Yufala i Naf Blong Kasem Kingdom

“Fasin ya blong yufala i pruvum se God i jajem man long stret fasin, mo hem i luk we yufala i naf blong kasem kingdom blong God.”—2 TES. 1:5, NW.

1, 2. ?From wanem God bambae i jajem ol man, mo God bambae i yusum hu blong mekem jajmen ya?

RAONABAOT long yia 50 K.T., * aposol Pol i stap long taon ya Atens. Hem i harem nogud tumas blong luk we ol man long taon ya oli strong long wosip blong ol aedol. Samting ya i pulum hem blong prij long olgeta. Hem i givim wan nambawan tok long olgeta, mo las tok blong hem i pulum tingting blong plante long ol hiten man ya we oli stap lesin long hem. Hem i se: “Naoia [God] i stap talem long yumi evriwan long evri ples se, ‘Yufala evriwan i mas tanem tingting blong yufala from ol sin blong yufala.’ Hem i talem olsem, from we hem i putum dei finis we bambae hem i save jajem olgeta man long wol, mo bambae hem i mekem long fasin we i stret nomo. God i jusumaot finis man ya we bambae hem i yusum blong jajem olgeta man. Mo hem i soemaot finis long olgeta man we hem bambae i mekem olsem, from we hem i mekem man ya i laef bakegen finis.”—Wok 17:30, 31.

² !Yes, God i jusum wan dei finis blong hem i jajem ol man! Yumi mas tinghevi long samting ya. Taem Pol i stap toktok long ol man Atens, hem i no talemaot nem blong man ya we bambae God i yusum blong mekem jajmen ya. Be yumi save se hemia Jisas Kraes we God i mekem hem i laef bakegen long ded. Jajmen we Jisas bambae i mekem i save givim laef no i save givim ded long man.

3. ?From wanem Jeova i mekem wan kontrak wetem Ebraham, mo hu i gat wan impoten wok blong mekem tok blong kontrak ya i kamtru?

³ Dei blong Jajmen bambae i longwan olsem 1,000 yia. Jisas we i King long Kingdom blong God, bambae i lukaot long wok ya blong jajem ol man long nem blong Jeova. Be bambae hem i no mekem wok ya hem wan nomo. Jeova i jusum sam narafala man long wol ya blong oli go rul wetem Jisas mo jajem ol man long taosen yia rul ya we Baebol i talem se i olsem wan dei. (Skelem wetem Luk 22:29, 30.) Klosap 4,000 yia bifo finis, Jeova i stat rerem Dei blong Jajmen taem hem i mekem kontrak wetem Ebraham we i man blong wok blong hem. (Ridim Jenesis 22:17, 18.) Kontrak ya i stat long 1943 B.K.T. * Long taem ya, Ebraham i no rili gat fulwan save yet se kontrak ya bambae i mekem wanem samting stret long olgeta man. Be, tede, yumi luksave se folem kontrak ya, ol pikinini blong Ebraham, hemia sid blong hem, oli gat wan impoten wok blong mekem. Oli mas givhan blong mekem plan blong God blong jajem ol man i kamtru.

4, 5. (a) ?Hu ya stamba man long sid blong Ebraham, mo hem i talem wanem long saed blong Kingdom? (b) ?Wetaem God i openem rod blong ol man blong go long Kingdom?

⁴ Stamba man long sid blong Ebraham, hemia Jisas. Long 29 K.T., tabu spirit i makemaot Jisas mo hem i kam Mesaea no Kraes we ol profet tok oli bin tokbaot. (Gal. 3:16) Nao Jisas i spenem tri mo haf yia blong talemaot gud nius blong Kingdom long neson blong ol man Jiu. Afta we Jon Baptaes i go kalabus, Jisas i soem se i gat sam man we bambae oli go long Kingdom, i se: “Stat long taem blong Jon Baptaes, i kam kasem tede, ol man oli stap traehad blong kasem kingdom blong heven. Mo olgeta we oli gohed blong traehad bigwan, oli save kasem.”—Mat. 11:12, NW.

⁵ Samting we yumi intres long hem se, jes bifo we Jisas i tokbaot ol man we bambae oli ‘kasem’ Kingdom blong heven, hem i talem se: “Tru mi talem long yufala, long olgeta we i bon long wol ya, i no gat man we i hae moa, i winim Jon Baptaes. Be long olgeta we . . . [“oli go long kingdom long heven,” NW], man we i daon moa long olgeta, hem i  hae moa long Jon.” (Mat. 11:11) ?From wanem i olsem? From we, long taem ya, God i no openem rod yet long ol man we oli holemstrong long bilif, blong oli save go long Kingdom. Hem i openem rod ya taem hem i sanem tabu spirit i kamdaon long olgeta long Pentekos long yia 33 K.T. Be long taem ya Jon Baptaes i ded finis.—Wok 2:1-4.

God i Talemaot Se Sid Blong Ebraham i Stretgud

6, 7. (a) ?Olsem wanem sid blong Ebraham i kam “olsem ol sta long skae”? (b) ?Wanem blesing we Ebraham i kasem, mo wanem semfala blesing we sid blong hem i kasem?

⁶ God i talem long Ebraham se sid blong hem, no ol pikinini we oli kamaot biaen long hem, bambae oli plante mo bambae oli “olsem ol sta long skae” mo olsem sanbij daon long solwota. (Jen. 13:16; 22:17) Hemia i min se long taem ya we God i toktok long Ebraham, i no gat man i save se hamas man bambae oli mekemap sid ya blong Ebraham. Be, biaen, namba blong ol man we oli olsem sid blong Ebraham we bambae oli go rul long heven, i kam klia. Namba ya hemia 144,000. Olgeta ya nao oli joen wetem Jisas blong mekemap sid ya blong Ebraham.—Rev. 7:4; 14:1.

⁷ Baebol i tokbaot bilif blong Ebraham i se: “[Ebraham] i bilif strong long Hae God, mo from we hem i bilif olsem, Hae God i luk hem se hem i wan stret man long fes blong hem.” (Jen. 15:5, 6) I tru, i no gat wan man we i stret man fulwan. (Jem. 3:2) Nating se i olsem, from bilif blong Ebraham, Jeova i mekem i gud long hem olsem we hem i mekem i gud long wan stret man, mo i singaot Ebraham tu se i fren blong hem. (Aes. 41:8) Olgeta we oli olsem sid blong Ebraham we bambae oli go rul long heven, wetem Jisas tu, God i luk olgeta olsem stret man, mo samting ya i mekem we oli gat sam blesing we oli bigwan moa i bitim ol blesing we Ebraham i kasem.

8. ?Wanem blesing we olgeta we oli sid blong Ebraham oli gat janis blong kasem?

⁸ Ol Kristin we tabu spirit i makemaot olgeta, oli kam stret man long fes blong God from we oli bilif long ransom sakrefaes blong Jisas. (Rom 3:24, 28) Long lukluk blong Jeova, olgeta ya oli fri long sin blong olgeta, taswe tabu spirit i save makemaot olgeta oli kam ol spirit pikinini blong God, ol brata blong Jisas Kraes. (Jon 1:12, 13) Oli joen long wan niufala kontrak mo oli kam wan niufala neson we Baebol i kolem se “Isrel blong God.” (Gal. 6:16, NW; Luk 22:20) !Hemia wan bigfala ona long olgeta we oli kasem spesel blesing ya! From olgeta samting ya we God i mekem long ol Kristin ya we tabu spirit i makemaot olgeta, olgeta ya oli no stap tingbaot laef blong olwe long wol ya. Oli rere blong lego laef ya blong joen wetem Jisas long Dei blong Jajmen mo blong rul wetem hem long heven. Yes, hemia wan samting we oli wantem tumas mo we oli glad tumas long hem.—Ridim Rom 8:17.

9, 10. (a) ?Wetaem God i jusum ol faswan man we hem i makemaot olgeta wetem tabu spirit, mo olgeta ya oli gat janis blong kasem wanem nambawan blesing? (b) ?Wanem samting we God i givim blong halpem ol Kristin we tabu spirit i makemaot olgeta?

⁹ Ol man we oli hivap wanples long Pentekos 33 K.T., oli kasem janis blong joen long grup ya we bambae oli rul wetem Jisas long Dei blong Jajmen. Olgeta ya oli 120 disaepol blong Jisas we tabu spirit i makemaot olgeta, i olsem we oli baptaes long tabu spirit, nao oli kam ol faswan man we God i jusum. Be, hemia faswan step nomo. Afta we oli kasem tabu spirit finis, olgeta ya oli mas soemaot se oli stap tru long Jeova nomata wanem traem we Setan bambae i mekem agensem olgeta. Sipos oli wantem kasem praes blong laef long heven oli mas stap tru long God gogo kasem we oli ded.—Rev. 2:10.

¹⁰ Jeova i yusum Baebol mo Kristin kongregesen blong mekem se ol tabu Kristin oli kasem advaes mo toktok blong leftemap tingting blong olgeta mo blong mekem oli gohed strong. Olsem nao, aposol Pol i raetem leta i go long ol tabu Kristin long Tesalonaeka i se: “Yufala i savegud we mifala i mekem long yufala evriwan, stret olsem wan papa we i stap lukaot long ol pikinini blong hem. Mifala i stap leftemap tingting blong yufala, mo mifala i stap mekem yufala i harem gud, mo mifala i stap toktok long yufala, blong givhan long yufala blong yufala i save holem ol fasin we i stret long fes blong God. Hem i stap singaot yufala blong yufala i obei long hem we . . . [“hem i singaot yufala i go long kingdom blong hem,” NW], mo blong yufala i save kasem gudfala laef blong heven.”—1 Tes. 2:11, 12.

11. ?Wanem samting we Jeova i putum i stap long wan buk blong halpem olgeta we oli “Isrel blong God”?

 ¹¹ Long ol yia afta we tabu spirit i makemaot ol faswan memba ya blong kongregesen blong ol tabu Kristin, Jeova i luk se i stret blong raetemdaon ol wok we Jisas i mekem long wol wetem ol samting we hem i mekem mo ol advaes we hem i givim long ol tabu Kristin long faswan handred yia. Ale, Jeova i joenem Kristin Grik haf blong Baebol i go long Hibru haf blong Baebol we i stap finis. Hibru haf blong Baebol oli raetem fastaem i go long neson blong Isrel, we long taem ya oli stap mekem ol samting we God i glad long hem. Kristin Grik haf blong Baebol oli raetem fastaem i go long “Isrel blong God,” hemia olgeta we tabu spirit i makemaot olgeta blong oli kam ol brata blong Kraes mo ol pikinini blong God. Nating se i olsem, ol man we oli no man Isrel, olgeta tu oli save stadi long Hibru haf blong Baebol mo kasem save long plante samting we i givhan bigwan long laef blong olgeta. Long sem fasin, nating se yumi no Kristin we tabu spirit i jusum yumi blong go long heven, yumi save kasem plante blesing tu, taem yumi stadi mo mekem laef blong yumi i laenap wetem ol tok we oli stap long Kristin Grik haf blong Baebol.—Ridim 2 Timoti 3:15-17.

12. ?Pol i pulum ol Kristin we tabu spirit i makemaot olgeta blong tingbaot wanem?

¹² God i luk ol Kristin long faswan handred yia se oli stret man long fes blong hem, mo hem i makemaot olgeta wetem tabu spirit blong mekem we oli save kasem praes blong olgeta long heven. Taem God i makemaot olgeta wetem tabu spirit, hemia i no min se bifo we oli go long heven oli save kam king antap long ol narafala tabu Kristin brata mo sista blong olgeta long wol. Nogat. Be sore tumas, sam Kristin long faswan handred yia oli fogetem samting ya mo oli stat wantem kam hae moa long ol brata blong olgeta long kongregesen. Samting ya i pulum Pol blong talem long olgeta se: “Olgeta samting ya we yufala i wantem, ating yufala i kasem finis. Ating yufala i kam rijman finis. Ating yufala i kam haeman finis, olsem we yufala i king, be mifala no yet, mifala i stap daon. Man, sipos i tru we yufala i king, bambae mi mi glad tumas. Sipos i olsem, bambae mifala tu i king wetem yufala.” (1 Kor. 4:8) Taswe Pol i talem long ol tabu Kristin long taem blong hem se: “Mifala i no wantem mekem i strong long yufala, blong makem wanem tok i stret blong yufala i bilif long hem mo wanem i no stret, nogat. . . . Mifala i wantem wok wetem yufala, blong mekem yufala i harem gud moa.”—2 Kor. 1:24.

Grup i Kasem Fulnamba Blong Hem

13. ?Wok blong jusum olgeta we bambae oli go long heven, i gohed olsem wanem afta long yia 33 K.T.?

¹³ God i no jusum fulnamba blong ol 144,000 man, long ol Kristin blong faswan handred yia nomo. I tru hem i jusum plante long taem blong ol aposol, i luk olsem se afta long taem ya hem i gohed blong stap jusum man, be hem i jusum wanwan nomo. Nating se i olsem, wok ya blong jusum man i no stop, hem i gohed nomo kam kasem taem blong yumi. (Mat. 28:20) Afta we Jisas i stat rul long 1914, wok ya i gohed bigwan bakegen.

14, 15. ?Wanem i hapen long taem blong yumi long saed blong wok ya blong jusum olgeta we bambae oli go long heven?

¹⁴ Faswan samting we Jisas i mekem taem hem i kam king, hem i klinim heven i tekemaot evri samting we i agensem rul blong God. (Ridim Revelesen 12:10, 12.) Nao hem i stat lukluk long wok blong hivimap ol laswan memba blong Kingdom gavman blong hem, blong mekem se ol memba ya oli kasem 144,000 man evriwan. Afta long 1930, i luk olsem se wok ya blong hivimap olgeta we bambae oli go long heven klosap i finis, from we bighaf blong ol man we oli stap lesin long gud nius, oli no gat tingting ya se oli wantem go long heven. Yes, tabu spirit i no joen wetem tingting blong olgeta blong talemaot se oli pikinini blong God. (Skelem wetem Rom 8:16.) Defren nao, olgeta ya oli wantem laef olwe long wan paradaes long wol, mo samting ya i soemaot se olgeta ya oli “ol narafala sipsip.” (Jon 10:16) Taswe, afta long 1935, wok blong prij i jenis. Oli stat hivimap moa ol man blong “bigfala kampani” ya we aposol Jon i luk olgeta long wan vison, se bambae oli pastru long “bigfala trabol.”—Rev. 7:9, 10, 14, NW.

¹⁵ Nating se i olsem, stat long 1930 i kam kasem tede, God i gohed blong jusum sam man blong oli go long heven. ?From wanem? Samtaem hemia from we samfala we God i jusum olgeta maet oli lego bilif, nao i nidim narafala blong tekem  ples blong olgeta. (Skelem wetem Revelesen 3:16.) Long taem blong ol aposol tu i gat samfala olsem. Pol i tokbaot samfala we hem i save gud olgeta, be oli lego trutok. (Fil. 3:17-19) ?Jeova i jusum hu blong tekem ples blong olgeta ya? Hemia desisen blong hem. Be ating i stret blong talem se Jeova i no save jusum man we i niu long trutok. Jeova i jusum olgeta ya nomo we oli pruvum finis se oli stap tru long hem, olsem ol disaepol ya we Jisas i toktok long olgeta taem hem i stanemap lafet blong Memoriol wetem olgeta. *—Luk 22:28.

16. ?Long saed blong ol Kristin we tabu spirit i makemaot olgeta, yumi gat tangkiu from wanem, mo yumi save bilif fulwan long wanem?

¹⁶ Be, long olgeta we God i stap jusum, stat long 1930 i kam kasem naoia, i no olgeta evriwan we God i jusum blong tekem ples blong narafala we i lego bilif. I klia se Jeova i wantem meksua se bambae i gat sam Kristin we tabu spirit i makemaot olgeta, we oli stap wetem yumi yet long ol laswan dei blong wol ya gogo kasem taem we ‘Bigfala Babilon’ i lus. * (Rev. 17:5) Mo yumi save sua se namba blong ol 144,000 memba ya bambae i fulwan long stret taem we Jeova nomo i jusum, mo se olgeta evriwan bambae oli tekem stret ples blong olgeta long Kingdom gavman ya. Yumi save bilif fulwan se i gat wan bigfala kampani tu we bambae i stap tru long God. Maet sam long bigfala kampani ya bambae oli lego God, be profet tok i soemaot se neva fulwan grup ya bambae i lego God. I no longtaem bambae olgeta ya oli “pastru long bigfala trabol” we bambae i kasem wol blong Setan, mo bambae oli glad tumas blong go insaed long niufala wol blong God.

!Klosap Gavman Blong God i Fulwan Finis!

17. ?Folem ol tok blong 1 Tesalonaeka 4:15-17 mo Revelesen 6:9-11, wanem i hapen long ol Kristin we tabu spirit i makemaot olgeta mo oli holemstrong long bilif gogo kasem we oli ded?

¹⁷ Stat long 33 K.T. i kam, plante taosen Kristin we tabu spirit i makemaot olgeta, oli bin holemstrong long bilif mo oli bin stanap strong gogo kasem we oli ded. Olgeta ya we oli ded oli soemaot finis se oli naf blong kasem Kingdom, taswe i stat smoltaem nomo afta we Jisas i kam King, olgeta ya oli go long heven blong kasem praes blong olgeta—Ridim 1 Tesalonaeka 4:15-17; Revelesen 6:9-11.

18. (a) ?Ol Kristin we tabu spirit i makemaot olgeta mo we oli stap yet long wol, oli sua fulwan long wanem samting? (b) ?Ol narafala sipsip oli gat wanem tingting long saed blong ol Kristin brata blong olgeta we tabu spirit i makemaot olgeta?

¹⁸ Ol Kristin we tabu spirit i makemaot olgeta mo we oli stap yet long wol, oli sua fulwan se sipos oli no lego bilif, olgeta tu bambae oli kasem praes blong olgeta long heven. Plante milian narafala sipsip, taem oli luk bilif blong ol brata ya we tabu spirit i makemaot olgeta, oli agri wetem ol tok ya blong aposol Pol we i tokbaot ol Kristin long Tesalonaeka i se: “Mifala i stap talem tangkiu oltaem long God from yufala. I stret nomo blong mifala i mekem olsem from we bilif blong yufala i stap kam strong moa oltaem, mo fasin blong yufala blong lavlavem yufala i bigwan tumas mo i stap kam bigwan moa. From samting ya, mifala i tokbaot yufala long ol narafala kongregesen blong God. Yufala i stanap strong longtaem mo yufala i holem bilif nating se ol man oli kilim yufala mo nating se yufala i kasem plante trabol. Fasin ya blong yufala i pruvum se God i jajem man long stret fasin, mo hem i luk we yufala i naf blong kasem kingdom blong God, yes, from kingdom ya nao, yufala i stap safa.” (2 Tes. 1:3-5, NW) Yumi no save se wetaem laswan memba blong ol tabu Kristin ya long wol bambae i ded, be long taem ya nao bambae gavman blong God long heven i fulwan. !Hemia wan taem we olgeta long heven mo long wol bambae oli glad bigwan!

[Ol futnot]

?Yu Yu Save Eksplenem?

• ?Wanem samting we God i talem long Ebraham, we i joen wetem Dei blong Jajmen?

• ?From wanem God i luk Ebraham olsem wan stret man?

• ?Taem God i luk sid blong Ebraham se oli stret man, hemia i minim wanem?

• ?Olgeta Kristin oli sua long wanem samting?

[Kwestin]