1. ?Jehoas, Usia mo Josaea oli fesem wanem had samting long laef blong olgeta?

 TRAEM tingbaot sipos yu kam king blong ol man blong God, taem yu wan smol pikinini nomo. ?Bambae yu harem olsem wanem? ?Bambae yu yusum gud paoa blong yu? Baebol i tokbaot sam yangfala we oli kam king blong Juda. I gat Jehoas we i kam king taem i gat 7 yia, Usia we i gat 16 yia, mo Josaea we i gat 8 yia. !Tingbaot olsem wanem wok ya i mas had long trifala! Nating se i olsem, Jehova mo sam narafala oli givhan long trifala blong mekem plante gudfala samting.

2. ?From wanem i gud blong stadi long laef blong Jehoas, Usia mo Josaea?

² Nating se yumi no ol king mo kwin, be yumi save lanem plante samting long laef blong trifala ya. Trifala i mekem sam gudfala desisen, be oli mekem sam nogud desisen tu. Eksampol blong trifala i tijim yumi se yumi mas jusum ol gudfala fren, gat tingting daon mo lukaot Jehova.

3. ?Jehoas i mekem wanem taem Hae Pris Jehoada i givim advaes long hem?

³ Mekem ol waes desisen olsem Jehoas. Taem King Jehoas i yangfala, hem i mekem wan waes desisen. From we papa blong hem i ded, Hae Pris Jehoada i lukaot long hem mo i tijim hem long saed blong Jehova. Jehoas i waes from we hem i lesin long advaes we Jehoada i givim long hem. Hem i folem eksampol blong Jehoada, mo i lidim ol man blong mekem tru wosip long Jehova. Mo tu hem i mekem plan blong ol wok blong fiksimap tempol blong Jehova.—2 Kron. 24:1, 2, 4, 13, 14.

4. Taem yumi lavem mo obei long ol loa blong Jehova, ?hemia i givhan long yumi olsem wanem? (Ol Proveb 2:1, 10-12)

⁴ Sipos papa mo mama blong yu o wan narafala i tijim yu blong lavem Jehova mo ol loa blong hem, hemia i wan nambawan presen. (Ridim Ol Proveb 2:1, 10-12.) Papa mo mama blong yu i save trenem yu long plante defren rod. Tingbaot olsem  wanem papa blong wan sista we nem blong hem Katya, i halpem hem blong mekem ol gudfala desisen. Evri dei taem hem i tekem Katya i go long skul, hem i tokbaot vas blong dei wetem hem. Be, ?olsem wanem sipos papa mo mama blong yu i putum sam rul we oli stanap long Baebol, mo yu harem se oli blokem yu blong mekem sam samting we yu wantem? ?Wanem i save givhan long yu blong obei? Wan sista we nem blong hem Anastasia i talem se papa mo mama blong hem i tekem taem blong eksplenem from wanem oli mekem sam rul. Hem i talem se: “Hemia i givhan long mi blong kasemsave se tufala i no putum ol rul ya blong bos long mi, be tufala i lavem mi mo tufala i wantem protektem mi.”

5. ?Ol aksen blong yu oli save mekem wanem long papa mo mama blong yu mo Jehova? (Ol Proveb 22:6; 23:15, 24, 25)

⁵ Taem yu folem ol advaes blong Baebol we papa mo mama i givim long yu, bambae yu mekem tufala i hapi. Antap moa, bambae yu mekem God i hapi mo bambae yu kam fren blong hem blong olwe. (Ridim Ol Proveb 22:6; 23:15, 24, 25.) Hemia ol gudfala risen blong folem eksampol blong yangfala Jehoas.

6. Afta we Jehoada i ded, ?Jehoas i lesin long ol advaes blong hu? ?Biaen wanem i hapen? (2 Kronikel 24:17, 18)

⁶ ?Yumi lanem wanem long ol nogud desisen blong Jehoas? Afta we Jehoada i ded, Jehoas i jusum ol rabis fren. (Ridim 2 Kronikel 24:17, 18.) Hem i lesin long ol advaes blong ol prins blong Juda we oli no lavem Jehova. Ating yu agri se Jehoas i sud stap longwe long ol rabis man olsem. (Prov. 1:10) Be hem i lesin long ol nogud advaes we oli givim. Taswe taem Sekaraea we i kasen blong Jehoas i traem blong stretem hem, Jehoas i givim oda blong oli kilim hem i ded. (2 Kron. 24:20, 21; Mat. 23:35) !Hemia wan rabis samting we i no waes nating! Jehoas i wan gudfala man taem hem i yangfala, be sore tumas, biaen hem i kam wan man blong apostasi mo man blong kilim narafala i ded. Biaen, wan wokman blong hem nomo i kilim hem i ded. (2 Kron. 24:22-25) Traem tingbaot olsem wanem laef blong hem bambae i defren olgeta sipos hem i bin gohed blong lesin long Jehova mo olgeta we oli lavem hem. ?Yu yu lanem wanem long eksampol ya?

7. ?Yu mas jusum wanem kaen fren? (Mo tu, yu luk pija.)

⁷ Wan lesen we yumi save lanem, hemia se yumi mas jusum ol fren we oli lavem Jehova mo oli wantem mekem hem i glad. Ol fren olsem bambae oli halpem yumi blong mekem ol gudfala samting. Yumi save jusum ol fren we oli olfala moa o yang moa long yumi. Traem  tingbaot, Jehoas i yang moa long fren blong hem Jehoada. Taswe taem yu stap jusum ol fren, i gud yu askem yu wan se: ‘?Oli stap givhan long mi blong mekem bilif blong mi long Jehova i strong moa? ?Oli pulum mi blong folem ol loa blong God? ?Oltaem oli stap tokbaot Jehova mo ol gudfala trutok blong Baebol? ?Oli respektem ol loa blong God? ?Oli no fraet blong stretem mi long taem we mi nidim, o oli talem nomo ol samting we mi glad blong harem?’ (Prov. 27:5, 6, 17) Blong talem stret, yu no nidim ol fren we oli no lavem Jehova. Be sipos ol fren blong yu oli lavem Jehova, yu no lego olgeta from we bambae oli givhan long yu blong mekem ol gudfala samting.—Prov. 13:20.

8. ?Yumi mas tingbaot wanem sipos yumi stap yusum sosol media?

⁸ Sosol media i wan gudfala rod blong toktok wetem ol famle mo fren. Be plante man oli postem ol foto mo video long sosol media blong ol samting we oli pem o mekem, blong traem soemaot olgeta long ol narafala. Sipos yu yusum sosol media i gud yu askem se, ‘?mi mi wantem soemaot mi wan long ol narafala? ?Mi wantem serem ol gudfala samting wetem ol narafala o mi wantem se oli presem mi nomo? ?Mi mi letem ol narafala we oli yusum sosol media oli spolem tingting, toktok mo ol aksen blong mi?’ Brata Nathan Knorr, we bifo i wan memba blong Hed Kampani i givim advaes ya se: “Yu no mas traem mekem ol man oli glad. Sipos yu mekem olsem bambae yu no mekem eni man i glad. Traem mekem Jehova i glad, nao bambae yu mekem olgeta we oli lavem Jehova tu oli glad.”

9. ?Jehova i halpem Usia blong mekem wanem? (2 Kronikel 26:1-5)

⁹ Mekem ol waes desisen olsem Usia. Taem King Usia i wan yangfala, hem i gat tingting daon. Hem i lanem blong “fraet long tru God.” Jehova i blesem hem plante long ol 68 yia blong laef blong hem. (Ridim 2 Kronikel 26:1-5.) Usia i winim plante nesen we oli enemi blong Isrel mo i mekem Jerusalem i strong blong ol enemi oli no save winim. (2 Kron. 26:6-15) I sua se Usia i glad long ol samting we God i halpem hem blong mekem.—Pri. 3:12, 13.

10. ?Wanem i hapen long Usia?

¹⁰ ?Yumi lanem wanem long ol nogud desisen blong Usia? Oltaem King Usia i stap givim oda long ol narafala. Maet hemia nao i mekem hem i harem se hem i save mekem eni samting we hem i wantem. Wan dei, Usia i go insaed long tempol blong Jehova, mo i traem blong bonem insens long olta, be hemia wan samting we ol king oli no gat raet blong mekem. (2 Kron. 26:16-18) Hae Pris Asaria i traem blong stopem hem, be Usia i kam kros tumas. Sore tumas, Usia i no obei long Jehova mo Jehova i panisim hem, i mekem hem i kasem leprosi. (2 Kron. 26:19-21) !Sipos hem i gat tingting daon oltaem, laef blong hem bambae i defren olgeta!

11. ?Wanem i save halpem yumi blong gat tingting daon? (Mo tu, yu luk pija.)

¹¹ Taem Usia i kasem moa paoa, hem i fogetem se Jehova nao i stamba blong paoa blong hem mo ol gudfala samting we hem i kasem. ?Yumi lanem wanem? I gud yumi tingbaot oltaem se Jehova nao i givim ol blesing we yumi kasem long laef mo long wok blong hem. I nogud yumi tok flas from ol samting we yumi mekem, be yumi mas talem tangkiu long Jehova from. b (1 Kor. 4:7) Yumi mas gat tingting daon mo luksave se yumi sinman, mo samtaem narafala i mas stretem yumi. Wan brata we i gat samwe 60 yia i talem se: “Mi mi lanem blong no  kam kros mo no harem nogud tumas taem ol narafala oli stretem mi from sam krangke mastik we mi mekem, be mi traem blong kam gud moa mo mekem bes blong mi blong gohed.” Taem yumi obei long Jehova mo gat tingting daon oltaem, yumi save gat wan gudfala laef.—Prov. 22:4.

12. ?Olsem wanem Josaea i lukaot Jehova taem hem i yangfala? (2 Kronikel 34:1-3)

¹² Mekem ol waes desisen olsem Josaea. Josaea i gat 16 yia taem hem i stat blong lukaot Jehova. Hem i wantem kasemsave long Jehova mo mekem samting we Hem i wantem. Be laef blong yangfala king ya i no isi. Long taem ya, bighaf blong ol man oli wosipim ol giaman God, taswe Josaea i mas gat strong tingting blong stanemap trufala wosip. !Mo i tru se hem i gat strong tingting! Bifo we hem i gat 20 yia, hem i tekemaot giaman wosip long nesen ya.—Ridim 2 Kronikel 34:1-3.

13. ?I minim wanem blong givim laef blong yu long Jehova?

¹³ Nating se yu yangfala nomo, yu save folem eksampol blong Josaea blong kasemsave moa long Jehova mo ol gudfala fasin blong hem. Nao bambae yu wantem givim laef blong yu long hem. ?Hemia i minim wanem? Luke we i baptaes taem hem i gat 14 yia, i talem se: “Naoia bambae mi putum Jehova long fasples long laef blong mi, mo traem mekem hem i glad.” (Mak 12:30) !Sipos yu tu yu mekem olsem bambae yu kasem bigfala blesing!

14. Tokbaot olsem wanem sam yangfala oli stap folem eksampol blong King Josaea.

¹⁴ ?Wanem sam samting we i save traem wan yangfala we i stap wosipim Jehova? Johan we i baptaes taem hem i gat 12 yia, i talem se ol yangfala long klas blong hem oli traem fosem hem blong smokem elektronik sigaret. Taem Johan i tingbaot se ol elektronik sigaret ya oli save spolem helt blong hem mo mekem hem i no moa frengud wetem Jehova, hemia i mekem se hem i gat strong tingting blong talem no long olgeta. Rachel we i baptaes taem hem i gat 14 yia, i tokbaot ol samting we oli givhan long hem blong winim ol samting we oli traem hem long skul. Hem i talem se: “Mi traem blong luk olsem wanem ol samting raonabaot long mi oli joen wetem Baebol mo Jehova. Eksampol, maet wan  lesen long histri i mekem mi tingbaot wan profet tok o stori long Baebol. O taem mi stap storian wetem narafala maet mi tingbaot wan vas we mi save serem wetem hem.” Maet ol samting we oli traem yu oli defren long ol samting we King Josaea i fesem, be yu save kam waes mo holemstrong long Jehova olsem Josaea. Sipos yu winim ol samting we oli traem yu taem yu yangfala, bambae yu naf blong winim ol narafala hadtaem we bambae oli traem yu long ol yia we i kam.

15. ?Wanem i halpem Josaea blong holemstrong long Jehova? (2 Kronikel 34:14, 18-21)

¹⁵ Taem King Josaea i gat 26 yia, hem i lidim wok blong wokem gud haos tempol bakegen. Nao oli faenem “buk blong loa blong Jehova we God i bin givim tru long Moses.” Taem oli ridimaot buk ya long king, wantaem nomo hem i tekem aksen blong obei long samting we hem i harem. (Ridim 2 Kronikel 34:14, 18-21.) ?Olsem wanem? ?Yu tu yu wantem ridim Baebol evri dei? Sipos yu stap mekem olsem finis, ?yu stap enjoem Baebol riding blong yu? ?Yu makem sam vas we oli save givhan long laef blong yu? Luke we yumi tokbaot finis, i stap raetemdaon ol gudfala poen we hem i faenem. Sipos yu mekem olsem, samting ya bambae i halpem yu blong tingbaot ol vas blong Baebol mo ol lesen we yu lanem. Moa we yu kasemsave long Baebol mo laekem, moa we bambae yu wantem mekem wok blong Jehova. Mo olsem King Josaea, Tok Blong God bambae i pulum yu blong tekem aksen blong obei.

16. ?From wanem Josaea i mekem wan bigfala mastik? ?Yumi lanem wanem from?

¹⁶ ?Yumi lanem wanem long nogud desisen blong Josaea? Taem Josaea i gat 39 yia, hem i mekem wan bigfala mastik we i mekem se hem i ded from. Hem i no askem long Jehova blong givhan long hem be hem i trastem hem wan. (2 Kron. 35:20-25) ?Yumi lanem wanem? Nating se yumi olfala mo yumi stadi Baebol longtaem finis, be yumi mas gohed blong lukaot Jehova. Hemia i minim se yumi mas prea oltaem  blong askem hem blong lidim yumi, stadi long ol tok blong hem mo lesin long advaes blong ol Kristin we oli bigman long spirit. Sipos yumi mekem olsem, hemia bambae i blokem yumi blong no mekem ol bigfala mastik mo tu bambae yumi glad moa.—Jem. 1:25.

17. ?Wanem ol impoten samting we yumi lanem long stori blong trifala king blong Juda?

¹⁷ Taem yu yangfala yu gat janis blong mekem plante gudfala samting. Stori blong Jehoas, Usia mo Josaea i soemaot se ol yangfala oli save mekem ol waes desisen mo folem rod we Jehova i glad long hem. I tru, maet samtaem yumi save mestem olsem trifala ya. Be sipos yu folem ol gudfala fasin blong trifala mo no mekem ol mastik we trifala i mekem, yu save gat wan gudfala laef.

18. ?Wanem sam eksampol long Baebol we oli soemaot se yu save gat wan gudfala laef? (Mo tu, yu luk pija.)

¹⁸ I gat plante narafala stori long Baebol blong ol yangfala we oli kam klosap long Jehova, nao hem i glad long olgeta mo oli gat wan gudfala laef. Deved i wan long olgeta. Taem hem i yangfala, hem i jusum blong wosipim God mo biaen hem i kam wan king we i stap tru long God. I tru, samtaem hem i mestem, be God i luk hem olsem wan man we i holemstrong long hem. (1 King 3:6; 9:4, 5; 14:8) Taem yu stadi long laef blong Deved, eksampol blong hem bambae i givhan long yu blong gohed blong holemstrong long Jehova. Mo tu, yu save stadi long eksampol blong Mak o blong Timoti. Tufala i stat blong mekem wok blong Jehova taem tufala i yangfala nomo mo tufala i gohed blong holemstrong long hem. Desisen ya i mekem Jehova i glad mo i mekem tufala tu i glad.

19. ?Yu save gat wanem kaen laef?

¹⁹ Fiuja blong yu i dipen long samting we yu mekem long laef blong yu naoia. Sipos yu no trastem yu wan be yu trastem Jehova, bambae hem i halpem yu blong mekem ol waes desisen. (Prov. 20:24) Yu save gat wan gudfala laef we yu glad long hem. Yu no mas fogetem se Jehova i tinghae long samting we yu mekem blong hem. Beswan rod blong yusum laef blong yu, i blong mekem wok blong Papa blong yumi long heven we i lavem yumi.