Ol man we oli wok had oli no les. Oli harem gud blong wok blong kasem samting we oli nidim mo blong givhan long narafala, nating se oli mekem wan wok we ol narafala oli ting se i daon tumas.

Yumi gat plante wok long laef blong yumi, nating se yumi glad blong mekem o nogat. Bighaf blong ol man oli no wantem wok had. Be sipos yu yu glad blong wok, bambae yu kasem gudfala frut.—Prija 3:13.

“Mi luk se taem mi wok had, mi harem gud mo mi glad long wok blong mi. Samting ya i mekem se mi laekem blong wok. Mo tu, ol narafala oli glad long mi.”—Rayen.

RUL BLONG BAEBOL: “Sipos man i stap wok had, bambae hem i stap win.”—Ol Proveb 14:23.

Blong gat wan gudfala tingting long saed blong wok, yu save mekem olsem:

Traehad blong mekem gudfala wok. Nomata wanem wok we yu stap mekem, olsem skul wok, o wok blong kasem mane, i gud yu putum tingting blong yu fulwan long hem. Taem yu save gud wok ya, lukaot rod blong mekem i gud moa o i kwik moa. Moa we yu gat gudhan blong mekem wan wok, moa we bambae yu harem gud long wok ya.

RUL BLONG BAEBOL: ‘Man we wok blong hem i gud, hem i gud moa i winim plante narafala man, mo hem i naf blong kam man blong wok blong king.’—Ol Proveb 22:29.

Luksave se wok blong yu i givhan long ol narafala tu. Taem yu mekem gud wok blong yu, plante taem yu givhan long narafala. Traem tingbaot, taem yu mekem gud ol smosmol wok long haos, yu givhan long evriwan long famle.

RUL BLONG BAEBOL: “Man i harem gud moa taem hem i givim samting long narafala, i bitim we hem i kasem samting.”—Ol Wok 20:35.

Yu go wan kilometa moa. I gud yu traehad blong mekem moa wok, i bitim samting we yu mas mekem nomo. Long rod ya, yu nao yu bos long laef blong yu. Yu mekem moa from we yu wantem, be i no from we wan man i fosem yu.—Matiu 5:41.

RUL BLONG BAEBOL: “Mi no wantem fosem yu . . . Mi mi wantem blong yu yu mekem long tingting blong yu nomo.”—Filimon 14.

Stret tingting long wok. Ol man we oli wok had oli no les, be oli tekem smol taem blong spel tu. Oli traehad blong gat stret tingting long saed blong wok, i min se oli harem gud blong wok had be oli glad blong spel smol tu.

RUL BLONG BAEBOL: “Sipos tingting blong yumi i stap gud, yumi no wari, hemia i winim fasin ya we yumi stap hadwok tumas oltaem, be yumi no winim wan samting nating.”—Prija 4:6.