LONGTAEM finis i kam, ol man oli bilif se pijin ya arktik tern i flae samwe long 35, 200 kilometa stat long ples ya Artik kasem Antatika mo i gobak long Artik. Be ol stadi we oli jes kamaot oli soem se pijin ya i flae i go longwe moa.

I gat sam smosmol masin we oli stap putum long ol pijin. Nem blong masin ya geolocator, mo i hevi olsem wan lid blong pen. Masin ya i soemaot se sam long ol pijin ya arktik tern oli flae 90,000 kilometa, gokam. Pijin ya i travel longwe moa long ol narafala anamol. !Wan long ol pijin ya i flae 96,000 kilometa! ?From wanem i gat jenis long ol namba ya?

Nomata weples we oli stat blong flae long hem, oli no flae long sem rod nomo. Olsem pija ya i soem, taem oli flae krosem Atlantik Osen, rod blong olgeta i olsem wan leta S. ?From wanem? From we oli folem win we oltaem i stap blu long ples ya.

Ol pijin ya tern oli laef samwe long 30 yia, mo oli save flae long bitim 2.4 milian kilometa. !Hemia i sem mak olsem se oli flae raon long mun 3 o 4 taem! Wan man blong mekem stadi i talem se: “Hemia i wan samting we i had blong kasemsave long hem from we hevi blong pijin ya i kasem 100 gram nomo.” Mo tu, from we arktik tern i stap flae i go long not pol mo saot pol, buk ya Life on Earth: A Natural History i talem se oli luk “moa delaet evri yia i bitim ol narafala laef samting.”