BAEBOL I TALEM WANEM
Ol enjel
Plante pija, buk, mo muvi, oli tokbaot ol enjel. ?Be hu ya ol enjel, mo wanem wok blong olgeta?
?Hu ya ol enjel?
?BAEBOL I TALEM WANEM?
Bifo we God i wokem wol ya mo ol man, hem i wokem ol enjel we oli gat bigfala paoa. Ol enjel oli gat moa paoa i bitim ol man, mo oli laef wetem God long heven, wan ples we ol man oli no save luk mo oli no save laef long hem. (Job 38:4, 7) Baebol i singaot ol enjel se “ol spirit.”—Ol Sam 104:4, NW; 103:20. *
?I gat hamas enjel evriwan? Oli plante we oli plante. Baebol i talem se i gat “plante taosen enjel we oli plante we plante,” oli stanap raon long bigfala jea blong God. (Revelesen 5:11) !Tok ya ‘plante taosen’ i soemaot se i mas gat plante handred milian enjel!
“Nao taem mi stap lukluk, mi harem voes blong plante taosen enjel we oli plante we plante. Oli stap stanap raon long bigfala jea blong king.”—Revelesen 5:11.
?Ol enjel oli mekem wanem wok long taem bifo?
?BAEBOL I TALEM WANEM?
Ol enjel oli mekem wok olsem ol man blong karem tok o ol mesenja blong God. * Baebol i talem tu se God i sanem ol enjel blong oli mekem sam spesel wok blong hem. God i sanem wan enjel blong i blesem Ebraham mo i blokem hem blong i no mekem sakrefaes long boe blong hem Aesak. (Jenesis 22:11-18) Wan enjel i kamtru long wan tri we faea i laet long hem blong i talemaot wan mesej long Moses, we biaen mesej ya i jenisim laef blong Moses. (Eksodas 3:1, 2) Taem oli sakem profet Daniel long wan hol we i gat ol laeon, “God i sanem enjel blong hem i kam satem maot blong ol laeon ya.”—Daniel 6:22.
“Nao taem [Moses] i stap long ples ya, wan enjel blong Hae God i kamtru long hem long faea we i laet olbaot long wan smol tri.”— Eksodas 3:2.
?Ol enjel oli stap mekem wanem wok naoia?
?BAEBOL I TALEM WANEM?
Yumi no save evri wok we ol enjel oli stap mekem tede. Be, Baebol i talem se ol enjel oli joen long wok ya blong givhan long ol man blong oli save moa long saed blong God.—Ol Wok 8:26-35; 10:1-22; Revelesen 14:6, 7.
Jehova i mekem se Jekob i luk wan drim, mo long drim ya hem i luk wan “lada” i stap bitwin heven mo wol, mo ol enjel oli stap godaon mo go antap long hem. (Jenesis 28:10-12) Drim ya i soemaot se Jehova i sanem ol enjel i kam long wol blong mekem sam wok, hemia blong givhan long ol man we oli nidim we Hem i givhan long olgeta.—Jenesis 24:40; Eksodas 14:19; Ol Sam 34:7.
“Nao [Jekob] i luk wan drim, mo long drim ya, i luk wan lada i stanap, we stamba blong hem i stap long graon, be en blong hem antap i kasem heven, mo i luk ol enjel oli stap long hem, we oli stap kamdaon, mo oli stap go antap.”—Jenesis 28:12.
^ par. 6 Baebol i tokbaot se sam enjel oli rebel agensem God, mo hem i singaot ol enjel ya se “ol rabis spirit.”—Luk 10:17-20.
^ par. 11 Long Baebol, Hibru mo Grik tok ya enjel i minim “mesenja.”
Maet Yu Laekem Hemia Tu
ANSA WE BAEBOL I GIVIM
?Ol Enjel Oli Hu, No Oli Wanem?
?I gat hamas enjel i stap? ?Oli gat prapa nem mo prapa fasin blong olgeta?
