Mi mi bon long 1934. Perens blong mi oli blong Swiselan mo oli muv i kam laef long Timmins, we i wan smol taon long Ontario, Kanada, we oli stap digim maen long hem. Samwe long yia 1939, mama blong mi i stat blong ridim magasin ya Wajtaoa mo i joen long ol miting blong ol Witnes blong Jehova. Mo hem i stap tekem mi wetem ol tri sista mo tri brata blong mi i go wetem hem. I no longtaem afta, hem i kam wan Witnes blong Jehova.

Papa i no glad long desisen blong mama, be from we mama i laekem tumas trutok, hem i gat strong tingting blong gohed. Mo hem i gohed blong holemstrong long taem ya we oli putum tabu long wok blong ol Witnes long Kanada. Mo oltaem hem i kaen mo i respektem papa, nating se papa i stap tok nogud long hem. Gudfala eksampol blong hem i halpem mifala blong akseptem trutok tu. Mo mifala i glad se sloslo fasin blong papa i jenis, mo hem i stat blong kaen long mifala.

Samwe long medel blong yia 1950, mi go long Niu Yok blong joen long asembli ya “Theocracy’s Increase.” !Taem mi mitim ol brata mo sista we oli kam long defren kantri, mo mi lesin long ekspiriens blong olgeta we oli graduet long Gilead Skul, mi wantem mekem moa long wok blong Jehova! Mi gat strong tingting moa blong mekem fultaem wok i bitim bifo. Stret afta we mi gobak long haos, mi fulumap fom blong kam wan fultaem paenia. Be Branj ofis long Kanada i raet i kambak mo i se mi mas baptaes fastaem. Ale long 1 Oktoba 1950, mi baptaes. Wan manis afta, mi kam wan fultaem paenia, mo faswan ples we oli sanem mi mi go long hem, hemia Kapuskasing. Taon ya i stap longwe long ples mi laef long hem.

Long 1951, branj ofis i askem ol Witnes we oli save toktok Franis, sipos oli glad blong muv i  go long wan provins long Quebec we i toktok Franis. I gat bigfala nid long provins ya. Taem mi gruap, mi lanem blong Franis mo Inglis, taswe mi glad blong muv i go mo oli sanem mi mi go long Rouyn. Mi no save eni man long ples ya, be mi gat adres ya nomo we oli givim long mi, olsem we mi bin tokbaot long stat. Nating se i olsem, evri samting i go gud. Mi mo Marcel i kam ol gudfala fren. Mi glad blong prij long Quebec long ol fo yia we i kam biaen, mo biaen mi kam wan spesel paenia.

Taem mi stap long Quebec, mi sapraes tumas blong kasem invetesen blong joenem namba 26 klas blong Gilead Skul long South Lansing, Niu Yok. Mi graduet long 12 Februari 1956, mo oli sanem mi i go long kantri ya we naoia oli singaot se Gana, b hemia long Wes Afrika. Be bifo we mi go, mi mas gobak long Kanada blong “sam wik,” blong wet kasem we ol pepa blong travel blong mi i redi.

Mi stap long Toronto i no blong sam wik, be seven manis. Mo long ol taem ya, famle Cripps, i lukaot gud long mi. Mi fren gud wetem gel blong olgeta, Sheila, mo mitufala i stat blong laeklaekem mitufala. Taem mi rere blong askem hem blong i maredem mi, ol pepa blong travel blong mi i redi. Mi mo Sheila i prea, mo mekem desisen se i gud mi go fastaem long ples we oli sanem mi long hem. Be bambae mitufala i gohed blong raetem leta long mitufala, mo luk sipos mitufala i save mared long fiuja. Hemia i no wan isi desisen, be biaen mitufala i luksave se hemia nao stret samting blong mekem.

Afta we mi travel wan manis long tren, kago sip, mo plen, mi kamtru long Accra, long Gana. Long ples ya oli askem mi blong mekem wok blong distrik elda. Mo mi mas travel long ol eria long Gana, long Aevori Kos, mo long Togolan (naoia Togo.) Plante taem, mi travel mi wan nomo long trak we branj ofis i givim. !Mi rili enjoem taem blong mi!

Long ol wiken, mi gat wok blong mekem long eria asembli. Mifala i no gat ol Haos Asembli. Taswe, ol brata oli mas bildim wan temporari selta we  oli wokem ol pos blong hem long bambu mo ruf blong hem oli putum ol lif blong pamtri blong blokem san. Mo from we i no gat aesbokis, ol brata oli kipim ol laef animol blong oli save kilim mo kukum blong fidim ol man we oli kam long asembli.

I gat sam fani samting tu oli hapen long taem blong ol asembli ya. Taem brata Herb Jennings, c we i wan misinari, i stap givim tok, wan buluk i kamaot long fenis mo i ron i go long medel blong platfom mo long ol man we oli stap lesin. Brata Herb stop blong toktok mo buluk ya tu i konfius. Be afta fo brata oli kam mo oli tekem buluk ya i gobak long fenis, mo ol man we oli stap lesin oli klapem han blong talem tangkiu.

Long ol dei blong wik blong asembli, mi go long ol vilej we i stap klosap blong soem muvi ya The New World Society in Action. Be blong soem muvi ya, samtaem mi fasem wan bigfala waet kaliko i go long tu pos o tu tri. Hemia faswan taem we plante man long ol vilej ya oli wajem wan muvi, mo oli laekem tumas. Oli klapem han blong olgeta strong taem oli wajem haf ya we i soem ol man we oli tekem baptaes. Muvi ya i givhan bigwan long olgeta blong luksave se oganaesesen blong yumi raon long wol i joen gud.

Afta we mi spenem tu yia long Afrika, mi glad tumas we long 1958 mi save joenem intenasnal asembli long Niu Yok Siti. Be tu, mi glad tumas blong luk Sheila i kam long Quebec, mo long taem ya hem i wan spesel paenia. Mitufala i bin stap raetem leta long mitufala, be naoia we mitufala i mit bakegen, mi askem hem blong mifala i mared mo hem i talem yes. Biaen, mi raet i go long Brata Knorr d blong askem sipos Sheila i save joen tu long Gilead mo biaen folem mi i go long Afrika. Brata Knorr i agri, mo Sheila i kam long Gana. Mitufala i mared long Accra, long 3 Oktoba 1959. Mitufala i luksave se Jehova i blesem mitufala taem mitufala i putum hem fasples.

Long 1961, oli sanem mitufala i go long Kamerun, from oli wantem se mitufala i givhan blong stanemap wan niufala branj ofis. Mi mi bisi we mi bisi. From we mi neva mekem wok ya blong lukaot long wan branj ofis, i gat plante samting we mi mas lanem. Be biaen, long 1965, mi mo Sheila i faenemaot se hem i gat bel. Blong talem stret, mitufala i faenem i had blong tingbaot se bambae  mitufala i kam ol perens. Be taem mitufala i stap glad from niufala responsabiliti ya mo mekem ol plan blong gobak long Kanada, wan nogud samting i hapen.

Mitufala i lusum bebi ya we i no bon yet. Dokta i talem se smol bebi ya i wan boe. Samting ya i hapen 50 yia i pas finis, be mitufala i neva fogetem. Nating se samting we i hapen i mekem mitufala i harem nogud, be mitufala i gohed long wok we mitufala i laekem tumas blong mekem long Kamerun.

Plante taem, ol brata mo sista long Kamerun, oli fesem fasin agens from we oli no wantem joen long politik. Mo long taem blong ol eleksen hemia i mowas. Be samting we mifala i fraet moa long hem, i kamtru long 13 Mei 1970, taem oli putum tabu long ol Witnes blong Jehova. Mo gavman i holem naesfala branj ofis ya we mifala i jes muv i go long hem faef manis i pas. Long wan wik nomo, oli sanemaot evri misinari i aot long kantri, mo hemia i minim mi mo Sheila tu. I had blong mifala i lego ol brata mo sista, from we mifala i kea bigwan long olgeta, mo mifala i wari tu from ol samting we bambae i hapen long olgeta long ol dei we i kam.

Mitufala i spenem ol nekis sikis manis long branj ofis blong Franis. Long ples ya, mi gohed blong mekem bes blong mi blong lukaot long nid blong ol brata mo sista long Kamerun. Mo long Disemba, long semfala yia ya, oli sanem mitufala i go long branj ofis blong Naejeria we i stat blong lukaot long ol wok long Kamerun. Ol brata mo sista long Naejeria oli welkamem gud mitufala, mo mitufala i harem gud blong wok long ples ya blong sam yia.

Long 1973, mitufala i mas mekem wan had desisen. Sheila i bin stap safa from sam problem blong helt. Taem mitufala i stap long Niu Yok long wan bigfala asembli, Sheila i harem nogud tumas, mo i talem long mi se: “!Mi no moa save gohed! Mi harem se mi taed mo oltaem mi sik.” Hem i bin wok wetem mi blong bitim 14 yia long Wes Afrika. Mi mi praod tumas long ol wok we hem i bin mekem, be mitufala i nidim blong mekem sam jenis. Afta we mitufala i tokbaot situesen blong mitufala mo mitufala i prea from, mitufala i disaed blong gobak long Kanada blong hem i save kasem ol gudfala tritmen. Desisen ya blong no moa mekem wok blong misinari mo mekem wok blong Jehova fultaem, i no wan isi desisen mo mitufala i rili harem nogud from.

Taem mitufala i gobak long Kanada, mi wok long kampani blong wan gudfala fren, we hem i stap salem ol trak long wan taon we i stap long not blong Toronto. Mi mo Sheila i rentem wan apatmen, pem ol sekenhan jea mo tebol, mo mitufala i naf blong statem niufala laef blong mitufala we mitufala i no mekem eni kaon. Mitufala i wantem gohed blong gat wan simpol laef, from mitufala i hop se wan dei bambae mitufala i mekem wok blong Jehova fultaem bakegen. Mo mitufala i sapraes se hop ya i kamtru kwiktaem nomo.

Mi stat blong givhan olsem wan volontia evri Sarede blong bildim wan niufala Haos Asembli  long Norval, Ontario. Mo samtaem biaen, oli askem mi blong wok olsem ovasia blong Haos Asembli. Helt blong Sheila i stap kam gud, mo mitufala i harem se naoia hem tu i naf blong givhan blong mekem niufala wok ya. Ale mitufala i muv i go insaed long apatmen blong Haos Asembli ya long Jun 1974. !Mitufala i glad tumas blong save mekem fultaem wok bakegen!

Mi glad se helt blong Sheila i gohed blong stap kam gud moa. From tu yia biaen, mitufala i akseptem blong mekem wok blong eria elda. Eria we mitufala i wok long hem, hemia long Manitoba, we i wan provins long Kanada we i kolkol we i kolkol. Nating se i olsem, mitufala i glad long naesfala kampani blong ol brata mo sista long eria ya. Mitufala i lanem se samting we i moa impoten, hemia blong gohed blong mekem wok blong Jehova nomata wea ples yumi stap long hem.

Afta we mi mekem wok blong eria elda blong sam yia, oli invaetem mitufala long 1978, blong wok long Betel Blong Kanada. Mo smoltaem afta, mi lanem wan impoten lesen, we long stat i bin mekem mi harem nogud. Oli askem mi blong givim wan longfala tok blong wan aoa mo teti minit long Franis, long wan spesel miting long Montreal. Be tok blong mi i no pulum intres blong ol man blong oli wantem lesin, mo wan brata long Sevis Dipatmen i givim advaes blong stretem mi. Blong talem stret, mi sud luksave se mi no gat gudhan blong givim ol tok. Be long taem ya, mi no wantem akseptem advaes blong brata ya. Storian blong mitufala i no go gud. Mi harem nogud from mi ting se fasin blong hem i strong tumas from hem i no talem ol gudfala toktok long mi from tok we mi mekem. Mi mi mekem mastik ya blong jajem fasin blong brata ya blong givim advaes, mo nogud filing we mi gat long hem long taem ya.

Sam dei biaen, wan memba blong Branj Komiti i toktok long mi from samting we i bin hapen. Mi talem stret se mi no bin glad tumas long advaes we mi kasem, mo mi talem se mi sore. Biaen, mi go toktok long brata ya we i givim advaes long mi, mo hem i glad blong fogivim mi. Ekspiriens ya i kam olsem wan impoten lesen long saed blong tingting daon we bambae mi neva fogetem. (Prov. 16:18) Mi prea plante taem long Jehova from samting ya, mo mi gat strong tingting blong neva sakemaot advaes bakegen.

Mi bin stap long Betel Blong Kanada blong bitim 40 yia finis. Mo stat long yia 1985, mi gat janis ya blong wok long Branj Komiti. Long Februari 2021, gudfala waef blong mi Sheila, i slip long ded. Mi misim hem bigwan, mo antap long hemia, mi tu mi fesem sam problem blong helt. Be wok blong Jehova i givhan long mi blong stap bisi, nao ‘i had long mi blong i luksave se ol dei blong laef blong mi oli stap pas kwiktaem nomo.’ (Pri. 5:20) Nating se mi fesem sam hadtaem, be i gat plante samting we mi mekem we oli givim bigfala glad long mi. Mi kasem bigfala blesing taem mi putum Jehova i fasples, mo mi harem gud blong mekem wok blong hem fultaem blong 70 yia. Mi stap prea from ol yangfala brata mo sista blong yumi blong oli gohed blong putum Jehova fasples, from mi sua fulwan se bambae oli harem gud mo oli gat wan gudfala laef, taem oli mekem wok blong Jehova.