1-2. ?Profet Hagae i talemaot se wanem bambae i hapen long taem blong yumi?

LONG 2015 i gat wan bigfala etkwek long Nepal. Sam man we oli stap long taem ya oli talem se: “Wantaem nomo ol stoa mo ol olfala bilding oli stap folfoldaon.” “Ol man oli konfius . . . Plante man oli talem se graon i seksek blong tu minit olsem, be long mi i luk olsem foreva.” Sipos wan nogud samting olsem i bin hapen long yu, maet bambae i had blong yu fogetem.

² Tede, yumi stap ekspiriensem wan semfala samting olsem, be hem i no jes seksekem wan taon o wan kantri nomo, hem i stap seksekem olgeta nesen mo i stap gohed olsem blong plante yia finis. Profet Hagae i bin tokbaot samting ya, i se: “Hemia samting we Jehova komanda blong ol ami i talem, i se: ‘Wan moa taem bakegen, smol taem nomo yet, mo bambae mi seksekem heven mo wol mo solwota mo drae graon.’”—Hag. 2:6.

3. ?Olsem wanem samting we Hagae i tokbaot i defren long wan trufala etkwek?

³ Samting we Hagae i tokbaot i no olsem wan trufala etkwek we i spolem ol samting nomo. Be hem i mekem sam gudfala samting i hapen. Jehova hem wan i talem se: “Bambae mi seksekem olgeta nesen, nao ol gudgudfala samting blong olgeta nesen bambae oli kam insaed, mo bambae haos blong mi i fulap long glori.” (Hag. 2:7) ?Profet tok ya i minim wanem long ol man we oli laef long taem blong Hagae? ?Mo i minim wanem long yumi tede? Long stadi ya bambae yumi tokbaot ansa blong ol kwestin ya, mo tu bambae yumi luk olsem wanem yumi stap joen long wok ya blong seksekem ol nesen tede.

4. ?From wanem Jehova i sanem profet Hagae i go long ol man blong hem?

⁴ Jehova i givim wan impoten wok long profet Hagae blong i mekem. Long 537 B.K.T. Hagae i bin folem ol man ya we oli aot long Babilon blong gobak long Jerusalem. Smoltaem afta we oli kasem Jerusalem, oli stat blong bilding fandesen blong haos blong Jehova o tempol. (Esra 3:8, 10) Be smoltaem afta, wan nogud samting i hapen. Tingting blong olgeta i foldaon mo oli stop blong wokem tempol from we ol man oli agensem olgeta. (Esra 4:4; Hag. 1:1, 2) So long 520 B.K.T., Jehova i talem long Hagae blong i mekem ol man oli gat strong tingting mo enkarejem olgeta blong oli finisim tempol. *—Esra 6:14, 15.

5. ?Mesej we Hagae i talemaot i givhan olsem wanem long ol man blong God?

⁵ Mesej we Hagae i talemaot i blong mekem ol man Jiu oli bilif strong moa long Jehova. Hem i gat strong tingting blong talem long ol man Jiu ya we tingting blong olgeta i foldaon se: “‘Olgeta man long ples ya, yufala i mas strong’ hemia nao tok blong Jehova, ‘mo yufala i wok. From mi mi stap wetem yufala,’ hemia nao tok blong Jehova komanda blong ol ami.” (Hag. 2:4) I sua se tok ya “Jehova i komanda blong ol ami” i mekem olgeta oli gat strong tingting bakegen. Jehova i gat wan bigfala ami blong ol enjel we oli stap folem ol oda blong hem, taswe ol man Jiu oli mas dipen long hem blong oli save win.

6. ?Wanem bambae i kamaot from samting we Hagae i tokbaot?

⁶ Jehova i sanem Hagae blong i talemaot long ol man Jiu se bambae hem i seksekem ol nesen. Vison ya i enkarejem ol man we oli stop blong wokem tempol, se Jehova bambae i seksekem Pesia we i wol paoa long taem ya. ?Mo wanem bambae i kamaot from? Fastaem, ol man blong God bambae oli finisim wok ya blong bildim tempol. Biaen ol man blong narafala nesen bambae oli joen wetem olgeta blong wosipim Jehova long tempol ya we oli wokem bakegen. !Mesej ya i rili enkarejem ol man blong God!—Sek. 8:9.

7. ?Tede yumi stap joen long wanem wok? Yu eksplenem.

⁷ ?Profet tok blong Hagae i minim wanem long yumi tede? Bakegen Jehova i stap seksekem ol nesen, mo naoia yumi joen wetem hem long wok ya. Traem tingbaot: Long 1914, Jehova i putumap Jisas olsem King long Kingdom blong Hem long heven. (Sam 2:6) Taem Kingdom ya i stat blong rul, hemia i wan rabis nius long ol lida blong wol. Hemia i minim se “stret taem blong ol nesen,” hemia period ya we i no gat wan rula i rul long nem blong Jehova, i finis o i kasem en blong hem. (Luk 21:24) From samting ya nao, speseli long yia 1919, ol man blong Jehova oli stap talemaot se Kingdom blong God nomo i save stretem ol trabol blong ol man. Wok ya blong talemaot “gud nius ya blong Kingdom” i seksekem fulwol.—Mat. 24:14.

8. Folem Ol Sam 2:1-3, ?wanem tingting blong bighaf blong ol nesen long mesej we yumi stap talemaot?

⁸ ?Wanem tingting blong ol man long mesej ya? Bighaf blong ol man oli no glad. (Ridim Ol Sam 2:1-3.) Ol nesen oli kam kros, mo oli no akseptem rula ya we Jehova i putumap. Long tingting blong olgeta, mesej ya blong Kingdom we yumi stap talemaot, i no wan “gud nius.” !Sam gavman oli blokem wok blong prij! Nating se plante long ol rula oli talem se oli mekem wok blong God, be oli no  wantem lego paoa mo otoriti blong olgeta. Taswe, olsem ol rula long taem blong Jisas, ol rula tede oli agensem Man ya we Jehova i putumap, taem oli atakem ol man we oli biaen long hem.—Wok 4:25-28.

9. ?Wanem tingting blong Jehova long ol nesen we oli no glad?

⁹ ?Wanem tingting blong Jehova long ol nesen ya we oli no glad? Ol Sam 2:10-12 i ansa se: “Taswe ol king, naoia yufala i mas soemaot se yufala i gat hed. Ol jaj blong wol, yufala i mas akseptem we man i stretem yufala. Yufala i wok blong Jehova, we yufala i fraet long hem. Mo yufala i glad mo yufala i mas seksek tu. Yufala i ona long pikinini ya, sipos no, God bambae i kros, nao bambae yufala i lus nomo long rod ya, from we kros blong Hem i olsem faea we i laet kwiktaem nomo. Olgeta we oli glad, hemia olgeta we oli stap go long Hem blong haed.” Jehova i kaen mo i givim janis long olgeta blong oli mekem stret desisen. Oli gat taem yet blong jenisim tingting blong olgeta mo akseptem Kingdom blong Jehova. Be i no gat tumas taem i stap yet. Yumi stap laef “long ol las dei” blong sistem blong wol ya. (2 Tim. 3:1; Aes. 61:2) Naoia i impoten tumas we ol man oli mas save trutok mo jusum blong wosipim Jehova.

10. Folem Hagae 2:7-9, ?wanem gudfala samting bambae i kamaot from wok ya we i seksekem fulwol?

¹⁰ Sam man oli glad from samting ya we Hagae i bin talemaot. Hem i talem se from we fulwol bambae i seksek, “ol gudgudfala samting blong olgeta nesen [ol man we hat blong olgeta i stret] bambae oli kam” blong wosipim Jehova. * (Ridim Hagae 2:7-9.) Aesea mo Maeka tu i bin talemaot se sem samting ya bambae i hapen “long ol las dei.”—Aes. 2:2-4, futnot; Maeka 4:1, 2, futnot.

11. ?Ken i mekem wanem taem hem i jes harem mesej blong Kingdom?

¹¹ Traem luk olsem wanem mesej ya we i seksekem ol nesen i gat paoa long wan brata we nem blong hem Ken we i wok long hedkwota.  Hem i tingbaot gud yet faswan taem we hem i harem mesej blong Kingdom, samwe 40 yia i pas. Ken i talem se: “Faswan taem we mi harem trutok blong Baebol, mi glad tumas blong lanem se yumi stap laef long ol lasdei blong sistem blong wol ya. Mi luksave se blong God i glad long mi mo blong mi save laef olwe, mi mas ronwe long ol nogud samting blong wol ya mo mi tekem saed blong Jehova. Nao mi prea long Jehova mo mi tekem aksen kwiktaem. Mi no moa sapotem wol ya mo mi ron i go haed long Kingdom blong God, we i no gat wan samting i save seksekem.”

12. ?Long ol lasdei, olsem wanem tempol blong Jehova long saed blong spirit i kam fulap?

¹² I klia nomo se Jehova i stap blesem ol man blong hem. Long ol lasdei ya, yumi luk we namba blong ol man we oli stap wosipim hem i kam antap bigwan. Long 1914, yumi no plante tumas, be naoia i gat moa long eit milian man we oli stap wosipim God, mo plante milian moa we oli stap joenem yumi evri yia blong mekem Memoriol. Long rod ya, yad blong tempol blong Jehova long saed blong spirit long wol ya, hemia plan blong tru wosip, i fulap wetem “ol gudgudfala samting blong ol nesen.” Mo tu, nem blong Jehova i kam antap moa taem oli werem niufala fasin.—Efes. 4:22-24.

13. ?Wanem sam narafala profet tok we oli kamtru from wok ya blong seksekem ol nesen? (Yu luk pija long fran pej.)

¹³ Ol samting ya oli mekem ol narafala profet tok tu oli kamtru, olsem hemia long Aesea 60. Long vas 22 blong japta ya i talem se: “Smolwan bambae i kam wan taosen mo hemia we i smol olgeta bambae i kam wan strong nesen. Mi Jehova, mi nao bambae mi mekem i spid long prapa taem blong hem.” From we plante moa man oli stat blong wosipim Jehova, wan gudfala samting i hapen. “Ol gudgudfala samting” o ol man ya oli kam wetem gudhan we oli gat blong mekem plante defren samting mo oli rere nomo blong talemaot “gud nius blong Kingdom.” From samting ya, Aesea i tokbaot gudhan blong olgeta se i olsem “melek blong ol nesen.” (Aes. 60:5, 16) Wetem help blong ol gudfala man mo woman ya, wok blong prij i stap gohed long 240 kantri, mo oli printim ol buk long bitim 1,000 lanwis.

14. ?Ol man oli mas mekem wanem desisen naoia?

¹⁴ Long ol lasdei ya, wok blong seksekem ol nesen i fosem ol man blong mekem wan desisen. ?Bambae oli sapotem Kingdom blong God, o bambae oli trastem ol gavman blong wol ya? Hemia i wan desisen we ol man oli mas mekem. Nating se ol man blong Jehova oli obei long ol loa blong gavman long ol kantri we oli stap long hem, be oli no joen nating long politik blong wol ya. (Rom 13:1-7) Oli save se Kingdom blong God nomo bambae i finisim ol trabol blong ol man. Mo Kingdom ya i no blong wol ya.—Jon 18:36, 37.

15. ?Buk blong Revelesen i tokbaot wanem traem we ol man blong God bambae oli kasem?

¹⁵ Buk blong Revelesen i talem se long ol lasdei bambae i gat ol samting we oli traem fasin blong ol man blong God blong holemstrong long hem. Ol samting ya bambae oli gohed blong kam strong moa, mo ol man bambae oli agensem mo mekem i nogud long yumi. Ol gavman blong wol ya bambae oli wantem se yumi wosipim olgeta, mo bambae oli mekem i nogud long ol man we oli no wantem sapotem olgeta. (Rev. 13:12, 15) Bambae oli “fosem olgeta man, hemia ol haeman mo ol man we oli no gat nem, ol rijman mo ol puaman, ol slef mo ol friman, se oli mas kasem mak long raethan blong olgeta mo long fored blong olgeta.” (Rev. 13:16) Long taem bifo, oli putum mak long ol slef blong soem se hu i masta blong olgeta. Long sem fasin, tede ol man bambae oli ekspektem evriwan blong oli soemaot se oli sapotem hu. Bambae oli wantem se tingting mo aksen blong evri man i soemaot se oli sapotem ol gavman blong wol ya.

16. ?From wanem naoia i impoten we yumi holemstrong moa long Jehova?

¹⁶ ?Olsem wanem? ?Bambae yumi akseptem mak ya mo yumi sapotem ol gavman blong wol ya? Olgeta we oli no wantem akseptem mak ya bambae oli kasem hadtaem mo oli stap long denja. Buk blong Revelesen i gohed se: “Man we i no gat mak ya long hem, hem i no save pem wan samting, mo i no save salem wan samting.” (Rev. 13:17) Be yumi save samting we God bambae i mekem long ol man ya we oli gat mak we Revelesen 14:9, 10 i tokbaot. Olgeta we oli no wantem akseptem mak ya, bambae oli raetem long han blong olgeta se, “Hemia i blong Jehova.” (Aes. 44:5) Naoia i taem we yumi mas meksua se yumi stap holemstrong long Jehova. !Olsem nao, Jehova bambae i glad tumas blong talem se yumi blong hem!

17. ?Yumi mas tingbaot wanem long saed blong longfala tingting blong Jehova?

¹⁷ Long ol lasdei ya, Jehova i stap soemaot se hem i gat longfala tingting. Hem i no wantem se wan man i ded. (2 Pita 3:9) Hem i givim janis long evri man blong oli tanem tingting blong olgeta, mo blong oli mekem stret desisen. Be longfala tingting blong hem i gat limit blong hem. Olgeta we oli no wantem sapotem Kingdom blong God, bambae oli kasem sem kaen trabol olsem Fero long taem blong Moses. Jehova i talem long Fero se: “Sipos mi wantem, mi save stretem han blong mi naoia mo panisim yu wetem ol man blong yu, mo aotem yu long wol ya. Be hemia risen from wanem mi letem yu yu stap laef: Blong mi soemaot paoa blong mi long yu, mo blong mi mekem ol man oli talemaot nem blong mi long fulwol.” (Eks. 9:15, 16) I no longtaem olgeta nesen bambae oli save se Jehova nomo i tru God. (Esik. 38:23) ?Olsem wanem samting ya bambae i hapen?

18. (1) ?Hagae 2:6, 20-22 i stap tokbaot wanem? (2) ?Olsem wanem yumi save se ol tok ya blong Hagae bambae oli kamtru long fiuja?

 ¹⁸ Plante yia afta we Hagae i ded, aposol Pol i raet i go long ol Kristin long Hibru blong soemaot long olgeta se ol tok long Hagae 2:6, 20-22 bambae oli kamtru long fiuja. (Ridim.) Pol i se: “Hem i promes se: ‘Bambae mi seksekem wol ya wan moa taem bakegen, mo bambae mi seksekem heven tu.’ Tok ya ‘wan moa taem’ i soemaot se God bambae i tekemaot ol samting we oli seksek, hemia ol samting we hem i no mekem, blong bambae ol samting we oli no seksek oli save stap.” (Hib. 12:26, 27) Samting we Pol i tokbaot i defren long samting we Hagae 2:7 i tokbaot. Pol i tokbaot samting we bambae i hapen blong distroem fulwan ol man we oli olsem Fero, we oli no wantem luksave se Jehova nomo i gat raet blong rul.

19. ?Wanem bambae i no seksek, mo olsem wanem yumi save samting ya?

¹⁹ ?Wanem bambae i no seksek o i no lus? Pol i gohed se: “Bambae yumi kasem wan Kingdom we i no save muvmuv, taswe yumi mas gohed blong mekem we God i kaen long yumi, nao yumi save mekem tabu wok blong hem we yumi fraet mo yumi respektem hem. Nao long fasin ya, hem i save glad long wok blong yumi.” (Hib. 12:28) !Afta we laswan wok ya blong seksekem ol nesen i finis, Kingdom blong God nomo bambae i stap we i no muv, mo bambae hem nomo i stanap strong blong olwe!—Sam 110:5, 6; Dan. 2:44.

20. ?Ol man oli mas mekem wanem desisen, mo olsem wanem yumi save halpem olgeta?

²⁰ !Taem i sot! Ol man oli mas mekem desisen se: ?Bambae oli gohed blong sapotem fasin blong laef we wol i stap leftemap we i blong go lus nomo, o bambae oli mekem laef blong olgeta i laenap wetem wil blong God, blong oli save laef olwe? (Hib. 12:25) Wok blong prij we yumi stap mekem, i save halpem ol man blong mekem wan stret desisen. I gud yumi gohed blong halpem plante moa man blong oli tekem saed blong Kingdom blong God. Mo i gud yumi gohed blong tingbaot ol tok ya blong Masta blong yumi Jisas, we i se: “Ol man bambae oli talemaot gud nius ya blong Kingdom long olgeta ples long wol, blong oli witnes long olgeta nesen, nao biaen en bambae i kam.”—Mat. 24:14.