1. ?Yu yu harem olsem wanem taem wan we yu lavem hem tumas i lego Jehova?

?I GAT wan we yumi lavem hem tumas long kongregesen i bin disfelosip? !I sua se hemia i mekem yu yu harem nogud tumas! Wan sista we nem blong hem Hilda, i talem se: “Taem hasban blong mi i ded afta we mitufala i bin mared blong 41 yia, mi harem nogud tumas, * be taem boe blong mi i lego kongregesen, waef mo ol pikinini blong hem oli safa moa i bitim mi.”

2-3. Folem Ol Sam 78:40, 41, ?Jehova i harem olsem wanem taem wan man blong hem i lego hem?

² !Jehova i harem nogud tumas taem sam memba blong famle blong hem oli tanem baksaed long hem! (Jud 6) Mo traem tingbaot olsem wanem hem i harem nogud taem i luk we ol man Isrel oli rebel agensem hem bakegen mo bakegen. (Ridim Ol Sam 78:40, 41.) Yumi sua tu se Papa blong yumi long heven i harem nogud tumas, taem wan we yumi lavem hem i lego hem. Hem i kasem save long harem nogud blong yu. Mo bambae hem i sapotem yu mo i leftemap tingting blong yu.

³ Long stadi ya, bambae yumi tokbaot samting we yumi save mekem blong kasem help blong Jehova, taem wan we yumi lavem hem i lego trutok. Mo tu bambae yumi tokbaot olsem wanem yumi save halpem ol narafala long kongregesen we oli stap gotru long trabol olsem. Be fastaem bambae yumi luk wan nogud tingting we yumi mas blokem.

4. ?Plante perens oli harem olsem wanem taem boe o gel blong olgeta i lego Jehova?

⁴ Taem wan pikinini i lego Jehova, plante taem ol perens oli  stap tingbaot se oli sud mekem sam moa samting blong halpem pikinini blong olgeta blong i stap long trutok. Brata Luk we boe blong hem i disfelosip, i talem se: “Mi blemem mi wan mo mi stap gat ol rabis drim long naet. Samtaem bae mi krae mo hat blong mi i soa.” Elisabet, wan sista we boe blong hem tu i disfelosip i talem se: “?Wanem samting nao mi mekem i rong? Mi harem olsem se mi no tijim gud boe blong mi blong i lavem Jehova.”

5. ?Sipos wan man i lego Jehova, hemia i fol blong hu?

⁵ Yumi mas tingbaot se Jehova i mekem we yumi wanwan i naf blong jus. Hemia i min se yumi save jusum se bambae yumi obei long hem o nogat. Sam yangfala, nating se perens blong olgeta i no soem gudfala eksampol, be oli jusum blong mekem wok blong Jehova mo holemstrong long hem. Sam narafala, perens blong olgeta i wok had blong tijim olgeta blong lavem Jehova, be biaen taem oli kam bigwan oli lego trutok. So i stap long yumi wanwan blong jusum se bambae yumi mekem wok blong Jehova o nogat. (Jos. 24:15) Taswe, ol perens we oli stap harem nogud from we pikinini blong olgeta i no moa wosipim Jehova, oli no mas ting se i fol blong olgeta.

6. ?Wanem filing blong ol yangfala we perens blong olgeta i lego trutok?

⁶ Samtaem, wan papa o mama i lego trutok mo iven famle blong hem. (Sam 27:10) Hemia i save mekem ol pikinini oli harem nogud tumas, antap moa sipos oli respektem mo luk perens blong olgeta olsem ol gudfala eksampol. Esta we papa blong hem i disfelosip i talem se: “Plante taem mi krae from we mi luksave se hem i no jes lego trutok nomo, be hem i jusum blong no moa wosipim Jehova. Mi lavem papa blong mi, so taem hem i disfelosip mi harem nogud tumas mo samtaem mi stap wari bitim mak.”

7. ?Wanem filing blong Jehova long wan yangfala we perens blong hem i disfelosip?

⁷ !Ol yangfala, sipos papa o mama blong yu i lego trutok, mifala tu i harem nogud wetem yu! Mo tu, yu save sua se Jehova i kasemsave taem yu harem nogud. Hem i lavem yu mo i glad we yu holemstrong long hem, mo mifala ol brata mo sista tu i glad long yu. Yu mas tingbaot tu se yu no gat fol from desisen we perens blong yu i mekem. Olsem yumi tokbaot finis, Jehova i mekem we yumi wanwan i save jus. Mo evri man we oli givim laef blong olgeta long Jehova mo oli baptaes, “oli gat prapa wok blong olgeta blong mekem.”—Gal. 6:5, futnot.

8. ?Ol famle oli save mekem wanem taem oli stap wet blong wan we oli lavem hem tumas i kambak long Jehova? (Yu luk bokis ya tu “ Kambak Long Jehova.”)

⁸ Taem wan we yu lavem hem tumas i lego Jehova, i stret nomo blong tingbaot se wan dei bambae hem i kambak long Jehova. ?Be naoia we i stap yu save mekem wanem? Yu save mekem bes blong yu blong mekem bilif blong yu i kam strong moa. Sipos yu mekem olsem, bambae yu soem gudfala eksampol long ol narafala memba blong famle mo maet long hemia tu we i disfelosip. Mo tu, bambae yu kasem paoa we yu nidim blong stanap strong tru long hadtaem ya we yu kasem. Naoia bambae yumi tokbaot olsem wanem yu save mekem bilif blong yu i stap strong.

9. ?Yu save mekem wanem blong holemtaet strong bilif? (Yu luk bokis ya tu “ Ol Vas Blong Halpem Yu Sipos Wan We Yu Lavem Hem i Lego Jehova.”)

⁹ Holemtaet wan gudfala program long saed blong spirit. I impoten tumas we yu mo narafala memba blong famle i gohed blong stanap strong. ?Olsem wanem blong mekem? Yu save kasem paoa long Jehova taem yu gat wan gudfala program blong ridim Baebol, tingting dip long hem, mo go long ol Kristin miting. Joana, we papa mo sista blong hem i lego trutok, i talem se: “Taem mi ridim stori blong ol man long Baebol olsem Abigel, Esta, Job, Josef, mo Jisas, hemia i halpem mi blong mi no wari tumas. Eksampol blong olgeta i leftemap tingting blong mi mo i halpem mi blong gat stret tingting. Mo ol original singsing blong yumi tu oli mekem mi haremgud.”

10. ?Olsem wanem Ol Sam 32:6-8 i halpem yumi blong stanap strong?

¹⁰ Talemaot ol wari blong yu long Jehova. Taem yu harem nogud, yu no mas stop blong prea long Jehova. Askem hem blong i halpem yu blong gat stret tingting long situesen ya, mo blong i ‘mekem se yu gat hed mo i tijim yu long rod we yu mas folem.’ (Ridim Ol Sam 32:6-8.) I tru, maet i no isi blong talemaot ol harem nogud blong yu long Jehova. Be hem i kasemsave ol samting we i stap long hat blong yu. Hem i lavem yu mo i wantem we yu talemaot olgeta samting we i stap long hat blong yu.—Eks. 34:6; Sam 62:7, 8.

11. Folem Hibru 12:11, ?from wanem yumi mas trastem fasin blong Jehova blong stretem man? (Yu luk bokis ya tu “ Disfelosip i Soemaot Lav Blong Jehova.”)

¹¹ Sapotem desisen blong ol elda. Taem wan man i disfelosip, hemia i wan haf blong arenjmen blong Jehova. Fasin blong hem blong stretem man i mekem i gud long yumi evriwan, inkludum hemia tu we i no moa wosipim Jehova.  (Ridim Hibru 12:11.) Maet samfala long kongregesen bambae oli talem se desisen we ol elda oli mekem i no stret, be plante taem oli no tokbaot rong we narafala ya i mekem. Yumi no gat evri save long saed blong bisnes ya, taswe i waes blong trastem desisen we ol elda oli mekem folem ol rul blong Baebol, mo blong oli jaj “long nem blong Jehova.”—2 Kron. 19:6.

12. ?Wanem gudfala samting i kamaot taem samfala oli folem arenjmen blong Jehova?

¹² Taem yumi sapotem desisen blong ol elda blong putumaot wan we yumi lavem hem, yumi save halpem hem blong i kambak long Jehova. Elisabet we yumi tokbaot hem finis i talem se: “I had blong no moa joen wetem boe blong mitufala. Be afta we hem i kambak long Jehova, hem i luksave se desisen ya blong putumaot hem i stret nomo, mo i lanem plante gudfala lesen from. Mi lanem se fasin blong Jehova blong stretem man, oltaem i stret.” Mak we i hasban blong Elisabet, i talem tu se: “Mi tingbaot we boe blong mitufala i talem se hem i wantem kambak. Wan risen hemia from we mitufala i no joen nating wetem hem. Mi glad tumas we Jehova i halpem mifala blong obei long hem.”

13. ?Wanem i save halpem yu taem yu harem nogud?

¹³ Toktok wetem ol fren we oli kasemsave long filing blong yu. Joen wetem ol Kristin we oli bigman long spirit blong oli save halpem yu blong gat stret tingting. (Prov. 12:25; 17:17) Joana we yumi tokbaot hem finis i talem se: “Long hat blong mi, mi harem se mi stap mi wan. Be taem mi toktok long ol fren we mi trastem olgeta, hemia i halpem mi bigwan.” ?Be olsem wanem sipos i gat samfala long kongregesen we oli stap talem ol samting we i mekem yu harem nogud moa?

14. ?From wanem yumi no mas ‘hareap blong kros mo glad blong fofogivim yumi’?

¹⁴ Gat longfala tingting long ol brata mo sista. Yumi no mas ting se evriwan bambae oli talem samting we i stret oltaem. (Jem. 3:2) Yumi evriwan i no stretgud, taswe yumi no mas sapraes se samfala oli no save wanem blong talem, o oli talem sam samting we i mekem yumi harem nogud, nating se oli no minim. Tingbaot advaes blong aposol Pol we i se: “Yufala i no mas hariap blong kros long yufala, mo yufala i mas glad blong fofogivim yufala nating sipos wan long yufala i gat risen blong komplen agens long narawan.” (Kol. 3:13) Wan sista we wan famle blong hem i disfelosip i eksplenem se: “Jehova i halpem mi blong fogivim ol brata we oli ting se oli stap halpem mi, be oli mekem mi harem nogud moa.” ?Kongregesen i save mekem wanem blong halpem ol memba blong famle olsem?

15. ?Wanem i save halpem olgeta we wan famle blong olgeta i jes disfelosip?

¹⁵ Yu kaen mo joen wetem ol memba blong famle we oli holemstrong. Wan sista we nem blong hem Miriam i talem se afta we brata blong hem i disfelosip, hem i fraet blong go long ol miting. Hem i se: “Mi fraet long samting we ol man bambae oli talem. Be i gat  plante brata mo sista we olgeta tu oli harem nogud, mo oli no talem eni nogud samting long saed blong brata blong mi. Mi talem tangkiu long olgeta from we mi luksave se i no mi wan nomo we mi harem nogud.” Wan narafala sista i talem se: “Afta we boe blong mitufala i disfelosip, ol gudfala fren oli kam blong leftemap tingting blong mifala. Samfala oli talem se oli no save wanem blong talem. Sam narafala oli krae wetem mi o oli raetem sam kad blong leftemap tingting. !Samting we oli mekem i givhan bigwan long mi!”

16. ?Olsem wanem kongregesen i save gohed blong sapotem olgeta we famle i disfelosip?

¹⁶ Gohed blong sapotem ol memba blong famle we oli holemstrong. Naoia oli nidim moa we yumi soemaot lav mo leftemap tingting blong olgeta. (Hib. 10:24, 25) Samtaem ol memba blong famle blong hemia we i disfelosip oli harem olsem se olgeta tu oli disfelosip, from we ol narafala long kongregesen oli no moa joen wetem olgeta. !Yumi no mas letem samting olsem i hapen! Ol yangfala we perens blong olgeta i lego trutok, oli nidim we yumi talem ol gudfala toktok blong enkarejem olgeta. Maria we hasban blong hem i disfelosip mo we i lego famle, i talem se: “Sam fren blong mi oli kam long haos, oli kuk mo oli halpem mi blong stadi wetem ol pikinini. Oli kasem save long trabol blong mi mo oli krae wetem mi. Oli difendem mi taem ol narafala oli talem ol giaman tok long saed blong mi. !Oli rili leftemap tingting blong mi!”—Rom 12:13, 15.

17. ?Ol elda oli save mekem wanem blong givhan long olgeta we oli harem nogud?

¹⁷ Ol elda, i gud yufala i yusum evri janis blong halpem ol memba blong famle we oli holemstrong, blong oli kam strong moa. Yufala i gat wan spesel wok, hemia blong sapotem olgeta we wan famle blong olgeta i lego Jehova. (1 Tes. 5:14) Tekem janis blong enkarejem olgeta bifo mo afta long miting. Visitim olgeta mo prea wetem olgeta. Prij wetem olgeta o invaetem olgeta blong joen wetem yufala long famle wosip. Ol elda oli mas soem sore long ol sipsip blong Jehova we oli harem nogud. Oli mas kea mo soem lav long olgeta.—1 Tes. 2:7, 8.

18. Folem 2 Pita 3:9, ?God i wantem se olgeta we oli lego trutok oli mekem wanem?

¹⁸ Jehova “i no wantem se wan man i ded, hem i wantem se olgeta man oli tanem tingting blong olgeta.” (Ridim 2 Pita 3:9.) Nating se maet wan man i mekem wan bigfala sin, be yet God i tinghae long laef blong hem. Tingbaot se Jehova i pem wan hae praes, hemia ransom sakrefaes blong pikinini blong hem, from laef blong yumi ol sinman. Jehova i traehad blong halpem olgeta we oli disfelosip blong oli kambak long hem. Hem i hop se bambae oli kambak, olsem boe ya we i lusum rod we Jisas i tokbaot long parabol blong hem. (Luk 15:11-32) Plante we oli lego trutok oli kambak long Papa blong olgeta long heven we i lavem olgeta tumas. Mo kongregesen i glad tumas blong welkamem olgeta taem oli kambak. Elisabet we yumi tokbaot hem finis i glad tumas taem boe blong hem i kambak long trutok. Hem i tingtingbak, nao i se: “Mi glad tumas se plante oli leftemap tingting blong mifala blong no lusum hop.”

19. ?From wanem yumi save gohed blong trastem Jehova?

¹⁹ Yumi save trastem Jehova, from we ol advaes blong hem oli save givhan long yumi oltaem. Hem i wan Papa we i glad nomo blong givim samting, i gat sore, mo i lavem tumas ol man we oli lavem mo wosipim hem. Yu save trastem se Jehova bambae i neva lego yu long ol taem we yu harem nogud. (Hib. 13:5, 6) Mak we yumi tokbaot hem finis i talem se: “Jehova i neva lego yumi, mo hem i neva stap longwe long yumi taem yumi gotru long ol hadtaem.” Jehova bambae i gohed blong givim “paoa ya we i bigwan bitim mak.” (2 Kor. 4:7) Yes, yumi save gohed blong stanap strong mo gat hop nating se wan we yumi lavem hem tumas i lego Jehova.