Oltaem ol hasban mo waef oli fesem bigfala trabol afta we ol pikinini blong olgeta oli kam bigwan mo oli aot long haos. Jenis ya i save mekem tufala i harem se tufala i strenja nomo. Man ya M. Gary Neuman i raetem se: “Mi givim advaes long plante hasban mo waef we oli no save olsem wanem blong joen gud bakegen.” Hem i gohed se: “Taem ol pikinini blong olgeta oli aot long haos, oli no moa toktok tugeta o mekem samting tugeta.” *

?Samting ya i hapen tu long mared blong yu? Sipos yes, yutufala i save joen gud bakegen. Fastaem, traem luk sam samting we maet i mekem se yutufala i no joen gud.

Blong plante yia, yu tingbaot pikinini fastaem. From wan gudfala risen, plante papa mo mama oli tingbaot nid blong pikinini fastaem long nid blong hasban o waef blong olgeta. Samting we i kamaot se, tufala i save gud wok blong ol papa mo mama be tufala i lusum fasin ya blong joen gud olsem hasban mo waef. Samting ya i kamaot klia taem ol pikinini oli aot long haos. Wan waef we i gat 59 yia i talem se: “Taem ol pikinini blong mitufala oli stap yet, samtaem mitufala i wok tugeta.” Be taem oli aot long haos, hem i se: “Mitufala i gat defdefren tingting long wanem we i impoten long laef.” Wan taem hem i talem long hasban blong hem se: “Yumitu no moa joen gud nating.”

Sam hasban mo waef oli no rere blong folem niufala laef ya. Buk ya Empty Nesting i talem se: “I olsem se plante hasban mo waef oli jes mared.” From we oli harem se oli no joen gud, oli mekem samting we olgeta wanwan oli wantem. Oli kam olsem ol fren we oli serem wan rum, be i no ol fren we oli mared.

Be gud nius se, yu save blokem problem ya. Mo yu save harem gud tu long ol gudfala samting we i kamaot from niufala jenis ya long laef blong yu. Baebol i save halpem yu. I gud yumi luk olsem wanem Baebol i save givhan.

Yu mas akseptem jenis ya. Taem ol pikinini oli kam bigwan, Baebol i talem se: “Man i mas aot long papa mo mama blong hem.” (Jenesis 2:24) Taswe ol papa mo mama, mak blong yufala i blong tijim ol pikinini go kasem taem we oli kam bigwan, blong halpem olgeta blong oli save wanem we oli mas mekem taem oli aot. Sipos yu mekem olsem, yu save glad taem pikinini blong yu i aot long haos.—Rul blong Baebol: Mak 10:7.

I tru, bambae yu gohed blong stap olsem papa mo mama blong pikinini blong yu. Bambae yu stap givim advaes yet long hem, be yu no moa bos long hem. Niufala jenis ya i mekem se yu save gohed blong fren wetem pikinini blong yu, be long semtaem yu tingbaot moa hasban o waef blong yu. *—Rul blong Baebol: Matiu 19:6.

Yu tokbaot ol wari blong yu. I gud yu tokbaot long hasban o waef blong yu ol samting we jenis ya i mekem long yu, mo yu mas rere tu blong lesin taem hem i tokbaot ol filing blong hem. Yutufala i mas kasemsave long yutufala mo gat longfala tingting. I tekem taem blong yutufala i mekem fasin fren blong yutufala olsem hasban mo waef i kam strong, be taem yutufala i mekem olsem gudfala frut bambae i kamaot from.—Rul blong Baebol: 1 Korin 13:4.

Mekem sam niufala samting tugeta. Tokbaot ol mak we yutufala i wantem kasem o sam samting we yutufala i laekem blong mekem tugeta. Taem yutufala lukaot ol pikinini, yutufala gat plante waes. ?Olsem wanem sipos yutufala i yusum ol save ya blong givhan long ol narafala?—Rul blong Baebol: Job 12:12.

Tingbaot bakegen ol gudfala fasin blong yutufala. I gud yutufala i tingbaot bakegen ol gudfala fasin we i pulum yutufala blong laekem yutufala. Olsem hasban mo waef, tingbaot bakegen ol taem we yutufala i spenem tugeta, mo ol problem we yutufala i winim tugeta. Long rod ya, niufala jenis ya long laef blong yutufala bambae i wan gudfala jenis. Taem yutufala i traehad blong joen gud tugeta bambae yutufala i gat janis blong mekem se mared blong yutufala i kamgud moa, mo bambae yutufala i tingbaot bakegen lav ya we yutufala i gat taem yutufala i jes mared.