YU TRAEM tingbaot se yu stap wokbaot long rod long medel naet. Wantaem nomo yu haremsave se wan man i stap biaenem yu. Taem yu stop, hem tu i stop. Mo taem yu wokbaot kwik, be hem tu i wokbaot kwik. Nao yu ron i go long haos blong wan fren we i stap klosap. Taem fren blong yu i openem doa blong yu go insaed, yu no moa wari from we yu harem se yu sef.

Maet wan samting olsem i neva hapen long yu. Be ating yu gat ol narafala samting we oli save mekem se yu wari. Eksampol, maet yu yu gat wan slak fasin we yu stap traehad blong winim be yu luk se yu no save winim. No maet yu lusum wok blong yu afta yu stap traehad longtaem finis blong faenem wan narawan, be yu no faenem yet. No, maet yu wari from we yu stap kam olfala mo yu stap wari tu long helt blong yu. No, maet yu stap wari from wan narafala samting.

Sipos yu gat eni problem, i gud yu tokbaot wetem wan fren blong yu we i rere oltaem blong givhan long yu. ?Yu yu gat wan fren olsem? !Si! Jehova nao i fren blong yu. Aesea 41:8-13 i tokbaot se Jehova i fren gud wetem gudfala man ya Ebraham. Long vas 10 mo 13, Jehova i promes long yumi wanwan se: “!Yufala i no fraet! !Mi mi stap wetem yufala! !Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala! !Mi bambae mi blokemgud yufala, mi sevem yufala! [“!Bambae mi holemtaet yu, mo mi yusum raet han blong mi blong lidim yu long stret fasin!” NW]. !Mi mi Hae God, mi God blong yufala! Mi nao mi stap mekem yufala i strong [“!Mi stap holemtaet raethan blong yu!” NW], mo mi stap talem long yufala se, ‘!Yufala i no fraet! !Mi bambae mi givhan long yufala!’”

Ol toktok ya blong Jehova oli mekem yumi harem gud. Yu traem tingbaot samting we Jehova i promes blong mekem long yumi. Vas blong Aesea i no talem se yu stap wokbaot long saed blong Jehova mo yu holem han blong hem. Sipos yu stap wokbaot long saed blong hem, bambae raethan blong hem i holem lefhan blong yu. Be Jehova i pusum ‘raethan blong hem’ mo i holemtaet “raethan blong yu,” i olsem we hem i stap pulumaot yu long wan bigfala trabol. Jehova i mekem yu yu strong taem hem i holemtaet raethan blong yu, mo i talem se: “!Yufala i no fraet! !Mi bambae mi givhan long yufala!”

?Yu yu luksave Jehova olsem wan papa no wan fren we i lavem yu tumas? ?Yu yu bilif se bambae hem i givhan long yu taem yu fesem ol hadtaem? Jehova i rili kea long yu mo hem i wantem givhan long yu. Taem yu kasem ol hadtaem, Jehova i wantem se yu harem gud mo yu sef. ?From wanem? From we hem i lavem yu tumas. I tru nomo se “oltaem, hem i rere blong givhan long yumi long taem blong trabol.”—Ol Sam 46:1.

Samfala oli stap tingbaot ol mastik we oli bin mekem mo oli no sua sipos God i fogivim olgeta finis no nogat. Sipos yu gat tingting olsem, i gud yu tingbaot stori blong Job. Hem i talem se taem hem i yangfala, hem i mekem sin. (Job 13:26) Deved tu i gat tingting olsem mo hem i askem strong long Jehova se: “Plis yu fogivim mi, yu tekemaot ol sin blong mi mo ol rabis fasin we mi stap mekem taem mi yang yet.” (Ol Sam 25:7) Yumi evriwan i sinman taswe yumi ‘mekem nogud finis, mo yumi stap afsaed olgeta long ol gudgudfala fasin blong God.’—Rom 3:23.

Ol gudfala toktok long Aesea japta 41, i go long ol man Isrel. Jehova i panisim olgeta taem hem i letem olgeta oli go kalabus long Babilon, from we oli mekem plante bigfala sin. (Aesea 39:6, 7) Mo tu God i promes se, sipos olgeta we oli tanem tingting blong olgeta mo oli kambak long hem, bambae hem i mekem olgeta oli go fri. (Aesea 41:8, 9; 49:8) Tede tu, Jehova i soemaot se hem i lavem mo i sore long olgeta we oli tanem tingting blong olgeta mo oli wantem mekem hem i glad.​—Ol Sam 51:1.

Traem tingbaot stori blong Takuya. * Hem i stap traehad blong winim doti fasin ya blong lukluk ol rabis pija mo pleplei wetem seks blong hem. Plante taem, hem i foldaon long fasin ya. ?Wanem tingting blong hem? Hem i talem se: “Mi mi harem se mi nating nomo, be taem mi prea strong long Jehova blong hem i fogivim mi, mi harem se hem i mekem mi mi strong bakegen.” ?Olsem wanem Jehova i mekem samting ya? Ol elda long kongregesen blong Takuya oli talem long hem blong i ring long olgeta taem hem i foldaon bakegen long fasin ya. Hem i talem se: “I no isi long mi blong ring long olgeta, be taem mi mekem, mi kasem paoa bakegen.” Ale, ol elda oli mekem plan blong eria elda i visitim Takuya. Eria elda i talem long hem se: “I no wan mastik we mi kam luk yu. Mi kam from we ol elda oli wantem givhan long yu.” Takuya i talem se: “Mi nao mi stap mekem sin, be Jehova i wantem blong givhan long mi yet, nao hem i yusum ol elda.” Takuya i stopem fasin ya mo hem i kam wan fultaem paenia. Mo naoia hem i stap wok long wan branj ofis. Sipos God i givhan long brata ya, hem i save givhan long yu tu taem yu mekem mastik.

Samfala oli wari from we oli lusum wok blong olgeta mo oli no save faenem wan narawan. Yu traem tingbaot se yu go askem wok long plante kampani be yu no kasem wan nating. Sipos samting olsem i hapen long wan man, hem i save harem nogud bigwan. ?Jehova i save givhan long yu olsem wanem? Maet hem i no save givim wan wok long yu kwiktaem nomo, be hem i save givhan long yu blong tingbaot ol tok we Deved i raetem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” (Ol Sam 37:25) Jehova i tinghae long yu, mo hem i givim ‘raet han blong hem blong lidim yu,’ blong i meksua se yu gat ol samting we yu nidim blong gohed long wok blong hem.

Sara we i stap long Kolombia, i luksave olsem wanem Jehova i stap givhan long hem. Hem i wok fultaem long wan bigfala kampani, mo hem i kasem plante mane. Be hem i wantem mekem moa  long wok blong Jehova, ale hem i lego wok ya mo i statem wok blong paenia. Be, i had long hem blong faenem wan haftaem wok blong sapotem hem. Hem i statem wan smol stoa blong salem aeskrim, be hem i sot long mane nao bisnes ya i brokdaon. Hem i se: “Mi talem tangkiu long Jehova from we long ol tri yia we oli pas, hem i givhan long mi blong stanap strong.” Sara i lanem blong luksave ol samting we hem i rili nidim mo olsem wanem blong blokem ol wari blong nekis dei. (Matiu 6:33, 34) Biaen, bos blong kampani we hem i bin wok long hem i singaot hem bakegen blong kambak wok. Sara i talem se hem i glad blong kam wok sipos hem i wok haftaem nomo, mo i gat taem blong go long ol miting, mo ol asembli. Tede, Sara i no kasem plante mane olsem fastaem, be hem i save gohed yet long wok blong fultaem paenia. Hem i talem se long ol hadtaem we hem i kasem, hem i harem olsem se Jehova i stap holem han blong hem.

Plante oli wari from we oli stap kam olfala mo i no long taem bambae oli no moa wok. Oli stap wari sipos oli gat naf mane blong lukaot long olgeta. Mo tu oli stap wari long helt blong olgeta taem oli kam olfala. Maet King Deved i talem ol tok ya long Jehova se: “Naoia mi mi kam olfala. Plis yu no tanem baksaed long mi. Naoia mi mi no moa strong. Plis yu no lego mi.”​—Ol Sam 71:9, 18.

?Olsem wanem ol olfala oli save gat strong tingting long saed blong fiuja? Oli mas gohed blong mekem bilif blong olgeta i strong, mo blong trastem God blong givim evri samting we oli nidim. Samfala oli harem gud long plante samting from we oli gat plante mane. Be oli mas lanem blong gat wan laef we i no fasfas mo blong harem gud long smol samting we oli gat. Maet oli luksave se i gud moa blong “kakae drae” i bitim we oli kakae ol “gudfala mit,” from we hemia i save givhan long helt blong olgeta. (Ol Proveb 15:17) Sipos yu gat strong tingting blong mekem wok blong Jehova, bambae hem i givim evri samting we yu nidim taem yu kam olfala.

Yu traem tingbaot José mo Rose, we tufala i wok fultaem long wok blong Jehova bitim 65 yia. Long ol yia ya, tufala i fesem plante hadtaem. Tufala i stap lukaot long papa blong Rose long dei mo long naet. Mo tu, dokta i bin katem José from kansa mo hem i stap kasem tritmen from. ?Olsem wanem Jehova i holem tufala long raet han blong hem? Hem i yusum Kristin hasban mo waef ya, Tony mo Wendy, blong givhan long tufala. Tufala i gat wan rum we tufala i wantem givim fri nomo long olgeta we oli fultaem paenia. Tony i rimemba taem ya we hem i bin stap long hae skul, hem i stap lukluk tru long windo mo i luk José mo Rose i stap prij oltaem. Tony i stap rimemba tufala from we tufala i wok strong. Tony mo Wendy i glad blong givim rum ya long tufala, from we tufala i spenem ful laef blong tufala long wok blong Jehova. Tony mo Wendy i givhan long tufala bitim 15 yia, mo naoia José mo Rose i gat samwe 85 yia. José mo Rose i luksave se Tony mo Wendy i olsem wan presen we Jehova i givim.

Jehova i promes se: “!Yufala i no fraet! !Mi bambae mi givhan long yufala!” Hem i stap pusum ‘raet han blong hem’ long yu. ?Bambae yu tu, yu holem han blong hem?