STADI 38
‘Kam Long Mi, Bambae Mi Mekem We Yu Kasembak Paoa’
‘Yufala we i stap hadwok tumas mo karem ol hevi samting, yufala i kam long mi, mo bambae mi mekem we yufala i spel mo kasembak paoa.’—MAT. 11:28.
SINGSING 17 “Mi Wantem”
BIGFALA TINGTING *
1. ?Jisas i mekem wanem promes long Matiu 11:28-30?
JISAS i mekem wan nambawan promes long wan bigfala hip blong man we oli stap lesin long hem, i se: ‘Yufala i kam long mi, mo bambae mi mekem we yufala i spel mo kasembak paoa.’ (Ridim Matiu 11:28-30.) Hemia i no wan giaman promes. Tingbaot samting we hem i mekem long wan woman we i harem nogud plante yia long wan rabis sik.
2. ?Jisas i mekem wanem long wan woman we i sik?
2 Woman ya i traehad blong faenem wan man blong halpem hem. Hem i safa blong 12 yia, mo i go luk plante dokta, be i no gat wan man we i save halpem hem. Folem Loa we God i givim long Moses, hem i doti long fes blong God. (Lev. 15:25) Wan dei, woman ya i harem nius se Jisas i stap mekem ol sikman oli kam gud, ale hem i go lukaot Jisas. !Taem hem i faenem Jisas, hem i tajem en blong klos blong hem, nao wantaem nomo sik blong hem i finis! Be Jisas i mekem wan narafala samting tu. Hem i mekem woman ya i harem se i gat man we i lavem mo respektem hem. Taem Jisas i toktok long hem, hem i yusum tok ya “pikinini blong mi,” we i soemaot lav mo respek. !Tru ya, woman ya i mas harem se hem i spel mo i kasembak paoa!—Luk 8:43-48.
3. ?Wanem ol kwestin we bambae yumi tokbaot?
3 Makem gud se woman ya i kam long Jisas. Hem i traehad. Sem mak long yumi, yumi mas traehad blong “kam long” Jisas. Tede Jisas i no mekem merikel blong tekemaot sik blong ol man
we oli “kam long” hem. Be hem i stap singaot yumi yet se: ‘Kam long mi, mo bambae mi mekem we yu spel mo kasembak paoa.’ Long stadi ya, bambae yumi faenem ansa blong faef kwestin: ?Olsem wanem yumi “kam long” Jisas? ?Jisas i minim wanem taem hem i talem se, ‘putum yok blong mi long solda blong yu’? ?Yumi lanem wanem long eksampol blong Jisas? ?Olsem wanem wok we hem i givim long yumi i mekem yumi spel mo kasembak paoa? ?Olsem wanem yumi save gohed blong harem gud aninit long yok blong Jisas?“KAM LONG MI”
4-5. ?Olsem wanem blong “kam long” Jisas?
4 Wan rod blong “kam long” Jisas, hemia blong kasem save long ol samting we hem i talem mo i mekem. (Luk 1:1-4) I no gat narafala man we i save mekem samting ya blong yumi. Yumi wanwan i mas stadi long laef blong Jisas long Baebol. Mo tu, yumi “kam long” Jisas taem yumi mekem desisen blong baptaes mo kam wan disaepol blong hem.
5 Wan narafala rod blong “kam long” Jisas, hemia blong askem help blong ol elda long kongregesen. Jisas i stap yusum ‘ol man ya we oli olsem presen’ blong lukaot long ol sipsip blong hem. (Efes. 4:7, 8, 11; Jon 21:16; 1 Pita 5:1-3) Be yumi mas go askem help blong olgeta. Yumi no mas ting se ol elda oli save finis samting we i stap long tingting blong yumi mo ol samting we yumi nidim. Wan brata, nem blong hem Julian, i talem se: “Mi mas lego wok long Betel from we mi mi sik. Wan fren i talem se i gud mi askem long ol elda blong oli kam luk mi blong leftemap tingting. Fastaem, mi no ting se mi nidim. Be afta, mi askem long olgeta, mo oli visitim mi. Hemia wan nambawan presen we mi kasem long laef blong mi.” Ol gudfala elda olsem oli save givhan long yumi tu, blong yumi save “tingting blong Kraes,” hemia i min se, blong yumi gat sem tingting olsem Kraes. (1 Kor. 2:16; 1 Pita 2:21) Hemia wan nambawan presen we yumi save kasem.
‘PUTUM YOK BLONG MI LONG SOLDA BLONG YU’
6. ?Jisas i minim wanem taem hem i talem se ‘putum yok blong mi long solda blong yu’?
6 Taem Jisas i talem se, ‘putum yok blong mi long solda blong yu,’ maet hem i min se “obei long mi,” mo maet i minim tu se, “kam aninit long yok wetem mi, nao yumitu tugeta i mekem wok blong Jehova.” Nating se hem i minim wanem, be yok ya i givim tingting se yumi mas wok.
7. ?Matiu 28:18-20 i tokbaot wanem wok we yumi mas mekem, mo yumi save sua long wanem?
7 Yumi kam long Jisas taem yumi givim laef blong yumi long Jehova mo yumi baptaes. Jisas i singaot yumi evriwan blong mekem olsem. Hem i no save blokem eniman we i rili wantem mekem wok blong God. (Jon 6:37, 38) Jehova i givim wok long Jisas blong talemaot gud nius, mo ol man blong Jisas tu oli kasem blesing blong joen long wok ya. Yumi save sua se Jisas bambae i stap wetem yumi oltaem, blong halpem yumi blong mekem wok ya.—Ridim Matiu 28:18-20.
“LAN LONG MI”
Mekem ol narafala oli harem gud, olsem jisas i mekem (Haf 8-11) *
8-9. ?From wanem olgeta we oli gat tingting daon oli glad blong kam long Jisas? ?Wanem ol kwestin we yu mas tingbaot?
8 Olgeta we oli gat tingting daon oli glad blong kam long Jisas. (Mat. 19:13, 14; Luk 7:37, 38) ?From wanem? Traem tingbaot olsem wanem Jisas i defren long ol Farisi. Ol Farisi oli no gat lav mo oli praod. (Mat. 12:9-14) Be Jisas i lavem ol man mo i gat tingting daon. Ol Farisi oli ting se oli impoten mo oli wantem se ol man oli leftemap olgeta. Be Jisas i no wantem olsem. Hem i tijim ol disaepol blong hem blong oli gat tingting daon mo oli mekem wok blong narafala. (Mat. 23:2, 6-11) Ol Farisi oli mekem ol man oli fraet, mo oli fosem olgeta blong obei. (Jon 9:13, 22) Be Jisas i soemaot lav mo i toktok kaen, blong mekem ol man oli harem gud.
9 ?Yu yu lanem finis ol fasin ya blong Jisas? Traem askem se: ‘?Ol narafala oli tingbaot mi olsem wan kwaet man we i gat tingting daon? ?Mi mi glad blong mekem ol wok we oli no impoten blong givhan long ol narafala? ?Mi mi kaen long ol narafala?’
10. ?Olsem wanem Jisas i mekem se ol disaepol oli glad blong wok wetem hem?
10 Jisas i mekem ol disaepol oli harem gud blong wok wetem hem, mo hem i glad tu blong trenem olgeta. (Luk 10:1, 19-21) Hem i wantem se oli askem kwestin, mo hem i lesin gud taem oli talemaot tingting blong olgeta. (Mat. 16:13-16) Olsem ol tri we oli gru long wan gudfala ples, ol disaepol oli harem gud mo karem frut. Oli lesin gud taem Jisas i tijim olgeta, mo oli karem frut taem oli mekem ol gudfala wok.
Fren gud wetem ol narafala mo mekem i isi blong oli toktok long yu
Wok wetem strong tingting
Gat tingting daon mo wokhad *
11. ?Wanem ol kwestin we yu yu mas tingbaot?
11 ?Olsem wanem? ?I gat sam man we oli stap aninit long yu? Sipos yes, i gud yu askem se: ‘?Mi mekem wanem fasin long ples blong wok mo long haos? ?Mi mekem se ol narafala oli glad blong stap wetem mi? ?Mi mi pulum olgeta blong oli askem kwestin? ?Mi mi lesin gud taem oli talemaot tingting blong olgeta?’ Yumi no wantem kam olsem ol Farisi, taem oli kros long ol man we oli askem kwestin, mo oli tok nogud long olgeta we oli gat defren tingting.—Mak 3:1-6; Jon 9:29-34.
‘BAMBAE YU HAREM GUD’
12-14. ?From wanem yumi harem gud blong mekem wok ya we Jisas i givim?
12 ?From wanem yumi harem gud blong mekem wok ya we Jisas i givim long yumi? I gat plante risen, be bambae yumi tokbaot sam nomo.
13 Ol gudfala elda oli lukaot long yumi. Jehova i hae olgeta, be hem i no mekem bigfala bos long yumi. Hem i glad long ol wok blong yumi mo i talem tangkiu. (Hib. 6:10) Mo tu, hem i givim paoa long yumi blong mekem wok ya. (2 Kor. 4:7; Gal. 6:5, futnot) King blong yumi, Jisas, i soemaot fasin we yumi mas mekem long ol narafala. (Jon 13:15) Mo ol elda we oli lukaot long yumi oli traehad blong folem eksampol blong Jisas, “bigfala man blong lukaot long sipsip.” (Hib. 13:20; 1 Pita 5:2) Oli mekem bes blong olgeta blong soemaot kaen fasin, leftemap tingting, mo oli gat strong tingting blong tijim yumi mo lukaot gud long yumi.
14 Yumi gat ol gudfala fren. Ol narafala man oli no gat ol gudfala fren blong wok wetem, olsem yumi. Traem tingbaot: Yumi wok wetem ol brata mo sista we oli gat nambawan fasin mo oli no ting se oli gud moa long yumi. Oli gat gudhan blong mekem plante samting, be oli luk ol narafala se oli gud moa long olgeta. Oli tingbaot yumi olsem ol gudfala fren, i no ol man blong wok nomo. !Mo oli lavem yumi tumas, mekem se oli rere blong ded from yumi!
15. ?Wanem tingting blong yumi long wok we yumi mekem?
15 Yumi gat wan gudfala wok. Yumi tijim ol man long trutok long saed blong Jehova, mo yumi soemaot se Setan i man blong giaman. (Jon 8:44) Setan i mekem ol man oli karem ol hevi samting, taem hem i talem ol giaman toktok we i daonem olgeta. Hem i talem se Jehova i no save fogivim sin blong yumi mo i no save lavem yumi. !Hemia wan giaman toktok we i spolem gud ol man! Samting we i tru se, taem yumi “kam long” Jisas, Jehova i fogivim ol sin blong yumi, mo hem i lavem yumi tumas. (Rom 8:32, 38, 39) !Yumi harem gud tumas blong tijim ol man blong trastem Jehova, mo mekem laef blong olgeta i kam gud moa!
GOHED BLONG HAREM GUD ANINIT LONG YOK BLONG JISAS
16. ?Olsem wanem wok we Jisas i givim i defren long ol narafala hevi samting we yumi karem?
16 Wok we Jisas i givim long yumi i defren long ol narafala hevi samting we yumi karem. Traem tingbaot taem yumi wok wan fuldei blong kasem mane. Long en blong dei, yumi taed mo yumi no glad. Be taem yumi mekem wok blong Jehova mo Jisas, yumi glad tumas. Afta we yumi wok wan fuldei blong kasem mane, yumi taed mo maet yumi mas fosem yumi nomo blong go long miting long naet. Be taem yumi kambak long haos, yumi harem gud mo yumi kasembak paoa. Sem mak taem yumi go prij mo mekem prapa Baebol stadi blong yumi. !Blesing we yumi kasem i bigwan moa i bitim paoa we yumi yusum!
17. ?From wanem yumi mas skelem gud samting we yumi wantem mekem?
17 Yumi no gat paoa blong mekem evri samting. Taswe yumi mas skelem gud samting we yumi wantem mekem. Maet yumi stap westem paoa blong yumi blong hivimap ol sas samting. Be makem gud samting we i Jisas i talem long wan yang rijman, we i askem se: “?Mi mas mekem wanem blong mi kasem laef we i no save finis?” Man ya i stap obei long Loa finis. Ating hem i wan gudfala man from we Gospel blong Mak i talem se Jisas i “lavem hem tumas.” Jisas i talem long man ya se: “Yu go, yu salemaot olgeta samting blong yu, mo yu kam, yu biaen long mi.” Man ya i wantem folem Jisas, be hem i no save lego “plante samting” we hem i gat. (Mak 10:17-22) Taswe, hem i no putum yok blong Jisas long solda blong hem, be hem i jus blong kam wan slef blong “mane.” (Mat. 6:24) Sipos yu, ?bambae yu jusum wanem?
18. ?Sam samtaem i gud yumi mekem wanem? ?From wanem?
18 Sam samtaem i gud yumi jekem samting we yumi stap putum long fasples long laef blong yumi. ?From wanem? From we yumi wantem meksua se yumi stap yusum gud paoa blong yumi. Wan yangfala man, nem blong hem Mak, i talem se: “Mi paenia plante yia finis mo mi ting se laef blong mi i no fasfas. Be oltaem mi stap tingbaot mane, mo olsem wanem blong gat plante samting blong mekem laef blong mi i isi moa. Mi no kasem save from wanem mi harem se laef blong mi i had. Nao wan dei mi luksave se mi stap putum ol samting we mi mi wantem long fasples, mo mi givim taem mo paoa we i stap nomo i go long Jehova.” Mak i jenisim tingting mo laef blong hem, blong i gat moa taem blong mekem wok blong Jehova. Hem i se: “Samtaem mi wari yet long saed blong mane, be Jehova mo Jisas i givhan long mi blong mi winim ol hadtaem, mo blong mi putum tingting blong mi long wok blong Jehova fastaem.”
19. ?From wanem i impoten blong holem stret tingting?
19 Bambae yumi gohed blong harem gud aninit long yok blong Jisas sipos yumi mekem tri samting. Faswan, yumi mas holem stret tingting. From we yumi mekem wok blong Jehova, yumi mas mekem long fasin we Jehova i wantem. Yumi ol wokman nomo, Jehova nao i Masta. (Luk 17:10) Sipos yumi traem mekem wok blong hem long fasin we yumi wantem, bambae yumi harem nogud blong karem yok blong Jisas. Nating se wan buluk i gat bigfala paoa, be sipos hem i no letem masta i kontrolem yok we i stap long solda blong hem, bambae hem i kasem kil mo i kam taed. Sipos yumi letem Jehova i lidim yumi, yumi save mekem bigfala wok, mo winim samting we yumi ting se yumi no naf blong winim. !Oltaem yumi mas tingbaot se i no gat man we i save blokem samting we Jehova i wantem!—Rom 8:31; 1 Jon 4:4.
20. ?Yumi mas wok wetem wanem tingting blong karem yok blong Jisas?
Jon 6:25-27, 51, 60, 66; Fil. 3:18, 19) Be olgeta we oli mekem wok blong God from we oli lavem hem mo oli lavem ol man raonabaot long olgeta, oli stap glad mo oli karem yok blong Jisas blong ful laef blong olgeta long wol ya, wetem janis blong go long heven blong rul wetem Jisas. Yumi tu, bambae yumi glad sipos yumi wok wetem stret tingting blong karem yok blong Jisas.
20 Seken samting, yumi mas wok wetem stret tingting. Yumi wantem leftemap nem blong Papa blong yumi Jehova. Ol man long taem blong Jisas we oli griri mo oli wantem kasem samting blong olgeta nomo, oli no glad mo oli lego yok blong Jisas. (21. Folem Matiu 6:31-33, ?yumi save se Jehova bambae i mekem wanem?
21 Namba tri samting, yumi mas tingbaot se Jehova bambae i givhan. Yumi jusum wan fasin blong laef we yumi rere blong lego plante samting mo yumi wok had. Jisas i givim woning se plante man bambae oli agensem yumi mo mekem i nogud long yumi. Be yumi mas tingbaot se Jehova bambae i givim paoa long yumi blong stanap strong mo winim ol hadtaem. Mo taem yumi stanap strong, yumi kasem moa paoa. (Jem. 1:2-4) Yumi mas tingbaot tu se Jehova bambae i givim ol samting we yumi nidim, Jisas bambae i lidim yumi olsem wan man blong lukaot long sipsip, mo ol brata mo sista bambae oli leftemap tingting blong yumi. (Ridim Matiu 6:31-33; Jon 10:14; 1 Tes. 5:11) !Yumi gat evri samting we yumi nidim blong stanap strong!
22. ?Yumi glad tumas long wanem?
22 Woman ya we Jisas i tekemaot sik blong hem, i harem gud wantaem nomo. Be blong harem gud olwe, hem i mas kam wan disaepol blong Kraes. ?Yu ting se hem i mekem olsem? !Sipos hem i putum yok blong Jisas long solda blong hem, hem i save kasem blesing blong rul wetem Jisas long heven! Ol samting we woman ya i lego blong folem Jisas, i nating nomo taem yumi tingbaot blesing ya we hem i save kasem. Nating se bambae yumi laef long heven o long wol, be yumi glad tumas se yumi obei finis long tok ya blong Jisas se: “!Kam long mi!”
SINGSING 13 Yumi Folem Fasin Blong Kraes
^ par. 5 Jisas i singaot yumi i kam long hem. ?Olsem wanem blong kam long hem? Stadi ya bambae i ansarem kwestin ya, mo bambae i mekem yumi tingbaot olsem wanem yumi save harem gud mo kasembak paoa taem yumi wok wetem Jisas.