SIK O HANDIKAP I SAVE SPOLEM MAN. Wan man we nem blong hem Alf, i helti gud mo i wok strong. Be afta, haf bodi blong hem i ded mo i handikap. Hem i talem se: “Tingting blong mi i foldaon fulwan. Mi no moa gat paoa long bodi mo tingting. . . . Mi harem se ‘laef blong mi i nogud olgeta.’”

Stori blong Alf i soemaot se yumi no save blokem sik fulwan. Nating se i olsem, yumi save mekem sam samting blong stap helti. ?Be olsem wanem sipos yu kasem wan sik? ?Hemia i min se yu no moa save glad? Si, yu save glad yet. Be bifo we yumi tokbaot samting ya, bambae yumi luk sam samting we yumi save mekem blong gat gudfala helt.

“KONTROLEM OL FASIN.” (1 Timoti 3:2, 11) I nogud yu kakae tumas mo dring bitim mak. !Hemia i save spolem helt blong yu, mo i westem mane tu! Baebol i talem se: ‘I nogud yu go joen wetem ol man we oli stap dring tumas mo oli stap kakae we i bitim mak. Man olsem bambae i kam puaman.’—Ol Proveb 23:20, 21.

NO SPOLEM BODI. Baebol i talem se: “Yumi mas wasemaot ol samting we oli mekem bodi mo tingting blong yumi i kam doti.” (2 Korin 7:1) Ol man oli spolem bodi taem oli smok o kakae tabak, dring bitim mak, mo tekem drag. Wan grup long Amerika we i wok blong blokem ol sik, i talem se taem man i smok, “hem i save kam sik we i no moa save wok, from we smok i spolem evri haf blong bodi.”

TINGBAOT LAEF MO BODI OLSEM PRESEN WE I SAS. Baebol i talem se: “[God] nomo i mekem se yumi gat laef, yumi stap, mo yumi muvmuv.” (Ol Wok 17:28) Sipos yu tingting gud long samting ya, bambae yu lukaotgud blong no putum laef blong yu long denja, taem yu wok, draevem trak, mo pleplei. !Smol taem ya we yu putum laef blong yu long denja blong harem gud, i save mekem se yu handikap long ful laef blong yu!

BOS LONG OL NOGUD FILING. Tingting mo bodi i wok tugeta. Taswe, yu mas traehad blong no wari tumas, no faerap long kros, no jalus, mo no gat ol narafala nogud filing. Ol Sam 37:8 i talem se: “I nogud yu kros, i nogud yu faerap.” Wan narafala vas i talem se: “Yufala i no mas wari tumas from ol samting  blong tumora. Ol wari blong tumora oli blong tumora.”—Matiu 6:34.

TINGBAOT OL GUDFALA SAMTING. Ol Proveb 14:30 i talem se: “Sipos tingting blong man i stap kwaet oltaem, hemia bambae i mekem bodi blong hem i stap gud.” Mo bakegen: “Sipos yu yu stap glad oltaem, sik i no save spolem yu.” (Ol Proveb 17:22) Ol saentis tu oli talem olsem. Wan dokta long Skotlan i talem se: “Sipos yu glad, ating yu no save kasem plante sik olsem ol man we oli no glad.”

WOKEM STRONG TINGTING. Maet yu gat wan sik we i stap long yu oltaem, olsem Alf we yumi tokbaot finis. Be yu save harem gud yet. Samfala oli letem tingting i foldaon olgeta, be hemia i jes mekem ol samting oli kam mowas. Ol Proveb 24:10 (NW) i talem se: “Sipos tingting blong yu i no strong long taem blong trabol, bambae yu no moa gat paoa.”

Sam narafala oli harem nogud, be biaen oli jenisim tingting blong olgeta, nao oli harem gud. Hemia samting we Alf i mekem. Hem i prea plante mo i tingting dip long ol gudfala tok blong Baebol, nao i “no moa luk ol trabol we oli blokem hem, be i luk ol blesing we hem i gat.” Olsem plante narafala we oli kasem ol bigfala trabol, Alf i lanem blong tingbaot narafala mo soemaot sore. Nao hem i wantem serem ol tok blong Baebol wetem olgeta, blong leftemap tingting blong olgeta.

Wan man we nem blong hem Stiv, hem tu i safa bigwan. Taem hem i gat 15 yia, hem i kasem wan aksiden we i mekem se bodi blong hem i ded, i stat long nek blong hem go kasem leg blong hem daon. Be taem hem i gat 18 yia, hem i save yusum tufala han blong hem bakegen. Ale hem i go long yunivesiti. Be i no longtaem, hem i stat blong tekem drag, dring bitim mak, mo mekem ol rabis fasin wetem woman. Hem i lusum hop. Biaen, hem i stat blong stadi Baebol, nao hem i gat wan niufala tingting mo i lego ol nogud fasin. Hem i talem se: “Mi no moa harem se laef blong mi i nating nomo. Naoia mi gat pis, mi glad, mo mi harem gud long laef.”

Ol toktok blong Stiv mo Alf oli mekem yumi tingbaot Ol Sam 19:7, 8 we i se: ‘Loa blong Hae God i stret gud, mo i stap givim niufala paoa. Olgeta we oli stap obei long ol loa ya, oli stap harem gud. Ol tok we hem i putum oli stret gud, mo oli stap givim save long yumi.’