Ol Bigfala Poen Long Buk Blong Matiu
Tok Blong Jeova i Wan Samting We i Laef
Ol Bigfala Poen Long Buk Blong Matiu
MATIU i faswan man blong raetem nambawan stori blong laef blong Jisas mo minista wok blong hem. Hem i wan gudfala fren blong Jisas Kraes we bifo hem i man blong tekem mane blong takis. Matiu i raetem buk ya fastaem long lanwis Hibru mo biaen oli tanem i kam long lanwis Grik. Hem i finis blong raetem Gospel blong hem long 41 K.T., mo Gospel ya i joenem Hibru haf wetem Grik haf blong Baebol.
Ol save long Gospel blong Matiu oli go fastaem long ol man Jiu. Ol toktok blong Gospel ya oli save givhan bigwan long man mo oli save pusum man tu blong mekem sam samting from we oli tokbaot Jisas se hem i Pikinini blong God mo hem i Mesaea ya we God i promes blong sanem. Sipos yumi tingtinggud long mesej we i stap long buk ya, samting ya i save mekem bilif blong yumi i strong long trufala God, Pikinini blong hem mo ol promes blong Hem.—Hib. 4:12.
“KINGDOM BLONG HEVEN I KAM KLOSAP FINIS”
(Mat. 1:1–20:34, NW)
Matiu i tokbaot ol tok long saed blong Kingdom mo ol tijing blong Jisas, nating se hem i no folem prapa oda blong taem we ol samting ya oli hapen. Eksampol, Matiu i tokbaot Bigfala Toktok blong Jisas antap long Hil long stat blong buk blong hem, be Jisas i givim Bigfala Toktok ya long medel blong minista wok blong hem.
Taem Jisas i mekem minista wok blong hem long Galili, hem i mekem ol merikel, hem i tokbaot wok blong prij long ol 12 aposol, hem i jajem ol Farisi mo i talem sam pijatok we i givim moa save long saed blong Kingdom. Biaen, hem i aot long Galili mo i kam ‘long distrik ya Judia, long narasaed Jodan Reva.’ (Mat. 19:1) Long rod, Jisas i talem long ol disaepol blong hem i se: ‘Yumi stap go antap long Jerusalem, mo long ples ya, sam man bambae oli jajem mi se bambae mi mas ded, mo long namba tri dei, bambae God i mekem mi mi laef bakegen.’—Mat. 20:18, 19.
Ansa Blong Sam Kwestin Long Saed Blong Baebol:
3:16—?Long wanem fasin, ‘heven i open’ long taem we Jisas i baptaes? Tok ya i blong soemaot se Jisas i save tingbaot bakegen laef blong hem long heven bifo we hem i kam long wol.
5:21, 22—?Olsem wanem? ?Fasin blong faerap long kros i moa nogud i winim fasin blong holem kros longtaem? Jisas i givim woning ya se wan man we i holem kros blong hem agensem brata blong hem i mekem wan bigfala sin. Be, fasin blong faerap long kros mo talem ol tok we oli no soem respek i moa nogud. Man we i mekem fasin ya i mas pas long wan kot we i hae moa i bitim we i pas long wan kot we i lukluk nomo long ol trabol blong evri dei.
5:48—?Olsem wanem? ?Yumi save kam ‘stret gud, olsem Papa blong yumi long heven’? Yes, be long sam fasin nomo. Long vas ya, Jisas i stap tokbaot fasin ya lav mo hem i talem long ol man we oli stap lesin long hem se oli mas folem fasin blong God mo lav blong olgeta i mas stret gud, i mas fulwan. (Mat. 5:43-47) ?Olsem wanem oli save mekem samting ya? Hemia taem oli soemaot lav long ol enemi blong olgeta.
7:16—?Wanem ol “frut” we oli makem wan trufala Kristin? Ol frut ya oli no long saed blong ol fasin blong yumi nomo. Oli joen tu wetem bilif blong yumi—hemia ol tijing we yumi stap folem.
10:34-38—?I stret blong talem se tok long ol vas ya i mekem famle i seraot? Nogat. Fasin seraot i kamaot long wan famle from we samfala memba blong famle ya oli no bilif. Maet ol memba ya we oli no bilif oli jusum blong sakemaot no agensem Kristin skul, ale, fasin ya i mekem se famle i seraot.—Luk 12:51-53.
11:2-6—Sipos Jon i bin harem voes blong God we i talem se Hem i laekem tumas pikinini blong hem, Jon i mas save finis se Jisas i Mesaea ya. ?Be, from wanem Jon i askem sipos Jisas i ‘Man ya we bambae i kam’? Maet Jon i askem olsem from we hem i wantem we Jisas hem wan i talem se hem i Mesaea. Be i luk olsem se Jon i wantem save tu sipos i gat “wan narafala man bakegen” we i mas kam long paoa blong Kingdom mo mekem ol samting we ol man Jiu oli stap wet blong i kamtru. Ansa blong Jisas i soemaot se i no gat wan narafala man bakegen we bambae i tekem ples blong hem.
19:28—?Tok ya se bambae oli jajem ol “twelef laen blong Isrel” i minim wanem? Tok ya i no minim ol 12 laen blong Isrel long saed blong spirit. (Gal. 6:16; Rev. 7:4-8) Ol aposol we Jisas i stap talem tok ya long olgeta oli haf blong Isrel long saed blong spirit, taswe oli no save jajem olgeta bakegen. Jisas i mekem ‘wan kontrak wetem olgeta from wan Kingdom,’ mo bambae oli ‘pris mo king blong mekem wok blong God.’ (Luk 22:28-30, NW; Rev. 5:10) Olgeta we oli blong Isrel long saed blong spirit bambae oli “jajem olgeta man blong wol.” (1 Kor. 6:2) Taswe, taem Jisas i talem se olgeta we oli stap sidaon long jea blong olgeta long heven bambae oli jajem ol “twelef laen blong Isrel” ya, i klia se ol twelef laen blong Isrel ya hemia ol man long wol we oli no insaed long grup ya we bambae oli king mo pris. Ol twelef laen long Dei blong Stretem Sin i pija blong olgeta man ya nao we bambae oli laef long wol ya.—Lev., japta 16.
Ol Lesen Blong Yumi:
4:1-10. Vas ya i tijim yumi se Setan i wan trufala man be i no wan rabis fasin nomo. Setan i stap yusum fasin ya we man i “wantem tumas ol rabis samting we tingting blong hem i wantem, mo i wantem tumas ol samting we ae blong hem i luk” blong traem yumi. Nating se i olsem, sipos yumi mekem ol advaes blong Baebol oli wok long laef blong yumi, samting ya bambae i halpem yumi blong gohed blong stap tru long God.—1 Jon 2:16.
5:1–7:29. Luksave se yu nidim ol samting long saed blong spirit. Stap long pis wetem ol man. Sakemaot ol rabis tingting. Holem promes blong yu. Taem yu prea, tingbaot ol samting long saed blong spirit fastaem long ol samting long saed blong bodi. Kam rijman long fes blong God. Lukaot Kingdom fastaem mo stret fasin blong God. Yu no mas jajem man. Mekem ol samting we God i wantem. Yumi lanem plante nambawan lesen long Bigfala Toktok we Jisas i givim antap long Hil.
9:37, 38. Taem yumi askem long Masta blong i “sanem sam moa man oli kam blong karem ol kakae long garen,” yumi mas wok folem wanem we yumi stap askem. Yumi mekem olsem taem yumi joen mo wok strong long wok blong pulum ol man oli kam disaepol.—Mat. 28:19, 20.
10:32, 33. Yumi neva mas fraet blong talemaot bilif blong yumi.
13:51, 52. Taem yumi kasem save long ol trutok long saed blong Kingdom, yumi gat wok ya tu blong tijim ol narafala mo halpem olgeta blong oli kasem save long ol impoten trutok ya.
14:12, 13, 23. Fasin blong stap yu wan smoltaem i gud from we i givhan long yu blong tingting dip.—Mak 6:46; Luk 6:12.
17:20. Yumi nidim bilif blong winim ol problem we oli olsem ol bigfala hil we oli save blokem yumi blong yumi no gohed long saed blong spirit mo blong fesem ol hadtaem. Yumi no mas ting nating long fasin ya blong bildimap bilif mo mekem bilif blong yumi long Jeova mo ol promes blong hem i strong.—Mak 11:23; Luk 17:6.
18:1-4; 20:20-28. Sin we i stap long ol man mo tijing we skul blong olgeta i givim long saed blong haenem, i mekem se ol disaepol blong Jisas oli tingting tumas long saed blong haenem. Yumi mas wokem tingting daon blong blokem ol tingting we i save pulum yumi blong mekem sin mo blong holem stret tingting long saed blong ol blesing mo ol wok we yumi kasem.
“OLI PUTUM MI, MI PIKININI BLONG MAN, MI GO LONG HAN BLONG OL MAN”
Jisas i “raed long wan dongki,” i kam long Jerusalem long Nisan 9 long yia 33 K.T. (Mat. 21:5) Long nekis dei, hem i ronemaot ol man we oli stap mekem maket long haos tempol. Long Nisan 11, hem i tij insaed long tempol, i stap jajem ol Sadusi mo ol Farisi mo biaen hem i talemaot long ol disaepol blong hem ‘saen we i soemaot we hem i stap mo we en blong fasin blong laef blong wol ya i kam.’ (Mat. 24:3, NW) Long nekis dei, hem i talem long olgeta se: “Yufala i save, i gat tu dei i stap blong kasem Lafet blong Pasova. Mo long taem ya bambae oli putum mi, mi Pikinini blong Man, mi go long han blong ol man, blong oli nilim mi long [“pos,” NW] blong mi ded.”—Mat. 26:1, 2.
Long Nisan 14, afta we Jisas i stanemap Memoriol blong tingbaot ded blong hem, wan giaman fren i salem Jisas long ol enemi blong hem, oli holem hem, hem i kasem traem mo oli nilim hem long pos. Long namba tri dei, God i mekem hem i laef bakegen long ded. Bifo we hem i go long heven, Jisas ya we i laef bakegen i talem long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi.”—Mat. 28:19.
Ansa Blong Sam Kwestin Long Saed Blong Baebol:
22:3, 4, 9—King i sanem toktok tri taem blong singaot ol man oli kam long kakae blong mared. ?Be, wetaem ol wanwan toktok ya i goaot? Faswan toktok i goaot blong singaot olgeta we oli stap long grup blong woman ya we i mared blong oli kam wanples. Samting ya i hapen taem Jisas mo ol man blong hem oli stat blong prij long yia 29 K.T., mo oli gohed olsem kasem yia 33. Namba tu toktok i goaot stat long taem we tabu spirit i kamdaon long ol disaepol long Pentekos 33 mo i gohed kasem 36 K.T. Tufala toktok ya oli go stret long ol man Jiu, ol man blong narafala laen we oli joen blong wosip wetem ol man Isrel mo ol man Sameria. Be, namba tri toktok i go long ol man blong narafala kantri we hemia ol man we oli no man Isrel mo we oli no sakomsaes. Toktok ya i stat goaot long yia 36 K.T., taem Konilias we i ami blong ol man Rom, i kam Kristin, mo toktok ya i stap go long ol man yet kasem taem blong yumi.
23:15—?From wanem wan proselaet no wan man we i jenisim skul blong hem blong folem bilif blong ol Farisi, i kam wan ‘man we i blong go long [“Gehena,” NW] mo i mowas olgeta’ i winim ol Farisi? Maet samfala we oli jenisim skul blong olgeta blong folem bilif blong ol Farisi oli ol man we bifo oli mekem sam bigfala sin. Be, taem oli joen long bilif blong ol Farisi, oli kam mowas i bitim ol tija blong olgeta. Taswe, oli kam ‘man we i blong go long Gehena,’ i mowas i bitim ol Farisi we oli man Jiu.
27:3-5—?Wanem samting i soem se Judas i no rili sore from wanem we hem i mekem? I no gat wan pruf nating we i soem se Judas i rili tanem tingting blong hem. Bitim we hem i askem long God blong i fogivim hem, hem i girap i talemaot ol mastik blong hem long ol jif pris mo ol elda blong ol man Jiu. From we Judas i mekem wan “sin we i blong ded,” tingting blong hem i foldaon bigwan. (1 Jon 5:16) Fasin blong hem blong no rili sore from sin blong hem, i mekem hem i kasem trabol.
Ol Lesen Blong Yumi:
21:28-31. Jeova i glad taem yumi mekem samting we hem i wantem. Eksampol, yumi mas gat strong tingting blong talemaot Kingdom blong hem mo pulum ol man oli kam disaepol.—Mat. 24:14; 28:19, 20.
22:37-39. !Long sot tok nomo, tufala bigfala loa ya i soemaot wanem we God i wantem olgeta we oli wosip long hem oli mekem!
[Tok blong pija long pej 31]
?Yu yu gohed strong long wok blong karem kakae long garen?
[Credit Line]
© 2003 BiblePlaces.com
[Tok blong pija long pej 31]
Samting we Matiu i tokbaot plante, hemia Kingdom