“Olgeta We Oli Stret Blong Kasem Laef” Oli Obei Long Gud Nius

“Olgeta we oli stret blong kasem laef blong olwe, oli bilif.”—WOK 13:48, NW.

1, 2. ?Taem ol faswan Kristin oli harem profet tok we Jisas i talemaot se gud nius i mas go long olgeta ples blong wol, oli mekem wanem?

BUK blong Ol Wok long Baebol i karem nambawan stori blong ol faswan Kristin. Olgeta ya oli harem profet tok blong Jisas se bambae gud nius blong Kingdom i mas goaot long olgeta ples blong wol, nao oli tekem aksen. (Mat. 24:14) Oli gat strong tingting blong prij, mo oli givim nambawan eksampol long ol man we oli kam biaen long olgeta. Long Jerusalem, ol disaepol blong Jisas oli wok strong blong talemaot gud nius, ale plante taosen man, wetem “plante pris” tu, oli joen long faswan Kristin kongregesen.—Wok 2:41; 4:4; 6:7.

² Ol faswan misinari oli givhan long plante moa man blong oli joen long Kristin skul. Wan long ol misinari ya, Filip, hem i go long Sameria. Long ples ya plante man oli lesin long gud nius we hem i talemaot. (Wok 8:5-8) Pol i wokbaot i go long plante ples wetem ol defdefren fren blong hem. Oli talemaot Jisas Kraes long ol ples olsem Saepras, sam ples long Esia Maena, Masedonia, Gris, mo Itali. Long ol taon we Pol i prij long olgeta, fulap Jiu mo fulap man Gris oli bilif. (Wok 14:1; 16:5; 17:4) Taetas i prij long Krit. (Taet. 1:5) Pita i stap bisi long wok ya long Babilon. Taem hem i raetem faswan leta blong hem samwe long ol yia 62 kasem 64, ol man oli savegud wok blong prij blong ol Kristin long ol ples olsem Pontas, Galesia, Kapadosia, Esia, mo Bitinia. (1 Pita 1:1; 5:13) !Tru ya, hemia ol nambawan taem ya! Ol Kristin long faswan handred yia oli strong blong mekem wok blong prij, taswe ol enemi blong olgeta oli talem se oli “stap mekem tumas trabol long olgeta ples.”—Wok 17:6; 28:22.

3. ?Wanem frut i stap kamaot tede from wok blong ol man blong talemaot Kingdom? ?Wanem filing blong yu long saed ya?

³ Long taem blong yumi tu, Kristin kongregesen i stap gru i kam bigwan moa oltaem. ?Yu yu haremgud evri yia taem yu ridim ripot long wok blong ol Witnes blong Jeova blong ful yia ya, mo taem yu luk ol nambawan frut we i stap kamaot long olgeta ples blong wol? ?Yu yu glad blong save se ol man blong talemaot Kingdom oli bin mekem bitim sikis milian Baebol stadi long tiokratik yia blong 2007? Mo tu, las yia, i gat samwe long ten milian man we oli kam joen long Memoriol blong ded blong Jisas Kraes. Ol man ya oli no ol Witnes blong Jeova, be from we oli intres long gud nius, oli kam long impoten miting ya. Samting ya i soemaot se i gat plante wok yet we yumi mas mekem.

4. ?Hu olgeta we oli stap bilif long gud nius blong Kingdom?

⁴ Olsem long faswan handred yia, tede tu “olgeta we oli stret blong kasem laef blong olwe” oli stap bilif long trutok. (Wok 13:48, NW) Jeova i stap pulum ol man ya oli kam insaed long ogenaesesen blong hem. (Ridim Hagae 2:7.) ?Wanem tingting we yumi mas gat oltaem long saed blong Kristin wok blong prij, blong yumi save joengud tugeta blong mekem wok ya blong hivimap ol man?

 Prij Long Enikaen Man

5. ?Jeova i glad long wanem kaen man?

⁵ Ol faswan Kristin oli kasem save se “God i stap mekem i sem mak nomo long olgeta man,” mo se, “sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Wok 10:34, 35) Blong frengud wetem Jeova, wan man i mas bilif long ransom sakrefaes blong Jisas. (Jon 3:16, 36) Jeova i “wantem sevem olgeta man, mo i wantem we olgeta man bambae oli save trutok blong hem.”—1 Tim. 2:3, 4.

6. ?Ol man blong talemaot Kingdom oli no mas mekem wanem? ?From wanem?

⁶ I no stret we ol man blong talemaot gud nius oli jajem ol narafala from kala blong skin, from haenem no from we oli man nating, from oli luk naes no nogat, from skul blong olgeta, no from wan narafala samting bakegen. Tingbaot: ?Yu yu glad se faswan man we i bin toktok long yu long saed blong ol trutok blong Baebol i no jajem yu from wan samting olsem? Taswe, yu tu, yu mas talemaot tok we i save sevem laef blong man, i go long enikaen man we i glad blong lesin.—Ridim Matiu 7:12.

7. ?From wanem yumi no mas jajem ol man we yumi prij long olgeta?

⁷ Jeova i putumap Jisas olsem Jaj, taswe, yumi no gat raet blong jajem wan man. I stret olsem, from we yumi defren long Jisas. Yumi jajem man from ‘ol samting ya nomo we yumi save luk long ae blong yumi,’ no from ‘ol samting ya nomo we ol man oli stap talem long yumi.’ Be Jisas i save luk ol tingting blong man we oli haed mo ol samting we i stap long hat blong man.—Aes. 11:1-5; 2 Tim. 4:1.

8, 9. (a) ?Bifo we Sol i kam wan Kristin, hem i wanem kaen man? (b) ?Stori blong aposol Pol i tijim yumi long wanem samting?

⁸ Ol man we oli gat ol defren kaen fasin blong laef bifo, oli bin kam ol man blong Jeova. Wan man we i mas mekem plante bigfala jenis long laef blong hem, hemia Sol blong Tasas, we biaen i kam aposol Pol. Fastaem, Sol i wan Farisi we i agensem bigwan ol Kristin. Hem i bilif strong se ol Kristin oli rong, mo tingting ya i pulum hem blong mekem i nogud long Kristin kongregesen. (Gal. 1:13) Long tingting blong ol man, ating Sol i laswan man we i save kam wan Kristin. Be Jisas i luk se i gat wan gudfala samting long hat blong Sol, ale hem i jusum Sol blong mekem wan spesel wok. From samting ya, Sol i kam wan memba blong Kristin kongregesen long faswan handred yia, mo i wok had mo prij strong bitim ol narafala.

⁹ ?Stori blong aposol Pol i tijim yumi long wanem samting? Long ples blong yumi, maet i gat sam grup we oli agensem tok we yumi stap talemaot. Maet yumi ting se neva wan long olgeta i save kam wan trufala Kristin. Be yumi no mas kam slak long ol traehad blong yumi blong toktok wetem olgeta. Sam long olgeta we yumi ting se bambae oli neva lesin, oli save bilif long gud nius. Wok blong yumi i blong gohed blong prij long olgeta man, “we yumi no kam slak.”—Ridim Ol Wok 5:42, NW.

Olgeta ‘We Oli No Kam Slak’ Blong Prij, Bambae Oli Kasem Blesing

10. ?From wanem yumi no mas fraet blong prij long ol man we fasin blong olgeta i nogud? Talem stori blong samfala long ples blong yu.

¹⁰ Sipos yumi jajem wan man from lukluk blong hem, yumi save kasem rong tingting long saed blong man ya. Wan man we nem blong hem Ignacio, * hem i stat blong stadi Baebol wetem ol Witnes blong Jeova taem hem i stap long prisen long wan kantri long Saot Amerika. Ol narafala oli fraet long Ignacio from we hem i wan raf man. Taswe ol prisena we oli wokem sam samting blong salem long ol narafala prisena, oli sanem Ignacio i go luk olgeta we oli gat kaon from olting ya, blong hem i karem mane blong olgeta. Be taem Ignacio i gohed blong stadi Baebol mo i folem ol samting we hem i lanem, hem i lego raf fasin mo hem i kam wan man we i kaen we i kaen. Naoia ol narafala oli no moa sanem hem blong go karem mane long ol man we oli gat kaon long olgeta. Ignacio i glad we trutok blong Baebol wetem spirit blong God i halpem hem blong jenisim fasin blong hem. Hem i glad tu se ol man we oli talemaot Kingdom long hem oli no jajem hem from fasin blong hem, be oli traehad blong stadi wetem hem.

11. ?From wanem yumi stap gobak plante taem blong prij long ol man?

¹¹ Wan risen from wanem yumi gobak plante taem blong talemaot gud nius long ol man, hemia from we ol samting long laef blong olgeta mo tingting blong olgeta i save jenis. Afta we yumi bin luk olgeta lastaem, ating oli kasem wan strong sik, no  oli lusum wok blong olgeta, no wan famle no fren blong olgeta i ded. (Ridim Prija 9:11.) Ol samting we i stap hapen long wol tu i save mekem man i tingting dip long fiuja. Ol jenis ya oli save mekem se man we i no intres no i agensem yumi, i save lesin nekis taem we yumi prij long hem. Taswe yumi mas tekem evri janis blong talemaot gud nius long olgeta man.

12. ?Wanem tingting we yumi mas gat long saed blong ol man we yumi prij long olgeta? ?From wanem?

¹² Yumi ol sinman, yumi gat fasin ya blong jajem man kwiktaem mo blong putum ol man long ol defren grup folem kaen blong olgeta. Be Jeova i stap lukluk ol man wanwan. Hem i luk ol gudfala fasin blong wanwan man mo samting we oli naf blong mekem. (Ridim 1 Samuel 16:7.) Long wok blong prij, yumi mas traehad blong folem fasin ya blong Jeova. Plante taem yumi harem stori blong ol gudfala frut we i kamaot taem yumi gat gudfala tingting long saed blong ol man we yumi prij long olgeta.

13, 14. (a) ?From wanem wan paenia i gat nogud tingting long saed blong wan woman we hem i mitim long wok blong prij? (b) ?Stori ya i tijim yumi long wanem samting?

¹³ Sandra i wan paenia long wan aelan long Karabin Si. Taem hem i stap prij, hem i mitim woman ya Ruth we hem i stap joen fulwan long ol lafet blong wol. Tu taem ol man oli putumap Ruth olsem kwin blong ol lafet long kantri blong hem. Nating se i olsem, Ruth i intres bigwan long wanem we Sandra i talem, ale Sandra i mekem plan blong stadi Baebol wetem hem. Sandra i storian se: “Taem mi go long haos blong Ruth, mi luk wan bigfala pija blong hem we i werem ol spesel klos blong lafet, wetem sam praes we hem i bin winim. Nao tingting blong mi i go nogud long saed blong hem. Mi mi ting se wan woman we ol man blong wol oli laekem hem tumas, mo we i joen fulwan long ol lafet blong wol, i no save intres long trutok. Ale mi no moa gobak blong luk hem bakegen.”

¹⁴ Taem i pas, nao wan dei Ruth i go long Haos Kingdom. Afta long miting hem i go luk Sandra, i askem long hem se, “?From wanem yu no moa kam blong stadi wetem mi?” Sandra i talem sore long hem mo i mekem plan blong stadi bakegen wetem hem. Ruth i gohed gud, hem i tekemaot ol pija blong ol lafet ya we oli hang long haos blong hem, i joen long ol wok blong kongregesen, mo i givim laef blong hem i go long Jeova. Yes, Sandra i luksave se faswan tingting we hem i gat long saed blong Ruth i rong olgeta.

15, 16. (a) ?Wanem frut i kamaot taem wan pablisa i prij long wan famle blong hem? (b) ?From wanem yumi no mas fraet blong prij long ol famle blong yumi we fasin blong laef blong olgeta i nogud?

¹⁵ Plante we oli bin prij long ol famle blong olgeta oli kasem gudfala frut, nating we fastaem oli bin ting se ol famle ya oli no save lesin. Tingbaot Kristin woman ya Joyce long Yunaeted Stet. Tawian blong hem i spenem plante taem long kalabus stat long taem we hem i yangfala nomo. Joyce i talem se: “From we tawian blong mi i salem drag, i stil, mo i mekem plante narafala nogud samting, ol man oli stap talem se laef blong hem i blong nating nomo. Nating we i luk olsem se bambae hem i neva jenis, mi gohed blong 37 yia blong talemaot ol trutok blong Baebol long hem.” Ol traehad we Joyce i mekem blong givhan long tawian blong hem wetem longfala tingting, oli karem bigfala blesing taem man ya i stat blong stadi Baebol wetem ol Witnes blong Jeova, mo i mekem ol bigfala jenis long laef blong hem. I no longtaem, man ya we i gat 50 yia blong hem i tekem baptaes long wan distrik asembli long California. Joyce i talem se: “Mi glad  we mi glad, we wota blong ae blong mi i ron. !Mi glad se mi neva kam slak blong traehad blong givhan long hem!”

¹⁶ Ating yu fraet blong toktok long famle blong yu long saed blong ol trutok blong Baebol, from we fasin blong laef blong olgeta i nogud. Be samting ya i no blokem Joyce blong toktok long tawian blong hem. Yumi no save wanem i stap long hat blong narafala man. Maet hem i rili stap traehad blong faenem trufala skul. Taswe, yumi no mas fraet blong givim janis long evri man blong faenem trutok.—Ridim Ol Proveb 3:27.

Wan Gudfala Buk Blong Halpem Ol Man Blong Stadi Baebol

17, 18. (a) ?Ol ripot long olgeta ples blong wol oli soemaot wanem long saed blong buk ya ?Wanem Samting We Baebol i Rili Tijim? (b) Talem sam gudfala samting we oli bin hapen long yu taem yu yusum buk ya.

¹⁷ Ol ripot we oli kam long plante kantri blong wol oli soemaot se ol man we oli rili wantem save trutok oli laekem tumas buk ya ?Wanem Samting We Baebol i Rili Tijim? we i blong halpem olgeta blong stadi Baebol. Wan paenia long Yunaeted Stet, nem blong hem Penni, i yusum buk ya blong statem plante Baebol stadi. Tu long ol stadi ya, hem i statem wetem tufala olfala we tufala i strong long jos blong tufala. Penni i no save se bambae tufala i tingting olsem wanem long saed blong ol trutok blong Baebol we oli lanem long buk ya Baebol Tijim. Nating se i olsem, hem i talem se: “From we ol tok long buk ya i klia, i sot, mo i isi blong kasem save long hem, oli luksave kwiktaem se oli stap lanem trutok, oli no rao mo harem nogud from.”

¹⁸ Woman ya Pat we hem i wan pablisa long Inglan, hem i stat blong stadi Baebol wetem wan woman we hem i ronwe long kantri blong hem long Esia blong kam stap long Inglan. Woman ya i ronwe long kantri blong hem taem ol soldia blong ol rebel grup oli karem hasban blong hem mo ol boe blong hem oli gowe, mo hem i neva luk olgeta bakegen. Oli talem long woman ya tu se bambae oli kilim hem i ded. Oli bonem haos blong hem, mo sam long olgeta oli repem hem. Ol trabol ya i mekem hem i harem se laef blong hem i blong nating nomo, mo plante taem hem i ting se i moagud we i kilim hem wan i ded. Be stadi blong Baebol i leftemap tingting blong hem. Pat i talem se: “Ol isi tok we buk ya Baebol Tijim i yusum blong eksplenem ol samting, wetem ol pija tu, oli gat bigfala paoa long tingting blong woman ya.” Hem i gohed gud, i kam wan pablisa we i no baptaes, mo i talem se hem i wantem tumas blong tekem baptaes long nekis asembli. !Yumi kasem bigfala glad taem yumi givhan long ol man we oli rili wantem save trutok, blong oli kasem save mo gat tangkiu from ol nambawan promes long Baebol!

“No Kam Slak Blong Mekem Ol Gudfala Fasin”

19. ?From wanem wok blong prij i impoten tumas naoia?

¹⁹ Evri dei, wok ya blong prij mo blong pulum ol man oli kam disaepol i kam moa impoten, mo taem we yumi gat blong mekem wok ya i kam sot moa. Evri yia, plante taosen man we oli wantem kasem stret save long saed blong God oli tekem aksen folem samting we yumi talemaot long olgeta long wok blong prij. Be i gat sam we oli stap yet long tudak long saed blong God mo ol plan blong hem, mo “oli stap go blong kasem ded nomo,” from we ‘bigfala Dei ya blong Jeova i kam klosap finis.’—Sef. 1:14; Prov. 24:11.

20. ?Yumi evriwan i mas gat strong tingting blong mekem wanem?

²⁰ I gat rod yet blong halpem ol man ya. Be blong mekem olsem, yumi mas folem fasin blong ol Kristin long faswan handred yia, we oli gohed nomo blong “tijim ol man, mo oli stap talemaot gud nius ya blong Jisas” we oli no kam slak nating. (Wok 5:42) !Yu save folem eksampol blong olgeta sipos yu gohed nomo nating se yu kasem trabol, mo yu traehad blong ‘gat gudhan blong tij,’ mo yu prij long enikaen man! Yumi ‘no mas kam slak blong mekem ol gudfala fasin.’ Sipos yumi gohed nomo, bambae yumi kasem fulap nambawan blesing we oli soemaot se God i glad long yumi.—2 Tim. 4:2; ridim Galesia 6:9.

[Futnot]

?Bambae Yu Yu Ansa Olsem Wanem?

• ?Hu olgeta we oli stap bilif long gud nius?

• ?From wanem yumi no mas jajem ol man we yumi stap prij long olgeta?

• ?Wanem ol gudfala frut we i stap kamaot taem yumi yusum buk ya ?Wanem Samting We Baebol i Rili Tijim?

[Kwestin]

[Tok blong pija long pej 17]

Plante taosen man we oli rili wantem save God oli stap bilif long trutok

[Tok blong pija long pej 19]

?Ol jenis we aposol Pol i mekem oli tijim yumi long wanem samting?