?Wetaem Bambae Kingdom Blong God i Kam?

“MASTA ?I stret taem nao blong yu mekem we ol laen blong Isrel oli gat king blong olgeta bakegen, no i no taem blong hem yet?” (Ol Wok 1:6) Ol aposol oli wantem tumas blong save wetaem Jisas bambae i stanemap Kingdom blong hem. Tede, 2,000 yia i pas nao, plante man oli wantem yet blong save se: ?Wetaem bambae Kingdom blong God i kam?

Maet yu stap tingbaot se Jisas i mas tokbaot kwestin ya from we Kingdom blong God nao i bigfala samting we hem i talemaot. !Yes, hem i bin tokbaot kwestin ya! Hem i toktok plante long saed blong wan longfala taem we i gat stat mo en blong hem mo we hem i kolem se, taem we hem i “stap.” (Matiu 24:37, NW) Taem ya we hem i “stap,” i joen wetem taem ya we Kingdom blong Mesaea i stanap. ?Wanem taem ya we Jisas i “stap”? I gud yumi luk fo trutok we Baebol i talem long saed blong taem ya we Kraes i “stap.”

1. Taem ya we Kraes i “stap,” i stat longtaem afta we hem i ded. Jisas i talem wan pijatok mo long pijatok ya hem i talem se hem i olsem wan man we i “go long wan narafala kantri longwe, blong kasem paoa blong kam king.” (Luk 19:12, Nyutesteman wetem Ol Sam long Bislama) ?Olsem wanem pijatok ya, we i olsem wan profet tok, i kamtru? Jisas i ded mo i laef bakegen. Biaen hem i go long wan “narafala kantri longwe,” we hemia heven. Olsem Jisas i talem long wan narafala pijatok we i sem mak, se taem ya we hem i kambak wetem paoa blong king bambae i kamtru afta we “plante yia i pas.”—Matiu 25:19.

Sam yia afta we Jisas i gobak long heven, aposol Pol i raetem se: “Kraes i letem laef blong hem blong i tekemaot sin blong ol man. Mo fasin ya we hem i mekem, we hem i ded wan taem nomo, hemia i naf blong tekemaot sin blong ol man, gogo i no save finis. Nao biaen, hem i go sidaon long raet saed blong God, mo i stap wet long ples ya, gogo God bambae i mekem ol enemi blong hem oli stap aninit long paoa blong hem, oli slef blong hem.” (Hibrus 10:12, 13) Taswe, taem Jisas i kasem heven, hem i mas wet longtaem bakegen. Hem i wet gogo kasem we Jeova God i mekem hem i King long Kingdom blong Mesaea we Hem i bin promes longtaem finis blong mekem. Hemia nao stat blong taem ya we Jisas i kolem se, taem ya we hem i “stap.” ?Olsem wanem? ?Ol man long wol bambae oli luk impoten samting ya?

2. Taem ya we Jisas i “stap,” hem i no wan samting we ol man oli save luk wetem prapa ae blong olgeta. Rimemba se Jisas i tokbaot saen blong taem we hem i stap. (Matiu 24:3, NW) ?Sipos ol man oli save luk wetem prapa ae blong olgeta se Jisas i stap, yu ting se oli nidim blong luk wan saen? Traem tingbaot se yu stap ron long trak blong go long solwota. Long rod, maet yu luk ol saen we oli soemaot long yu rod we yu mas folem blong kasem solwota. Be taem yu kasem sanbij, nao yu luk bigfala solwota ya we i stap long fored blong yu, ?olsem wanem? ?Bambae yu nidim yet wan bigfala saen we i soem long yu se hemia nao solwota? !No, nogat! Yu no nidim wan saen blong soem wan samting long yu we yu save luk klia nomo wetem prapa ae blong yu.

Taem Jisas i tokbaot saen blong taem we hem i “stap,” hemia i no blong soemaot wan samting we ol man bambae oli save luk wetem prapa ae blong olgeta. Nogat. Saen we Jisas i talem i blong givhan long ol man blong oli luksave samting we bambae i hapen long heven. Taswe Jisas i talem se: “Fasin we God i stap kam King blong ol man blong hem, hem i no wan samting we ol man oli save luk long ae blong olgeta.” (Luk 17:20) ?Be, olsem wanem saen ya i soemaot long ol man long wol se Jisas i “stap”?

3. Ol bigfala trabol we oli hapen long wol oli soemaot se Jisas i “stap.” Jisas i talem se ol wo, kakae i sot, graon i seksek, ol strong sik mo ol  fasin nogud long wol ya bambae oli makem taem ya we hem i stap olsem King long heven. (Matiu 24:7-12; Luk 21:10, 11) ?From wanem bambae i gat plante trabol olsem? Baebol i eksplenem se Setan we i stap “rulum wol ya,” i kros tumas from we hem i save se, naoia we Kraes i stap olsem King, hem i gat smol taem nomo i stap yet. (Jon 12:31; Revelesen 12:9, 12) Long taem blong yumi, yumi luk klia plante samting we i pruvum se Setan i kros tumas mo we Kraes i “stap” finis. Speseli stat long 1914, ol pruf we oli soemaot samting ya oli klia moa i bitim olgeta yia bifo mo oli hapen long fulwol. Ol man blong histri tu oli luksave se 1914 i wan yia we i gat bigfala jenis i hapen long wol.

I luk olsem we ol samting we yumi tokbaot oli ol nogud nius, be i no olsem. Ol samting ya oli minim nomo se Kingdom blong Mesaea i stap rul naoia long heven. I no longtaem, gavman ya bambae i rul antap long wol ya. ?Olsem wanem ol man oli save kasem save long saed blong Kingdom ya blong oli save agri long rul blong hem mo stap aninit long hem?

4. Wok blong prij long fulwol i wan klia pruf se Jisas i “stap.” Jisas i talem se taem we hem i “stap” bambae i olsem “taem blong Noa.” * (Matiu 24:37-39) Noa i no jes man blong bildim bigfala sip nomo be hem i wan “prija we i stap talemaot stret fasin” tu. (2 Pita 2:5) Noa i givim woning long ol man se i no longtaem nao God bambae i mekem jajmen blong hem i kamtru long ol man long taem ya. Jisas i talem se, naoia we hem i “stap,” ol man blong hem long wol ya bambae oli mekem sem mak olsem Noa, bambae oli givim woning long ol man. Hem i talem profet tok ya se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae . . . [“en,” NW] i save kam.”—Matiu 24:14.

Olsem yumi luk long laswan haf, Kingdom blong God bambae i spolem olgeta gavman blong wol ya. Wok blong prij i givim woning long ol man se i no longtaem gavman ya blong heven bambae i tekem aksen. Wok ya i givim janis long ol man blong oli save sef long taem blong bigfala trabol we i stap kam mo blong oli save stap aninit long Kingdom ya. Bigfala kwestin hemia se: ?Bambae yu yu mekem wanem taem yu harem woning ya?

?Yu Yu Tingbaot Kingdom Blong God Olsem Wan Gudfala Nius Long Yu?

Mesej we Jisas i talemaot i wan nambawan hop. Taosen yia bifo, afta long rebelian we i kamaot long Iden, stamba tingting blong Jeova God hemia blong stanemap wan gavman we bambae i stretem bisnes ya. Gavman ya bambae i mekem olgeta man we oli stap tru long God oli laef olwe long wan paradaes long wol olsem we Hem i bin tingbaot fastaem. !Yumi glad tumas blong save se gavman ya we God i bin promes long hem longtaem finis, hem i stap rul finis long heven naoia! !Hemia i no wan samting we i stap long tingting blong yumi nomo, be hem i wan trufala samting!

Naoia, King ya we God i makemaot i stap rul nating se ol enemi blong hem oli stap yet. (Ol Sam 110:2) Long wol ya we i fulap long trabol mo we i stap longwe long God, Mesaea i stap mekem ol samting we Papa blong hem i wantem oli kamtru, hemia blong lukaot olgeta man we oli wantem savegud God mo oli wantem wosipim hem wetem “spirit mo trutok.” (Jon 4:24, NW) Ol man blong ol defdefren laen, ol olfala mo ol yangfala, mo olgeta we oli blong defdefren kantri, oli gat hop ya blong laef foreva aninit long Kingdom blong God. (Ol Wok 10:34, 35) Mifala i askem strong long yu blong yu akseptem nambawan janis ya we yu kasem. !I gud yu stat naoia blong lanem se wanem ya Kingdom blong God, olsem nao bambae yu save haremgud blong laef aninit long stretfala rul ya foreva!—1 Jon 2:17.

[Futnot]