Save we yumi kasem long Baebol i gat paoa blong mekem laef blong yumi i kamgud moa. Tingbaot tufala man ya Rikado mo Andres.

RIKADO: Taem mi gat 15 yia, mi joenem wan grup blong ol stronghed yangfala. Ol niufala fren ya oli gat bigfala paoa long mi. !Mi traehad blong kasem mak ya we mi stap ten yia long presin! Maet yu ting se hemia i krangke nomo. Be long ples blong mi, ol man oli laekem mo respektem olgeta we oli go long presin. Taswe, mi tu mi wantem kam olsem olgeta.

Mi mekem sem fasin olsem ol stronghed yangfala ya, mi tekem drag, mi slip olbaot, mo mi faet. Wan naet, mifala i faet agensem wan narafala grup blong ol stronghed, mo oli traem sutum mifala wetem masket. Mi ting se bambae mi ded, be mi no kasem kil nating. Afta, mi tingting gud long laef blong mi mo ol samting we mi mi wantem, mo mi mekem desisen blong jenisim laef blong mi. ?Be olsem wanem mi save mekem? ?Hu bambae i givhan long mi?

Bighaf blong ol famle blong mi oli no hapi from we oli gat tumas problem. Be famle blong angkel blong mi i defren. Oli folem ol rul blong Baebol, mo mi luk se oli gat gudfala fasin. Mi tingbaot wan taem we oli talem long mi se nem blong God hem i Jehova. Taswe afta long faet ya, mi prea blong God i halpem mi, mo mi yusum nem blong hem Jehova. !Mi sapraes bigwan se long nekis dei nomo, wan Witnes blong Jehova i kilkilim doa! Biaen, hem i mekem Baebol stadi wetem mi.

I no longtaem, mi fesem samting we i had blong winim. Ol fren blong mi bifo oli ringim mi blong askem sipos mi save joen wetem olgeta. I no isi blong talem no, be mi wantem tumas blong gohed blong stadi Baebol. !Mo mi glad se mi gohed! Laef blong mi i jenis, mo mi rili glad.

Mi tingbaot wan prea we mi talem long God se, fastaem mi wantem stap ten yia long presin blong ol man oli respektem mi olsem wan stronghed. Be naoia mi wantem gohed ten yia blong prij fultaem mo givhan long plante man, olsem we narafala i bin givhan long mi. !God i ansarem prea ya, from we 17 yia nao mi gohed blong prij fultaem! Mo tu, mi no go long presin nating.

Plante long ol fren blong mi oli go long presin blong plante yia. Sam long olgeta oli ded. Mi mi talem tangkiu long ol famle blong mi we oli Witnes. Oli folem Baebol long laef blong olgeta, mo mi luk se oli defren long ol narafala man. Mi mi respektem olgeta moa i bitim we mi respektem eniwan long ol stronghed fren blong mi. Antap moa, mi talem tangkiu long God from we hem i tijim mi blong mi gat wan gudfala laef.

 ANDRES: Mi mi gruap long wan ples we i pua, i gat ol woman blong rod, mo plante man oli tekem drag, oli stil, mo oli kilim man i ded. Papa blong mi i alkolik mo i tekem drag ya koken. Oltaem hem mo Mama i raorao mo faet.

Taem mi yangfala, mi stat blong dring mo tekem drag. Mi mi laef long rod nomo. Mi stap stilim olting blong ol man mo salem olgeta bakegen. Taem mi kam bigwan, Papa i tijim mi blong mi karem ol drag mo ol narafala nogud samting i kam long kantri long fasin haed, mo salem olgeta. Hem i ting se hemia wan rod blong mitufala i fren gud. Kwiktaem nomo mi winim plante mane. Wan dei, polis i kam long haos blong arestem mi. Kot i panisim mi se mi mas stap faef yia long presin, from we mi bin traem blong kilim wan man i ded.

Wan moning, mi harem wan mesej i kamaot long laodspika long presin se ol Witnes blong Jehova oli invaetem ol presina blong kam lesin long wan tok long saed blong Baebol. Mi mi go lesin mo mi laekem, taswe mi stat blong stadi Baebol wetem ol Witnes. Oli no fraet blong talem ol samting we oli stret folem Baebol, mo oli soemaot long mi ol gudfala fasin we God i wantem se mi mas mekem.

Mi luksave se mi nidim help blong jenisim fasin blong mi, antap moa, taem ol narafala presina oli tok nogud long mi from samting we mi stap mekem. Ale, mi prea long Jehova blong i mekem mi mi strong mo i givim waes long mi. Jehova i halpem mi, mo biaen, mi no moa wari long ol strong tok blong olgeta, be mi girap mi tokbaot Baebol long olgeta.

!Taem mi rere blong kamaot long presin, mi fraet blong laef afsaed mo mi harem se i moagud mi stap insaed! Taem mi aot, plante presina oli sakem han blong talem tata. Samfala oli talem long kaen fasin se: “!Man blong God, yu gohom!”

Mi fraet blong tingbaot se laef blong mi bambae i olsem wanem sipos mi no bin letem God i tijim mi. Mi mi glad tumas se God i lavem mi, mo i givim janis long mi blong mi jenisim laef blong mi. *