1-2. ?From wanem i gud yumi stadi long stori blong Samson?

 TAEM yu harem nem ya Samson, ?yu tingbaot wanem? Ating yu tingbaot wan man we i strong bitim mak. Hemia i tru, be Samson i mekem wan nogud desisen we i mekem se hem i safa. Nating se i olsem, Jehova i tingbaot ol gudfala samting we Samson i mekem blong holemstrong long Hem, mo Hem i mekem se ol man oli raetemdaon stori ya long Baebol blong givhan long yumi.

² Jehova i yusum Samson blong mekem sam bigfala samting blong givhan long ol man Isrel we hem i jusumaot. Plante handred yia afta we Samson i ded, Jehova i pulum aposol Pol blong raetem nem blong Samson long lis blong ol man we oli gat bigfala bilif. (Hib. 11:32-34) Eksampol blong Samson i save leftemap tingting blong yumi. Oltaem hem i dipen long Jehova, nating se samtaem hem i fesem hadtaem. Long stadi ya, bambae yumi tokbaot samting we yumi lanem long Samson mo olsem wanem eksampol blong hem i save enkarejem yumi.

3. ?Jehova i givim wanem wok long Samson?

³ Taem Samson i bon, ol man Filistia oli stap rulum nesen blong Isrel mo mekem i strong long olgeta. (Jaj. 13:1) Ol man Isrel oli safa bigwan from we ol man Filistia oli raf tumas. Jehova i jusum Samson blong “statem wok ya blong sevem ol man Isrel, i tekemaot olgeta long han blong ol man Filistia.” (Jaj. 13:5) !Hemia wan hadwok ya! Samson i mas dipen fulwan long Jehova blong mekem wok ya.

4. ?Olsem wanem Jehova i givhan long Samson blong kam fri long ol man Filistia? (Jajes 15:14-16)

⁴ Tingbaot wan samting we i soemaot se Samson i trastem Jehova mo i dipen fulwan long hem. Wan taem ol soldia blong  Filistia oli kam long Lehi we i stap long Juda, blong holemtaet Samson. Ol man Juda oli fraet, nao oli putum Samson long han blong ol enemi blong olgeta. Ol man ples blong Samson oli fasem hem wetem tu niufala rop mo oli karem hem i go long ol man Filistia. (Jaj. 15:9-13) Be “spirit blong Jehova i mekem hem i strong” nao hem i brekem ol rop ya. Biaen, “hem i faenem wan bun blong maot blong wan man dongki we i strong gud yet,” i pikimap, mo i yusum bun ya blong kilim 1,000 man Filistia i ded.—Ridim Jajes 15:14-16.

5. ?Olsem wanem Samson i soemaot se hem i dipen long Jehova?

⁵ ?From wanem Samson i yusum bun blong maot blong dongki? !Tul blong faet ya i narakaen! Samson i luksave se hem i naf blong win, i no from ol tul blong faet be from we hem i dipen long Jehova. Yes, man ya blong bilif i yusum wanem we hem i gat blong mekem samting we Jehova i wantem. Samson i winim olgeta man ya from we hem i dipen long Jehova.

6. ?Yumi lanem wanem long stori blong Samson?

⁶ Jehova God bambae i givim paoa long yumi tu blong mekem eni samting we hem i askem, nating we yumi harem olsem se yumi no naf blong mekem wok ya. Mo God bambae i halpem yumi long fasin we yumi sapraes long hem. Trastem Jehova we i givim paoa long Samson, blong i halpem yu blong mekem samting we Hem i wantem, taem yu dipen long Hem.—Prov. 16:3.

7. ?Wanem eksampol i soemaot se i impoten blong lukaot rod we Jehova i wantem yumi blong folem?

⁷ Plante brata mo sista we oli joen long wok blong konstraksen blong ol haos wosip, oli soemaot se oli trastem Jehova. Long ol yia we i pas, ol brata nomo oli disaenem mo bildim bighaf blong ol Haos Kingdom mo ol niufala bilding. Be taem plante moa man oli joen long oganaesesen blong Jehova, oli mas mekem sam jenis. Ol brata we oli lidim wok ya, oli prea long Jehova mo oli traem sam niufala rod, olsem pem ol bilding mo riperem. Robert we i wok long ol defdefren konstraksen projek raon long wol, i talem se: “Fastaem i no isi  long samfala blong folem niufala rod ya, we i defren olgeta long samting we oli bin mekem blong plante yia. Be oli rere blong jenis mo i klia se Jehova i blesem olgeta from.” Hemia wan eksampol nomo we i soemaot olsem wanem Jehova i stap lidim ol man blong hem, blong mekem samting we hem i wantem. Samtaem i gud yumi askem se: ‘?Mi mi stap lukaot rod we Jehova i lidim mi long hem, mo mi rere blong mekem sam jenis blong givim bes blong mi long hem?’

8. ?Taem Samson i tosta tumas, hem i mekem wanem?

⁸ Maet yu ridim stori blong plante narafala wok we Samson i mekem. Hem wan nomo i kilim wan laeon i ded, mo i kilim 30 man Filistia long taon ya Askelon. (Jaj. 14:5, 6, 19) Samson i save se hem i nidim help blong Jehova blong mekem ol wok ya. Samting ya i kamaot klia taem hem i kilim i ded 1,000 man Filistia, nao hem i tosta tumas. ?Hem i mekem wanem? Hem i no dipen long hem wan blong faenem wota, be i singaot long Jehova blong i halpem hem.—Jaj. 15:18.

9. ?Jehova i mekem wanem blong ansa long prea blong Samson? (Jajes 15:19)

⁹ Blong ansa long Samson, Jehova i openem wan hol mo i mekem wota i kamaot olsem wan merikel. Taem Samson i dring wota ya, “hem i kasem paoa bakegen, nao hem i harem gud.” (Ridim Jajes 15:19) Plante yia biaen, taem profet Samuel i raetem buk blong Jajes, hol blong wota ya i stap yet. Taem ol man Isrel oli luk wota ya we i stap ron, maet oli tingbaot se sipos ol man blong Jehova oli dipen long hem, bambae hem i givhan long olgeta.

10. ?Yumi mas mekem wanem blong kasem help blong Jehova? (Mo tu, yu luk pija.)

¹⁰ Yumi tu yumi mas dipen long Jehova blong i givhan long yumi, nomata wanem save o gudhan we yumi gat long wok blong Jehova o wanem wok yumi mekem finis. Yumi mas gat tingting daon mo luksave se, sipos yumi dipen long Jehova nomo bambae yumi naf blong mekem samting we hem i askem. Samson i kasem paoa we hem i nidim taem hem i dring wota ya we Jehova i givim. Long sem fasin, yumi save kasem paoa sipos yumi yusum ol samting we Jehova i stap givim long yumi.—Mat. 11:28.

11. ?Olsem wanem yumi save dipen long Jehova, olsem Aleksey mo waef blong hem?

¹¹ Tingbaot eksampol blong Aleksey, wan brata long Rasia we i stanap strong nating se oli mekem i nogud long hem. ?Wanem i halpem hem blong stanap strong long hadtaem ya? Hem mo waef blong hem, tufala i gat wan gudfala program blong stadi Baebol mo mekem wosip. Hem i talem se: “Oltaem mi traehad blong stadi mi wan mo ridim Baebol evri dei. Evri moning, mi mo waef blong mi, mitufala i tokbaot vas blong dei tugeta mo prea long Jehova.” ?Eksampol blong tufala i tijim yumi long wanem? Yumi no mas dipen long yumi wan, be yumi mas dipen long Jehova. ?Olsem wanem yumi save mekem olsem? Yumi mas folem wan gudfala program blong ridim Baebol mo mekem ol narafala tiokratik wok, mo hemia bambae i mekem bilif blong yumi i strong. Sipos yumi mekem olsem, Jehova bambae i halpem yumi blong gohed blong mekem wok blong hem. Hem i givim paoa long Samson, mo Hem i save givim paoa long yumi tu.

12. ?Wanem nogud desisen we Samson i mekem? ?Olsem wanem frensip blong hem wetem Delila i defren long ol narafala frensip we hem i gat bifo?

¹² Samson i wan sinman olsem yumi, taswe  samtaem hem i mekem nogud desisen. Wan desisen we hem i mekem i lidim hem blong kasem bigfala trabol. Samtaem afta we Samson i stat blong mekem wok blong jaj, “hem i luk wan woman long Krik Blong Sorek, mo i laekem hem tumas. Nem blong hem Delila.” (Jaj. 16:4) Be hem i promes finis blong mared long wan woman Filistia, mo hemia i folem “tingting blong Jehova,” we i “stap lukaot rod blong agensem ol man Filistia.” Afta long hemia, Samson i stap long haos blong wan prostitut long taon ya Gasa long Filistia. Long taem ya, Jehova i givim paoa long Samson blong tekemaot get blong taon ya. Hemia i mekem se taon ya i no moa strong. (Jaj. 14:1-4; 16:1-3) Be from we Delila i wan woman Isrel, frensip blong Samson wetem hem i no givim janis blong faet agensem ol man Filistia.

13. ?Delila i mekem wanem long Samson?

¹³ Delila i kasem bigfala mane blong putum Samson i go long han blong ol man Filistia. Maet Samson i lavem hem tumas, taswe i no luksave se Delila i stap trikim hem. Nating se i olsem, Delila i gohed nomo blong askem long Samson blong i talemaot from wanem hem i strong, gogo Samson i talemaot long hem. Sore tumas, mastik blong Samson i mekem se hem i lusum paoa, mo long taem ya Jehova i no glad long hem.—Jaj. 16:16-20.

14. ?Wanem i hapen long Samson from we hem i trastem Delila?

¹⁴ Samson i kasem bigfala trabol from we hem i trastem Delila i bitim Jehova. Ol man Filistia oli holemtaet Samson mo oli stikimaot tufala ae blong hem. Oli putum hem long prisen long Gasa, hemia ples we bifo Samson i bin pulumaot ol doa blong taon ya. Ol man ya oli mekem hem i kam wan slef we i stap granem sid. Biaen oli mekem wan  bigfala lafet mo oli tekem Samson i kam stanap long medel blong olgeta. Oli mekem wan bigfala sakrefaes long giaman god blong olgeta Dagon, from we oli bilif se hem nao i putum Samson long han blong olgeta. Oli tekemaot Samson long kalabus i kam long lafet ya, “blong hem i save mekem sam samting blong [oli] laf long hem” mo jikim hem.—Jaj. 16:21-25.

15. ?Olsem wanem Samson i soem bakegen se hem i dipen long Jehova? (Jajes 16:28-30) (Yu luk pija long fran pej.)

¹⁵ Samson i mekem wan bigfala mastik, be hem i no givap. Hem i gohed blong lukaot wan janis blong winim ol man Filistia olsem we Jehova i wantem. (Ridim Jajes 16:28-30.) Samson i askem long Jehova se: “Plis yu letem mi mi panisim olgeta.” God i ansarem prea blong Samson, i mekem wan merikel blong hem i kasem spesel paoa bakegen. From samting ya, Samson i kilim i ded moa man Filistia long taem ya i bitim olgeta taem bifo.

16. ?Mastik blong Samson i tijim yumi long wanem samting?

¹⁶ Nating se Samson i kasem bigfala trabol from mastik blong hem, be hem i stap gohed nomo blong traehad blong mekem samting we Jehova i wantem. Sipos yumi mekem wan mastik we oli mas stretem yumi from, o yumi lusum wok blong yumi long kongregesen, yumi no mas givap. Yumi mas tingbaot se Jehova i rere oltaem blong fogivim yumi. (Sam 103:8-10) Nating se yumi mestem samtaem, be Jehova i save gohed blong yusum yumi olsem we hem i mekem long Samson.

17-18. ?Olsem wanem eksampol blong Michael i leftemap tingting blong yu? (Mo tu, yu luk pija.)

¹⁷ Tingbaot eksampol blong wan yangfala brata we nem blong hem Michael. Hem i wan man blong givhan, wan fultaem paenia, mo i bisi oltaem long wok blong Jehova. Be sore tumas, hem i mekem wan mastik mo i lusum wok blong hem long kongregesen. Hem i talem se: “Kam kasem taem ya, mi mi ful spid long wok blong Jehova. Be wantaem nomo, mi harem olsem se mi bangem wan stonwol. Mi no gat tingting ya se Jehova i lego mi, be mi stap tingbaot sipos mi save frengud wetem hem bakegen olsem fastaem, mo sipos mi save mekem wok long kongregesen bakegen.”

 ¹⁸ I gud tumas se Michael i no givap. Hem i talem se: “Oltaem mi prea long Jehova, mi stadi mo mi tingting dip, blong traehad blong frengud wetem hem bakegen.” Biaen, Michael i kasembak wok blong hem long kongregesen. Naoia hem i wan elda mo wan fultaem paenia. Hem i talem se: “Ol tok we mi kasem blong leftemap tingting mo sapotem mi, speseli help blong ol elda, i givhan long mi blong luksave se Jehova i lavem mi yet. Naoia mi save mekem wok long kongregesen bakegen we tingting blong mi i no stikim mi. Samting ya i tijim mi se Jehova i save fogivim eni man we i rili tanem tingting blong hem.” Nating se yumi mekem mastik, be yumi save bilif strong se Jehova bambae i gohed blong yusum mo blesem yumi, sipos yumi stretem ol rong blong yumi mo dipen long hem.—Sam 86:5; Prov. 28:13.

19. ?Olsem wanem eksampol blong Samson i mekem yu yu strong?

¹⁹ Long stadi ya, yumi tokbaot sam samting we oli hapen long laef blong Samson. Hem i no stretgud olgeta, be afta we hem i mekem mastik wetem Delila, hem i no givap. Hem i traehad blong gohed blong mekem wok blong Jehova. Mo Jehova i no lego Samson. Hem i yusum Samson bakegen long wan bigfala fasin. Jehova i tingbaot Samson olsem wan man we i gat bigfala bilif, mo i raetem nem blong hem long lis blong olgeta we oli gat bilif long Hibru japta 11. !I gud tumas blong save se Papa blong yumi long heven i gat bigfala lav mo i wantem tumas blong givhan long yumi, antap moa, taem yumi harem se yumi slak! Taswe olsem Samson, yumi mas askem strong long Jehova se: “Plis, yu tingbaot mi, mo . . . yu mekem mi mi strong.”—Jaj. 16:28.