Luk olsem wanem Baebol i ansa long kwestin ya.

Ol Wok 24:15 i talem se “ol man we oli stret wetem ol man we oli no stret bambae oli laef bakegen.” Ol man we oli stret, hemia olgeta we bifo oli ded, oli obei gud long God, taswe nem blong olgeta i stap long buk blong laef. (Mal. 3:16) Ol man we oli no stret, hemia olgeta we oli ded be oli no gat janis blong save Jehova, so nem blong olgeta i no stap long buk blong laef.

Jon 5:28, 29 i stap tokbaot tufala grup ya we Ol Wok 24:15 i tokbaot. Jisas i talem se “olgeta we oli mekem ol gudfala samting” bambae oli “girap blong kasem laef, be olgeta we oli mekem ol rabis samting, oli girap blong kasem jajmen.” Ol man we oli stret oli mekem ol gudfala samting bifo we oli ded. Olgeta ya bambae oli laef bakegen from we nem blong olgeta i stap long buk blong laef. Be ol man we oli no stret, oli mekem ol rabis samting bifo we oli ded. Olgeta ya bambae oli laef bakegen blong kasem jajmen. Nem blong olgeta i no stap yet long buk blong laef, be bambae oli wajem olgeta blong luk sipos oli obei. Long taem ya, bambae oli gat janis blong save Jehova, nao nem blong olgeta i save stap long buk blong laef.

Revelesen 20:12, 13 i eksplenem se olgeta man we oli laef bakegen oli mas obei long “ol samting we oli raetem long ol skrol,” hemia ol niufala loa we God bambae i givim long yumi long niufala wol. Olgeta we oli no obei, Jehova bambae i distroem olgeta.—Aes. 65:20.

Daniel 12:2 i talem se sam long ol man ya we oli ded, bambae oli girap “blong kasem laef we i no save finis, mo ol narafala oli blong kasem ol strong tok mo blong sakemaot olgeta olwe.” Vas ya i stap tokbaot laswan jajmen blong olgeta we oli laef bakegen. Bambae oli “kasem laef we i no save finis” o oli “sakemaot olgeta olwe.” Taswe, long en blong 1,000 yia, samfala bambae oli kasem laef olwe, mo samfala bambae oli lus blong olwe.—Rev. 20:15; 21:3, 4.

Situesen blong tufala grup ya we i laef bakegen, i sem mak long ol man we oli wantem go laef long wan narafala kantri. Ol man we oli stret, oli olsem ol man we oli kasem wok visa o residen visa, blong oli laef long kantri mo oli fri blong mekem eni samting. Be ol man we oli no stret, oli olsem ol man we oli kam stap smoltaem nomo o oli gat turis visa. Olgeta ya oli mas obei long loa blong kantri ya blong oli save gohed blong stap. Long sem fasin, ol man ya we oli no stret we oli laef bakegen, oli mas obei long ol loa blong Jehova, mo pruvum se oli save gohed blong stap long Paradaes. Nomata se ol man ya oli kasem wanem kaen visa blong kam insaed long narafala kantri, maet samfala bambae oli kam sitisen, mo samfala maet oli dipotem olgeta. Hemia bambae i dipen nomo long tingting mo fasin blong olgeta taem oli stap long niufala kantri ya. Long sem fasin, laswan jajmen blong olgeta ya we oli laef bakegen, bambae i dipen long fasin blong olgeta blong holemstrong long Jehova mo fasin we oli mekem long niufala wol.

Jehova God i gat sore, be hem i God blong jastis tu, mo i mekem i sem mak long olgeta man. (Dut. 32:4; Sam 33:5) Bambae hem i soemaot lav taem hem i mekem ol man we oli stret wetem ol man we oli no stret, oli laef bakegen. Be bambae oli mas obei long ol rul blong hem long saed blong samting we i stret mo samting we i no stret. Olgeta ya nomo we oli lavem hem mo oli folem ol rul blong hem, bambae oli gohed blong laef long niufala wol.