“Wan man nomo i mekem se sin i kam long wol, mo ded i kamaot from sin. Mo ded i kasem olgeta man.”—ROM 5:12.

God i wokem faswan papa mama blong yumi, Adam mo Iv, we bodi mo tingting blong tufala i stretgud olgeta. Mo hem i givim long tufala wan paradaes long wol, hemia garen blong Iden. Hem i talem se tufala i save kakae long olgeta tri we i stap long garen ya, be wan nomo tufala i no mas kakae long hem. Be Adam mo Iv i jusum blong kakae sam frut blong tri ya mo hemia wan sin. (Jenesis 2:15-17; 3:1-19) Afta we tufala i no obei, God i ronemaot tufala long garen ya, nao laef blong tufala i kam had. Biaen, taem tufala i gat ol pikinini, laef blong olgeta tu i kam had. Olgeta evriwan oli stap kam olfala mo oli ded. (Jenesis 3:23; 5:5) From we yumi kamaot long faswan famle ya, yumi tu yumi stap sik, kam olfala mo ded.

“Fulwol i stap long paoa blong man ya we i rabis.”—1 JON 5:19.

“Man ya we i rabis” hemia Setan. Hem i wan enjel we yumi no save luk mo i rebel agensem God. (Jon 8:44; Revelesen 12:9) Biaen, sam narafala enjel oli joenem Setan. Oli singaot ol enjel ya se ol dimon. Ol rabis enjel ya oli yusum paoa blong olgeta blong trikim ol man mo pulum olgeta oli gowe long God.  Oli pulum plante man blong mekem ol nogud samting. (Ol Sam 106:35-38; 1 Timoti 4:1) Setan mo ol dimon oli laekem blong mekem ol man oli safa o fesem hadtaem.

“Wanem sid we man i planem, be frut blong hem nomo, man ya bambae i kasem.”—GALESIA 6:7.

Yumi stap safa long ol defren samting, from yumi gat sin mo from ol nogud samting we Setan i stap mekem. Be samtaem, man i mekem laef blong hem wan i kam had. ?Hem i mekem olsem wanem? Taem hem i mekem ol rabis samting o ol nogud desisen, bambae hem i kasem ol nogud frut. Be man we i mekem ol gudfala samting, bambae i kasem ol gudfala frut. Eksampol, wan hasban o papa we i traehad blong mekem i stret oltaem, i wok had, mo i lavem famle blong hem, bambae hem i kasem plante gudfala samting mo i mekem famle blong hem i glad. Be hemia we i stap plei laki, dring tumas, o i les, bambae hem i mekem hem wan mo famle blong hem i kam pua. Taswe i waes blong lesin long Krieta blong yumi. Hem i wantem se yumi kasem plante gudfala samting mo “kasem pis we i bigwan.”—Ol Sam 119:165.

“Long ol las dei . . . , bambae ol man oli tingbaot olgeta nomo, oli laekem mane tumas, . . . oli no obei long papa mo mama blong olgeta, . . . oli no save bos long tingting, oli wael olgeta, mo oli no laekem ol gudfala fasin.”—2 TIMOTI 3:1-5.

Tede, plante man oli gat ol fasin ya. Hemia i pruvum se yumi stap long ol las dei blong wol ya. Vas i talem tu se bambae i gat ol faet, kakae i sot, graon i seksek, mo ol strong sik. (Matiu 24:3, 7, 8; Luk 21:10, 11) Ol samting ya oli mekem se ol man oli stap safa mo ded.