1. Klosap long en blong laef blong Pita, ?wanem narafala wok we Jehova i givim long hem?

 APOSOL Pita i mekem wok blong Jehova blong plante yia. Hem i folem Jisas long wok blong prij, i statem wok ya blong prij long ol man we oli no man Jiu, mo biaen hem i kam wan memba blong hed kampani. Klosap long en blong laef blong hem, Jehova i givim moa wok long hem. Samwe long ol yia 62-64 K.T., Jehova i yusum hem blong raetem tu leta, hemia Fas mo Seken Pita. Pita i hop se tufala leta ya bambae i halpem ol Kristin afta we hem i ded.—2 Pita 1:12-15.

2. ?From wanem Pita i raetem tufala leta blong hem long stret taem?

² Pita i raetem tufala leta ya long wan taem we ol brata mo sista oli stap fesem “ol defdefren trabol.” (1 Pita 1:6) Sam man nogud oli karem ol giaman tijing mo ol doti fasin i kam insaed long kongregesen. (2 Pita 2:1, 2, 14) I no longtaem ol Kristin long Jerusalem bambae oli luk “en blong evri samting.” I min se ol ami blong Rom bambae oli spolem taon blong Jerusalem mo tempol. (1 Pita 4:7) I sua se tufala leta blong Pita, i givhan bigwan long ol Kristin blong oli stanap strong mo oli rere blong fesem ol samting we bambae oli kam. b

3. ?From wanem yumi mas stadi gud long tufala leta blong Pita?

³ Nating se Pita i raetem tufala leta ya long ol Kristin long faswan handred ya, be Jehova i meksua se oli stap long Tok blong Hem Baebol. Long rod ya, yumi tu yumi save kasem ol  gudfala samting long ol leta ya. (Rom 15:4) Olsem ol Kristin long taem ya, yumi tu yumi laef long wan wol we i fulap long ol doti fasin, we i save mekem i had blong gohed long wok blong Jehova. Mo i no longtaem bambae yumi fesem wan trabol we i bigwan moa i bitim trabol we i kasem ol man Jiu. From samting ya, yumi save faenem sam impoten advaes long tufala leta blong Pita. Ol advaes ya, bambae oli halpem yumi blong wet long dei blong Jehova, winim fraet long man, mo wokem fasin ya blong lavlavem yumi. Mo tu, oli save halpem ol elda blong mekem gud wok blong olgeta blong givhan long ol brata mo sista blong stanap strong.

4. Folem 2 Pita 3:3, 4, ?wanem i save mekem se yumi gat tu tingting?

⁴ Ol man we oli stap raonabaot long yumi oli no bilif long ol profet tok blong Baebol. Samfala oli agensem mo jikim yumi from we plante yia finis yumi stap talem se en bambae i kam. Sam narafala oli stap talem se en bambae i neva kam. (Ridim 2 Pita 3:3, 4.) Sipos yumi harem ol tok olsem long wok blong prij, long ples blong wok, o long wan famle, maet hemia i save mekem yumi gat tu tingting. Pita i tokbaot samting we i save halpem yumi.

5. ?Wanem bambae i halpem yumi blong wet wetem longfala tingting? (2 Pita 3:8, 9)

⁵ Maet samfala oli ting se Jehova i slo tumas blong finisim rabis wol ya. Ol tok blong Pita i save halpem yumi blong tingbaot se tingting blong Jehova long saed blong taem, i defren olgeta long tingting blong man. (Ridim 2 Pita 3:8, 9.) Long tingting blong Jehova, wan taosen yia i sem mak long wan dei nomo. Mo Jehova i gat longfala tingting from hem i no wantem se wan man i lus. Nating se i olsem, taem dei blong hem i kamtru, bambae hem i finisim rabis wol ya. I gud tumas we yumi yusum taem ya we i stap yet blong prij long ol man long olgeta ples long wol.

6. ?Olsem wanem blong ‘tingbaot dei blong Jehova oltaem’? (2 Pita 3:11, 12)

⁶ Pita i talem se, ‘yumi mas tingbaot dei blong Jehova’ oltaem. (Ridim 2 Pita 3:11, 12.) ?Olsem wanem yumi mekem samting ya? I gud yumi traehad blong tingting dip evri dei long ol blesing blong niufala wol. Traem pijarem se yu stap pulum win we i klin, kakae ol naesfala kakae, welkamem bak ol famle mo ol fren we oli ded, mo tijim ol man we oli laef plante handred yia bifo we ol profet tok blong Baebol oli kamtru. Fasin ya blong tingting dip bambae i givhan long yu blong gohed blong wet mo sua se yumi stap laef long ol las dei. “From we yumi save finis olgeta samting ya” long saed blong fiuja, bambae ol giaman tija ‘oli no pulum yumi i go krangke.’—2 Pita 3:17.

7. ?Fraet long man i save mekem wanem long yumi?

⁷ From we yumi save se dei blong Jehova i klosap, yumi wantem mekem bes blong yumi blong talemaot gud nius long ol narafala. Be samtaem yumi fraet blong mekem olsem. ?From wanem? Maet yumi fraet long tingting blong ol narafala man. Hemia nao sem samting we i hapen long Pita. Long naet bifo we Jisas i ded, Pita i fraet blong talem se hem i wan disaepol blong Jisas, bakegen mo bakegen hem i talem se hem i no save hem. (Mat. 26:69-75) Be biaen taem Pita i winim fraet ya, hem i talem wetem strong tingting se: “Yufala i no mas fraet long samting we olgeta oli fraet long hem, mo tingting blong yufala i no mas trabol.” (1 Pita 3:14) Ol tok ya blong Pita i soemaot klia se yumi save winim fraet long man.

8. ?Wanem i save halpem yumi blong winim fraet long man? (1 Pita 3:15)

 ⁸ ?Wanem i save givhan long yumi blong winim fraet long man? Pita i talem se: “Yufala i mas akseptem long hat blong yufala se Kraes i Masta blong yufala mo hem i tabu.” (Ridim 1 Pita 3:15.) Hemia i min se yumi mas tingting dip long posisen mo paoa we Masta mo King blong yumi Jisas Kraes i gat. Sipos yumi fraet taem yumi gat wan janis blong talemaot gud nius long narafala, tingbaot King blong yumi. Pijarem hem long heven wetem plante milian enjel we oli stap raonabaot long hem. Tingbaot se ‘God i givim paoa long hem . . . long olgeta samting long heven mo long wol,’ mo bambae Jisas i ‘stap wetem yumi oltaem, gogo kasem lashaf blong sistem blong wol.’ (Mat. 28:18-20) Pita i talem se yumi “mas rere oltaem” blong tokbaot bilif blong yumi. ?Bambae yu glad blong prij long wok, long skul, o long wan narafala ples? Traem tingbaot wetaem yu save mekem olsem mo rerem samting we bambae yu talem. Prea long Jehova blong i givim strong tingting long yu, mo trastem se hem i save halpem yu blong winim fraet long man.—Wok 4:29.

9. ?Wanem samting we Pita i mekem we i no soemaot lav? (Mo tu, yu luk pija.)

⁹ Pita i lanem olsem wanem blong soemaot lav. Hem i stap taem Jisas i talem se: “Mi mi  givim wan niufala komanmen long yufala, se yufala i mas lavlavem yufala. Olsem we mi lavem yufala, ale long sem fasin, yufala tu i mas lavlavem yufala.” (Jon 13:34) Nating se i olsem, biaen Pita i no wantem kakae wetem ol brata mo sista we oli no man Jiu, from hem i fraet long tingting blong ol Kristin we oli man Jiu. Aposol Pol i talem se Pita i gat “tu fes.” (Gal. 2:11-14, fut.) So Pita i akseptem tok ya we Pol i talem blong stretem hem mo i lanem samting from. Long tufala leta blong Pita, hem i makem se yumi no mas harem nomo se yumi lavem ol brata mo sista, be yumi mas soemaot lav ya tu.

10. ?Olsem wanem yumi save ‘laekem tumas ol brata long fasin we i no blong giaman’? Eksplenem. (1 Pita 1:22)

¹⁰ Pita i talem se, yumi mas ‘laekem tumas ol brata long fasin we i no blong giaman.’ (Ridim 1 Pita 1:22.) Yumi kasem lav ya taem yumi “obei long trutok.” Wan trutok, hemia tijing ya se “God i stap mekem i sem mak nomo long olgeta man.” (Wok 10:34, 35) Sipos yumi soemaot lav long samfala nomo long kongregesen, yumi no stap obei long komanmen blong Jisas long saed blong lav. I tru, olsem Jisas, maet yumi harem se yumi klosap moa long samfala i bitim ol narafala. (Jon 13:23; 20:2) Be Pita i mekem yumi tingbaot se yumi mas traehad blong “laekem tumas ol brata” mo sista, from oli olsem famle blong yumi.—1 Pita 2:17.

11. ?Lav we i “strong” i minim wanem?

¹¹ Pita i talem se: “Yufala i mas strong blong lavlavem yufala long fulhat blong yufala.” Lav ya i “mas strong” from we samtaem i had blong lavem narafala, be yumi mas lavem hem. Traem tingbaot sipos wan brata i mekem yu yu harem nogud. Maet yu harem se yu wantem givimbak long hem mo yu kros, i bitim we yu soemaot lav long hem. Be Jisas i tijim Pita se God i no glad taem yumi givimbak. (Jon 18:10, 11) Pita i raetem se: “Taem man i mekem i nogud long yufala, yufala i no mas mekem i nogud long hem bakegen. Taem man i tok nogud long yufala, yufala i no mas tok nogud long hem bakegen. Be yufala i mas toktok kaen long hem.” (1 Pita 3:9) Taem yumi strong blong lavem narafala, yumi kaen mo yumi tingbaot hem nating se hem i mekem yumi harem nogud.

12. (1) ?Lav ya we i strong gud bambae i pusum yumi blong mekem wanem? (2) ?Bambae yu traehad blong mekem wanem, olsem video ya Protektem Fasin Blong Joen Gud Tugeta i soemaot?

¹² Long fas leta we Pita i raetem, hem i talem se ‘lav ya we i strong gud’ bambae “i kavremap plante plante sin,” i no sam sin nomo. (1 Pita 4:8) Ating Pita i tingbaot samting we Jisas i tijim plante yia bifo, long saed blong fasin blong fogif. Long taem ya, Pita i ting se hem i kaen gud from i talem se hem i glad blong fogivim brata blong hem go kasem “seven taem.” Be Jisas i tijim hem mo yumi, se yumi mas fogivim narafala “go kasem 77 taem,” hemia i min se oltaem, we i no gat en blong hem. (Mat. 18:21, 22) !Yu no mas harem nogud sipos yu faenem i had blong folem advaes ya! Ol man blong Jehova oli no stret gud olgeta, taswe samtaem oli faenem i had blong fogif. Be samting we i impoten, hemia blong mekem evri samting we yu naf blong mekem blong fogivim brata blong yu, mo mekem pis wetem hem. c

13. ?From wanem i had blong ol elda oli faenem taem blong leftemap tingting blong ol brata mo sista?

¹³ I sua se Pita i neva fogetem samting we Jisas i talem taem hem i laef bakegen, se: “Yu  lidim ol smol sipsip blong mi.” (Jon 21:16) Sipos yu wan elda, yu save se ol tok ya i stret long yu tu. Be samtaem, maet wan elda i faenem i had blong mekem gud ol impoten wok ya. Fastaem ol elda oli mas lukaot long prapa famle blong olgeta long saed blong bodi, filing, mo spirit. Mo tu, oli soemaot gudfala eksampol long wok blong prij, mo oli rerem ol haf we oli mas mekem long ol miting mo asembli. Sam elda oli gat wok tu long Komiti Blong Toktok Wetem Ol Dokta o Lokol Disaen/Konstraksen. !Tru ya ol elda oli bisi tumas!

14. ?Wanem i save givim paoa long ol elda blong lukaot gud long ol sipsip blong God? (1 Pita 5:1-4)

¹⁴ Pita i talem long ol elda se: “Yufala i mas lukaot gud long ol sipsip blong God.” (Ridim 1 Pita 5:1-4.) Sipos yu wan elda, i sua se yu lavem ol brata mo sista mo yu wantem leftemap tingting blong olgeta. Be samtaem, maet yu harem se yu taed o yu bisi tumas, nao yu no save mekem gud wok ya. ?Long taem olsem, yu save mekem wanem? Talemaot ol wari blong yu long Jehova mo tokbaot olsem wanem yu wantem halpem ol brata mo sista. Pita i raetem se: “Sipos wan long yufala i mekem minista wok blong givhan long narafala, i gud hem i mekem wok ya olsem we hem i dipen long paoa we God i givim.” (1 Pita 4:11) Maet sam brata mo sista oli fesem sam problem we oli no save winim long olfala wol ya. Be yu mas tingbaot se “nambawan man blong lukaot long sipsip” Jisas Kraes, i save mekem moa i bitim wanem we yu naf blong mekem. Hem i save halpem olgeta naoia mo long niufala wol tu. Jehova i wantem nomo se ol elda oli lavem ol brata mo sista, lukaot gud long olgeta, mo soemaot “gudfala eksampol long ol sipsip.”

15. ?Olsem wanem wan elda i lukaot gud long ol sipsip blong God? (Mo tu, yu luk pija.)

¹⁵ William we i wan elda blong plante yia finis i luksave se i impoten blong lukaot gud long ol sipsip blong God. Taem COVID-19 pandemik i stat, hem wetem ol narafala elda oli meksua se oli kontaktem evriwan long grup blong olgeta, wan taem evri wik. William i eksplenem from wanem, i se: “Plante brata oli stap olgeta nomo long haos, mo i isi blong tingting blong olgeta i kam nogud.” Taem wan brata o sista i gat wan problem, William i lesin gud blong faenemaot ol wari blong hem mo samting we hem i save mekem blong givhan.  Biaen, hem i traem faenem sam buk mo video long websaet blong yumi, we hem i save yusum blong leftemap tingting blong brata o sista ya. Hem i talem se: “Naoia ol brata mo sista oli nidim moa we yumi leftemap tingting blong olgeta. Yumi wok had blong halpem ol narafala man blong oli kasemsave long Jehova, taswe i stret we yumi wok had tu blong halpem ol sipsip blong Jehova blong oli stap strong long trutok.”

16. ?Olsem wanem yumi save folem ol advaes we yumi lanem long tufala leta blong Pita?

¹⁶ Yumi bin tokbaot sam lesen nomo we yumi lanem long tufala leta blong Pita. ?Yu yu makem wan samting we yu save kam gud moa long hem? ?Yu wantem tingting dip moa long ol blesing blong niufala wol? ?Yu wantem kasem mak ya blong prij long ples blong wok, long skul, o long wan narafala ples? ?Yu luksave sam rod blong kamgud moa blong soemaot lav long ol brata mo sista? Ol elda, ?yufala i gat strong tingting mo glad blong lukaot long ol sipsip blong Jehova? I gud yufala i traehad blong luksave samting we yufala i mas kam gud moa long hem, mo no letem tingting blong yufala i foldaon. “Masta i kaen,” mo bambae i halpem yumi blong kam gud moa. (1 Pita 2:3) Pita i mekem yumi sua se “God bambae i finisim trening blong yufala . . . Hem bambae i mekem yufala i strong, mo i givim paoa long yufala, i mekem yufala i stanap strong we i no gat wan samting i save muvum yufala.”—1 Pita 5:10.

17. Sipos yumi no givap mo yumi letem Jehova i trenem yumi, ?bambae yumi kasem wanem?

¹⁷ Fastaem Pita i harem se i no stret we hem i joen wetem Jisas we i Pikinini blong God. (Luk 5:8) Be Jehova mo Jisas i givhan long Pita, nao hem i no givap, be i gohed blong folem Kraes. From samting ya, Pita i kasem blesing blong “go insaed long Kingdom ya we bambae i stap olwe, we i blong Masta mo Sevia blong yumi, Jisas Kraes.” (2 Pita 1:11) !Hemia wan nambawan presen! Yu tu, sipos yu no givap be yu letem Jehova i trenem yu, bambae yu kasem nambawan presen ya, hemia laef we i no save finis. Yu save ‘sua fulwan se bilif bambae i sevem laef blong yu.’—1 Pita 1:9.