Yunaeted Nesen i stap pulum ol man blong oli wok gud tugeta, respektem raet blong ol man, mo lukaot gud long ol laef samting long wol. ?From wanem oli pulum ol man blong mekem olsem? Long wan niuspepa (UN Chronicle) Maher Nasser i talem se: “Long fulwol, weta i stap jenis, ol grup oli stap stil mo kilim man, plante moa man oli mekem i no stret long narafala, ol faet oli stap gohed, fulap man oli stap ronwe long ples blong olgeta, i gat ol teroris, ol strong sik we oli pas i go long ol man kwiktaem, mo ol narafala denja tu. Olgeta samting ya oli stap spolem laef blong ol man long evri kantri.”

Sam narafala man oli go moa, oli talem se i mas gat wan gavman nomo long fulwol. Wan man we i talem olsem, hemia wan man blong politik long Itali we i gat plante save mo i raetem ol waestok, nem blong hem Dante (1265-1321). Narafala man, hemia Albert Einstein (1879-1955), we i stadi dip long ol paoa we oli wok long skae mo long wol. Dante i bilif se pis i no save stap sipos wol i seraot long ol defdefren gavman. Hem i talem bakegen tok we Jisas i bin talem se: “Sipos ol man blong wan gavman oli seraot . . . bambae gavman ya i mas foldaon.”—Luk 11:17.

Smoltaem afta we tu bigfala bom i bosta long Wol Wo Tu, Albert Einstein i raetem wan leta long niuspepa we i go long Jenerol Asembli blong Yunaeted Nesen, i se: “Yunaeted Nesen i mas mekem wan samting kwiktaem blong gat wan gavman nomo long fulwol, we i save mekem se olgeta kantri oli sef.”

?Be yumi save sua se ol man blong gavman ya bambae oli gat naf save, oli no mekem kruked fasin, mo oli no save kam raf? ?O bambae oli sem mak nomo long ol narafala rula? Ol kwestin ya oli mekem yumi tingbaot tok blong wan man we i stadi long histri long Inglan, nem blong hem Lod Acton, i se: “Taem man i kasem smol paoa, i isi blong hem i kam nogud, mo sipos hem i kasem bigfala paoa, hem i save kam nogud olgeta.”

Nating se i olsem, be sipos ol man oli wantem gat pis mo joen gud, oli mas gat wan tingting nomo. ?Olsem wanem blong kasem mak ya? ?Samting ya i save hapen? Baebol i talem se yes, i save hapen mo bambae i hapen. ?Olsem wanem i save hapen? Wan gavman we man i rul long hem i no save mekem. Be wan gavman we God i putumap i save mekem. Mo gavman ya bambae i soemaot se God nomo i gat raet blong rul long olgeta man. ?Yumi stap tokbaot wanem gavman? Baebol i kolem gavman ya se “Kingdom blong God.”—Luk 4:43.

Jisas Kraes i stap tingbaot Kingdom blong God taem hem i talem long Lodsprea se: “Yu mekem Kingdom blong yu i kam. Yu mekem samting we yu wantem i kamtru long wol ya.” (Matiu 6:9, 10) Yes, Kingdom blong God bambae i mekem samting we God i wantem i kamtru, be i no samting we ol lida blong wol we oli gat griri fasin, oli wantem.

Mo tu, Baebol i kolem Kingdom blong God se “Kingdom blong heven.” (Matiu 5:3) ?From wanem? From we Kingdom ya i no stap long wol be i stap long heven, mo bambae i rulum wol. Taswe gavman ya blong fulwol bambae i no nid blong askem takis o kasem wan narafala samting long ol man. !Ol man bambae oli harem gud tumas!

Olsem tok ya “kingdom” i soemaot, gavman ya i gat wan king. Hemia Jisas Kraes we God i putumap hem. Baebol i tokbaot King Jisas, i se:

• “Gavman ya bambae i stap long han blong hem . . . Bambae i gohed blong kam strong moa, mo bambae pis i no save finis.”—Aesea 9:6, 7, King James Version.

•   “Olfala ya i putumap man ya i king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem. Hem i king we . . . rul blong hem bambae i no save finis.”—Daniel 7:14.

• “Kingdom blong wol i kam Kingdom blong Masta blong yumi [God] mo blong Kraes blong hem.”—Revelesen 11:15.

Samting we Jisas i askem long Lodsprea bambae i kamtru. Kingdom blong God bambae i mekem samting we God i wantem i kamtru long wol. Aninit long rul blong hem, ol man bambae oli lanem olsem wanem blong lukaot gud long wol, nao bambae wol i kam gud bakegen mo ol laef samting bambae oli plante we i plante.

Antap long hemia, Kingdom blong God bambae i tijim olgeta man. Bambae ol man oli joen gud mo i no gat raorao. Aesea 11:9 i talem se: “Bambae i no moa gat man we i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.”

Ol man long wol bambae oli joen gud mo oli stap long pis. Hemia wan samting we Yunaeted Nesen i wantem mekem be hem i no naf. Ol Sam 37:11 i talem se: “[Ol man] bambae oli harem gud, from we oli stap gud, mo oli gat plante samting.” Bambae i no moa gat ol tok olsem: “kilim man i ded,” “ol doti long win mo wota,” “puaman,” mo “faet.” ?Be wetaem samting ya bambae i hapen? ?Wetaem Kingdom blong God bambae i stat blong rulum fulwol? Mo, ?wanem bambae i hapen long taem ya? ?Olsem wanem yu save kasem blesing from rul blong Kingdom? Bambae yumi ansa long ol kwestin ya.