomo i stap afta we bigfala hariken i pas. Yumi save se Setan bambae i kros tumas. Kros blong hem bambae i pulum hem blong i yusum “tri mesej we oli no klin,” hemia ol giaman toktok we i kamaot long ol devel, blong pulum ol nesen oli joen blong agensem ol man blong Jehova. (Rev. 16:13, 14) Baebol i singaot ol nesen ya se ‘King Gogo, blong kantri ya Magog.’ Taem oli girap agensem ol man blong God, Amagedon bambae i faerap.—Rev. 16:16.

14. ?King Gogo bambae i luksave wanem?

¹⁴ King Gogo bambae i trastem ‘paoa blong hem we i kam long man nomo,’ hemia ol bigfala ami blong hem. (2 Kron. 32:8) Be bambae yumi trastem God blong yumi Jehova. Ol nesen bambae oli ting se yumi krangke blong  mekem olsem. !Bambae oli tingbaot se ol god blong Bigfala Babilon oli no sevem hem, taem “wael anamol we i red we i red” wetem “ol ten hon” blong hem oli agensem hem! (Rev. 17:16) Taswe King Gogo bambae i ting se i isi nomo blong winim ol man blong Jehova. Bambae hem i kam agensem yumi “olsem bigfala klaod blong ren we i kavremap olgeta ples.” (Esik. 38:16) Be kwiktaem nomo bambae hem i luksave se hem i fas long wan trap. Olsem Fero long Red Si, bambae King Gogo i luksave se hem i stap faet agensem Jehova.—Eks. 14:1-4; Esik. 38:3, 4, 18, 21-23.

15. ?Olsem wanem Jisas bambae i win fulwan?

¹⁵ Jisas Kraes wetem ol ami blong hem long heven bambae oli smasem King Gogo mo ol ami blong hem, mo protektem ol man blong God. (Rev. 19:11, 14, 15) ?Be olsem wanem long Setan, bigfala enemi blong Jehova, wetem ol giaman toktok blong hem we i lidim ol nesen oli go long Amagedon? Jisas bambae i sakem hem wetem ol rabis enjel blong hem oli go long wan bigfala hol, mo bambae hem i lokem olgeta long ples ya blong wan taosen yia.—Rev. 20:1-3.

16. (1) ?Olsem wanem blong “save God”? (2) ?From wanem hemia bambae i wan blesing long Amagedon?

¹⁶ Nating se yu save trutok plante yia finis o smoltaem nomo, be blong stap sef long Amagedon, yu mas “save God” mo “obei long gud nius we i tokbaot Masta blong yumi Jisas.” (2 Tes. 1:7-9) Yumi “save God” taem yumi save ol samting we hem i laekem mo ol samting we hem i no laekem, mo ol rul blong hem. Mo tu, yumi lavem hem mo obei long hem, mo yumi wosipim hem nomo. (1 Jon 2:3-5; 5:3) Taem yu save God, yu kasem bigfala blesing ya blong ‘God i save yu.’ !Mo hemia i save sevem laef blong yu long Amagedon! (1 Kor. 8:3) ?From wanem i olsem? From we taem ‘God i save yu,’ hemia i min se hem i glad long yu.

17. ?Olsem wanem blong “obei long gud nius we i tokbaot Masta blong yumi Jisas”?

¹⁷ “Gud nius we i tokbaot Masta blong yumi  Jisas” i minim trutok we Jisas i tijim, olsem yumi ridim long Baebol. Yumi obei long gud nius taem yumi folem trutok ya long laef blong yumi. Hemia i min se yumi putum ol wok blong Kingdom fastaem, yumi obei long ol rul blong God, mo yumi talemaot Kingdom blong God. (Mat. 6:33; 24:14) Mo tu, yumi sapotem ol tabu brata blong Kraes, long ol impoten wok we oli mekem.—Mat. 25:31-40.

18. ?Olsem wanem ol tabu brata blong Kraes bambae oli givimbak kaen fasin we oli kasem?

¹⁸ I no longtaem, ol tabu Kristin bambae oli givimbak kaen fasin we “ol narafala sipsip” oli bin soemaot long olgeta. (Jon 10:16) ?Bambae oli mekem olsem wanem? Bifo we faet blong Amagedon i stat, ol laswan blong ol 144,000 bambae oli go long heven, olsem ol spirit man we oli no moa save ded samtaem. Nao ful grup ya blong 144,000 bambae i joen wetem ol ami long heven blong smasem King Gogo, mo blong protektem “bigfala hip blong ol man” blong God. (Rev. 2:26, 27; 7:9, 10) !Tru ya, bigfala hip blong ol man ya oli gat wan bigfala blesing, hemia blong sapotem ol tabu man blong Jehova taem oli stap yet long wol ya!

19-20. Nating se yumi fesem plante hadtaem, ?olsem wanem yumi save stanap strong taem Amagedon i kam klosap moa?

¹⁹ Long ol las dei ya we laef i had, ol man blong Jehova oli fesem plante hadtaem. Nating se i olsem, yumi save stanap strong mo stap glad. (Jem. 1:2-4) Wan impoten samting we i save givhan long yumi, hemia blong prea oltaem wetem fulhat blong yumi. (Luk 21:36) Blong wok folem prea blong yumi, yumi mas stadi Baebol evri dei, wetem ol nambawan profet tok we oli stap kamtru tede, mo yumi mas tingting dip long olgeta. (Sam 77:12) !Sipos yumi mekem olsem, mo yumi joen fulwan long wok blong prij, bilif mo hop blong yumi bambae i strong!

²⁰ !Traem tingbaot olsem wanem bambae yu glad taem Bigfala Babilon i lus mo faet blong Amagedon i finis! Samting we i moa impoten: !Tingbaot bigfala glad blong yu taem God i win mo i leftemap nem mo hae rul blong hem! (Esik. 38:23) Yes, Amagedon i wan gudfala nius long olgeta we oli save God, oli obei long Pikinini blong hem, mo oli stanap strong go kasem en.—Mat. 24:13.