RUL BLONG BAEBOL: “Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.”—Ol Proveb 21:5.

?I MINIM WANEM? Yu mas mekem wan plan mo folem gud. Hemia i min se yu plan gud bifo we yu spenem mane. Ating yu no save pem evri samting we yu wantem. Yu mas yusum gud mane blong yu.

?YU SAVE MEKEM WANEM?

• Yu no spenem mane olbaot. Raetemdaon ol samting we yu spenem mane long hem, mo seraotem olgeta long ol grup olsem kakae, klos, bensin, mo renhaos. Nao makemaot hamas mane yu spenem long ol wanwan grup ya. Sipos yu spenem tumas mane long wan, yu tekemaot sam mane long narawan. Olsem nao, sipos yu spenem tumas mane long bensin, yu tekemaot sam mane long samting we i no impoten tumas, olsem kakae long restoron.

• Yu no mekem bigfala kaon. Traehad blong no mekem bigfala kaon. I moagud yu sevem mane fastaem blong pem samting we yu wantem. Taem yu mekem wan lon, traem pembak stret mane evri manis, sipos no bambae yu pem intres antap bakegen. Taem yu gat kaon, mekem plan blong pembak, mo folem gud plan ya.

  Wan man we i stadi long saed ya, i talem se taem yu mekem wan lon, i isi blong spenem mane olbaot nomo. Taswe sipos yu mekem wan lon, yusum gud mane ya.

RUL BLONG BAEBOL: “Man we i les blong planem garen blong hem long stret taem blong hem, hem bambae i no gat kakae.”—Ol Proveb 20:4.

 ?I MINIM WANEM? Man we i les i save kam puaman. Taswe, yu mas wok had, mo traem folem wan plan we bambae i mekem se yu gat naf mane long fiuja.

?YU SAVE MEKEM WANEM?

• Yu wok had. Taem yu wok had mo bos blong yu i trastem yu, bambae hem i wantem se yu gohed nomo blong wok.

• Yu no stil. Sipos yu stil, bambae yu spolem gudnem blong yu, mo bambae i had blong yu faenem wan narafala wok.

• Yu no wantem tumas samting. Sipos oltaem yu stap traehad blong kasem moa mane, sloslo helt blong yu i save kam nogud, mo yu no gat taem blong fren gud wetem ol narafala. Yu mas tingbaot se, i no mane we i impoten.

YU NO WESTEM TAEM MO MANE LONG OL NOGUD FASIN.

“Man we i stap drong oltaem mo i stap kakae tumas bambae i kam puaman. Sipos yu no wok, yu stap kakae nomo, mo yu stap slip, bambae i no longtaem yu stap werem ol rabis klos.”—OL PROVEB 23:21.

YU NO WARI TUMAS.

‘Yufala i stop blong wari tumas from laef blong yufala se bambae yufala i kakae wanem, yufala i dring wanem, mo yufala i werem wanem.’—MATIU 6:25.

YU NO GRIRI.

“Man we i griri, oltaem nomo hem i stap hareap blong kasem plante samting moa blong mekem hem i kam rijman. Hem i no save tingbaot se i isi nomo blong trabol i kam spolem hem wantaem.”—OL PROVEB 28:22.