1. ?Wanem sam gudfala mak we yumi save putum taem yumi stap kam olfala?

TAEM yumi stap kam olfala, maet yumi fraet se Jehova bambae i no moa yusum yumi olsem bifo. I tru, maet yumi no moa gat paoa olsem bifo, be yet yumi save yusum waes mo ekspiriens blong yumi blong halpem ol yangfala blong oli save mekem moa wok long oganaesesen blong Jehova. Wan elda i talem se: “Naoia mi harem save se mi stap kam olfala, be mi glad se i gat ol yangfala brata we oli save mekem ol wok ya we mi no moa naf blong mekem.”

2. ?Bambae yumi tokbaot wanem long stadi ya?

² Long las stadi yumi bin tokbaot olsem wanem ol yangfala oli save kasem gudfala samting taem oli frengud wetem ol olfala. Long stadi ya, bambae yumi luk olsem wanem fasin blong gat tingting daon, no flas, glad, mo givim samting long gladhat, i save halpem ol olfala blong wok gud wetem ol yangfala blong givhan long ful kongregesen.

3. Folem Filipae 2:3, 4, ?wan man we i gat tingting daon i olsem wanem? ?Mo olsem wanem fasin ya i save givhan long wan Kristin?

³ Ol olfala oli mas gat tingting daon sipos oli wantem halpem ol yangfala. Man we i gat tingting daon i luk ol narafala se oli hae moa long hem. (Ridim Filipae 2:3, 4.) Ol olfala we oli gat fasin ya, oli luksave se i gat plante rod we i stret folem Baebol blong mekem gud wan wok. Taswe, oli no ekspektem evriwan blong mekem wan wok long sem fasin olsem we olgeta oli bin  mekem bifo. (Pri. 7:10) Nating se oli gat plante gudfala ekspiriens blong serem wetem ol yangfala, be oli luksave se “ol samting we oli stap hapen long wol ya oli stap jenis” mo maet oli nidim blong lanem sam niufala rod blong mekem samting.—1 Kor. 7:31.

4. ?Olsem wanem ol eria elda oli sem mak long ol Livaet bifo?

⁴ Ol olfala we oli gat tingting daon oli luksave se oli no naf blong mekem plante wok olsem bifo. Eksampol, traem tingbaot ol eria elda. Taem oli kasem 70 yia, oli askem olgeta blong mekem ol defren wok. Maet hemia i had from we oli glad tumas blong halpem ol brata mo sista. Oli laekem tumas wok ya, mo hemia i olsem wan faea we i stap laet yet long hat blong olgeta. Be oli kasemsave se i nidim ol yangfala blong oli gohed blong mekem wok ya. Ol eria elda oli olsem ol Livaet bifo, we taem oli kasem 50 yia, oli stop blong wok long tabenakel. Be ol olfala Livaet ya oli glad nomo nomata wanem wok oli kasem. Oli mekem samting we oli naf blong mekem blong givhan long ol yangfala. (Nam. 8:25, 26) Tede, nating se ol olfala eria elda oli no moa visitim ol kongregesen, be oli save givhan bigwan long kongregesen we oli stap long hem.

5. ?Yu lanem wanem long eksampol blong Dan mo Katie?

⁵ Traem tingbaot eksampol blong Dan we i mekem wok blong eria elda blong 23 yia. Taem hem i kasem 70 yia, oli askem hem mo waef blong hem Katie, blong mekem spesel  paenia. ?Wanem tingting blong tufala long niufala wok ya? !Dan i talem se naoia hem i bisi moa i bitim bifo! Hem i mekem gud wok blong hem long kongregesen, i halpem ol brata blong oli kam man blong givhan, mo i trenem ol narafala blong oli prij long ol bigfala taon mo long ol kalabus. Ol olfala, nating se yufala i mekem wok blong Jehova fultaem o nogat, be yufala i save mekem plante samting blong halpem ol narafala. Lanem blong akseptem jenis we i kamaot, putum ol niufala mak, mo tingbaot ol samting we yufala i save mekem naoia i bitim ol samting we yufala i no naf blong mekem.

6. ?From wanem i waes blong no flas? Talem wan eksampol.

⁶ Wan man we i no flas i luksave limit blong hem. (Prov. 11:2) From we hem i no flas, hem i luksave se i gat sam samting we hem i no naf blong mekem. From samting ya, bambae hem i gohed blong stap glad mo i wok had. Yumi save komperem wan man we i no flas wetem wan man we i stap draevem trak i go antap long wan hil. Draeva i mas jenisim gia i go long nambawan blong i save gohed blong ron i go antap long hil ya. I tru se trak bambae i ron slo moa, be bambae i gohed yet blong ron i go antap. Long sem fasin, wan man we i no flas i save wetaem i stret blong hem i “jenisim gia,” blong hem i save gohed blong mekem wok blong Jehova mo halpem ol narafala.—Fil. 4:5.

7. ?Olsem wanem Basilae i soemaot se hem i no flas?

⁷ Traem tingbaot Basilae. Hem i gat 80 yia taem King Deved i invaetem hem blong i kam stap long haos blong king. Be from Basilae i gat tingting daon mo i no flas, hem i no akseptem invetesen blong king. Basilae i luksave se hem i no naf blong mekem plante samting from we hem i olfala. Taswe hem i askem blong oli tekem yangfala man ya Kimam blong i tekem ples blong hem. (2 Saml. 19:35-37) Olsem Basilae, ol olfala brata oli glad nomo blong letem ol yangfala brata oli mekem ol wok.

8. ?Olsem wanem King Deved i soemaot se hem i no flas?

⁸ King Deved tu i soem wan nambawan eksampol blong no flas. Long hat blong hem, hem i wantem tumas blong bildim haos blong Jehova. Be taem Jehova i talem se Solomon nao bambae i bildim, Deved i akseptem desisen we Jehova i mekem, mo hem i mekem evri samting we hem i naf blong mekem blong sapotem projek ya. (1 Kron. 17:4; 22:5) Deved i no gat tingting ya se hem nao i sud bildim tempol ya from we Solomon i wan “yangfala nomo mo i no gat ekspiriens.” (1 Kron. 29:1) Hem i save se projek ya bambae i gohed from we Jehova nao i blesem, be i no from yia mo ekspiriens blong man we i lidim projek ya. Olsem Deved, tede ol olfala oli gohed blong wok strong long wok blong Jehova, nating se wok we oli mekem i jenis. Oli save se Jehova bambae i blesem ol yangfala we oli stap mekem ol wok we bifo olgeta nao oli stap mekem.

9. ?Olsem wanem wan memba blong Branj Komiti i soemaot se i no flas?

⁹ I gat wan brata long taem blong yumi we nem blong hem Shigeo, hem tu i soemaot wan nambawan eksampol blong no flas. Long 1976, taem hem i gat 30 yia, oli putumap hem i wok long Branj Komiti. Long 2004 hem i kam kodineta blong Branj Komiti. Biaen hem i luksave se hem i no moa gat paoa olsem bifo, mo i tekem longtaem blong hem i finisim ol wok blong hem. Ale hem i prea from samting ya mo i stap tingting se i moa gud wan yangfala brata i tekem ples blong hem. Nating se  Shigeo i no moa mekem wok olsem kodineta blong Branj Komiti, be hem i gohed yet blong givhan long ol memba blong komiti ya. Olsem yumi bin luk long eksampol blong Basilae, King Deved, mo Shigeo, wan man we i gat tingting daon mo i no flas, i no tingbaot hamas ekspiriens we ol yangfala oli gat, be i tingbaot paoa blong olgeta. Bambae oli no luk ol yangfala ya se oli traem blong winim olgeta, be bambae oli joen wetem olgeta blong mekem wok.—Prov. 20:29.

10. ?Ol olfala oli gat wanem lukluk long ol yangfala long kongregesen?

¹⁰ Ol olfala oli luk ol yangfala olsem wan presen we i kam long Jehova mo oli glad tumas from. Ol olfala ya oli glad tumas from we taem paoa blong olgeta i stap godaon, be ol yangfala we oli gat paoa oli rere mo oli naf blong mekem ol wok long kongregesen.

11. Folem Rut 4:13-16, ?wanem i kamaot taem ol olfala oli akseptem help blong ol yangfala?

¹¹ Baebol i tokbaot Naomi olsem wan nambawan eksampol blong wan olfala we i glad blong akseptem help blong wan yangfala. Long stat, Naomi i stap talem long Rut we i waef blong boe blong hem, blong i gobak long ol famle blong hem. Be taem Rut i strong blong folem Naomi i gobak long Betlehem, Naomi i glad mo i akseptem help blong hem. (Rut 1:7, 8, 18) !Mo hemia i mekem i gud long tufala tugeta! (Ridim Rut 4:13-16.) Ol olfala we oli gat tingting daon bambae oli folem eksampol blong Naomi.

12. ?Pol i mekem wanem blong soemaot se hem i glad?

¹² Aposol Pol i glad tumas taem ol brata sista oli givhan long hem. Eksampol, hem i talem tangkiu long ol Kristin long Filipae from ol samting we oli sanem i go long hem. (Fil. 4:16) Hem i talem tangkiu tu long Timoti  from ol samting we hem i mekem blong givhan long hem. (Fil. 2:19-22) Mo tu, hem i talem tangkiu long God from olgeta we oli kam enkarejem hem, taem hem i go long Rom olsem wan prisena. (Wok 28:15) Pol i wan man we i gat paoa mo i stap travel plante taosen kilometa blong prij mo mekem ol kongregesen oli kam strong. Be yet, hem i gat tingting daon mo i akseptem help blong ol brata mo sista.

13. ?Olsem wanem ol olfala oli save soemaot se oli glad long ol yangfala?

¹³ Ol olfala, yufala i save soemaot long plante defren rod se yufala i glad long ol yangfala long kongregesen blong yufala. Sipos oli wantem givhan long yufala long saed blong transpot, soping, o narafala samting, i gud yufala i akseptem help blong olgeta. Yufala i mas tingbaot help we oli givim, olsem wan rod we i soemaot se Jehova i lavem yufala. Maet bambae yufala i sapraes se bambae yufala i kam gudfala fren. Mo tu, yufala i save halpem olgeta blong kam klosap moa long Jehova, mo talem long olgeta se yufala i glad blong luk we ol yangfala oli mekem moa wok blong givhan long kongregesen. Mo yufala i mas glad blong spenem taem wetem olgeta blong tokbaot ol ekspiriens blong yufala. Sipos yufala i mekem olsem, bambae yufala i “gat fasin ya blong talem tangkiu” long Jehova from ol yangfala ya we hem i pulum olgeta i kam long kongregesen.—Kol. 3:15; Jon 6:44; 1 Tes. 5:18.

14. ?King Deved i soemaot olsem wanem se hem i givim samting long gladhat?

¹⁴ Long eksampol blong King Deved, i gat wan narafala impoten fasin we ol olfala oli nidim blong soemaot, hemia blong givim samting long gladhat. Deved i givim plante mane mo ol gudfala samting we hem i gat blong sapotem konstraksen blong tempol. (1 Kron. 22:11-16; 29:3, 4) Hem i mekem olsem nating se ol man bambae oli talem se Solomon nao i bildim. I tru, maet yumi no moa gat paoa blong joen long ol tiokratik konstraksen projek, be yumi save gohed yet blong sapotem ol projek ya, taem yumi givim presen mane o eni samting we yumi naf blong givim. Mo yumi save halpem ol yangfala taem yumi tokbaot ol ekspiriens we yumi kasem long ol yia we oli pas.

15. ?Wanem gudfala samting we aposol Pol i tijim Timoti long hem?

¹⁵ Tingbaot eksampol we aposol Pol i soemaot. Pol i invaetem Timoti blong i joen wetem hem long misinari wok, mo i glad nomo blong tijim yangfala Timoti long ol defren rod blong prij mo tij. (Wok 16:1-3) Trening we Timoti i kasem, i givhan long hem blong i kam wan gudfala man blong prij mo tijim gud nius. (1 Kor. 4:17) Biaen Timoti i yusum ol trening ya blong trenem ol narafala.

16. ?From wanem Shigeo i trenem ol narafala?

¹⁶ Ol olfala tede oli no gat tingting ya se sipos oli trenem ol yangfala blong mekem ol wok long kongregesen, bambae Jehova i no moa yusum olgeta. Eksampol, long ol yia we i pas, Shigeo we yumi tokbaot hem finis i trenem gud ol yangfala memba blong Branj Komiti. Hem i mekem olsem blong sapotem wok blong Kingdom long kantri we hem i stap long hem. Nao taem hem i no moa naf blong mekem wok blong kodineta, wan brata we i trenem gud finis i tekem ples blong hem. Shigeo i wok olsem wan memba blong Branj Komiti blong bitim 45 yia mo i gohed blong serem ol samting we hem i lanem long ol yangfala brata. !Ol olfala brata olsem oli wan bigfala blesing blong ol man blong God!

17. Folem Luk 6:38, ?ol olfala oli save givim wanem long ol narafala?

 ¹⁷ Yufala ol olfala brata mo sista, yufala i pruvum se beswan rod blong laef hemia blong mekem wok blong Jehova wetem bilif mo holemstrong long hem. Eksampol blong yufala i soem se taem yumi folem ol rul blong Baebol, hemia i mekem i gud long yumi. Yufala i save gud fasin blong mekem wok long taem bifo, be yufala i luk tu se i nidim mekem sam jenis folem ol niufala situesen. Yufala ol olfala we i jes baptaes, yufala tu i save tokbaot long ol narafala, glad we yufala i gat naoia we yufala i save Jehova. Ol yangfala bambae oli glad blong harem ol ekspiriens blong yufala mo ol samting we yufala i bin lanem from. Sipos yufala i “gat fasin ya blong givim samting,” hemia taem yufala i tokbaot ol ekspiriens blong yufala long ol yangfala, Jehova bambae i blesem yufala bigwan.—Ridim Luk 6:38.

18. ?Olsem wanem ol olfala mo ol yangfala oli givgivhan long olgeta?

¹⁸ Taem yufala ol olfala i fren gud wetem ol yangfala, bambae yufala i givgivhan long yufala. (Rom 1:12) Wanwan long yufala i gat sam gudfala samting we narafala i no gat. Ol olfala oli gat waes mo ekspiriens we oli kasem long laef blong olgeta. Ol yangfala oli gat paoa mo oli strong. Taem ol yangfala mo ol olfala oli wok tugeta olsem ol fren, oli presem Papa blong yumi long heven, mo oli givhan bigwan long evriwan long kongregesen.