1. ?From wanem yumi no sapraes se ol man blong wol oli no trastem ol narafala?

 OL MAN blong wol ya we Setan i bos long hem, oli no save hu nao blong trastem. Fasin blong ol lida blong politik, jos, mo ol bisnes man i spolem ol man ya. Hemia i stap hapen tu wetem ol fren, ol neba, mo ol famle. Yumi no sapraes long samting ya, from we Baebol i talem se: “Long ol las dei . . . , bambae ol man oli . . . no holemstrong long ol narafala, . . . oli spolem nem blong narafala, . . . oli putum ol fren blong olgeta long han blong ol enemi.” Hemia i min se ol man oli stap soemaot fasin blong god blong wol ya we yumi no save trastem nating.—2 Tim. 3:1-4; 2 Kor. 4:4.

2. (1) ?Hu olgeta we yumi trastem fulwan? (2) ?Be samfala oli stap tingbaot wanem?

² Yumi ol Kristin, yumi trastem Jehova fulwan. (Jer. 17:7, 8) Yumi bilif strong se hem i lavem yumi mo bambae hem i “neva lego” ol fren blong hem. (Sam 9:10) Yumi trastem Kraes Jisas tu from we hem i givim laef blong hem from yumi. (1 Pita 3:18) Mo yumi luk long laef blong yumi wanwan se yumi save trastem Baebol blong lidim yumi. (2 Tim. 3:16, 17) Yes, yumi gat strong bilif se yumi save trastem Jehova, Jisas, mo Baebol. Be samfala oli stap tingbaot sipos oli save trastem ol brata mo sista oltaem. Ansa se, yes. ?Be from wanem yumi save trastem olgeta?

3. ?Wanem bigfala ona we yumi gat? (Mak 10:29, 30)

³ Jehova i jusum yumi blong joen long bigfala famle blong ol man we oli wosipim hem long fulwol. !Traem tingbaot bigfala ona ya mo ol blesing we yumi kasem from! (Ridim Mak 10: 29, 30.) Raon long wol, i gat ol brata mo sista we oli lavem Jehova olsem yumi, mo oli traem bes blong olgeta blong folem ol rul blong hem. Maet lanwis, kalja, mo klos blong yumi i defdefren, be yumi harem se yumi lavem olgeta, nating se yumi neva mitim olgeta. !Yumi laekem moa blong joen wetem olgeta blong wosipim Papa blong yumi long heven!—Sam 133:1.

4. ?From wanem yumi nidim ol brata mo sista?

⁴ Naoia yumi nidim moa blong joen gud wetem ol brata mo sista. Oli halpem yumi blong karem ol hevi baden blong yumi. (Rom 15:1; Gal. 6:2) Mo tu, oli halpem yumi blong gohed strong long wok blong Jehova mo stap strong long bilif. (1 Tes. 5:11; Hib. 10:23-25) ?Bambae yumi harem olsem wanem sipos kongregesen i no halpem yumi blong stanap strong agensem enemi blong yumi, Setan, mo rabis wol ya? I no longtaem Setan wetem ol man we oli stap aninit long paoa blong hem, bambae oli atakem ol man blong God. !Tingbaot olsem wanem bambae yumi glad se ol brata mo sista oli stap klosap long yumi!

5. ?From wanem i had blong samfala oli trastem ol brata mo sista?

⁵ I had blong samfala oli trastem ol brata mo sista, maet from we wan brata o sista i talemaot sikret blong olgeta, o i brekem wan promes. O maet wan long kongregesen i talem, o i mekem wan samting we i spolem gud olgeta. Ol ekspiriens olsem oli mekem i had blong trastem narafala. ?Wanem i save halpem yumi blong trastem moa ol brata mo sista?

6. ?Olsem wanem lav i save halpem yumi blong trastem narafala? (1 Korin 13:4-8)

⁶ Fastaem yumi mas lavem narafala, nao yumi save trastem hem. Fas Korin japta 13 i  tokbaot ol defren fasin we oli joen wetem lav, we oli save halpem yumi blong trastem narafala, o trastem bakegen man we i spolem yumi. (Ridim 1 Korin 13:4-8.) Olsem vas 4 i talem, “man we i gat lav, hem i gat longfala tingting mo i kaen.” Jehova i gat longfala tingting nating se yumi mekem samting we i agensem hem. Taswe yumi mas gat longfala tingting long ol brata mo sista sipos oli talem o mekem wan samting we i mekem yumi kros o harem nogud. Vas 5 i gohed se: “[Man we i gat lav] hem i no kros kwik. Hem i no tingbaot rong we ol narafala oli mekem long hem.” Yumi no mas “tingbaot rong we ol narafala oli mekem,” mo yumi no gohed blong tingbaot samting ya. Prija 7:9 i talem se yumi no mas “hariap blong kros.” I moa gud yumi folem ol tok blong Efesas 4:26 we i se: “Yufala i no mas stap kros gogo kasem we san i godaon.”

7. ?Olsem wanem Matiu 7:1-5 i save halpem yumi blong trastem narafala?

⁷ Wan narafala samting we i halpem yumi blong trastem ol brata mo sista, hemia blong gat sem tingting we Jehova i gat long olgeta. God i lavem olgeta mo i no stap raetemdaon ol sin blong olgeta. Yumi mas gat sem fasin. (Sam 130:3) Yumi no mas luk ol slak fasin blong olgeta, be yumi traehad blong luk ol gudfala fasin mo tingbaot ol gudfala samting we oli naf blong mekem. (Ridim Matiu 7:1-5.) Yumi bilif se oli no minim blong spolem yumi, from we lav i “bilif long olgeta samting.” (1 Kor. 13:7) Hemia i no min se Jehova wantem we yumi trastem enikaen man, be hem i wantem se yumi trastem ol brata mo sista from we oli soemaot finis se yumi save trastem olgeta. *

8. ?Yumi save mekem wanem blong trastem ol brata mo sista?

⁸ Yumi mas winim tras blong narafala, sem mak olsem we yumi mas winim respek blong narafala. Yumi mas soemaot long ol fasin blong yumi se narafala i save trastem yumi, mo hemia i tekem taem. Taswe, ?yumi save mekem wanem blong trastem ol brata mo sista? Yumi mas savegud olgeta, storian wetem olgeta long ol miting, mo prij wetem olgeta. Yumi mas gat longfala tingting, mo yumi givim janis long olgeta blong oli soemaot se yumi save trastem olgeta. Maet bambae yu lukaot gud blong no talemaot ol prapa tingting mo filing blong yu long wan man we yu jes save hem. Be taem frensip blong yutufala i kam strong moa, maet bambae i moa isi blong yu tokbaot ol filing blong yu. (Luk 16:10) ?Be olsem wanem sipos wan brata i mekem wan samting, nao yu no moa trastem hem? Yu no mas kwik blong lego hem, be i gud blong letem taem i pas. Mo yu no mas letem samting we hem i mekem, i spolem tras we yu gat long ol narafala brata mo sista. Naoia, bambae yumi tokbaot sam gudfala man blong Jehova bifo, we oli gohed nomo blong trastem narafala, nating se samfala oli mekem olgeta oli harem nogud.

9. (1) ?Olsem wanem Hana i gohed blong trastem Jehova, nating se ol man we hem i putumap oli mekem samting we i no stret? (2) ?Olsem wanem eksampol blong Hana i tijim yu blong trastem olgeta we Jehova i putumap? (Yu luk pija.)

⁹ ?Yu yu harem nogud finis from fasin blong wan brata we i gat wok long kongregesen? Sipos yes, eksampol blong Hana i save halpem yu. Long taem blong hem, Hae Pris Ilae nao i stap lukaot long wosip blong Jehova long Isrel. Be famle blong Ilae i no soem gudfala  eksampol. Ol boe blong hem we oli pris, oli stap mekem ol samting blong sem, mo ol doti fasin, be papa blong olgeta i no traem stretem olgeta. Jehova i no kwik blong tekemaot Ilae long wok blong hae pris. Nating se i olsem, Hana i no gat tingting se bambae hem i no moa go mekem wosip long tabenakel, from we Ilae i hae pris. Taem Ilae i luk we Hana i stap prea from i harem nogud tumas, hem i ting se Hana i drong. Hem i no traem blong faenemaot fastaem, be i kwik blong tok strong long hem. (1 Saml. 1:12-16) Nating se i olsem, Hana i mekem wan strong promes se sipos hem i bonem wan boe, bambae hem i tekem hem i go wok long tabenakel, mo Ilae bambae i lukaot long hem. (1 Saml. 1:11) ?Olsem wanem? ?Oli stretem finis ol boe blong Ilae? No yet, be Jehova i mekem samting ya long stret taem blong hem. (1 Saml. 4:17) Mo samtaem biaen, God i blesem Hana, i givim wan boe long hem, hemia Samuel.—1 Saml. 1:17-20.

10. Nating se samfala oli agensem Deved, ?olsem wanem hem i gohed blong trastem ol narafala?

¹⁰ ?Olsem wanem? ?Besfren blong yu i bin spolem yu? Sipos yes, traem tingbaot eksampol blong King Deved. Hem i gat wan gudfala fren, hemia Ahitofel. Be taem Absalom, boe blong Deved, i traem blong tekem ples blong papa blong hem olsem king, Ahitofel i joenem hem blong agensem Deved. !Deved i mas harem nogud bigwan, from we boe blong hem mo gudfala fren blong hem, oli agensem hem! Be Deved i no letem samting ya i stopem hem blong trastem ol narafala. Hem i gohed blong trastem gudfala fren blong hem Usia, we i jus blong stap long saed blong Deved. Deved i trastem Usia, from we Usia i pruvum se hem i wan gudfala fren, taem i putum laef blong hem long denja blong halpem Deved.—2 Saml. 17:1-16.

11. ?Olsem wanem wan man blong wok blong Nabal i soemaot se hem i trastem narafala?

¹¹ Mo tu, traem tingbaot wan man blong wok blong man Isrel ya Nabal. Deved mo ol man blong hem, oli bin protektem ol man blong wok blong Nabal. Samtaem biaen, Deved i askem rijman ya Nabal, blong i givim sam kakae long ol man blong hem. Be Nabal i no wantem givim, nao Deved i kros tumas mo i wantem kilim i ded evri man long haos blong  Nabal. Ale, wan man blong wok i go talemaot nius ya long Abigel, we i waef blong Nabal. Man blong wok ya i save se laef blong hem i stap long han blong Abigel. Hem i trastem se Abigel i naf blong stretem bisnes ya, taswe hem i no ronwe. Evri man i save se Abigel i wan waes woman. I stret nomo we hem i trastem Abigel, from we Abigel i no fraet blong traem stopem Deved blong i no folem plan blong hem. (1 Saml. 25:2-35) Hem i trastem se Deved bambae i mekem samting we i stret.

12. ?Wanem i soemaot se Jisas i trastem ol disaepol blong hem nating se oli mekem mastik?

¹² Jisas i trastem ol disaepol blong hem nating se oli mekem mastik. (Jon 15:15, 16) Taem Jemes mo Jon i askem long Jisas blong i givim wan hae posisen long tufala long Kingdom, Jisas i no jajem tufala, mo i no sakemaot tufala blong oli no moa aposol. (Mak 10:35-40) Long naet we oli arestem Jisas, evri aposol oli lego hem. (Mat. 26:56) Be Jisas i gohed blong trastem olgeta. Hem i savegud ol slak fasin blong olgeta, be hem i “lavem olgeta kasem en blong laef blong hem.” (Jon 13:1) Mo taem Jisas i laef bakegen, hem i givim wan impoten wok long ol 11 gudfala aposol, blong oli lidim wok blong mekem disaepol mo oli lukaotgud long ol sipsip blong hem. (Mat. 28:19, 20; Jon 21:15-17) I stret nomo we hem i trastem ol man blong hem we oli sinman, from we oli holemstrong long Jehova kasem we oli ded. Yes, Hana, Deved, man blong wok blong Nabal, Abigel, mo Jisas, oli soem wan gudfala eksampol blong trastem ol man we oli no stretgud.

13. ?From wanem samfala oli faenem i had blong trastem narafala?

¹³ ?Yu bin talemaot wan impoten infomesen long wan brata we yu trastem, be biaen yu faenemaot se hem i talemaot samting ya long narafala? I sua se yu harem nogud mo yu no moa trastem hem. Wan sista i talemaot wan impoten samting long wan elda mo i trastem hem blong i no talemaot long narafala. Be long nekis dei, waef blong elda ya i ring long sista ya blong leftemap tingting blong hem. Wantaem nomo sista ya i save se elda i tokbaot samting ya long waef blong hem. Sore tumas, sista ya i faenem i had blong trastem bakegen elda ya. Be hem i go luk wan narafala elda, mo elda ya i halpem hem blong trastem bakegen ol elda.

14. ?Wanem i halpem wan brata blong i trastem narafala bakegen?

¹⁴ Wan brata i kros longtaem long tu elda, nao hem i no moa trastem tufala. Biaen, hem i stat blong tingbaot toktok blong wan brata we hem i gat bigfala respek long hem. Toktok ya i rili gat paoa, i se: “Setan nao i enemi, be i no ol brata mo sista blong yumi.” Brata ya i tingting gud long toktok ya, mo long samting we hem i mas mekem. Biaen, hem i prea long Jehova blong i halpem hem, nao hem i naf blong mekem pis bakegen wetem tufala elda ya.

15. ?From wanem maet i tekem taem blong trastem bakegen ol narafala? Talem wan eksampol.

¹⁵ ?Yu yu bin lusum wan wok long oganaesesen blong Jehova? I sua se yu yu harem nogud. Sista Grete mo mama blong hem oli holemstrong long Jehova, long taem we Nasi Jemani i putum tabu long wok blong ol Witnes, long ol yia 1930. Grete i gat nambawan wok ya blong taepem ol kopi blong Wajtaoa blong givim long ol brata mo sista. Be taem ol brata oli faenemaot se papa blong hem i agensem trutok, oli tekemaot wok ya long hem, from we oli fraet se papa blong hem bambae i givimaot sam infomesen long saed blong kongregesen, long ol man blong agens. Be i no finis long ples ya. Long Seken Wol Wo, ol brata  oli no givimaot ol magasin long Grete mo mama blong hem, mo taem oli mitim tufala long rod, oli no wantem toktok long tufala. Tufala i harem nogud tumas, mo i tekem longtaem blong Grete i fogivim ol brata ya, mo trastem olgeta bakegen. Be biaen, hem i kasemsave se Jehova i fogivim ol brata ya, taswe hem tu i mas mekem sem mak. *

16. ?From wanem yumi mas wok had blong trastem ol brata mo sista bakegen?

¹⁶ Sipos yu gotru long wan rabis ekspiriens olsem, i gud yu wok had blong trastem ol narafala bakegen. Maet bambae i tekem taem, be gudfala frut i save kamaot. Traem tingbaot, sipos yumi sik from we yumi kakae wan kakae we i nogud, maet nekis taem bambae yumi lukaot gud moa long kakae blong yumi. Be samting ya bambae i no mekem se yumi no moa kakae. Long sem fasin, yumi no mas letem rabis ekspiriens we yumi gotru long hem, i mekem we yumi no moa trastem ol brata mo sista, we yumi save se oli sinman. Sipos yumi traehad blong trastem olgeta bakegen bambae yumi glad, mo yumi naf blong halpem ol narafala long kongregesen blong oli trastem ol brata mo sista bakegen.

17. ?From wanem i impoten blong trastem narafala, mo bambae yumi tokbaot wanem long nekis stadi?

¹⁷ Long wol blong Setan, i had blong trastem narafala, be yumi save trastem ol brata mo sista, from we yumi lavlavem yumi. Taem yumi trastem narafala, yumi glad, yumi joengud, mo bambae i givhan long yumi taem yumi fesem ol hadtaem long fiuja. ?Olsem wanem sipos wan man i mekem yu harem nogud mo yu no moa trastem hem? I gud yu traem blong gat sem tingting olsem Jehova, yu folem ol advaes blong Baebol, yu traehad blong lavem moa ol brata mo sista, mo yu lanem samting long eksampol blong ol man long Baebol. Yumi save winim filing ya blong harem nogud mo trastem ol narafala bakegen. Sipos yumi mekem olsem, bambae yumi glad, mo yumi kasem blesing ya blong gat plante gudfala fren ‘we oli klosap moa long yumi i winim ol brata blong yumi.’ (Prov. 18:24) Be i no naf nomo blong trastem narafala, olgeta tu oli mas trastem yumi. Long nekis stadi, bambae yumi tokbaot olsem wanem blong soemaot se narafala i save trastem yumi.