Ol samting long yunives oli oganaes gud. Wan atikol long magasin ya Astronomy, i se: “Ol galaksi oli no stap olbaot nomo long skae, be oli stap long oda folem wan paten.” ?Olsem wanem hemia i posibol? Ol saentis oli bilif se maet wan dak mata (dark matter) we yumi no save luk, i kontrolem olgeta. Mo oli talem se dak mata ya i olsem “wan lada we yumi no save luk . . . we i sapotem ol galaksi mo ol grup blong galaksi we oli kolem ol klasta mo supaklasta . . . blong oli stap long stret ples blong olgeta.”

?Wanem i mekem se yunives i oganaes gud olsem? ?Yu ting se i save kamaot olsem nomo we i nogat wan man i wokem? Makem tok we Allan Sandage i talem. Man ya i bilif long God mo i “wan long ol beswan astronoma long ol yia 1900.”

 Hem i se: “I no posibol blong evri samting long spes i kamaot olsem nomo we i nogat wan i oganaesem.”

Yunives i stret nomo blong i gat laef long hem. Tingbaot samting we ol saentis oli kolem se weak force o wan fos we i no strong. Fos ya i mekem se san i stap laet oltaem long sem level. Sipos fos ya i godaon smol, bambae i nogat san mo sipos i go antap smol, bambae san i lus longtaem finis.

I gat plante long ol fos olsem we yumi dipen long olgeta blong laef. Wan man blong raetem ol save blong sayens, Anil Ananthaswamy, i talem se sipos wan long ol fos ya i jenis smol, “bambae ol sta, ol planet, mo ol galaksi oli no save fom. Bambae i no posibol blong ol samting i laef.”

I gat wan ples long yunives we i stret long ol man. Wol ya i gat inaf wota mo stret atmosfia, mo saes blong mun i stret blong mekem se wol i balens gud. National Geographic i talem se: “Plante samting we i mekemap geology, ecology, mo biology raon long yumi, i mekem se bigfala ston ya hemia wol, i stret nomo blong man i save laef long hem.” *

Wan man i raetem se sola sistem blong yumi “i stap hem wan,” i no joen wetem ol narafala sta long galaksi blong yumi. Samting ya i mekem se i save gat laef long wol ya. Sipos yumi stap klosap moa long ol narafala sta long galaksi blong yumi, o yumi stap afsaed olgeta, bambae rediesen i kilim yumi. Be yumi stap long sefples, we ol saentis oli kolem “galactic habitable zone.”

Fisiksis ya Paul Davies we i gat save long yunives mo ol narafala samting, i talem se: “Mi no save bilivim se yumi stap laef long yunives ya from laki nomo, o from wan aksiden long histri, o from wan bigfala bang long spes. Laef long ples ya i mas folem wan plan.” Davies i no tijim se God i krietem yunives mo man, be i luk olsem se yunives mo wol i gat disaen blong hem we i mekem se i save gat laef. ?Wanem tingting blong yu, yu ting se wan man i disaenem?