▪ Long 1 Korin 15:8, Pol i talem se: “Hem i kamtru long mi we mi olsem wan pikinini we i no bon long stret taem blong hem.” Bifo yumi ting se Pol i stap tokbaot prapa ekspiriens blong hem, taem hem i luk wan vison we i soemaot Jisas long glori blong hem long heven. Hemia i olsem we hem i kasem ona blong bon, o i laef bakegen olsem wan spirit man, plante handred yia bifo we ol tabu Kristin oli laef bakegen. Be afta we oli mekem plante risej, oli luksave se oli mas jenis eksplenesen blong vas ya.

I tru se Pol i stap tokbaot samting we i bin hapen long hem taem hem i jenis i kam Kristin. ?Be hem i minim wanem taem hem i talem se hem i “no bon long stret taem”? I save minim plante samting.

Hem i jenis kwiktaem nomo mo hem i sek nogud. Taem wan pikinini i no bon long stret taem, hemia i mekem man i sapraes. Taem Sol (we biaen oli singaot hem se Pol) i stap travel i go long Damaskes blong spolem ol Kristin, hem i no ting se bambae hem i luk wan vison blong Jisas we i laef bakegen. Pol i sapraes taem hem i jenis i kam Kristin, be i no hem nomo, ol Kristin tu we hem i plan blong go spolem olgeta oli sapraes. Pol i sek nogud tu long samting we i hapen long hem, mekem se hem i blaen blong smoltaem.—Wok 9:1-9, 17-19.

Hem i jenis long “rong taem.” Olfala Grik tok we yumi tanem i kam “wan pikinini we i no bon long stret taem” i save minim tu “wan we i bon long rong taem.” The Jerusalem Bible i talem se: “I olsem we mi bon long taem we man i no ekspektem.” Long taem ya we Pol i jenis i kam Kristin, Jisas i gobak long heven finis. Pol i no bin luk Jisas bifo we hem i gobak long heven, olsem olgeta ya we hem i tokbaot long ol vas bifo. (1 Kor. 15:4-8) Taem Jisas i kamtru long Pol, hem i gat janis blong luk Jisas, nating we i olsem se hemia i “rong taem.”

Hem i no leftemap hem wan. Sam man blong stadi oli ting se tok we Pol i yusum i daonem hem. Sipos Pol i gat tingting ya, hemia from we hem i luksave se hem i no naf blong kasem bigfala blesing olsem. Taswe hem i gohed se: “Mi mi daon moa long ol narafala aposol mo i no stret nating blong ol man oli singaot mi se aposol, from we fastaem, mi stap spolem kongregesen blong God. Be from kaen fasin blong God, mi mi kam wan aposol.”—1 Kor. 15:9, 10.

From samting ya, i luk olsem se Pol i stap tokbaot taem ya we Jisas i kamtru long hem, we i no stret blong hem i jenis, o hem i no naf blong kasem bigfala blesing olsem. Nating se i olsem wanem, i klia se Pol i tinghae long ekspiriens ya we i soemaot klia se Jisas i laef bakegen long ded. Yumi no sapraes se plante taem hem i tokbaot samting ya taem hem i talemaot long ol narafala se Jisas i laef bakegen.—Wok 22:6-11; 26:13-18.