1. Folem Malakae 3:16, ?Jehova i stap raetem wanem buk, mo wanem i stap long buk ya?

 PLANTE taosen yia finis Jehova i stap raetem wan spesel buk. Insaed long buk ya i gat wan lis blong ol nem, i stat wetem faswan man we i witnes blong Jehova, hemia Ebel. * (Luk 11:50, 51) Long ol handred yia we i pas, Jehova i stap ademap ol nem long buk ya, mekem se tede i gat plante milian nem long hem. Baebol i kolem buk ya se “buk blong rimemba,” “buk blong laef,” mo “skrol blong laef.” Long stadi ya, bambae yumi singaot buk ya se “buk blong laef.”—Ridim Malakae 3:16; Rev. 3:5; 17:8.

2. ?Nem blong hu i stap long buk blong laef? ?Yumi mas mekem wanem blong nem blong yumi i stap long buk ya?

² Long spesel buk ya i gat nem blong olgeta we oli wosipim Jehova wetem ona mo respek, mo oli tinghae long nem blong hem. Olgeta ya oli stret blong kasem laef olwe. Tede, nem blong yumi tu i save stap long buk ya, sipos yumi wokem wan fasin fren wetem Jehova we i stanap long ransom sakrefaes blong Pikinini blong hem, Jisas Kraes. (Jon 3:16, 36) Yumi evriwan i wantem se nem blong yumi i stap long buk ya, nating se yumi gat hop blong laef long heven o long wol.

3-4. (1) Sipos nem blong yumi i stap naoia long buk blong laef, ?hemia min se bambae yumi kasem laef olwe? Yu eksplenem. (2) ?Bambae yumi tokbaot wanem long stadi ya mo long nekis stadi?

 ³ ?Hemia i min se olgeta we nem blong olgeta i stap finis long buk ya, bambae oli kasem laef we i no save finis? Ol tok we Jehova i talem long Moses long Eksodas 32:33 i ansarem kwestin ya. Hem i se: “Man we i mekem sin agens long mi, nem blong hem nao bambae mi ravemaot long buk blong mi.” Taswe Jehova i save tekemaot o waepemaot nem we i stap finis long buk ya, i olsem we fastaem hem i raetem ol nem ya long pensel nomo. (Rev. 3:5, fut.) Yumi mas meksua se nem blong yumi i stap olwe long buk ya gogo kasem we Jehova i raetem nem blong yumi long ink.

⁴ Maet yumi stap tingbaot se: ?Baebol i talem wanem long saed blong ol man we nem blong olgeta i stap long buk blong laef, mo ol man we nem blong olgeta i no stap long buk ya? ?Ol man we nem blong olgeta i stap long buk ya, wetaem bambae oli kasem laef olwe? ?Olsem wanem long olgeta we oli ded bifo we oli gat janis blong save Jehova? ?Nem blong olgeta tu i save stap long buk ya? Bambae yumi ansarem ol kwestin ya long stadi ya mo long nekis stadi.

?NEM BLONG HU I STAP LONG BUK YA?

5-6. (1) Folem Filipae 4:3, ?nem blong hu i stap long buk blong laef? (2) ?Wetaem nem blong olgeta bambae i stap olwe long buk blong laef?

⁵ ?Nem blong hu i stap long buk ya? Blong ansarem kwestin ya, bambae yumi tokbaot faef grup blong man. Sam long olgeta, nem blong olgeta i stap long buk ya, mo samfala, nogat.

⁶ Faswan grup hemia olgeta we Jehova i jusum olgeta blong rul wetem Jisas long heven. ?Nem blong olgeta i stap finis long buk blong laef? Yes. Folem tok we aposol Pol i raetem  long olgeta long Filipae, we oli ‘mekem sem wok olsem hem,’ nem blong ol tabu man we Jehova i singaot olgeta blong rul wetem Jisas, i stap naoia long buk blong laef. (Ridim Filipae 4:3.) Be oli mas holemstrong long Jehova, blong nem blong olgeta i save gohed blong stap long buk ya. Nem blong olgeta bambae i stap olwe long buk ya, taem oli kasem laswan stamp blong olgeta, maet hemia i hapen jes bifo we oli ded o jes bifo we bigfala trabol i stat.—Rev. 7:3.

7. Folem Revelesen 7:16, 17 ?wetaem nem blong bigfala hip blong ol narafala sipsip bambae i stap olwe long buk blong laef?

⁷ Seken grup hemia bigfala hip blong ol narafala sipsip. ?Nem blong olgeta i stap naoia long buk blong laef? Yes. ?Nem blong olgeta bambae i stap yet long buk blong laef, afta we oli pastru long Amagedon? Yes. (Rev. 7:14) Jisas i talem se olgeta ya we oli olsem sipsip, bambae “oli kasem laef we i no save finis.” (Mat. 25:46) Be olgeta we oli pastru long Amagedon bambae oli no kasem laef olwe wantaem nomo. I olsem we nem blong olgeta i stap long pensel nomo long buk blong laef. Long taem ya we Jisas i Rul Blong Wan Taosen Yia, “bambae [hem] i lukaot long olgeta, olsem we man blong lukaot long sipsip i stap lukaot long ol sipsip blong hem, mo bambae hem i lidim olgeta oli go long springwota blong laef.” Olgeta we oli letem Jisas i lidim olgeta, nao Jehova i jajem olgeta se oli stap tru long hem, nem blong olgeta bambae i stap olwe long buk blong laef.—Ridim Revelesen 7:16, 17.

8. ?Nem blong hu i no stap long buk blong laef, mo wanem bambae i hapen long olgeta?

⁸ Namba tri grup hemia ol nani, we bambae oli lus long Amagedon. Nem blong olgeta i no stap long buk blong laef. Jisas i talem se “bambae oli kasem ded we i blong olwe.” (Mat. 25:46) Tabu spirit i pulum Pol blong raetem se: “Masta blong yumi bambae i jajem olgeta ya. Panis blong olgeta hemia se bambae oli mas finis blong olwe.” (2 Tes. 1:9; 2 Pita 2:9) Hemia i sem mak long olgeta we oli minim nomo blong mekem sin agens long tabu spirit, long ol yia we oli pas finis. Olgeta tu bambae oli kasem ded blong olwe, i no laef blong olwe. I klia se bambae oli no laef bakegen. (Mat. 12:32; Mak 3:28, 29; Hib. 6:4-6) Naoia, i gud yumi tokbaot tu grup we bambae oli laef bakegen long wol.

OLGETA WE BAMBAE OLI LAEF BAKEGEN

9. Folem Ol Wok 24:15, ?wanem tufala grup we bambae oli laef bakegen long wol? ?Olsem wanem tufala grup ya i defren?

⁹ Baebol i tokbaot tu grup blong man we bambae oli laef bakegen mo oli gat janis blong laef olwe long wol, hemia “ol man we oli stret” mo “ol man we oli no stret.” (Ridim Ol Wok 24:15.) “Ol man we oli stret” hemia olgeta we oli holemstrong long Jehova taem oli stap laef. Be “ol man we oli no stret,” hemia ol man we oli no holemstrong long Jehova. Plante long olgeta oli stap mekem ol fasin we i nogud we i nogud. From we tufala grup ya bambae i laef bakegen, ?yumi save talem se oli raetem nem blong olgeta long buk blong laef? Blong ansarem kwestin ya, bambae yumi tokbaot wanwan long tufala.

10. ?From wanem “ol man we oli stret” bambae oli laef bakegen? ?Sam long olgeta bambae oli kasem wanem blesing? (Yu luk haf ya “Kwestin” long magasin ya, we i tokbaot laef bakegen long wol.)

¹⁰ Namba fo grup hemia “ol man we oli stret.” Bifo we oli ded, nem blong olgeta i stap long buk blong laef. Taem oli ded, ?Jehova i tekemaot nem blong olgeta? Nogat, long tingting blong Jehova oli “laef” yet. Jehova “i God blong man we i laef, i no God  blong man we i ded, from we long tingting blong hem, olgeta evriwan oli laef nomo.” (Luk 20:38) Hemia i min se taem ol stret man oli laef bakegen long wol, nem blong olgeta bambae i stap long buk blong laef, be oli raetem long “pensel” nomo. (Luk 14:14) Sam long olgeta we oli laef bakegen, bambae oli kasem blesing ya blong kam “ol prins long olgeta ples long wol.”—Sam 45:16.

11. ?“Ol man we oli no stret” bambae oli mas lanem wanem bifo we oli raetem nem blong olgeta long buk blong laef?

¹¹ Namba faef grup hemia “ol man we oli no stret.” From we oli no save ol loa blong Jehova bifo we oli ded, laef blong olgeta i no stret. Taswe nem blong olgeta i no stap long buk blong laef. Be taem God i mekem olgeta oli laef bakegen, hem i givim janis long olgeta blong bambae nem blong olgeta i save stap long buk ya. ‘Ol man ya we oli no stret’ bambae oli nidim blong narafala i givhan bigwan long olgeta. Long laef blong olgeta bifo, sam long olgeta oli mekem ol samting we oli nogud olgeta. Taswe oli mas kasem tijing blong save olsem wanem blong folem ol rul blong Jehova long laef blong olgeta. Blong mekem olsem, Kingdom blong God bambae i lidim wan wok blong tijim ol man, we i bigwan moa i bitim ol narafala taem long histri.

12. (1) ?Hu bambae i tijim ol man we oli no stret? (2) ?Wanem bambae i hapen long olgeta we oli no folem samting we oli lanem?

¹² ?Hu bambae i tijim ol man we oli no stret? Hemia bigfala hip blong ol man, mo ol stret man we oli laef bakegen. Ol man we oli no stret, oli mas frengud wetem Jehova mo oli mas givim laef blong olgeta i go long hem, blong nem blong olgeta we save stap long buk blong laef. Jisas Kraes mo ol jaj we oli stap wetem hem, bambae oli wajem ol man we oli no stret blong luk sipos oli gohed gud. (Rev. 20:4) Eniman we i no wantem folem ol samting we hem i lanem, bambae hem i lus, nating sipos hem i gat 100 yia finis. (Aes. 65:20) Jehova mo Jisas i save samting we i stap long hat blong man, mo bambae tufala i no  letem eni man i spolem niufala wol.—Aes. 11:9; 60:18; 65:25; Jon 2:25.

OLI GIRAP BLONG KASEM LAEF MO KASEM JAJMEN

13-14. (1) ?Plante yia finis yumi ting se ol tok blong Jisas long Jon 5:29 oli minim wanem? (2) ?Yumi makem se Jisas i yusum wanem tok?

¹³ Jisas i tokbaot tu, olgeta we bambae oli laef bakegen long wol ya. Eksampol, hem i talem se: “I gat taem i stap kam we ol dedman bambae oli harem voes blong mi, nao bambae oli aot long beregraon blong olgeta. Olgeta we bifo oli stap mekem ol gudfala fasin, oli mas stanap bakegen blong kasem laef. Be olgeta we bifo oli stap mekem ol rabis fasin, oli mas stanap bakegen blong pas long bigfala kot ya, blong mi save jajem olgeta.” (Jon 5:28, 29; Baebol Long Bislama) ?Jisas i stap minim wanem?

¹⁴ Plante yia finis, yumi ting se Jisas i stap tokbaot ol samting we ol man bambae oli mekem afta we oli laef bakegen. Yumi bin ting se samfala we oli laef bakegen, bambae oli mekem ol gudfala samting, mo samfala we oli laef bakegen, bambae oli mekem ol rabis samting. Be Jisas i no talem se ol man we oli kamaot long beregraon, bambae oli mekem ol gudfala samting, o bambae oli mekem ol rabis samting. Long vas ya, Jisas i tokbaot ol samting we oli mekem bifo. Hem i stap tokbaot ol man we “bifo oli stap mekem ol gudfala fasin,” mo ol man we “bifo oli stap mekem ol rabis fasin.” So vas ya i stap tokbaot ol fasin we oli mekem bifo we oli ded. Hemia i stret nomo, from we long niufala wol Jehova i no save letem wan man i mekem ol rabis samting. Taswe ol man we oli no stret, oli bin mekem ol nogud samting bifo we oli ded. ?So Jisas i minim wanem taem hem i talem se bambae “oli girap blong kasem laef,” mo “oli girap blong kasem jajmen”?

15. ?Hu ya olgeta we bambae “oli girap blong kasem laef”? Yu eksplenem.

¹⁵ Ol man we oli stret, we oli mekem ol gudfala samting bifo we oli ded, bambae “oli girap blong kasem laef” from we nem blong olgeta i stap finis long buk blong laef. Hemia i min se “olgeta we oli mekem ol gudfala samting” we Jon 5:29 i tokbaot, hemia “ol man we oli stret” we Ol Wok 24:15 i tokbaot. Save ya i laenap gud wetem ol tok blong Rom 6:7, we i talem se: “Taem man i ded, hem i fri long olgeta sin blong hem.” Ded i kanselem sin we ol stret man ya oli bin mekem, be Jehova i no save fogetem se oli bin holemstrong long hem. (Hib. 6:10) I tru, afta we ol stret man ya oli laef bakegen, oli mas gohed yet blong holemstrong long Jehova. Olsem nao nem blong olgeta i save stap olwe long buk blong laef.

16. ?Tok ya “girap blong kasem jajmen” i minim wanem?

¹⁶ ?Olsem wanem long olgeta we oli mekem ol rabis samting bifo we oli ded? Nating se ded i bin kanselem sin we oli bin mekem, be oli no wosipim Jehova. From samting ya, nem blong olgeta i no stap long buk blong laef. Taswe “olgeta we oli mekem ol rabis fasin,” hemia “ol man we oli no stret” we Ol Wok 24:15 i tokbaot. Olgeta ya bambae “oli girap blong kasem jajmen.” * Tok ya kasem jajmen, i min se Jehova mo Jisas bambae oli jekem olgeta blong luk sipos oli stap gohed gud. (Luk 22:30) Bambae i tekem taem blong luksave sipos nem blong olgeta i save stap long buk blong laef. Sipos ol man ya we oli no stret oli lego ol olfala fasin blong olgeta, mo oli givim laef blong olgeta i go long Jehova, long taem ya nao nem blong olgeta i save stap long buk blong laef.

17-18. ?Olgeta man we bambae oli laef long wol oli mas mekem wanem? ?Folem Revelesen 20:12, 13, tok ya “samting we oli mekem” i minim wanem?

 ¹⁷ Nating se olgeta ya we oli laef bakegen oli ol man we oli stret, o ol man we oli no stret, be olgeta evriwan oli mas obei long ol loa long ol niufala skrol we bambae i open long 1,000 yia rul blong Kraes. Aposol Jon i tokbaot samting we hem i luk long vison, i se: “Mi luk ol dedman, olgeta we oli haeman wetem olgeta we oli no gat nem, oli stap stanap long fored blong tron ya, mo i gat ol skrol we oli open i stap. Be wan narafala skrol i open i stap, hemia skrol blong laef. Nao ol dedman ya oli kasem jajmen folem ol samting we oli raetem long ol skrol ya, we i stret long samting we oli mekem.”—Rev. 20:12, 13.

¹⁸ ?Bambae oli jajem ol man we oli laef bakegen folem wanem? ?Bambae oli jajem olgeta folem “samting we oli mekem” bifo we oli ded? !Nogat! Tingbaot se ded i kanselem ol sin we oli bin mekem. Taswe “samting we oli mekem,” i no minim ol samting we oli mekem bifo we oli ded. Be i minim ol samting we oli mekem long niufala wol, folem ol tijing we oli kasem. Ol gudfala man tu olsem Noa, Samuel, Deved, mo Daniel, bambae oli mas lanem ol save long saed blong Jisas Kraes, mo soemaot bilif long sakrefaes blong hem. !Sipos ol stret man ya oli mas lanem plante samting, hemia i min se ol man we oli no stret oli gat plante moa samting blong lanem!

19. ?Wanem bambae i hapen long olgeta we oli no wantem akseptem nambawan janis ya?

¹⁹ ?Wanem bambae i hapen long olgeta we oli no wantem akseptem nambawan janis ya? Revelesen 20:15 i talem se: “Hem i slingim olgeta ya . . . we oli no raetem nem blong olgeta long buk blong laef, oli go long lek blong faea.” Yes, bambae oli lus blong olwe. !Taswe i impoten tumas we yumi meksua se nem blong yumi i stap long buk blong laef, mo i stap blong olwe!

20. ?Wanem nambawan wok we bambae i gohed long Wan Taosen Yia Rul Blong Kraes? (Yu luk pija long fran pej.)

²⁰ !I sua se Wan Taosen Yia Rul Blong Kraes bambae i wan nambawan taem! Long taem ya, ol man blong God bambae oli mekem bigfala wok ya blong tijim ol man raon long wol. Be long taem ya tu, bambae Jehova mo Jisas i luklukgud long fasin blong ol man we oli stret, mo ol man we oli no stret. (Aes. 26:9; Wok 17:31) ?Olsem wanem bambae oli mekem bigfala wok ya blong tijim ol man? Nekis stadi bambae i halpem yumi blong kasemsave long samting ya, mo blong glad long nambawan blesing ya.