Yumi no mas gat tingting ya se Jisas i no glad long ol 70 disaepol ya o oli lego hem, taswe oli no stap long taem ya we Jisas i stanemap Kakae Blong Masta. From we long taem ya, Jisas i wantem stap nomo wetem ol aposol blong hem we oli holemstrong long hem.

Jisas i glad long ol 12 mo long 70 disaepol ya. Long olgeta disaepol, Jisas i bin jusumaot 12 man fastaem, we hem i singaot olgeta se ol aposol. (Luk 6:​12-16) Jisas i stap long Galili taem “hem i singaot ol twelef aposol” mo “i sanem olgeta blong oli go talemaot Kingdom blong God, mo blong oli hilim ol sikman.” (Luk 9:​1-6) Samtaem biaen, long Judia, Jisas i “jusum 70 narafala man, mo i sanemaot olgeta oli go tutu.” (Luk 9:51; 10:1) From samting ya, Jisas i gat plante disaepol we oli stap long ol defdefren eria mo oli stap talemaot gud nius blong hem.

Ol man Jiu we oli kam disaepol blong Jisas, oli gohed blong mekem lafet blong Pasova evri yia, maet wetem famle blong olgeta nomo. (Eks. 12: 6-11, 17-20) Smoltaem bifo we Jisas i ded, hem wetem ol aposol blong hem oli go long Jerusalem. Be hem i no askem olgeta disaepol blong hem we oli stap long Judia, Galili, mo Perea blong oli kam joen blong mekem lafet blong Pasova. I klia se Jisas i wantem stap nomo wetem ol aposol blong hem long taem ya. Hem i talem long olgeta se: “Mi mi wantem tumas blong joen wetem yufala long kakae ya blong Pasova, bifo we oli mekem mi mi safa.”—Luk 22:15.

Jisas i gat gudfala risen blong mekem olsem. I no longtaem bambae Jisas i ded olsem “Smol Sipsip Blong God we bambae i tekemaot sin blong ol man long wol.” (Jon 1:29) Mo bambae samting ya i hapen long Jerusalem, hemia ples we ol man oli stap givim ol sakrefaes i go long God. Ded blong Jisas bambae i mekem ol man oli fri long wan fasin we i gud moa, i bitim sipsip we ol man Isrel oli kakae wetem famle blong olgeta long naet we Jehova i mekem oli go fri long Ijip. (1 Kor. 5:​7, 8) Samting we Jisas i mekem, i openem rod blong ol 12 aposol oli kam olsem fandesen blong Kristin kongregesen. (Efes. 2:​20-22) Mo i naes blong save se, tabu taon ya Jerusalem, “fandesen blong hem i 12 bigfala ston” mo “i gat 12 nem blong ol 12 aposol blong Smol Sipsip long olgeta.” (Rev. 21:​10-14) Yes, ol gudfala aposol ya oli gat wan bigfala wok, hemia blong mekem stamba tingting blong God i kamtru. Taswe, naoia yumi kasemsave from wanem Jisas i wantem se ol 12 aposol blong hem oli mekem laswan Pasova wetem hem, mo biaen mekem Kakae Blong Masta.

Olgeta narafala disaepol wetem ol 70 disaepol ya, oli no bin stap long taem ya. Be yet, olgeta we oli holemstrong, bambae oli kasem gudfala samting from Kakae Blong Masta we Jisas i bin stanemap. Mo olgeta we tabu spirit i makemaot olgeta biaen, bambae oli joen long kontrak ya blong Kingdom, we Jisas i tokbaot long ol aposol blong hem long naet ya.—Luk 22:​29, 30.