1-2. ?Olsem wanem Prija 11:6 i joen wetem wok blong prij?

LONG sam kantri, ol man oli glad blong harem gud nius. !Hemia nao samting we oli wantem tumas! Long sam narafala kantri, ol man oli no intres long God o Baebol. ?Olsem wanem long ol manples blong yu? Nomata se i olsem wanem, Jehova i wantem se yumi gohed blong prij kasem we hem i talem se wok ya i finis.

² Long taem we Jehova i makemaot, wok blong prij bambae i finis mo “en bambae i kam.” (Mat. 24:14, 36) Be bifo we i kam, ?olsem wanem yumi save obei long tok ya se “no letem han blong yu i spel”? *—Ridim Prija 11:6.

3. ?Bambae yumi tokbaot wanem long stadi ya?

³ Las stadi i tokbaot fo samting we i givhan long yumi blong mekemgud wok ya blong “pulum man.” (Mat. 4:19) Be stadi ya bambae i tokbaot tri rod we i save mekem yumi gat strong tingting blong prij, nating se yumi fesem ol defren situesen. Bambae yumi lanem from wanem i impoten blong (1) putum tingting long wok ya nomo, (2) gat longfala tingting, mo (3) holemtaet strong bilif.

4. ?From wanem yumi mas putum tingting blong yumi long wok ya nomo we Jehova i givim?

⁴ Jisas i tokbaot ol samting we bambae oli makemaot ol las dei, mo we oli save pulum tingting blong ol man blong hem, nao oli no moa mekem wok blong prij. Hem i talem long ol disaepol blong hem se oli mas “gohed blong lukaot gud.” (Mat. 24:42) Tede, yumi stap fesem ol semfala samting we oli blokem ol man long taem blong Noa, blong oli no  lesin long woning we hem i talemaot. (Mat. 24:37-39; 2 Pita 2:5) Taswe, yumi wantem putum tingting blong yumi long wok ya nomo we Jehova i givim long yumi.

5. Folem Ol Wok 1:6-8, ?wok blong prij bambae i bigwan olsem wanem?

⁵ Tede, i impoten tumas we yumi putum tingting long wok blong talemaot Kingdom. Jisas i talemaot se afta long ded blong hem, wok ya bambae i gohed mo i kam bigwan moa. (Jon 14:12) Afta we Jisas i ded, sam long ol disaepol blong hem oli gobak fising. Mo afta we hem i laef bakegen, hem i mekem merikel nao sam disaepol blong hem oli kasem plante fis. Hem i yusum janis ya blong talemaot long olgeta se, wok ya blong pulum man i impoten moa long eni narafala wok. (Jon 21:15-17) Jes bifo we Jisas i go antap long heven, hem i talem long ol disaepol blong hem se wok blong witnes we hem i statem, bambae i go kasem ol narafala kantri aotsaed long Isrel. (Ridim Wok 1:6-8.) Plante yia afta, Jisas i soem wan vison long aposol Jon, blong soemaot wanem bambae i hapen “long dei blong Masta.” * Jon i luk plante samting, mo wan long olgeta, hemia: Enjel i stap lidim wok ya blong “talemaot gud nius ya we i blong stap olwe, . . . long olgeta kantri, long olgeta traeb, long olgeta lanwis, mo long olgeta grup blong man.” (Rev. 1:10; 14:6) I klia se tede wil blong Jehova, hemia se yumi joen long bigfala wok ya blong witnes go kasem we i finis.

6. ?Olsem wanem yumi save putum tingting i stap nomo long wok blong prij?

⁶ Tingting blong yumi i save stap nomo long wok blong prij, sipos yumi tingbaot samting we Jehova i mekem blong halpem yumi. Eksampol, hem i givim plante kakae long spirit, tru long ol buk we oli printim mo long Intenet, ol odio mo video rikoding, mo brodkasting. Tingbaot:  !Long websaet blong yumi, i gat ol infomesen long bitim 1,000 lanwis! (Mat. 24:45-47) Politik, jos, mo bisnes i seraotem ol man long wol ya, be bitim eit milian man blong God oli joengud olsem wan famle nomo long fulwol. Eksampol, long Fraede 19 Eprel 2019, ol Witnes raon long fulwol oli joengud blong mekem vas blong dei. Long sapa blong hem, 20,919,041 man oli joen blong mekem Memoriol blong ded blong Jisas. Hemia i wan merikel we yumi luk mo yumi joen long hem. Mo samting ya i pulum yumi blong putum tingting i stap nomo long wok blong talemaot Kingdom.

7. ?Olsem wanem eksampol blong Jisas i halpem yumi blong putum tingting i stap nomo long wok blong prij?

⁷ Wan narafala rod blong putum tingting i stap nomo long wok blong prij, hemia blong folem eksampol blong Jisas. Hem i no letem eni samting i blokem hem blong talemaot trutok. (Jon 18:37) Taem Setan i wantem givim “olgeta kantri long wol, wetem ol flas samting we oli gat,” Jisas i no letem samting ya i pulum hem. Mo tu, taem ol narafala oli wantem putumap hem i king, hem i no foldaon long trap ya. (Mat. 4:8, 9; Jon 6:15) Ol rij samting oli no pulum tingting blong hem, mo hem i no lego taem ol man oli agensem hem bigwan. (Luk 9:58; Jon 8:59) Taem samting i traem bilif blong yumi, yumi save putum tingting i stap nomo long wok blong prij, sipos yumi tingbaot advaes blong aposol Pol. !Hem i talem long ol Kristin blong oli folem eksampol blong Jisas, olsem nao oli no save ‘kam taed mo lego’!—Hib. 12:3.

8. ?Wanem ya longfala tingting? ?Mo from wanem yumi nidim tede?

⁸ Longfala tingting i mekem man i naf blong stap kwaet mo wet blong wan situesen i jenis. Nomata se yumi stap wet blong wan nogud samting i finis, o blong wan samting we yumi wantem tumas i kamtru, be yet yumi nidim longfala tingting. Profet Habakuk i wantem tumas se raf fasin long Juda i finis. (Hab. 1:2) Ol disaepol blong Jisas oli wantem tumas se Kingdom i “kamtru naoia nomo,” blong tekemaot olgeta long strong rul blong Rom. (Luk 19:11) Yumi wantem tumas se Kingdom blong God i tekemaot rabis fasin, mo i putum niufala wol we stret fasin nomo i stap long hem. (2 Pita 3:13) Be, yumi gat longfala tingting mo wet long stret taem we Jehova i makemaot. Tingbaot sam rod we Jehova i tijim yumi blong gat longfala tingting.

9. ?Wanem i soem se Jehova i gat longfala tingting?

⁹ Jehova i soemaot nambawan eksampol long fasin ya blong gat longfala tingting. Hem i letem inaf taem long Noa blong i bildim bigfala sip, mo blong i wok olsem “prija blong stret fasin.” (2 Pita 2:5; 1 Pita 3:20) Jehova i lesin long Ebraham taem hem i stap askem plante kwestin long hem, from desisen blong Hem blong distroem ol rabis man long Sodom mo Gomora. (Jen. 18:20-33) Blong plante handred yia, Jehova i rili soem longfala tingting long nesen blong Isrel we oli no stap tru long hem. (Neh. 9:30, 31) Tede, yumi luk longfala tingting blong Jehova, taem hem i givim inaf taem long ol man we hem i pulum olgeta blong “oli tanem tingting blong olgeta.” (2 Pita 3:9; Jon 6:44; 1 Tim. 2:3, 4) From we Jehova i gat longfala tingting olsem, yumi tu yumi mas gat longfala tingting taem yumi gohed blong prij mo tij. Mo tu, hem i yusum wan pijatok long Baebol, blong tijim yumi blong gat longfala tingting.

10. Folem Jemes 5:7, 8, ?fama ya i soem wanem gudfala eksampol?

 ¹⁰ Ridim Jemes 5:7, 8. Eksampol blong fama ya i tijim yumi blong gat longfala tingting. I tru se sam plant oli save gru hariap. Be bighaf blong ol plant, speseli olgeta we oli save karem frut, oli tektaem moa blong frut blong olgeta i rere. Long Isrel, i nidim sikis manis blong ol kakae oli gru mo rere. Fama i planem ol sid blong hem afta long ol faswan ren long taem we ol lif oli folfoldaon, mo i tekemaot kakae afta long ol laswan ren long taem we ol tri oli putum flaoa. (Mak 4:28) Yumi waes sipos yumi gat longfala tingting olsem fama ya. Be maet i no isi blong mekem olsem.

11. ?Longfala tingting i save halpem yumi olsem wanem long wok blong prij?

¹¹ Plante taem, yumi ol sinman yumi wantem kasem risal blong ol hadwok blong yumi kwiktaem. Be yet, sipos yumi wantem se i gat kakae long garen blong yumi, yumi mas wok long hem oltaem, yumi digim graon, yumi planem sid, yumi pulumaot gras, mo yumi wotarem. Long sem fasin, blong pulum man i kam disaepol, yumi mas gohed blong wok had. I tekem taem blong pulumaot rabis tingting ya blong no kea o no laekem man, long hat blong ol man we yumi stap tijim. Longfala tingting bambae i halpem yumi blong no harem nogud taem ol man oli no lesin. Mo taem ol man oli lesin, yumi mas gat longfala tingting yet. Yumi no save fosem wan Baebol studen blong i bilif. Samtaem ol disaepol blong Jisas tu oli slo blong kasemsave long ol tijing blong hem. (Jon 14:9) Maet yumi planem mo wotarem, be i gud blong tingbaot se God nao i mekem i gru.—1 Kor. 3:6.

12. ?Olsem wanem blong gat longfala tingting taem yumi prij long ol famle we oli no bilif?

¹² Maet i had moa blong gat longfala tingting taem yumi prij long ol famle we oli no bilif. Rul we i stap long Prija 3:1, 7 (NW) i save givhan long yumi. Hem i talem se: “I gat taem blong stap kwaet, mo i gat taem  blong toktok.” Yumi save letem ol gudfala fasin blong yumi i givim witnes, be yumi rere oltaem tu blong tokbaot trutok taem i gat janis. (1 Pita 3:1, 2) Yumi gat longfala tingting long olgeta man, ol famle blong yumi tu, taem yumi wok strong blong prij mo tij.

13-14. ?Wanem sam eksampol blong longfala tingting we yumi save folem?

¹³ Yumi save lanem longfala tingting long stori blong ol gudfala man long Baebol mo blong tede tu. Habakuk i wantem tumas se rabis fasin i finis, be hem i talem wetem strong tingting se: “Bambae mi gohed blong stanap long ples we mi stap gad long hem.” (Hab. 2:1, NW) Aposol Pol i talemaot se hem i wantem tumas blong “finisim” minista wok blong hem. Be wetem longfala tingting, hem i gohed blong “talemaot gud nius ya long olgeta ples.”—Wok 20:24.

¹⁴ Tingbaot eksampol blong wan mared kapol we oli graduet long Gilead. Tufala i go wok long wan kantri we i no gat plante Witnes, mo i no wan Kristin kantri. I no gat plante man i wantem stadi Baebol. Hemia i defren long ol narafala we oli graduet tugeta mo oli go wok long ol nara kantri. Olgeta oli tokbaot ol gudfala ekspiriens we i soem se ol Baebol stadi blong olgeta oli gohed gud. Nating se ol man oli no lesin, be tufala i gohed wetem longfala tingting long minista wok blong tufala. I luk olsem se teritori blong tufala i no save karem frut, be afta long eit yia, tufala i glad tumas blong luk wan Baebol studen blong tufala i baptaes. ?Ol eksampol ya blong bifo mo tede, oli soemaot wanem? Olgeta ya we oli stap tru, oli no kam les o letem han blong olgeta i spel, mo Jehova i blesem olgeta from we oli gat longfala tingting. I gud yumi “folem fasin blong olgeta ya we oli kasem ol samting we God i promes blong givim, from we oli bilif mo oli gat longfala tingting.”—Hib. 6:10-12.

15. ?Wanem faswan rod we bilif i save mekem yumi gat strong tingting blong prij?

¹⁵ Yumi bilif long mesej we yumi talemaot, taswe yumi wantem tumas blong serem long plante moa man. Yumi trastem ol promes blong Baebol. (Sam 119:42; Aes. 40:8) Yumi luk ol profet tok blong Baebol oli stap kamtru tede. Yumi luk olsem wanem laef blong ol man i kamgud moa taem oli folem ol advaes blong Baebol. Samting ya i mekem yumi bilif strong se gud nius blong Kingdom i wan mesej we evriwan i mas harem.

16. Folem Ol Sam 46:1-3, ?olsem wanem Jehova mo Jisas i mekem yumi gat strong tingting blong prij?

¹⁶ Mo tu, yumi bilif long Jehova we i Stamba blong mesej we yumi stap talemaot. Mo yumi bilif long Jisas we God i putumap hem i King long Kingdom. (Jon 14:1) Nomata wanem yumi fesem, Jehova bambae i stap oltaem olsem ples blong haed mo paoa blong yumi. (Ridim Ol Sam 46:1-3.) Mo tu, yumi bilif strong se Jisas we i stap long heven, i yusum paoa mo raet we Jehova i givim long hem, blong lidim wok blong prij.—Mat. 28:18-20.

17. ?From wanem yumi mas gohed blong prij? Talem wan ekspiriens.

¹⁷ Bilif i mekem we yumi trastem se Jehova bambae i blesem traehad blong yumi, samtaem long ol rod we yumi no tingbaot nating. (Pri. 11:6) Eksampol, evri dei plante taosen man oli wokbaot mo oli luk ol buk blong yumi long ol tebol mo troli. ?Fasin ya blong prij i wok gud? !Yes! Kingdom Wok Blong Yumi blong Novemba 2014, i tokbaot ekspiriens blong wan yangfala studen  blong yunivesiti, we i wantem raetem wan risej long saed blong ol Witnes Blong Jehova. Hem i no save faenem wan Haos Kingdom, be i faenem wan tebol we ol buk blong yumi i stap long hem, long eria blong skul, mo i faenem stret infomesen we hem i nidim. Sam taem biaen, hem i baptaes mo i kam wan Witnes, mo naoia hem i wan fultaem paenia. Ol stori olsem, oli pulum yumi blong gohed blong prij, from we oli soem se i gat sam man yet we oli nidim blong faenem mo harem mesej blong Kingdom.

18. ?From wanem yumi sua se wok blong prij bambae i finis long stret taem we Jehova i wantem?

¹⁸ Yumi save sua se wok blong talemaot Kingdom bambae i finis long stret taem. Tingbaot samting we i hapen long taem blong Noa. Jehova i pruvum se hem i God Blong Mekem Samting Long Stret Taem. Samwe 120 yia bifo, Jehova i putum finis stret taem blong Bigfala Wota i ron. Plante yia afta, Jehova i talem long Noa blong i bildim wan bigfala sip. Mo maet 40 o 50 yia bifo we Bigfala Wota i ron, Noa i gohed blong wok strong. Nating se ol man oli no wantem lesin long hem, be hem i gohed blong talemaot woning go kasem we Jehova i talem se i taem blong tekem ol animol i go insaed long sip. Nao long stret taem ya, Jehova i “satem doa.”—Jen. 6:3; 7:1, 2, 16.

19. ?Sipos yumi no letem han blong yumi i spel, bambae yumi kasem wanem?

¹⁹ Klosap nao Jehova bambae i mekem wok blong talemaot Kingdom i finis. Bambae hem i “satem doa” blong rabis wol ya blong Setan, mo i openem doa blong niufala wol i kam, we stret fasin i stap long hem. Be go kasem taem ya, i gud yumi folem fasin blong Noa, Habakuk, mo ol narafala we oli no letem han blong olgeta i spel. I gud yumi putum tingting blong yumi i stap nomo long wok blong prij, yumi gat longfala tingting, mo yumi holemtaet bilif long Jehova mo ol promes blong hem.