Wan mak we yu wantem kasem i no wan drim nomo. Hem i wan samting we yu plan from, yu mekem sam jenis long laef blong yu blong kasem, mo yu wok had from.

Maet yu tekem sam dei o wik nomo blong kasem wan mak. Be i gat sam mak we yu save tekem plante manis o yia blong kasem. Sipos yu stap traehad blong kasem wan mak olsem, i gud yu traem kasem ol smosmol mak we oli save givhan long yu blong kasem bigfala mak ya.

Taem yu kasem wan mak, tingting blong yu i kam strong moa, yu joen gud moa wetem ol fren blong yu, mo yu glad moa.

Tingting i kam strong moa: Taem yu kasem ol smosmol mak, yu harem se yu naf blong kasem sam mak we oli had moa. Mo tu, yu naf blong stanap strong agensem ol trabol we yu fesem evri dei, olsem, taem ol fren oli traem pulum yu blong mekem samting we i no stret.

Ol fren: Ol man oli laekem blong joen wetem olgeta we oli save wanem mak oli wantem kasem, mo oli stap traehad from. Mo tu, taem yu wok wetem wan narafala man blong kasem wan mak, hemia i mekem se yutufala i fren gud.

Glad: Taem yu kasem wan mak, yu harem se ol had wok blong yu i no blong nating nomo.

“Mi laekem blong traem kasem ol mak. Hemia i mekem se mi bisi mo mi gat samting blong wok had from. Mo taem mi kasem wan mak, mi tingting bak mo mi talem se, ‘!Man, mi winim! !Mi mekem samting we mi wantem mekem!’”—Kristofa.

RUL BLONG BAEBOL: ‘Sipos yu stap luk long win blong makem stret taem blong planem garen, neva bambae yu save planem mo tekemaot kakae.’—Prija 11:4.

Blong kasem ol mak, traem mekem olsem:

Raetem daon. Yu raetem wan lis blong ol mak we yu wantem kasem. Yu jusum hemia we i moa impoten blong mekem fastaem, afta, namba tu, namba tri, mo yu gohed olsem.

Yu mekem plan. Long ol mak ya wanwan, yu mekem olsem:

• Putum wan taem blong kasem mak ya we i no had tumas long yu.

• Plan from ol smosmol samting we yu mas mekem blong kasem mak ya.

• Tingbaot ol trabol we yu save kasem mo olsem wanem blong winim.

Wok folem. Yu no mas traem wokemaot evri smosmol samting bifo we yu stat. Tingbaot se, ‘?Wanem fas samting we mi save mekem blong kasem mak ya?’ Nao yu mekem. Afta we yu mekem wanwan long ol samting ya, yu traem tingbaot sipos yu stap gohed gud long plan blong yu.

RUL BLONG BAEBOL: “Man we i mekem gudfala plan mo i stap wok strong long hem, hem i save kasem plante samting.”—Ol Proveb 21:5.