1-2. ?Wanem i mekem se ol man blong God oli ol hapi man? (Jemes 1:​22-25)

 JEHOVA mo gudfala Boe blong hem, oli wantem se yumi hapi. Man we i raetem Ol Sam 119:2 i talem se: “Ol man we oli stap folem ol rimaenda blong hem, we oli stap lukaotem hem long fulhat blong olgeta, oli glad.” Mo Jisas tu i promes se: “!Ol man we oli harem tok blong God mo oli stap obei long hem, olgeta ya nao oli glad!”—Luk 11:28.

² Yumi ol man blong Jehova, yumi ol hapi man. ?From wanem? I gat plante risen, be wan long ol impoten risen hemia se yumi ridim Tok blong God evri dei mo yumi traem bes blong yumi blong folem long laef blong yumi.—Ridim Jemes 1:​22-25.

3. ?Taem yumi folem samting we yumi ridim long Tok blong God, olsem wanem hemia i givhan long yumi?

³ Taem yumi “mekem samting we tok ya i talem,” hemia i save mekem i gud long yumi long plante rod. Eksampol, taem yumi folem wanem we Baebol i talem, yumi mekem Jehova i glad mo yumi tu yumi glad. (Pri. 12:13) Taem yumi mekem samting we yumi ridim long Tok blong God, yumi save gat wan gudfala laef long famle, mo i mekem yumi fren gud wetem ol brata mo sista. Maet hemia samting we yu luk long laef blong yu. Antap moa, i givhan long yumi blong blokem ol problem we i stap kasem ol man we oli no stap folem ol rod blong Jehova. Maet yumi agri wetem King Deved. Afta we hem i tokbaot loa, ol oda, mo jajmen blong Jehova long wan singsing, hem i se: “Taem man i obei long olgeta, i gat wan bigfala pei i stap.”—Sam 19:​7-11.

4. ?From wanem i no isi blong folem samting we yumi ridim long Baebol?

 ⁴ Blong talem stret, i no isi oltaem blong folem samting we Tok blong God i talem. Yumi bisi, be yumi mas faenem taem blong ridim mo stadi long Baebol, blong kasemsave long samting we Jehova i wantem yumi blong mekem. Taswe naoia, i gud yumi luk sam rod we i save halpem yumi blong ridim Baebol oltaem. Mo tu, bambae yumi luk samting we i save halpem yumi blong tingting long wanem we yumi ridim, mo olsem wanem blong folem long laef blong yumi.

MAKEMAOT TAEM BLONG RIDIM TOK BLONG GOD

5. ?Wanem ol wok we i mekem se yumi bisi?

⁵ Bighaf blong ol man blong Jehova oli gat wan bisi laef. Yumi spenem plante taem blong mekem ol defren wok we Baebol i talem se oli impoten. Eksampol, plante long yumi oli wok blong lukaot long nid blong olgeta mo famle blong olgeta. (1 Tim. 5:8) Plante Kristin oli lukaot long wan famle we i sik o i olfala. Mo yumi evriwan i mas lukaot gud tu long helt blong yumi, mo hemia i tekem taem. Antap long ol wok ya, yumi gat ol wok blong mekem long kongregesen tu. Mo wan long ol impoten wok ya, hemia blong wok strong long wok blong prij. Taswe antap long olgeta wok ya, ?olsem wanem yumi save faenem taem blong ridim Baebol evri dei, tingting dip long hem, mo mekem i wok long laef blong yumi?

6. ?Yu mas mekem wanem blong ridim Baebol evri dei? (Mo tu, yu luk pija.)

⁶ Baebol riding i wan long “ol samting we oli moa impoten,” taswe yumi mas makemaot taem blong ridim evri dei. (Fil. 1:10) Long stat blong Ol Sam, man blong raetem sam ya i tokbaot man we i hapi se: “Hem i glad long loa blong Jehova, mo hem i stap ridim loa blong Hem long smol voes, long dei mo long naet.” (Sam 1:​1, 2) Ol tok ya oli soemaot klia se yumi mas makemaot taem blong ridim Baebol. ?Wanem beswan taem blong ridim Baebol? Hemia i dipen long yumi wanwan, be samting we i impoten hemia se yumi jusum wan taem evri dei blong ridim Baebol. Wan  brata nem blong Victor, i talem se: “Mi mi laekem blong ridim Baebol long moning. Nating se mi no laekem blong wekap eli long moning, be mi faenem se taem ya i gud from we i no gat plante samting blong distebem mi. Tingting blong mi i klia mo mi naf blong tingting gud.” ?Yu yu agri long ol tok blong Victor? Taswe i gud yu askem yu wan se: ‘?Wanem beswan taem blong mi ridim Baebol?’

TINGTING LONG SAMTING WE YU RIDIM

7-8. ?Wanem i save blokem yumi blong no kasem gudfala samting long Baebol riding blong yumi? Talem wan pijatok.

⁷ Blong talem stret, yumi stap ridim plante samting, be yumi no stap tekem taem blong tingting gud long olgeta. ?I hapen long yu finis se yu ridim wan samting mo smoltaem afta yu no moa tingbaot se yu ridim wanem? I sua se samting ya i hapen long yumi evriwan. Mo i save hapen tu taem yumi ridim Baebol. Maet yumi putum wan mak blong ridim sam japta blong Baebol evri dei. Hemia i gud. Yumi mas putum ol mak mo traehad blong folem olgeta. (1 Kor. 9:26) Be fasin blong ridim Baebol hemia i stat nomo. Yumi mas mekem sam moa samting blong yumi save kasem ol gudfala samting long Baebol riding blong yumi.

⁸ Traem tingbaot pijatok ya: Yumi kasem wota taem i ren, mo hemia i impoten long ol laef samting. Be sipos i gat tumas ren long wan sot taem nomo, bambae graon i fulap long wota. Mo sipos samting olsem i hapen, hemia bambae i no givhan nating long ol laef samting. Graon i nidim taem blong dring ol wota ya mo blong i save givhan long ol plant. Long sem fasin, yumi mas blokem fasin ya blong ridim Baebol kwiktaem nomo, nao yumi no tekem taem blong tingting, tingbaot, mo folem wanem we yumi ridim.—Jem. 1:24.

9. ?Yumi mas mekem wanem sipos yumi luksave se yumi stap ridim Baebol kwiktaem nomo?

⁹ ?Samtaem yu makem se yu stap ridim Baebol kwiktaem nomo? Sipos i olsem, ?yu mas mekem wanem? Yu mas rid slo. Traehad blong tingbaot samting we yu bin ridim o we yu jes ridim. Hemia i no had tumas blong mekem. Sipos yu harem se advaes ya blong tingting dip long wanem we yu ridim i had tumas blong  yu folem, maet yu save folem advaes ya yet be yu traem tingbaot nomo samting we yu ridim. Maet yu save mekem taem blong stadi blong yu i kam longfala moa, blong yu save tingting gud o tingting dip. O wan narafala rod, maet yu save jusum blong ridim sam vas nomo, mo tekem taem blong tingting bakegen long wanem we yu ridim. Victor, we yumi tokbaot hem finis, i talem se: “Mi traem mekem Baebol riding blong mi i sot, maet mi ridim wan japta nomo. Taem mi rid long eli moning, hemia i givhan blong mi save tingting bakegen long ol samting we mi ridim, long fuldei.” Nomata wanem rod yu folem blong ridim Baebol, be i impoten we yu rid slo blong yu save kasem plante gudfala samting long Baebol riding blong yu.—Sam 119:97; yu luk bokis ya “ Ol Kwestin Blong Tingbaot.”

10. Tokbaot olsem wanem yu save folem samting we yu lanem long Tok blong God. (1 Tesalonaeka 5:​17, 18)

¹⁰ Nomata wetaem yu mekem Baebol riding blong yu, mo yu spenem hamas taem blong mekem, be i gud blong tingbaot olsem wanem yu save folem tu long laef blong yu. Taem yu ridim wan vas, i gud blong askem yu wan tu se, ‘?Olsem wanem mi save folem save ya naoia o long fiuja?’ Eksampol, traem tingbaot se yu stap ridim 1 Tesalonaeka 5:​17, 18. (Ridim.) Afta we yu ridim tufala vas ya, i gud yu stop mo yu tingbaot se hamas taem yu stap prea mo se prea blong yu i dip olsem wanem. Mo tu, i gud yu tingbaot ol samting we yu wantem talem tangkiu long Jehova from. Maet yu jusum tri samting we yu save talem tangkiu long Jehova from. Sipos yu tekem sam minit blong tingting gud long ol samting we yu ridim, hemia bambae i halpem yu blong kasemsave long ol samting we yu ridim, mo blong mekem samting we Tok blong God i talem. !Mo sipos yu gohed blong mekem olsem evri dei wetem ol narafala vas blong Baebol we yu ridim, hemia bambae i givhan bigwan long yu! Nao long rod ya, bambae yu kam wan man we i stap mekem samting we Tok blong God i talem. ?Be olsem wanem sipos yu makem se i gat plante samting we yu mas kam gud moa long hem?

PUTUM OL MAK WE YU NAF BLONG KASEM

11. ?From wanem samtaem yu harem se i had tumas blong folem wanem we yu ridim? Talem wan eksampol.

¹¹ Taem yu ridim Baebol mo yu traehad blong mekem i wok long laef blong yu, samtaem bambae yu harem se i had tumas. Eksampol, traem tingbaot se tede Baebol riding blong yu i tokbaot se yu mas agensem fasin ya blong mekem i gud moa long wan kaen man. (Jem. 2:​1-8) Yu luksave se yu mas kam gud moa long fasin blong yu blong tritim ol narafala, ale yu jusum blong mekem sam jenis. !Hemia i nambawan! Ale tumoro, yu ridim  wan vas we i makem klia se i impoten blong kontrolem ol toktok blong yu. (Jem. 3:​1-12) Nao yu luksave se samtaem ol toktok blong yu oli no leftemap tingting blong narafala. Taswe yu gat strong tingting blong talem ol tok we i save leftemap tingting blong ol narafala. Mo long nekis dei afta, yu ridim wan vas we i wonem yumi se yumi no mas kam fren blong wol ya. (Jem. 4:​4-12) Mo yu makem se yu mas jusum gud ol samting we yu mekem blong spel mo pleplei. Long namba fo dei, maet bambae yu harem se i had tumas blong yu mekem olgeta jenis ya.

12. ?From wanem yu no mas harem nogud sipos yu luksave se yu mas mekem sam jenis taem yu stap ridim Baebol? (Mo tu, yu luk futnot.)

¹² Sipos yu makem se i gat plante samting we yu mas jenisim o kam gud moa long olgeta, yu no mas harem nogud from we hemia i pruvum se yu gat wan gudfala hat. Wan man we i gat tingting daon mo i tok tru long hem wan, taem hem i ridim Baebol bambae hem i traehad blong luk samting we hem i save kamgud moa long hem. a Mo tu, yumi mas tingbaot se blong putum “niufala fasin,” hemia wan samting we yumi mas gohed oltaem blong mekem. (Kol. 3:10) ?Taswe wanem bambae i halpem yu blong yu gohed blong mekem samting we Tok blong God i talem?

13. ?Olsem wanem yu save putum sam mak we yu naf blong kasem? (Mo tu, yu luk pija.)

¹³ Bitim we yu traem folem evri samting we yu ridim wantaem nomo, i gud yu putum sam mak we yu naf blong kasem. (Prov. 11:2) Maet yu save traem hemia: Mekem wan lis blong ol samting we yu wantem kam gud moa long olgeta, mo biaen yu jusum wan o tu long olgeta blong yu wok folem fastaem, mo biaen ol narafala wan. ?Bambae yu stat long wanem?

14. ?Wanem ol mak we yu save jusum blong putum fastaem?

 ¹⁴ Maet yu save stat wetem wan mak we i isi blong kasem. O maet yu jusum blong kam gud moa long wan fasin we yu ting se i impoten. Afta we yu jusum wan fasin we yu wantem kam gud moa long hem, yu mekem risej long ol buk blong yumi. Maet yu save yusum Watch Tower Publications Index o Buk Blong Mekem Risej. Mo tu, i gud yu prea long Jehova mo yu askem hem blong i mekem se yu ‘wantem wok mo i givim paoa long yu blong mekem olgeta samting we hem i laekem.’ (Fil. 2:13) Biaen, yu wok folem samting we yu lanem. Taem yu kasem faswan mak we yu putum, bambae yu gat strong tingting blong traem kasem ol narafala mak. I tru, taem yu traehad blong kam gud long wan Kristin fasin, bambae yu faenem se i moa isi blong kam gud moa long ol narafala fasin tu.

LETEM TOK BLONG GOD ‘I WOK LONG LAEF BLONG YU’

15. ?Olsem wanem ol man blong Jehova oli defren long plante man we oli stap ridim Baebol? (1 Tesalonaeka 2:13)

¹⁵ Sam man oli talem se oli ridim Baebol plante taem. ?Be oli rili bilif long Baebol? ?Oli stap folem o letem Baebol i wok long laef blong olgeta? Blong talem stret, nogat. !Hemia i defren olgeta long ol man blong Jehova! Olsem ol faswan Kristin, yumi akseptem Baebol mo yumi “kasemgud se hem i tok blong God.” Mo tu, yumi mekem bes blong yumi blong letem Tok blong God i wok long laef blong yumi.—Ridim 1 Tesalonaeka 2:13.

16. ?Wanem i save halpem yumi blong mekem samting we Tok blong God i talem?

¹⁶ I no isi oltaem blong ridim mo folem tok blong God long laef blong yumi. Samtaem yumi faenem i had blong makemaot taem blong ridim Baebol. O maet yumi rid kwiktaem nomo, mo yumi no tingting gud long samting we yumi ridim. O maet yumi harem se i had blong kam gud moa long ol fasin we yumi mas jenisim. Nating sipos yu faenem i had blong mekem wan long ol samting ya, be bambae yu naf blong mekem wetem help blong Jehova. Taswe i gud yumi gat strong tingting blong letem Jehova i halpem yumi, mo yumi kam ol man we oli lesin mo oli mekem samting we Tok blong hem i talem. Yes, taem yumi gohed blong ridim Tok blong God, mo mekem i wok long laef blong yumi, i sua se bambae yumi glad.—Jem. 1:25.