SAMFALA bambae oli jusum, “ol samting blong laef.” Maet oli talem se: “Bae mi glad moa  . . .

• “sipos mi gat plante mane”

• “sipos mi gat wan gudfala mared”

• “sipos mi gat wan gudfala helt”

Blong talem stret, tingting blong yumi nao i save mekem se yumi glad moa long laef blong yumi, i bitim ol samting blong laef mo ol fasin blong yumi. !Hemia wan gudfala samting! From we yumi save bos long tingting blong yumi, be maet yumi no save bos fulwan long ol samting blong laef mo ol fasin blong yumi tu.

Wan waestok blong Baebol i talem se: “Sipos yu yu stap glad oltaem, sik i no save spolem yu. Be sipos tingting blong yu i stap kam nogud oltaem, bambae yu stap long rod blong ded nomo.” (Ol Proveb 17:22) Gudfala tingting i save mekem yu glad long laef. Tingting blong yu i save mekem se yu wok strong blong kasem wan samting we yu wantem, no i save mekem se yu no wok strong. Mo tu, sipos yu kasem wan trabol, tingting blong yu nomo i save mekem se yu harem gud bakegen, no yu harem nogud.

Maet samfala oli gat tu tingting long saed ya. Oli talem se:

• ‘?From wanem mi mekem se evri samting i oraet nomo, nating se mi gat trabol?’

• ‘I no gat wan gudfala tingting we i save givhan long mi blong winim trabol blong mi.’

• ‘I gud blong tingbaot ol samting we mi save mekem naoia blong harem gud, i bitim we mi stap drim long ol samting we mi no save mekem.’

Maet ol tingting ya oli stret. Be, yumi save kasem ol gudfala samting sipos yumi gat gudfala tingting oltaem. Bambae yumi luk sam eksampol.

 Long wok, Alex mo Brian tufala i wok had blong mekem tu defren wok. Afta we bos blong tufala i jekem ol wok blong tufala, hem i talem sam mastik we tufala i mekem.

• Alex: “Mi spenem plante taem blong mekem wok ya, be mi no mekemgud nating. Bae mi no save mekemgud wok ya. Mi stap traehad blong nating nomo. ?From wanem mi mekem wok ya?”

• Brian: “Bos blong mi i talemaot sam gudfala samting long wok blong mi. Mo tu, hem i talemaot sam bigfala mastik we mi mekem. Mi lanem sam impoten lesen we oli save givhan long mi, blong mekemgud wok blong mi nekis taem.”

?WANEM TINGTING BLONG YU?

• Afta we sikis manis i pas, ?yu ting se weswan long tufala bambae i kam wan gudfala man blong wok? ?Alex no Brian?

• Sipos yu yu bos blong wan kampani, ?weswan long tufala bambae yu wantem se hem i wok blong yu?

• Sipos yu no glad long wan samting, ?bambae yu mekem olsem Alex no Brian?

Yu traem tingbaot, Andrea mo Brittney. Tufala i gat wan problem, samtaem tufala i harem se tufala i no wantem joen wetem ol narafala. Be, tufala tugeta i gat defren rod blong winim problem ya.

• Andrea i tingbaot hem wan nomo. Hem i no wantem givhan long ol narafala, sipos oli no givhan long hem fastaem. Hem i talem se, ‘Mi no wantem westem taem long ol man we oli no givhan long mi.’

• Brittney i traehad blong kaen long ol man, mo i givhan long ol narafala, nating se oli givhan long hem no nogat. Hem i folem Nambawan Rul ya, blong mekem i gud long narafala, olsem we hem i wantem ol narafala oli mekem i gud long hem. (Luk 6:31) Brittney i glad nomo blong givhan long ol narafala, nomata se oli givimbak no nogat.

?WANEM TINGTING BLONG YU?

• ?Weswan long tufala woman ya, we yu wantem se hem i fren blong yu?

• ?Weswan long tufala bambae i harem gud blong fren wetem ol narafala?

• Sipos samtaem yu harem nogud blong stap yu wan, ?bambae fasin blong yu blong winim problem, i olsem blong Andrea no Brittney?

Maet yu save sam man we oli gat fasin olsem, Brian mo Brittney. Maet yu harem se yu tu, yu gat sem fasin olsem tufala. Sipos yes, bambae yu luk se ol tingting blong yu, oli save jenisim laef blong yu. Be, ?olsem wanem sipos fasin blong yu i olsem Alex mo Andrea? I gud yumi luk tri advaes long Baebol, we oli save givhan long yu blong gat gudfala tingting long ol samting long laef.

BAEBOL I TALEM SE: “Sipos tingting blong yu i no strong long taem blong trabol, hemia i soemaot we yu yu no strong nating.” —Ol Proveb 24:10.

MINING BLONG HEM: Sipos evri dei yu stap wari long ol samting blong laef, hemia bambae i mekem se yu no moa gat paoa blong winim ol problem blong yu.

Stori blong Juilza i soemaot se, i gat ol nambawan rul mo advaes we oli stap long Baebol, mo oli save givhan long yu blong blokem ol nogud tingting we oli kamaot long laef blong yu. Eksampol, Efesas 4:23 i talem se: “Tingting blong yufala i mas kam niuwan olgeta.”

Vas ya i soemaot se, yu save jenisim tingting blong yu long wan samting. Yu save mekem tingting blong yu i “kam niuwan.” Be, i tekem taem blong mekem samting ya. Hemia nao from wanem long sam Baebol, vas ya i talem se “yufala i mas gohed blong kam niuwan.”

BAEBOL I TALEM SE: “Taem man i stap harem nogud, hem i no save glad long laef blong hem evri dei. Be man we hat blong hem i glad, i olsem we hem i mekem lafet oltaem.”​—Ol Proveb 15:15, NW.

MINING BLONG HEM: Sipos yu stap tingbaot nogud saed blong evri samting, bambae yu “harem nogud” mo evri dei, bambae yu “no save glad” long laef. Be, sipos yu stap tingbaot ol gudfala samting, bambae ‘hat blong yu i glad’. Hemia i prapa desisen blong yu.

Wan samting we i givhan long Yanko, hemia blong ridim Baebol. Hem i talem se: “Taem mi ridim Baebol, hemia i givhan long mi blong gat gudfala tingting. Mo mi no fogetem ol samting we mi wantem mekem long fiuja. Be naoia, mi stap traehad blong mekem ol samting we mi naf blong mekem. Taem mi stat blong tingbaot ol nogud samting long laef, kwiktaem nomo mi traem blong tingbaot ol gudfala samting we mi bin mekem. Samting ya i blokem mi long ol nogud tingting, mo i mekem mi mi glad.”

Stori blong Yanko i soemaot se, yu save gat ol gudfala tingting, mo blokem ol samting we oli mekem yu wari long laef. Sipos yu kasem wan problem long laef, olsem Yanko we i gat problem blong helt, i gud yu tingbaot ol kwestin ya: ‘?Problem ya i save finis? ?I gat rod blong mi winim problem ya, no hem i wan samting we i blokem mi nomo?’ I gud yu tingbaot ol gudfala samting nomo, olsem nao bambae evridei yu stap glad.

BAEBOL I TALEM SE: “Man we i stap givim presen i go, hem i save harem gud moa, i winim man we i stap kasem presen blong hem.”​—Ol Wok 20:35.

MINING BLONG HEM: Man we i glad blong givim samting long narafala, bambae i harem gud long laef blong hem. ?From wanem? From we God i wokem yumi blong yumi no tingbaot yumi nomo, be yumi tingbaot ol narafala tu. (Filipae 2:3, 4; 1 Jon 4:11) Yumi glad taem yumi givim samting long narafala, mo hemia i save givhan long yumi blong winim ol nogud samting we oli hapen long laef blong yumi.

Yu lukaot rod blong givhan long narafala. Eksampol, maet yu givim kakae long wan man we i sik. Maet yu givhan blong mekem sam wok long haos blong wan olfala.

Taem yu lukaotgud long tingting blong yu, i olsem we yu stap lukaotgud long wan garen. Long garen, yu pulumaot ol rabis gras, mo yu planem ol gudfala sid. Ol sid ya oli gru, mo biaen oli karem gudfala frut. Long sem fasin, taem yu sakemaot ol wari blong laef mo ol nogud tingting, mo yu tingbaot nomo ol gudfala samting, hemia bambae i mekem yu harem gud long laef, mo i givhan long yu blong gat gudfala tingting oltaem. Biaen, bambae yu luksave se, gudfala tingting i save mekem yu glad long laef.