I luk olsem se yestede nomo, yu stap karem smol bebi blong yu. Mo naoia, hem i no moa wan bebi. I tru, maet hem i pikinini yet, be hem i stap long rod ya blong kam bigman. Hemia i min se, bambae i gat ol jenis long bodi blong hem.

Ol jenis long bodi blong wan pikinini, i mekem se samtaem oli fraet mo tingting blong olgeta i fasfas. Taswe, ?olsem wanem bambae yu givhan long pikinini blong yu, blong i save ol jenis ya?

I gat taem blong bodi i jenis. Ol jenis ya oli save stat taem pikinini i gat 8 yia, no 15 yia blong hem. Buk ya, Letting Go With Love and Confidence i talem se: “Ol jenis long bodi, oli save hapen long ol defren taem, folem yia blong pikinini.”

Ol jenis long bodi i save mekem pikinini i harem nogud. Taem pikinini i kam yangfala, bambae hem i stat blong tingting gud long ol samting we hem i mekem, taem hem i joen wetem ol narafala. Wan yangfala, nem blong hem Jared * i talem se: “Mi meksua se mi luk naes, mo mi mekem samting we i stret. Taem mi stap wetem ol narafala, mi fraet se bambae oli luk mi se mi defren.” Sipos lam i stat blong kamaot long fes blong wan pikinini, hemia i save mekem hem i harem gud. Kellie we i gat 17 yia, i talem se: “Lam i meksave fes blong mi. Mi tingbaot we mi stap krae, from we fes blong mi i no moa naes.”

Jenis long bodi i save mekem sam trabol. Hemia i tru tumas, speseli long ol gel. From we maet ol narafala oli jikim olgeta, taem oli luk titi blong olgeta i stap kam bigwan, mo saes blong bodi blong olgeta we i jenis. Wan buk, A Parent’s Guide to the Teen Years, i talem se: “Ol gel olsem, oli stap long denja from we oli save pulum tingting blong ol boe we oli save finis, fasin blong man wetem woman.”

Jenis long bodi i no min se hem i kam bigman. Ol Proveb 22:15 i talem se: “Fasin blong pikinini, oltaem i save mekem ol krangke samting we i no save tingbaot.” Ol jenis we oli kamaot long bodi blong pikinini, oli no jenisim samting ya. Buk ya You and Your Adolescent, i talem se, wan yangfala i save bigwan long bodi, be hem i no naf yet blong mekem ol gudfala desisen, mekem ol gudfala fasin, bos long tingting, mo mekem ol narafala samting we i soemaot se hem i wan bigman.

Yu tokbaot ol jenis ya bifo we pikinini i kasem. I gud yu tokbaot long pikinini blong yu ol jenis we bambae oli kamaot long bodi blong hem. Sipos hem i wan gel, yu eksplenem long hem, wanem ya sik blong woman. Mo sipos hem i wan boe, yu eksplenem long hem, wanem ya wota blong man. Ol jenis ya oli save hapen long wan pikinini enitaem nomo, mo hemia i save mekem tingting blong hem i fasfas mo i fraet. Taswe, yu mas eksplenem gud long hem se, ol jenis we bambae hem i luk, oli stat blong rerem bodi blong hem blong i kam bigman.​—Rul blong Baebol: Ol Sam 139:14.

Yu mas eksplenem gud. Wan yangfala we nem blong hem Jon i talem se: “Taem papa mo mama blong mi tufala i tokbaot ol jenis ya long mi, tufala i no eksplenem gud long mi. !Man, sipos tufala i bin talem stret long mi nomo!” Alana, wan yangfala gel we i gat 17 yia, i talem sem samting, i se: “Mama i tokbaot ol jenis ya long mi, be hem i no eksplenem gud evri samting, mekem se mi harem nogud taem ol jenis ya oli hapen.” ?Toktok blong tufala yangfala ya, i tijim yu long wanem samting? Yu mas eksplenem gud evri samting we bambae i hapen long pikinini blong yu, taem bodi blong hem i stap jenis.​—Rul blong Baebol: Ol Wok 20:20.

Askem ol kwestin we i pulum hem blong storian. Sipos yu wantem se pikinini blong yu i no fraet blong storian wetem yu, long saed blong ol jenis long bodi blong hem, i gud yu tokbaot fastaem ol jenis we oli hapen long bodi blong ol narafala. Sipos hem i wan gel, maet yu save askem long hem se: “?Yu harem sam fren blong yu long skul oli stap tokbaot sik blong woman? ?Ol pikinini long skul, oli jikim ol gel we oli stat blong putum bra?” Sipos hem i wan boe, maet yu save askem long hem se: “?Ol fren blong yu, oli stap jikim ol boe we oli no gat mustas yet?” Taem ol yangfala oli stat blong tokbaot ol jenis we oli kamaot long ol narafala pikinini, maet bambae i isi moa blong oli talemaot ol filing blong olgeta mo ol samting we oli mekem. Long taem olsem, i gud yu folem advaes blong Baebol we i se: “Yufala evriwan i mas rere oltaem blong lesin, be yufala i no mas hareap blong toktok.”​—Jemes 1:19

Givhan long yangfala blong i waes mo i luksave samting. (Ol Proveb 3:21) Taem bodi mo tingting blong pikinini blong yu i jenis, hemia i save givhan long hem blong yusum gud tingting blong hem, blong mekem ol gudfala desisen taem hem i kam bigman. Taswe, yu mas yusumgud taem ya, blong tijim yangfala blong yu, blong i luksave samting mo i gat ol gudfala fasin.​—Rul blong Baebol: Hibrus 5:14.

Gohed blong tijim pikinini blong yu. Plante yangfala oli no wantem tokbaot ol jenis we oli hapen long bodi blong olgeta, wetem ol papa mo mama blong olgeta. Be ol papa mo mama, yufala i no mas letem tingting ya i blokem yufala. Wan buk, You and Your Adolescent i talem se, nating sipos ol yangfala oli soemaot se oli no intres, oli no glad, no oli mekem olsem se sora blong olgeta i fas, be maet oli tingbaot gud evri samting we yu stap talem.