?Wanem Ya Kingdom Blong God?

?WANEM stamba tok blong Jisas taem hem i stap prij? Folem tok blong Jisas hem wan, hem i talem we stamba tok ya hemia Kingdom blong God. (Luk 4:43) I sua se ol man we oli stap lesin long hem taem hem i stap toktok, oli harem plante save long saed blong Kingdom ya. ?Olsem wanem? ?Ol man ya oli no kasem save long ol tok blong Jisas? ?Oli bin askem se wanem ya Kingdom? Nogat. Ol Gospel oli no tokbaot ol kwestin ya. Taswe, ?yu ting se ol man ya oli gat sam save long saed blong Kingdom ya?

I klia se, buk we ol man Jiu bifo oli respektem olsem tabu buk blong olgeta, i tokbaot Kingdom ya long fasin we i klia nomo mo wetem ol tok we i isi blong kasem save se Kingdom ya i wanem mo wanem ol samting we Kingdom ya bambae i mekem. Tede, yumi save lanem moa long saed blong Kingdom ya tru long Tok blong God, sem mak olsem ol man Jiu bifo. Bambae yumi tokbaot seven trutok long saed blong Kingdom we Baebol i tijim long yumi. Ol faswan trifala trutok ya, hemia ol trutok we ol man Jiu long taem blong Jisas mo bifo long taem blong Jisas oli save finis. Narafala trifala trutok, hemia ol trutok we Kraes mo ol aposol blong hem oli talemaot long ol faswan handred yia. Laswan trutok i kamaot klia long taem blong yumi.

1. Kingdom blong God i wan trufala gavman, wan gavman we bambae i stap blong olwe. Faswan profet tok blong Baebol i talemaot se God bambae i sanem wan man blong sevem ol man we oli stap tru long hem. Man ya we Baebol i kolem “sid,” bambae i finisim olgeta problem mo trabol we oli kamaot from fasin rebel blong Adam, Iv mo Setan. (Jenesis 3:15, NW) Biaen, King Deved we i wan man blong bilif i tokbaot wan nambawan samting long saed blong “sid” ya, no Mesaea. Jisas bambae i king long Kingdom ya. Gavman ya bambae i defren long ol narafala gavman. Bambae hem i stap gogo i no save finis.—2 Samuel 7:12-14.

2. Kingdom blong God bambae i finisim olgeta gavman blong man. Profet Daniel i luk wan vison, mo long vison ya hem i luk ol gavman blong wol we wan i stanap mo biaen i foldaon mo narawan i tekem ples blong hem mo biaen i foldaon mo i gohed olsem gogo kasem taem blong yumi. Makem bigfala samting long vison ya we i pulumgud tingting blong yumi: “Long taem blong ol king ya, God ya we i stap long heven bambae i stanemap wan king [“Kingdom,” NW] we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.” Olgeta kingdom blong wol ya—wetem ol wo blong olgeta, fasin blong olgeta blong mekem i strong tumas long narafala mo kruked fasin blong olgeta—bambae oli lus olgeta mo blong olwe. Profet tok blong Daniel i soem se Kingdom blong God bambae i rul antap long wol ya i no longtaem.  (Daniel 2:44, 45) Kingdom ya i wan trufala samting, mo tu, bambae Kingdom ya i stap olsem wan gavman ya nomo we bambae i rulum wol ya. *

3. Kingdom blong God bambae i finisim ol wo, sik, hanggri mo ded tu. Ol nambawan profet tok blong Baebol oli talemaot samting we Kingdom blong God bambae i mekem long wol ya. Gavman ya bambae i mekem ol samting we gavman blong man tede i neva mekem mo i no we i naf tu blong mekem. !Tingbaot! !Kingdom ya bambae i spolem olgeta tul blong faet blong olwe! “Hem i stap mekem ol faet i finis long olgeta ples long wol.” (Ol Sam 46:9) Bambae i no moa gat dokta, hospital mo ol kaen sik. “I no moa gat man olbaot long kantri ya we i save talem se hem i sik.” (Aesea 33:24) Bambae i no moa gat hanggri mo kakae i sot. “Bambae i gat plante kakae long ples ya.” (Ol Sam 72:16) Bambae i no moa gat dedman blong berem, fasin blong wekap fulnaet wetem dedbodi, beregraon, haos blong ded mo soasore we man i gat taem ol samting olsem oli hapen. Ded we i wan enemi blong yumi bambae i finis olgeta. God ‘bambae i mekem we ded bambae i go lus olgeta. Bambae hem i ravemaot wota blong ae long fes blong olgeta man.’—Aesea 25:8.

4. Kingdom blong God i gat wan King we God i jusumaot. Mesaea i no jusum hem wan blong kam King long Kingdom ya mo i no ol sinman tu we oli jusum hem. Jeova God hem wan i jusumaot hem. Taetel ya Mesaea mo Kraes i soemaot samting ya. Tufala taetel ya i minim “Man we God i Jusumaot.” Taswe, Jeova i jusumaot mo i makemaot King ya blong mekem wan spesel wok. God i tokbaot hem se: “!Yufala i luk! Hemia man blong wok blong mi, we mi mi stap mekem hem i strong. Mi mi jusumaot hem, mo mi mi glad tumas long hem. Mi mi mekem we Spirit blong mi i kam fulap finis long hem, mo hem bambae i soemaot stret fasin blong mi blong jajem man, long ol man blong ol narafala kantri.” (Aesea 42:1; Matiu 12:17, 18) Man we i Wokem yumi i savegud i bitim yumi se wanem rula nao we yumi ol man yumi nidim.

5. King blong Kingdom blong God i soemaot klia long ol man se hem i naf blong holem wok ya. Jisas blong Nasaret i pruvum se hem i Mesaea we ol profet tok oli tokbaot. Hem i bon long laen blong famle we God i bin jusum. (Jenesis 22:18; 1 Kronikel 17:11; Matiu 1:1) Taem Jisas i stap long wol, hem i mekem samting we i sem mak nomo olsem ol profet tok oli bin talem long saed blong Mesaea plante handred yia bifo finis. Olgeta long heven tu oli luksave se hem i Mesaea. ?Olsem wanem oli save samting ya? God i tok long heven i kamdaon, i talemaot se Jisas i Pikinini blong Hem; ol enjel oli talemaot se Jisas i Mesaea; mo Jisas i mekem ol merikel. Plante taem, hem i mekem ol merikel long fored blong plante handred man. Ol merikel ya oli soemaot klia se paoa blong God i stap long Jisas. * Jisas i soemaot bakegen mo bakegen se bambae hem i wanem kaen Rula. Jisas i no jes gat paoa nomo blong halpem ol man, be hem i wantem tu blong mekem olsem. (Matiu 8:1-3) Hem i no tingbaot hem wan nomo, hem i gat sore, hem i no fraet mo hem i gat tingting daon. Stori long saed blong laef blong Jisas taem hem i stap long wol ya i stap long Baebol blong yumi evriwan i save ridim.

6. I gat 144,000 man we bambae oli rul wetem Kraes long Kingdom blong God. Jisas i talem se ol narafala man wetem ol aposol blong hem tu bambae oli rul wetem hem long heven. Hem i kolem grup ya se “smol kampani.” (Luk 12:32, NW) Biaen, aposol Jon i talem se namba blong smol kampani ya evriwan hem i 144,000. Olgeta ya bambae oli gat wan nambawan wok long heven hemia blong rul olsem ol king mo wok olsem ol pris wetem Kraes.—Revelesen 5:9, 10; 14:1, 3.

7. Kingdom blong God i stap rul long heven naoia. Hem i rere blong rul antap long fulwol. Laswan trutok ya i wan long ol nambawan samting we yumi save lanem. Baebol i givim plante pruf se Jisas i kasem raet blong hem blong King long heven. Hem i stap rul long heven naoia mo i no longtaem bambae hem i rul antap long wol ya mo bambae hem i mekem ol nambawan profet tok ya we yumi tokbaot finis oli kamtru. ?Be olsem wanem yumi save sua se Kingdom blong God i stap rul naoia? ?Mo wetaem bambae Kingdom ya i rul antap long wol ya?

[Ol futnot]