STADI 39
“Mi Luk Wan Bigfala Hip Blong Ol Man”
“Mi luk wan bigfala hip blong ol man, we i no gat man i save kaontem olgeta . . . oli stap stanap long fored blong bigfala jea blong king, mo long fored blong Smol Sipsip.”—REV. 7:9.
SINGSING 60 Woning i Sevem Laef
BIGFALA TINGTING *
1. Samwe long yia 95, ?laef blong aposol Jon i olsem wanem?
SAMWE long yia 95, aposol Jon i fesem hadtaem. Hem i olfala, hem i kalabus long aelan blong Patmos, mo maet hem i laswan long ol aposol we i laef yet. (Rev. 1:9) Hem i save se sam man blong apostasi oli stap tijim ol giaman tijing mo mekem ol kongregesen oli seraot. I luk olsem se Kristin skul we i smol nomo, i save lus.—Jud 4; Rev. 2:15, 20; 3:1, 17.
Aposol Jon i luk “wan bigfala hip blong ol man” we oli werem waet klos mo oli holem han blong pamtri (Yu luk haf 2)
2. Folem Revelesen 7:9-14, ?wanem nambawan vison we Jon i luk? (Yu luk pija long fran pej.)
2 Long hadtaem ya, Jon i luk wan nambawan vison long saed blong fiuja. Hem i luk wan enjel we i talem long fo narafala enjel blong oli holemtaet ol win blong bigfala trabol, go kasem taem we ol slef blong God oli gat mak long fored blong olgeta. (Rev. 7:1-3) Hemia grup blong ol 144,000 man we bambae oli rul wetem Jisas long heven. (Luk 12:32; Rev. 7:4) Biaen, Jon i tokbaot wan narafala grup we i bigfala moa, i se: “Mi luk wan bigfala hip blong ol man, we i no gat man i save kaontem olgeta. Ol man ya oli kamaot long olgeta kantri, mo long olgeta laen, mo long olgeta grup blong man, mo long olgeta lanwis, oli stap stanap long fored blong bigfala jea blong king, mo long fored blong Smol Sipsip.” (Ridim Revelesen 7:9-14.) !Traem tingbaot olsem wanem Jon i mas glad blong faenemaot se fulap man bambae oli joen long tru wosip!
3. (1) ?From wanem vison blong Jon i mas mekem bilif blong yumi i strong? (2) ?Bambae yumi tokbaot wanem long stadi ya?
3 Yumi save se vison ya i mas mekem bilif blong Jon i strong,
be i mas mekem bilif blong yumi i strong moa, from we i stap kamtru long taem blong yumi. Yumi luk se plante milian man oli stap joen long tru wosip. Olgeta oli gat hop blong pastru long bigfala trabol mo laef olwe long wol. Long stadi ya, bambae yumi tokbaot olsem wanem Jehova i soemaot long ol man blong hem bitim eiti yia finis, hu nao bigfala hip blong ol man ya. Mo tu, bambae yumi tokbaot tu samting long saed blong grup ya: (1) hem i wan bigfala grup, mo (2) oli kamaot long olgeta kantri. Hemia bambae i mekem bilif blong olgeta we oli joen long grup ya, i kam strong moa.?BAMBAE OLI LAEF WEA?
4. ?Ol giaman Kristin skul oli no tijim wanem trutok blong Baebol? ?Be olsem wanem long ol Baebol Studen?
4 Ol giaman Kristin skul oli no tijim trutok blong Baebol se, ol man we oli obei long God bambae oli laef olwe long wol. (2 Kor. 4:3, 4) Tede plante skul we oli talem se oli Kristin, oli tijim se taem ol gudfala man oli ded, oli go long heven. Be smol grup blong ol Baebol Studen we oli stat blong printim Wajtaoa long 1879, oli no tijim samting ya. Oli bilif se God bambae i mekem wol ya i kam Paradaes bakegen, nao plante milian man we oli obei long hem bambae oli laef long wol ya nomo, i no long heven. Be i tekem taem blong oli kasem save klia se, hu nao ol man ya.—Mat. 6:10.
5. ?Wanem bilif blong ol Baebol Studen long saed blong ol 144,000?
5 Ol Baebol Studen oli kasem save tu se Baebol i tokbaot wan grup we God i “pemaot olgeta long wol” blong oli go rul wetem Jisas long heven. (Rev. 14:3) Hemia ol 144,000 Kristin we oli givim laef blong olgeta long God, mo oli mekem wok blong hem wetem strong tingting taem oli stap long wol. ?Be ol Baebol Studen oli bilivim wanem long saed blong bigfala hip blong ol man?
6. ?Wanem bilif blong ol Baebol Studen long saed blong bigfala hip blong ol man?
6 Jon i luk we bigfala hip blong ol man ya i “stanap long fored blong bigfala jea blong king, mo long fored blong Smol Sipsip.” (Rev. 7:9) Taswe ol Baebol Studen oli ting se grup ya bambae i stap long heven, olsem ol 144,000. Be sipos tufala grup ya i stap long heven, ?olsem wanem tufala i defdefren? Ol Baebol Studen oli ting se bigfala hip blong ol man, hemia ol Kristin we oli no obei fulwan long God taem oli stap long wol. Oli no mekem rabis fasin, be maet oli joen yet long ol giaman Kristin skul. Oli lavem God smol, be i no naf blong oli rul wetem Jisas. Oli naf nomo blong stanap long fored blong jea blong king long heven, be oli no naf blong sidaon long jea blong king.
7. ?Ol Baebol Studen oli ting se hu bambae i laef long wol long Rul Blong Kraes Blong Wan Taosen Yia? ?Wanem bilif blong olgeta long ol man blong God we oli ded bifo we Jisas i kam long wol?
7 ?Ale, hu olgeta we bambae oli laef long wol? Ol Baebol Studen oli bilif se taem ol 144,000 mo bigfala hip blong ol man oli go long heven, plante milian narafala man bambae oli laef long wol mo harem gud long Rul Blong Kraes Blong Wan Taosen Yia. Ol man ya oli no wosipim Jehova bifo, be long wan taosen yia ya, bambae oli kasem save long Jehova. Sipos oli folem ol rul blong Jehova, bambae oli kasem laef olwe long wol, sipos no, bambae oli lus. Mo tu, ol Baebol Studen oli ting se olgeta we oli wok olsem “ol prins” long wol, bambae oli kasem laef long heven long en blong wan taosen yia ya. Sam long olgeta, oli ol gudfala man blong God we oli ded bifo we Jisas i stap long wol.—Sam 45:16, NW.
8. ?Ol Baebol Studen oli ting se God i makemaot wanem trifala grup?
* Be long stret taem, Jehova i mekem laet blong trutok i saenaot moa.—Prov. 4:18.
8 Taswe, ol Baebol Studen oli ting se i gat tri grup: (1) ol 144,000 we oli rul wetem Jisas long heven, (2) wan bigfala hip blong ol Kristin we oli slak lelebet, we oli stanap long fored blong jea blong Jisas long heven, mo (3) plante milian narafala man long wol we oli kasem save long Jehova long Rul Blong Kraes Blong Wan Taosen Yia.LAET BLONG TRUTOK I SAENAOT MOA
Long wan asembli long 1935, plante man we oli gat hop blong laef long wol ya, oli baptaes (Haf 9)
9. (1) ?Olsem wanem bigfala hip blong ol man i stanap “long fored blong bigfala jea blong king, mo long fored blong Smol Sipsip”? (2) ?From wanem niufala save ya long Revelesen 7:9 i stret?
9 Long 1935, ol Witnes blong Jehova oli kasem save se hu nao bigfala hip blong ol man long vison blong Jon. Oli kasem save se i no nid blong ol man ya oli stap long heven blong oli stanap “long fored blong bigfala jea blong king, mo long fored blong Smol Sipsip.” Nating se oli stap long wol, i olsem we oli stanap “long fored blong bigfala jea blong king,” taem oli luksave se Jehova i King blong heven mo wol mo oli obei long hem. (Aes. 66:1) Mo i olsem we oli stanap “long fored blong Smol Sipsip” taem oli soemaot bilif long ransom sakrefaes blong Jisas. I sem mak long Matiu 25:31, 32, we i talem se “olgeta nesen,” wetem ol rabis man tu, oli “kam stanap long fes” blong Jisas we i sidaon long bigfala jea blong hem. I klia se, olgeta nesen ya oli stap long wol, i no long heven. Niufala save ya long Revelesen 7:9 i stret nomo, from we i no gat wan ples long Baebol we i talem se bigfala hip blong ol man bambae i go long heven. I gat wan grup nomo we i gat janis blong kasem laef olwe long heven, hemia ol 144,000 we oli joen wetem Jisas blong “rul long olgeta man long wol.”—Rev. 5:10.
10. ?From wanem bigfala hip blong ol man i mas save Jehova bifo long Rul Blong Kraes Blong Wan Taosen Yia?
10 Taswe, stat long 1935, ol Witnes blong Jehova oli bilif se bigfala hip blong man we Jon i luk long vison, i wan grup blong ol tru Kristin we oli gat hop blong laef olwe long wol. Blong pastru long bigfala trabol, oli mas kasem save long Jehova mo wosipim hem, bifo we Rul Blong Kraes Blong Wan Taosen Yia i stat. Bambae oli nidim strong bilif, blong oli save “ronwe long olgeta samting ya we oli mas kamtru” bifo long wan taosen yia ya.—Luk 21:34-36.
11. ?From wanem sam Baebol Studen oli ting se maet samfala oli go long heven afta long Rul Blong Kraes Blong Wan Taosen Yia?
11 ?Olsem wanem long tingting ya se sam gudfala man bambae oli go long heven afta long Rul Blong Kraes Blong Wan Taosen Yia? Maet yumi ting se: ‘?From wanem ol gudfala man blong God bifo bambae oli stap long wol nomo, be samfala we oli no obei gud olsem olgeta, bambae oli go long heven?’ Bilif ya blong ol Baebol Studen we i kamaot long Wajtaoa blong 15 Februari 1913, i stanap long tu rong tingting: (1) bigfala hip blong man bambae i go long heven, mo (2) bigfala hip ya i wan grup blong ol Kristin we oli slak lelebet.
12-13. ?Tufala grup ya tugeta i save wanem?
12 Olsem yumi tokbaot finis, stat long 1935, ol Witnes blong Jehova oli kasem save klia se ol man we oli pastru long Amagedon, olgeta nao oli bigfala hip ya blong ol man we Jon i luk long vison. Bambae oli “pastru long bigfala trabol” long wol ya, mo “oli gohed blong singaot bigwan se: ‘God blong yumi we i stap sidaon long bigfala jea blong hem, mo Smol Rev. 7:10, 14) Mo tu, ol Witnes oli kasem save se ol man blong God bifo bambae oli no go long heven. Baebol i talem se olgeta we oli go long heven oli kasem “samting we i gud moa” i bitim ol man blong God bifo. (Hib. 11:40) Taswe ol brata oli statem wan bigfala wok blong singaot ol man oli kam wosipim Jehova, wetem janis blong kasem laef olwe long wol.
Sipsip blong hem, tufala nao i sevem yumi.’” (13 Bigfala hip blong ol man ya i glad tumas long hop we oli gat. Oli save se Jehova nao i jusum weples ol man blong hem oli stap, hemia long heven o long wol. Grup ya wetem grup blong ol tabu Kristin, i save se kaen fasin blong Jehova nomo i givim janis long olgeta blong oli kasem nambawan laef long fiuja, from we hem i givim Jisas Kraes olsem wan ransom sakrefaes blong pemaot olgeta.—Rom 3:24.
WAN BIGFALA GRUP
14. Afta long 1935, ?from wanem samfala oli tingbaot yet profet tok long bigfala hip blong ol man?
14 Nating se save ya i kam klia long 1935, samfala oli tingbaot yet olsem wanem ol man we bambae oli stap long wol oli save kam wan bigfala hip. Long taem ya, Ronald Parkin i gat 12 yia. Hem i talem se: “I gat samwe long 56,000 pablisa long fulwol, mo plante long olgeta oli ol tabu man. Taswe bigfala hip blong ol man i no bigwan tumas.”
15. Eksplenem olsem wanem bigfala hip blong ol man i kam bigwan.
15 Long ol yia biaen, plante misinari oli go long ol defren kantri, nao namba blong ol Witnes blong Jehova i kam antap. Long 1968, ol Witnes oli yusum buk ya Trutok Blong Soemaot Rod Blong Itenel Laef blong stadi Baebol wetem ol man. Buk ya i mekem i isi blong ol man oli kasem save trutok blong Baebol, nao plante we oli gat tingting daon oli wosipim Jehova. Long fo yia nomo, bitim 500,000 niufala disaepol oli baptaes. Taem Katolik Jos i stat blong lusum paoa long Latin Amerika mo long sam narafala kantri, mo taem gavman i tekemaot tabu long wok blong yumi long Is Yurop mo long sam ples long Afrika, plante milian man bakegen oli baptaes. (Aes. 60:22) Klosap moa long taem blong yumi, oganaesesen blong Jehova i wokem plante moa samting blong givhan long ol man blong oli kasem save long ol tijing blong Baebol. Naoia i gat bitim eit milian man blong Jehova. !I klia nomo se hemia wan bigfala hip blong ol man!
OLI KAMAOT LONG OLGETA KANTRI
16. ?Bigfala hip blong ol man i kamaot wea?
16 Jon i raetem se ol man we hem i luk long Sek. 8:23.
vison, oli kamaot long ‘olgeta kala, olgeta kantri, olgeta laen, mo olgeta lanwis.’ Profet Sekaraea i talemaot samting ya finis, i se: “Long dei ya, bambae i gat ten man we oli strenja, we lanwis blong olgeta i naranarafala, bambae oli kam luk wan laen blong Isrel, oli talem long hem se, ‘Mifala i wantem kam fren blong yufala, from we mifala i harem nius se God i stap givhan long yufala.’”—17. ?Wanem wok i stap gohed blong givhan long ol man blong olgeta kantri mo lanwis?
17 Ol Witnes blong Jehova oli save se ol man oli mas harem gud nius long lanwis blong olgeta, blong oli save bilif long hem. Taswe 130 yia finis, oli stat blong transletem ol save blong Baebol i go long ol defren lanwis. Tede wok ya i kam antap bigwan. Naoia oli transletem ol tok i go long bitim 900 lanwis. I klia se Jehova i stap mekem wan merikel, taem hem i tekemaot wan bigfala hip blong ol man long olgeta kantri. From we save blong Baebol i stap long fulap lanwis, ol man oli save joen gud long wosip blong Jehova, nomata weples long wol oli stap. Ol man oli save gud ol Witnes from wok blong prij we oli mekem, mo from lav we i joenem olgeta olsem ol brata. !Hemia i mekem bilif blong yumi i kam strong!—Mat. 24:14; Jon 13:35.
VISON YA MO LAEF BLONG YUMI
18. (1) Folem Aesea 46:10, 11, ?from wanem yumi no sapraes we Jehova i mekem profet tok blong bigfala hip blong ol man, i kamtru? (2) ?From wanem olgeta we oli gat hop blong laef long wol, oli no harem se oli mestem wan gudfala samting?
18 !Yumi glad tumas long profet tok ya long saed blong bigfala hip blong ol man! Yumi no sapraes se Jehova i mekem profet tok ya i kamtru long wan bigfala fasin. (Ridim Aesea 46:10, 11.) Ol man ya oli glad tumas long hop we Jehova i givim long olgeta. Oli no harem se oli mestem wan gudfala samting, taem God i no makemaot olgeta wetem tabu spirit blong oli joen wetem Jisas long heven. Baebol i tokbaot plante man mo woman we oli gat strong bilif mo tabu spirit i lidim olgeta, be oli no blong grup ya blong ol 144,000. Wan long olgeta, hemia Jon we i baptaesem ol man. (Mat. 11:11) Narawan, hemia Deved. (Wok 2:34) Tufala ya wetem plante narafala, bambae oli laef bakegen long paradaes long wol. Wetem bigfala hip blong ol man, bambae oli gat janis blong soemaot se oli wantem obei long Jehova mo sapotem rul blong hem.
19. Sipos yumi kasem save gud long mining blong vison blong Jon, ?bambae yumi mekem wanem?
19 I no gat wan taem bifo, we God i mekem plante milian man blong olgeta nesen oli joengud blong wosipim hem. Nating se yumi gat hop blong laef long heven o long wol, yumi mas gohed blong givhan long ol man blong oli joen long bigfala hip ya blong “ol narafala sipsip.” (Jon 10:16) I no longtaem, Jehova bambae i mekem bigfala trabol i faerap blong spolem ol gavman mo ol jos we oli mekem ol man oli safa. !Wan bigfala blesing i stap fored long bigfala hip blong ol man, hemia blong mekem wok blong Jehova long wol ya, gogo i no save finis!—Rev. 7:14.
SINGSING 139 Yu Tingbaot Laef Long Niufala Wol