Samting we i traem yu hem i wan tingting we i pulum yu blong mekem wan samting we i nogud. Eksampol, yu stap pem ol samting long stoa, wantaem nomo yu luk wan naesfala samting. Wan tingting i kam long yu se, i isi nomo blong stilim samting ya mo bambae ol man oli no save faenemaot. !Be hat blong yu i stap stikim yu blong no karem! Ale yu sakemaot tingting ya we i pulum yu. Long rod ya, yu yu winim samting we i traem yu.

?BAEBOL I TALEM WANEM?

Taem wan samting i traem yu, hemia i no min se yu wan rabis man. Baebol i talem se ol samting oli traem yumi evriwan. (1 Korin 10:13) Samting we i impoten hemia aksen we yumi mekem taem wan samting i traem yumi. Samfala oli gohed blong tingting long ol nogud fasin, nao biaen oli mekem ol nogud fasin ya. Be sam narafala oli sakemaot ol nogud tingting ya kwiktaem, from we oli save se oli nogud.

“Ol samting blong traem man i save kam strong long hem taem hem i wantem tumas wan samting, nao samting ya i pulum hem, mo i trikim hem.”—Jemes 1:14.

Baebol i tokbaot ol samting we oli save lidim yumi blong mekem wan nogud samting. Jemes 1:15 i talem se: “Nao taem [nogud] tingting ya i kam strong long hem, hem i mekem sin.” Taswe, taem yumi gohed blong tingting long wan nogud samting, yumi kasem wan mak we nogud tingting ya i save pulum yumi blong tekem aksen. Be, blong yumi no kam slef blong ol nogud tingting, yumi mas bos long tingting blong yumi.

?OLSEM WANEM BAEBOL I SAVE GIVHAN?

Sipos tingting blong yumi i naf blong holemtaet ol nogud tingting, hem i naf blong sakemaot tu. ?Olsem wanem blong mekem olsem? Sipos nogud tingting i kam long yumi, i gud yumi fosem tingting blong yumi blong tingbaot narafala samting, yumi mekem wan wok, yumi storian wetem ol fren, o yumi tingbaot ol gudfala samting. (Filipae 4:8) Mo tu, i gud yumi tingbaot ol nogud frut we oli save kamaot sipos yumi letem wan samting i traem yumi. Ol nogud frut olsem, safa long bodi, long filing, mo long spirit. (Dutronome 32:29) Prea tu i save givhan bigwan. Jisas i talem se: “Yufala i mas prea oltaem, blong bambae i no gat wan samting i save traem yufala blong mekem yufala i foldaon.”—Matiu 26:41.

“Yufala i no go krangke: I no gat man i save trikim God. Wanem sid we man i planem, be frut blong hem nomo, man ya bambae i kakae.” —Galesia 6:7.

SAMTING WE YU MAS LUKSAVE

Yu mas luk samting we i traem yu se i wan trik o wan bet, we i save lidim wan krangke man, wan man we i no gat save, o wan man we i no stap lukaot gud, blong i mekem wan nogud fasin. (Jemes 1:14, futnot) Hemia i tru moa, sipos wan samting i traem yu blong mekem nogud fasin blong seks. Fasin ya i save mekem yu harem nogud bitim mak.—Ol Proveb 7:22, 23.

?OLSEM WANEM BAEBOL I SAVE GIVHAN?

Jisas i talem se: “Nao sipos raet ae blong yu i mekem yu yu foldaon, yu stikimaot mo yu sakem.” (Matiu 5:29) !Jisas i no stap talem se yumi mas stikimaot prapa ae blong yumi! Be hem i minim se, sipos yumi wantem mekem God i glad mo kasem laef we i no save finis, yumi mas kilimaot ol nogud fasin we ol haf blong bodi blong yumi oli pulum yumi blong mekem. (Kolosi 3:5) Maet hemia i min se yumi mas gat strong tingting blong tanem baksaed long ol samting we i traem yumi. Wan gudfala man blong God i prea se: “Plis yu blokem mi blong mi no save folem ol fasin ya we i no gat wan gudfala samting i save kamaot long hem.”—Ol Sam 119:37.

I tru se i had blong bos long yumi wan. Mo tu, “bodi blong [yumi] i slak.” (Matiu 26:41) Taswe bambae yumi mestem samtaem. Be sipos yumi rili sore from nogud samting we yumi mekem, mo yumi traehad blong no moa mekem fasin ya bakegen, Jehova, we i God blong yumi bambae “i gat sore [long yumi], mo oltaem hem i glad tumas blong mekem i gud” long yumi. (Ol Sam 103:8) !Hemia wan samting we i mekem yumi harem gud tumas!

“?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?”—Ol Sam 130:3.