RUL BLONG BAEBOL: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:4.

?I MINIM WANEM? Bambae yu fren gud wetem narafala sipos yu tingbaot samting we yu save mekem blong givhan long hem, i no samting we hem i save mekem blong yu. Sipos yu tingbaot yu wan nomo, bambae ol narafala oli no moa wantem fren wetem yu. Plante hasban mo waef we oli tingbaot olgeta nomo, oli go slip wetem narafala mo spolem mared blong olgeta. Mo tu, sipos yu tokflas from ol samting we yu gat mo from ol save blong yu, bambae ol man oli no wantem fren wetem yu. Taswe, wan buk (The Road to Character) i talem se: “Man we i tingbaot hem wan nomo bambae i kasem plante trabol.”

?YU SAVE MEKEM WANEM?

• Givhan long narafala. Sipos yu wan gudfala fren, bambae yu trastem ol fren blong yu, mo yu rere blong givhan long olgeta. Sam man blong stadi oli faenemaot se man we i givhan long narafala, tingting blong hem i no foldaon bitim mak, mo i no ting nating long hem wan.

• Kasemsave filing blong narafala. Sipos yu yu gat fasin ya, bambae yu safa wetem olgeta we oli safa. Mo bambae yu no save tok jikim narafala, o talem ol tok plei we i spolem filing blong hem.

  Sipos yu kasem save filing blong ol narafala, yu no save kam kros from sam fasin blong olgeta we yu no laekem. Taswe, yu no save agensem ol man blong ol defren kantri mo fasin blong laef, mo i isi blong yu fren wetem olgeta.

•   Spenem taem wetem ol narafala. Yu mas spenem taem wetem ol narafala blong save gud olgeta. Blong fren gud wetem olgeta, yu mas storian gud long ol samting we oli ting se i impoten. Mo yu mas lesin gud. Soemaot se yu tingbaot ol wari blong ol fren blong yu. Ol man blong stadi oli faenemaot se taem yumi “storian wetem ol narafala long ol samting we i impoten, yumi hapi moa.”

RUL BLONG BAEBOL: “Ol rabis fren oli save spolem ol gudfala fasin.”—1 Korin 15:33.

?I MINIM WANEM? Ol man we yu joen wetem olgeta oltaem, oli save mekem se fasin blong yu i kam gud o i kam nogud. Ol man we oli stadi long bisnes ya, olgeta tu oli ting se ol fren oli gat bigfala paoa long yu. Taswe, sipos yu joen oltaem wetem ol man we oli smok, i no longtaem bambae yu tu yu smok. Sipos yu joen wetem ol man we oli wantem mekem divos, i no longtaem yu tu bambae yu wantem divos.

?YU SAVE MEKEM WANEM? Jusum ol fren we oli gat ol gudfala fasin we yu laekem mo yu wantem folem. I gud yu joen wetem ol man we oli toktok kaen, oli gat respek, oli glad blong givim samting, mo oli glad blong singaot narafala i kam long haos.

YU NO TOK NOGUD.

“Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem.”—OL PROVEB 12:18.

YU GLAD BLONG GIVIM PRESEN.

“Man we i stap givim ol samting long narafala man long gladhat blong hem, oltaem hem i gat plante samting.”—OL PROVEB 11:25.

YU MEKEM I GUD LONG NARAFALA OLSEM WE YU WANTEM HEM I MEKEM LONG YU.

“Fasin we yufala i wantem blong ol narafala oli mekem long yufala, yufala i mas mekem long olgeta.”—MATIU 7:12.