SAM man blong stadi long ol samting, oli sapraes long fasin blong wan anis blong leftemap ol hevi samting. Blong kasemsave long samting ya, ol man blong stadi long ol samting, long Yunivesiti blong Ohio long Amerika, oli wokem wan kompiuta we i folem fasin blong ol anis. Oli yusum wan eksre we oli kolem micro CT blong wokem kompiuta ya, mo blong luk olsem wanem wan anis i yusum paoa blong hem blong leftemap wan hevi samting.

Wan impoten haf long bodi blong anis, hemia nek blong hem we hem i yusum blong karem wan hevi samting long maot blong hem. Ol sofsof sel long nek blong anis i joen wetem ol bun long bodi mo hed blong hem, olsem we han blong man i holemtaet narafala han mo i sat strong. Wan man we i mekem stadi long anis, i se: “Taem ol sofsof sel mo ol bun blong anis oli joen gud, hemia i givhan bigwan long nek blong anis blong muv.” Hem i gohed se: “Fasin ya we ol sofsof samting long nek blong anis i joen wetem ol bun long bodi mo hed blong anis i mekem se bodi blong anis strong gud, mo maet hemia nao risen from wanem anis i save leftemap ol hevi samting wetem nek blong hem.” Ol man blong stadi long ol samting, oli ting se oli save kamgud moa long fasin blong wokem ol robot, sipos oli folem fasin blong anis blong yusum nek blong hem blong leftemap ol hevi samting.

?Wanem tingting blong yu? ?Ol defdefren haf long nek blong anis we oli joen tugeta blong leftemap hevi samting i kamaot olsem nomo, no i gat wan man we i wokem?