?OL MAN OLI TALEM WANEM?

Ol man Isrel oli wosipim wan “god blong faet,” we i laekem tumas blong mekem blad i ron.

?BAEBOL I TALEM WANEM?

Ol kantri we Isrel i faet long olgeta, oli fulap long rabis fasin, olsem, man i slip wetem anamol, man i slip wetem wan stret famle blong hem, mo oli bonem pikinini blong mekem sakrefaes long god blong olgeta. God i letem plante handred yia i pas, blong oli save jenisim ol fasin ya, nao hem i talem se: “Ol fasin ya nao i mekem olgeta i doti long fes blong mi. From samting ya, bambae mi ronemaot olgeta.”—Levitikas 18:21-25; Jeremaea 7:31.

“Hem bambae i ronemaot olgeta oli gowe long kantri ya, from we oli stap mekem sin, fasin blong olgeta i nogud olgeta.”—Dutronome 9:5.

MAET YU LUK SE

Long plante faet, ol lida blong jos long tugeta saed oli talem se God i sapotem olgeta. Wan buk (The Causes of War) i talem se: “Long ol yia we oli pas, jos i joen long evri faet we i kamaot.”

?BAEBOL I TALEM WANEM?

Baebol i talem se ol Kristin oli no mas faet agensem ol enemi blong olgeta. Aposol Pol i raetem leta long ol Kristin long Rom, i se: “Sipos i gat rod, yufala i mas mekem bes blong yufala blong yufala i gat pis wetem olgeta man . . . yufala i no mas givimbak.”—Rom 12:18, 19.

Jisas i no sanem ol man blong hem oli go faet, be hem i talem se: “Yufala i mas gohed blong lavem ol enemi blong yufala, mo . . . prea from olgeta we oli stap ronem mo kilim yufala, long fasin ya, yufala i save kam ol pikinini blong Papa blong yufala we i stap long heven.” (Matiu 5:44, 45) Taem ol Kristin oli laef long kantri we i gat faet long hem, oli no joen long faet, from we oli “no blong wol ya.” (Jon 15:19) Taswe, sipos God i wantem we ol man blong hem oli lavem ol enemi blong olgeta mo oli no joen long wol, i klia se hem i no save sapotem ol faet tede.

“Kingdom blong mi i no blong wol ya. Sipos Kingdom blong mi i blong wol ya, bambae ol man blong mi oli faet finis blong blokem ol man ya blong oli no putum mi long han blong ol man Jiu. Be Kingdom blong mi i no blong wol ya.”—Jon 18:36.

?OL MAN OLI TALEM WANEM?

Ol faet bambae oli neva finis. Wan buk (War and Power in the 21st Century) i talem se: “Long handred yia we i kam, mo biaen long taem ya tu, bambae i no save gat pis long fulwol.”

?BAEBOL I TALEM WANEM?

Ol faet bambae oli finis taem ol man oli no moa wantem kilkilim olgeta. Taswe i no longtaem, Kingdom blong God, hemia gavman blong God we i stap long heven, bambae i mekem faet i finis long wol ya, mo tijim ol man blong oli gat pis. Baebol i promes se God “bambae i stretem ol rao blong ol kantri . . . ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.”—Maeka 4:3.

Baebol i talem se taem Kingdom i rul, bambae i no moa gat ol gavman we oli traem winim narafala gavman mo mekem samting we olgeta nomo i wantem, i no moa gat ol loa we oli no stret mo oli pulum ol man blong oli agensem gavman, mo i no moa gat fasin ya blong no laekem narafala we i stap pulum wan laen blong man blong agensem narafala laen. Taswe, ol faet bambae oli finis. God i promes se: “Bambae i no moa gat man we i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man we oli savegud Hae God.”—Aesea 11:9.

“Hem i stap mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”—Ol Sam 46:9.