1. ?Pita i harem olsem wanem taem Jisas i mekem merikel blong hem i kasem plante fis?

 PITA i stap fulnaet be i no kasem wan fis nating. Hem i sek taem Jisas i talem se: “Yufala i pul i go long ples we i dip, mo yufala i sakem net blong yufala.” (Luk 5:4) Pita i no ting se bambae i kasem sam fis, be hem i mekem samting we Jisas i talem. Nao ol net oli fulap long ol fis, mekem se oli brokbrok. Taem Pita mo olgeta we oli wok wetem hem oli luksave se Jisas i jes mekem wan merikel, “oli sapraes tumas.” Nao Pita i talem se: “Masta, yu gowe long mi, from we mi mi wan man nogud.” (Luk 5:6-9) Ating Pita i harem se i no stret nating we hem i stap wetem Jisas.

2. ?From wanem i gud yumi stadi long eksampol blong Pita?

² I stret nomo we Pita i talem se hem i “wan man nogud.” Baebol i soemaot se samtaem Pita i talem mo mekem sam samting we biaen hem i harem nogud from. ?Samtaem yu tu yu harem olsem Pita? ?Yu yu gat wan slak fasin we yu stap traehad longtaem finis blong winim? Sipos i olsem, i gud yu stadi long eksampol blong Pita we i save leftemap tingting blong yu. ?From wanem? Traem tingbaot: Jehova i save mekem se oli no raetem daon ol mastik blong Pita long Baebol. Be hem i pulum ol man blong raetem daon ol eksampol ya olsem ol lesen blong yumi tede. (2 Tim. 3:16, 17) Taem yumi kasemsave long ol slak fasin mo filing blong Pita, yumi luksave se Jehova i no ekspektem yumi blong kam stret gud olgeta. Be hem i wantem se yumi gohed blong traehad, nating se yumi gat ol slak fasin.

3. ?From wanem i impoten blong no givap?

³ ?From wanem i impoten blong no givap? Hemia from we taem yumi mekem wan samting bakegen mo bakegen yumi kam gud long hem. Traem tingbaot wan man we i wantem plei gud long gita. Long ol yia we hem i stap lanem, maet hem i  mestem plante taosen taem, be sipos hem i gohed blong mekem bakegen mo bakegen, bambae hem i kam gud. Nating se hem i lanem blong plei gud, samtaem hem i save mestem. Be hem i no givap, hem i gohed nomo blong praktis blong i save kam gud moa. Long sem fasin, nating se yumi winim wan slak fasin finis, yumi save mestem bakegen. Be yumi gohed nomo blong traehad blong kam gud moa. Yumi evriwan i talem o mekem sam samting we biaen yumi harem nogud from, be sipos yumi no givap, Jehova bambae i halpem yumi blong kam gud moa. (1 Pita 5:10) I gud yumi tingbaot eksampol blong Pita we i no givap. Nating se Pita i gat sam slak fasin, Jisas i sore long hem, mo samting ya i save leftemap tingting blong yumi blong gohed long wok blong Jehova.

4. Folem Luk 5:5-10, ?Pita i tokbaot hem wan olsem wanem? Mo ?Olsem wanem Jisas i leftemap tingting blong hem?

⁴ Baebol i no eksplenem from wanem Pita i talem se hem i “wan man nogud” mo wanem sin we hem i stap tingbaot. (Ridim Luk 5:5-10.) Maet hem i bin mekem sam bigfala mastik. Jisas i luksave se Pita i fraet, maet from we Pita i harem se hem i no naf. Be Jisas i save se Pita i naf blong stap tru long hem. Taswe long kaen fasin hem i talem long Pita se: “Yu no fraet.” Taem Jisas i trastem Pita olsem, hemia i jenisim laef blong Pita. Biaen Pita mo brata blong hem Andru, tufala i lego bisnes blong tufala blong kasem fis mo tufala i joenem Jisas long wok blong prij, mo Jehova i blesem tufala long plante defren rod.—Mak 1:16-18.

5. ?Wanem ol blesing we Pita i kasem from we hem i winim ol nogud filing blong hem mo i folem Jisas?

⁵ Taem Pita i folem Kraes, hem i gat plante nambawan ekspiriens. Hem i luk we Jisas i hilim ol sik man, ronemaot ol rabis spirit, mo i mekem ded man i laef bakegen. b (Mat. 8:14-17; Mak 5:37, 41, 42) Mo tu, Pita i luk wan nambawan vison blong taem ya we Jisas bambae i kam King long Kingdom blong God, mo hem i neva fogetem samting ya. (Mak 9:1-8; 2 Pita 1:16-18) Pita i luk plante samting we hem i no save luk sipos hem i no folem Jisas. I sua se hem i glad tumas we hem i no letem ol nogud filing long saed blong hem wan i blokem hem blong kasem ol gudfala blesing ya.

6. ?Pita i winim ol slak fasin blong hem kwiktaem? Eksplenem.

⁶ Nating se Pita i luk mo i harem ol samting ya, be hem i mas traehad yet blong winim  ol slak fasin blong hem. Tingbaot sam eksampol: Taem Jisas i eksplenem se bambae hem i safa mo i ded olsem ol profet tok blong Baebol i talem, Pita i talem se hemia i no save hapen long hem. (Mak 8:31-33) Bakegen mo bakegen, Pita mo ol narafala aposol oli raorao se hu i hae moa. (Mak 9:33, 34) Long naet bifo we Jisas i ded, Pita i girap mo i katemaot sora blong wan man. (Jon 18:10) Long sem naet ya, Pita i letem fraet long man i winim hem, mo tri taem hem i talem se hem i no save fren blong hem Jisas. (Mak 14:66-72) Afta long samting ya, Pita i krae we i krae.—Mat. 26:75.

7. ?Afta we Jisas i laef bakegen, hem i givim wanem janis long Pita?

⁷ Jisas i no lego aposol ya we tingting blong hem i foldaon. Taswe afta we Jisas i laef bakegen, hem i givim janis long Pita blong soemaot se hem i lavem hem yet. Hem i askem long Pita blong i lukaot gud long ol sipsip blong hem. (Jon 21:15-17) Pita i glad blong mekem samting ya we Jisas i askem. Mo hem i stap wetem ol faswan man we tabu spirit i makemaot olgeta, long dei blong Pentekos long Jerusalem.

8. ?Wanem bigfala mastik we Pita i mekem long Antiok?

⁸ Afta we Pita i kam wan tabu Kristin, hem i mas gohed yet blong winim ol slak fasin blong hem. Long 36 K.T., God i sanem Pita i go long Konilias we i no wan man Jiu. God i makemaot Konilias wetem tabu spirit, mo hemia i soemaot klia se “God i stap mekem i sem mak nomo long olgeta man,” mo olgeta blong ol narafala nesen tu oli save joen long Kristin kongregesen. (Wok 10:34, 44, 45) Afta long hemia, Pita i mekem samting we hem i neva mekem bifo, hem i kakae wetem ol man blong ol narafala nesen. (Gal. 2:12) Be sam Kristin we oli man Jiu oli harem se i no stret we oli kakae wanples wetem ol man blong ol narafala nesen. Taem sam long olgeta oli kam long Antiok, Pita i fraet long tingting blong olgeta ale hem i no moa kakae wetem ol brata we oli no man Jiu. Aposol Pol i luk se Pita i gat tu fes, nao i stretem hem long fored blong ol narafala. (Gal. 2:13, 14) Nating se Pita i mestem bakegen, be hem i no givap. ?Wanem i givhan long hem?

9. ?Olsem wanem Jon 6:68, 69 i soemaot se Pita i stap tru long Jisas?

⁹ Pita i stap tru long Jisas mo i no letem wan samting i blokem hem blong folem Jisas. Wan taem, Jisas i talem sam tok we ol disaepol oli no kasemsave long hem, be Pita i stap tru long Jisas. (Ridim Jon 6:68, 69.) Ol narafala oli no traem faenemaot mining blong tok blong Jisas, be oli lego hem wantaem. Pita i no mekem olsem. Hem i luksave se Jisas nomo i gat “ol tok blong laef ya we i no save finis.”

10. ?Olsem wanem Jisas i soemaot se hem i trastem Pita? (Mo tu, yu luk pija.)

¹⁰ Jisas i neva lego Pita. Long naet bifo we Jisas i ded, hem i save se Pita mo ol narafala aposol bambae oli lego hem. Nating se i olsem, Jisas i sua se Pita bambae i kambak long hem mo i stanap strong. (Luk 22:31, 32) Jisas i kasemsave se, “spirit i wantem tumas, be bodi i slak.” (Mak 14:38) Taswe nating we Pita i talem se hem i no save Jisas, be Jisas i no lego hem. Afta we Jisas i laef bakegen, hem i kamtru long Pita taem i stap hem wan. (Mak 16:7; Luk 24:34; 1 Kor. 15:5) !Tingbaot olsem wanem samting ya i mas leftemap tingting blong Pita, we i harem nogud from mastik we hem i bin mekem!

11. ?Olsem wanem Jisas i mekem Pita i sua se Jehova bambae i lukaot gud long hem?

¹¹ Jisas i mekem Pita i luksave se Jehova bambae i lukaot gud long hem. Afta we Jisas i laef bakegen, hem i mekem wan merikel bakegen blong Pita mo ol narafala aposol oli kasem  plante fis. (Jon 21:4-6) Merikel ya i mekem Pita i sua se Jehova i naf blong givim ol samting we oli nidim blong laef. Maet hemia i mekem Pita i tingbaot tok blong Jisas se Jehova bambae i givim evri samting we oli nidim, sipos oli gohed blong “lukaot Kingdom . . . fastaem.” (Mat. 6:33) Ol samting ya i halpem Pita blong putum wok blong prij i stap fasples long laef blong hem, bitim bisnes blong hem blong kasem fis. Long dei blong Pentekos long 33 K.T., Pita i no fraet blong givim wan gudfala witnes we i halpem plante taosen man blong oli bilif long gud nius. (Wok 2:14, 37-41) Biaen hem i halpem plante man Sameria mo plante narafala man we oli no man Jiu, blong oli folem Kraes. (Wok 8:14-17; 10:44-48) Tru ya, Jehova i yusum Pita long wan bigfala fasin, blong halpem plante defdefren kaen man blong oli joen long kongregesen.

12. ?Olsem wanem eksampol blong Pita i save halpem yumi, sipos yumi traehad longtaem blong winim wan slak fasin?

¹² Jehova i save halpem yumi blong no givap. Maet i no isi, speseli taem yumi traehad longtaem blong winim wan slak fasin. Samtaem maet yumi ting se ol slak fasin blong yumi oli had moa blong winim i bitim hemia blong Pita. Be Jehova i save givim paoa long yumi blong yumi no givap. (Sam 94:17-19) Tingbaot wan brata we bifo we hem i lanem trutok, hem i homoseksuol blong plante yia. Hem i jenisim laef blong hem mo i folem ol samting we Baebol i talem. Nating se i olsem, plante taem hem i mas faet agensem ol nogud filing we oli pulum hem. ?Wanem i halpem hem blong i no givap? Hem i talem se: “Jehova i stap givim paoa long ol man blong hem.” Mo i gohed i se: “Mi mi lanem se wetem spirit blong Jehova, yumi naf blong gohed blong laef long fasin we hem i wantem. Jehova i stap yusum mi, mo nating se mi gat plante slak fasin, hem i gohed blong givim paoa long mi.”

13. ?Olsem wanem yumi save folem eksampol blong Pita, we Ol Wok 4:13, 29, 31 i tokbaot? (Mo tu, yu luk pija.)

¹³ Olsem we yumi luk finis, Pita i mekem sam bigfala mastik from we hem i fraet long man. Be taem hem i prea blong gat strong tingting, hem i no fraet blong tekem aksen. (Ridim Ol Wok 4:13, 29, 31.) Yumi tu yumi naf blong winim ol samting we yumi fraet long hem. Traem tingbaot samting we i hapen long Horst, wan yangfala brata we i stap long Jemani taem ol Nasi oli rul. Long taem ya, oli  fosem ol man blong talem wan spesel tok, hemia “!Heil Hitler!” (Hitler bambae i sevem yumi). Horst i save se i no stret blong talem ol tok ya, be samtaem hem i talem from i fraet long ol tija mo ol narafala long klas. Papa mo mama blong Horst i no kros long hem, be tufala i prea wetem hem blong askem long Jehova blong i givim strong tingting long hem. Wetem help blong papa mama mo taem Horst i trastem Jehova, hem i kasem paoa blong stanap strong. Biaen hem i talem se: “Jehova i neva lego mi.” c

14. ?Olsem wanem ol gudfala man blong lukaot long sipsip oli save halpem olgeta we tingting blong olgeta i foldaon?

¹⁴ Jehova mo Jisas bambae i neva lego yumi. Afta we Pita i talem se hem i no save Jisas, hem i gat wan impoten desisen blong mekem. ?Bambae hem i givap? ?O bambae hem i gohed blong traehad blong stap olsem wan disaepol blong Kraes? Jisas i askem strong long Jehova, blong givhan long Pita blong i no lego bilif blong hem. Jisas i tokbaot prea ya long Pita, mo i talem se bambae Pita i naf blong mekem ol brata blong hem oli strong. (Luk 22:31, 32) !I sua se taem Pita i tingting bak long ol tok ya blong Jisas, hemia i mekem tingting blong hem i strong! Taem yumi mas mekem wan impoten desisen long laef blong yumi, Jehova i save yusum ol gudfala man blong lukaot long sipsip, blong givim paoa we yumi nidim blong stanap strong. (Efes. 4:8, 11) Paul we i wan elda longtaem finis, i traehad blong leftemap tingting blong ol narafala. Hem i askem long olgeta we oli wantem givap, blong oli tingbaot olsem wanem Jehova i pulum olgeta fastaem i kam long trutok. Afta, hem i mekem olgeta oli save se bigfala lav blong Jehova bambae i mekem se Hem i no save givap long olgeta. Paul i talem  se, “Mi luk plante we tingting blong olgeta i foldaon, oli no givap from we Jehova i halpem olgeta.”

15. ?Olsem wanem stori blong Pita mo Horst i soemaot se Matiu 6:33 i tru?

¹⁵ Jehova i givim ol samting we Pita mo ol narafala aposol oli nidim blong laef, long sem fasin, bambae hem i givim ol samting we yumi nidim sipos yumi putum wok blong hem long fasples long laef blong yumi. (Mat. 6:33) Horst we yumi tokbaot finis, i tingbaot blong paenia afta we Wol Wo Tu finis. Be hem i pua tumas mo hem i ting se hem i no save winim i naf mane blong gohed long wok blong paenia. ?Hem i mekem wanem? Hem i wantem luk sipos Jehova bambae i givim ol samting we hem i nidim, ale hem i spenem ful wik long wok blong prij, taem eria elda i visitim kongregesen. Long en blong wik, hem i sek long wan envlop we eria elda i givim long hem, be i no talem se hu i givim. Insaed long envelop ya, i gat naf mane we hem i save pem samting we hem i nidim blong i save paenia blong sam manis. Horst i luk presen ya olsem wan pruf se Jehova bambae i lukaot gud long hem. Taswe hem i gohed long ful laef blong hem blong putum wok blong Kingdom long fasples.—Mal. 3:10.

16. ?Yumi lanem wanem long eksampol blong Pita mo tufala leta we hem i raetem?

¹⁶ Pita i mas glad tumas se Jisas i no gowe long hem, olsem we hem i bin askem. Pita i kam wan gudfala aposol mo wan nambawan eksampol blong ol Kristin, from we Kraes i gohed blong trenem hem. Mo yumi lanem plante gudfala lesen from trening ya. Pita i tokbaot ol lesen ya mo sam narafala save long tufala leta we tabu spirit i pulum hem blong raetem i go long ol kongregesen long faswan handred yia. Long nekis stadi bambae yumi tingtingbak long sam samting long tufala leta ya, mo luk olsem wanem yumi save folem olgeta tede.