Yufala i Naf Blong Kasem Wota Blong Laef

“Smol Sipsip ya . . . bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwota ya we i save givim laef.”—REV. 7:17.

1. ?Baebol i talem wanem narafala nem blong ol Kristin we tabu spirit i makemaot olgeta, mo Jisas i putum wanem wok long han blong olgeta?

TOK BLONG GOD i soemaot se ol Kristin we tabu spirit i makemaot olgeta we oli stap lukaot long ol wok blong Kraes long wol ya, oli “man blong wok we i gat hed,” we Baebol ya New World Translation i talem se oli “slef ya we i stret mo waes.” Long 1918, Kraes i kam jekemap wok blong “slef,” hemia ol Kristin long wol ya we tabu spirit i makemaot olgeta. Taem hem i mekem olsem, hem i faenem we olgeta ya oli stap givimaot “kakae long stret taem blong hem” mo oli mekem wok ya long fasin we i stret. Taswe, Masta Jisas i glad long olgeta mo i putumap olgeta blong oli “lukaot long olgeta samting blong hem.” (Ridim Matiu 24:45-47.) Hemia i min se ol Kristin ya we tabu spirit i makemaot olgeta, oli mekem wok blong givhan long ol narafala man blong Jeova long wol ya bifo we oli kasem praes blong olgeta long heven.

2. ?Wanem ya olgeta samting we oli blong Jisas?

² Wan masta i bos long olgeta samting blong hem, mo hem i save yusum ol samting ya olsem we hem i wantem. Ol samting long wol ya we oli joen wetem Kingdom, mo ol man tu we oli stap aninit long rul blong Kingdom ya, hemia nao ol samting we oli blong Jisas Kraes, King ya we Jeova i putumap. Long ol man ya i gat “bigfala kampani” ya we aposol Jon i luk long wan vison. Jon i tokbaot bigfala kampani ya i se: “Mi mi luk wan bigfala kampani blong man, we i no gat man i save kaontem olgeta. Ol man ya oli kamaot long olgeta neson, mo long olgeta laen, mo long olgeta kantri, mo long olgeta lanwis. Olgeta oli stap stanap long fes blong jea blong king, mo long fes blong Smol Sipsip, mo oli werem waet klos. Mo olgeta oli stap holem han blong pamtri long han blong olgeta.”—Rev. 7:9, NW.

3, 4. ?Wanem bigfala blesing we bigfala kampani i kasem?

³ Ol man blong bigfala kampani ya oli olgeta ya we Jisas i kolem se ol “narafala sipsip” blong hem. (Jon 10:16) Hop blong olgeta i blong laef olwe long paradaes long wol. Oli trastem Jisas se bambae hem i “lidim olgeta oli go dring long ol springwota ya we i save givim laef. Mo God bambae i ravemaot wota blong ae blong olgeta.” From nambawan hop ya, olgeta ya oli “wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet.” (Rev. 7:14, 17) Oli bilif long sakrefaes blong Jisas, mo from samting ya God i luk olgeta olsem we oli werem ‘waet klos.’ Oli stret man long fes blong God taswe oli save kam fren blong God, olsem Ebraham i fren blong God.

⁴ Bigfala kampani ya blong ol narafala sipsip i stap kam bigwan moa oltaem. God i luk ol man ya se oli stret man long fes blong hem, taswe oli gat janis ya blong laef tru long “bigfala trabol,” taem God bambae i spolem rabis wol blong naoia. (Jem. 2:23-26) Oli save kam klosap long Jeova, mo fulwan grup blong olgeta i save gat nambawan janis ya se God bambae i sevem olgeta long faet blong Amagedon. (Jem. 4:8; Rev. 7:15) Olgeta ya oli no gat tingting ya se oli wantem bos long prapa laef blong olgeta, be oli glad nomo blong letem King blong olgeta long heven mo ol tabu brata blong King ya long wol, oli lidim olgeta.

5. ?Olsem wanem bigfala kampani i givhan long ol brata blong Kraes we tabu spirit i makemaot olgeta?

⁵ Ol Kristin we tabu spirit i makemaot olgeta oli kasem plante trabol we wol ya blong Setan i mekem agensem olgeta, mo bambae oli stap kasem trabol yet. Nating se i olsem, oli glad we ol narafala fren blong olgeta long bigfala kampani ya oli stap  givhan long olgeta. Namba blong ol Kristin we tabu spirit i makemaot olgeta, i smol nomo naoia, be namba blong bigfala kampani i stap gru evri yia from we plante taosen man oli stap joen long olgeta. Ol Kristin we tabu spirit i makemaot olgeta, oli no save lukaot long evri Kristin kongregesen raon long wol, we naoia namba blong olgeta i samwe long 100,000 kongregesen. Taswe, wan rod we ol narafala sipsip oli stap givhan long ol brata we tabu spirit i makemaot olgeta, hemia taem sam man we oli nafgud long bigfala kampani oli tekem wok blong elda insaed long ol kongregesen. Ol elda ya oli givhan blong lukaotgud long plante milian Kristin we Kraes i putum olgeta long han blong “slef ya we i stret mo waes.”

6. ?Olsem wanem profet tok i bin talemaot finis se ol narafala sipsip bambae oli givhan long ol Kristin we tabu spirit i makemaot olgeta?

⁶ Profet Aesea i bin talemaot se ol narafala sipsip bambae oli glad blong givhan long ol Kristin we tabu spirit i makemaot olgeta. Aesea i raetem se: “Hemia tok we Jeova i talem: ‘Ol man blong wok long Ijip we oli no stap kasem pei, mo ol bisnesman blong Itiopia wetem ol man Seba we oli longlongfala man, olgeta ya bambae oli kam long yu, mo bambae oli kam man blong yu. Bambae oli wokbaot biaen long yu.’” (Aes. 45:14, NW) Tede ol Kristin we oli gat hop blong laef olwe long wol oli sapotem grup blong slef we tabu spirit i makemaot olgeta mo Hed kampani blong hem, oli letem grup ya i lidim olgeta, i olsem we oli stap wokbaot biaen long slef ya. Ol narafala sipsip oli ‘man blong wok we oli no kasem pei,’ from we oli wok wetem fulhat blong olgeta mo oli glad nomo blong yusum paoa mo olting blong olgeta blong joen long wok blong prij raon long wol. Hemia nao wok we Kraes i bin putum long han blong ol man blong hem long wol ya, we tabu spirit i makemaot olgeta.—Wok 1:8; Rev. 12:17.

7. ?Bigfala kampani i stap kasem wanem trening?

⁷ Taem ol man blong bigfala kampani oli stap wok wetem ol Kristin we tabu spirit i makemaot olgeta, oli stap kasem trening. Trening ya i rerem olgeta long wok we bambae oli mekem long niufala wol afta long Amagedon. Oli olsem fandesen blong niufala wol ya. Fandesen ya i mas strong, mo ol man blong hem oli mas rere mo oli mas naf tu blong folem ol samting we Masta i talem blong lidim olgeta. Evri Kristin oli gat janis naoia blong soemaot se oli nafgud blong bambae King Jisas Kraes i save yusum olgeta. Taem wan Kristin i gat bilif mo i stap tru long God, hem i soem se bambae hem i rere blong wok, taem King i givim wok long hem long niufala wol.

Bigfala Kampani i Soemaot Se i Gat Bilif

8, 9. ?Olsem wanem ol man long bigfala kampani oli stap soemaot se oli gat bilif?

⁸ Ol narafala sipsip we oli fren blong ol Kristin we tabu spirit i makemaot olgeta, oli soemaot bilif blong olgeta long defdefren rod. Fastaem, oli sapotem ol tabu Kristin ya taem oli talemaot gud nius blong Kingdom blong God. (Mat. 24:14; 28:19, 20) Seken samting, oli rere blong obei long Hed Kampani mo letem hem i lidim olgeta.—Hib. 13:17; ridim Sekaraea 8:23.

⁹ Namba tri samting, ol man blong bigfala kampani ya oli soem se oli sapotem ol tabu brata, taem oli mekem laef blong olgeta i laenap wetem ol stretfala rul blong Jeova. Oli traehad blong wokem ol fasin olsem ‘lav, glad, pis, oli mekem tingting blong olgeta i longfala, oli gat sore, fasin blong olgeta i gud nomo, mo i stret oltaem, oli kwaet man, mo oli save blokem samting we olgeta nomo i wantem.’ (Gal. 5:22, 23) Tede, ol man blong wol oli ting se i narakaen lelebet we wan man i gat ol fasin ya i bitim we hem i ronem ol ‘samting we tingting nomo i wantem.’ Nating se i olsem, ol man blong bigfala kampani oli gat strong tingting se oli mas stap longwe long fasin blong ‘mekem nogud wetem woman, mekem ol samting blong sem, mo mekem ol samting we oli nogud olgeta, fasin blong prea long ol narafala god, mo mekem ol bisnes blong posen mo kleva, fasin blong kam enemi, faet, jalus, kros, mo fasin blong leftemap olgeta nomo, fasin blong rao oltaem, seraot, wantem kasem mak blong narafala man, dring lusum hed, mekem lafet blong mekem nogud nomo, mo ol narafala samting olsem.’—Gal. 5:19-21.

10. ?Ol man blong bigfala kampani oli gat strong tingting blong mekem wanem?

¹⁰ From we yumi no stretgud olgeta, samtaem i no isi nating blong soemaot ol fasin ya we oli kamaot long tabu spirit, i no isi tu blong blokem ol samting we tingting nomo i wantem, mo i no isi nating blong agensem ol traem we oli stap kamaot  oltaem long wol blong Setan. Be nating se yumi gat sam slak fasin, yumi mestem sam samtaem, no bodi blong yumi i no strong gud blong mekem plante wok, yumi no letem tingting blong yumi i foldaon, mo yumi no letem samting ya i daonem bilif mo lav we yumi gat long Jeova. Jeova i promes se bambae hem i sevem wan bigfala kampani blong man, i mekem oli pastru long bigfala trabol, mo yumi save se Jeova bambae i mas holem promes ya blong hem.

11. ?Wanem ol trik we Setan i yusum blong traem mekem bilif blong ol Kristin i slak?

¹¹ Yumi mas wekapgud oltaem from we yumi save se Devel Setan i enemi blong yumi, mo hem i stronghed. (Ridim 1 Pita 5:8.) Hem i yusum ol man blong apostasi * mo sam narafala man bakegen, blong traem mekem yumi bilif se ol tijing we yumi stap folem oli giaman nomo. Be plante taem, trik ya blong olgeta i no winim yumi. Sem mak taem ol man oli givim kil long yumi, samting ya i mekem wok blong prij i godaon smol, be plante taem hem i mekem bilif blong yumi i kam strong moa. Taswe, i gat wan samting we naoia Setan i stap traem yusum moa from we hem i ting se samting ya nao bambae i mekem bilif blong yumi i slak. Yes, hem i yusum filing blong yumi we yumi harem nogud mo tingting we i foldaon. Ol Kristin long faswan handred yia oli kasem woning long saed blong denja ya se: “I gud yufala i stap tingbaot ol hadtaem ya we [Kraes] hem i kasem, we ol man nogud oli girap oli agensem hem tumas.” ?Blong mekem wanem? Blong “bambae yufala i no save lego bilif blong yufala, mo oltaem tingting blong yufala i save stap strong.”—Hib. 12:3.

12. ?Ol advaes blong Baebol oli save givhan olsem wanem long wan man we tingting blong hem i foldaon?

¹² ?Samtaem yu yu harem olsem se yu wantem lego evri samting? ?Samtaem yu harem se yu nogud, yu no naf nating blong mekem wan gudfala samting? Sipos yes, ale yu no mas letem Setan i yusum ol filing ya blong holemtaet yu nao yu no moa gohed long wok blong Jeova. I gud yu stadi dip long Baebol, yu prea wetem fulhat long Jeova, mo yu kam oltaem long miting mo joen wetem olgeta we bilif blong olgeta i strong, nao bambae samting ya i save mekem yu yu strong mo i save blokem yu blong ‘yu no save lego bilif blong yu.’ Jeova i promes blong halpem olgeta we oli mekem wok blong hem, hem i promes se bambae hem i givim paoa long olgeta, mo yumi save trastem promes blong hem. (Ridim Aesea 40:30, 31.) Yu mas putum tingting blong yu i stap nomo long wok blong Kingdom. Lukaot long ol pleplei we oli westem taem, mo traem tingting oltaem long ol samting we yu save mekem blong halpem narafala. Ale bambae yu gat paoa blong stanap strong longtaem nomata sipos tingting blong yu i foldaon.—Gal. 6:1, 2.

Aot Long Bigfala Trabol Mo Go Insaed Long Niufala Wol

13. ?Wanem wok i stap blong olgeta we bambae oli laef afta long Amagedon?

¹³ Afta long Amagedon, plante man we fasin blong laef blong olgeta bifo i no stret, bambae oli laef bakegen long ded, mo bambae oli nidim man blong tijim olgeta long ol wok blong Jeova. (Wok 24:15) Oli mas save long ransom sakrefaes blong Jisas, mo antap long hemia, oli mas kasem tijing blong oli save bilif long sakrefaes ya mo kasem blesing blong hem. Oli nidim blong sakemaot ol tingting blong giaman skul we maet oli bin gat bifo, oli mas lego fasin blong laef tu we oli gat bifo. Oli mas lanem blong putum niufala laef ya olsem klos blong olgeta, hemia i makemaot olgeta olsem ol trufala Kristin. (Efes. 4:22-24; Kol. 3:9, 10) Ol narafala sipsip we oli laef afta long Amagedon bambae oli gat plante wok blong mekem. !Bambae oli glad bigwan blong mekem ol wok ya blong Jeova, from we bambae i no gat hadtaem mo nogud samting olsem long wol tede we oli save pulum ae mo tingting blong yumi!

14, 15. ?Ol man we oli laef tru long bigfala trabol mo ol man we oli laef bakegen long ded, bambae oli storian tugeta long wanem samting?

¹⁴ Ol gudfala man blong Jeova we oli ded bifo we Jisas i statem wok blong hem long wol ya, olgeta tu bambae oli mas lanem fulap samting. Bambae oli wantem save hu ya Mesaea we God i bin promes blong sanem—olgeta ya oli bin wantem tumas blong luk Mesaea ya be oli no gat janis. Taem ol man ya oli laef bifo, oli soemaot finis we oli rere blong letem Jeova i tijim olgeta. Tingbaot taem bambae yumi halpem ol man ya, olsem Daniel, blong oli save se ol profet tok we oli bin  raetemdaon, oli kamtru. Hemia wan bigfala glad mo blesing tu long olgeta we oli save eksplenem samting ya.—Dan. 12:8, 9.

¹⁵ I tru se ol dedman we oli laef bakegen bambae oli gat fulap samting blong lanem, be bambae yumi gat plante kwestin tu blong askem long olgeta. Bambae oli save givim moa save long yumi long saed blong sam stori long Baebol we maet oli no talem evri smosmol samting we i bin hapen. !Tingbaot kasen brata ya blong Jisas, hemia Jon Baptaes! Bambae hem i save givim plante save long yumi long saed blong Jisas se hem i olsem wanem. Ol samting we ol gudfala Witnes ya blong Jeova bambae oli serem wetem yumi long fiuja, oli save mekem save we yumi gat naoia long Tok blong God, i kam bigwan moa. Ol gudfala man blong Jeova we oli ded finis, wetem olgeta blong bigfala kampani we oli ded long taem blong yumi, bambae oli “laef bakegen long wan laef we i gud moa.” Taem oli bin stat blong mekem wok blong Jeova, oli stap long wol we Setan i bos long hem. Be taem bambae oli laef bakegen long niufala wol, bambae oli glad tumas blong mekem wok blong Jeova long wan ples we i moa gud olgeta.—Hib. 11:35; 1 Jon 5:19.

16. ?Wanem ol wanwan samting we ol profet tok blong Baebol oli soemaot se bambae oli hapen long Dei blong Jajmen?

¹⁶ Taem Dei blong Jajmen i stap gohed, bambae i gat sam niufala buk no skrol we oli open. Ol niufala skrol ya bambae oli joen wetem Baebol, mo bambae oli givhan long wok blong jajem olgeta man we oli laef long taem ya, blong luk sipos oli naf blong kasem laef we i no save finis. (Ridim Revelesen 20:12, 13.) Long Dei blong Jajmen, olgeta man wanwan oli gat longfala taem blong soemaot klia se oli stanap long saed blong hae rul blong Jeova no nogat. Taswe taem Dei blong Jajmen ya i finis, bambae i klia nomo se ?hu olgeta we oli sapotem ol plan blong Kingdom mo i letem Smol Sipsip i lidim olgeta i go long ‘springwota blong laef,’ mo hu olgeta we oli agensem Kingdom blong God mo we oli no wantem stap aninit long rul blong hem? (Rev. 7:17; Aes. 65:20) Long taem ya, evri man long wol bambae oli kasem janis finis blong mekem wan jus, we i kamaot stret long prapa tingting blong olgeta from we i no gat sin blong pulum olgeta mo i no gat rabis man tu blong pulum olgeta. I no gat man we bambae i save talem se laswan jajmen blong Jeova maet i no stret. Olgeta we bambae oli lus blong olwe long taem ya, hemia ol rabis man nomo.—Rev. 20:14, 15.

17, 18. ?From wanem ol Kristin we tabu spirit i makemaot olgeta mo ol narafala sipsip tu oli wantem tumas blong luk Dei blong Jajmen?

¹⁷ Ol Kristin tede we tabu spirit i makemaot olgeta, God i luk we oli naf blong kasem Kingdom, mo from samting ya olgeta ya oli wantem tumas blong rul long Dei blong Jajmen. !Hemia wan nambawan blesing ya blong olgeta! Taem oli tingbaot samting ya, oli wantem folem advaes ya we Pita i givim long ol Kristin long faswan handred yia se: “Yufala i mas traehad moa blong soemaot samting ya [we God i jusumaot yufala] oltaem long laef blong yufala. Sipos yufala i mekem olsem, bambae yufala i no save foldaon samtaem. Nao long fasin ya, bambae God i givim raet long yufala blong yufala i go insaed long . . . [“Kingdom ya,” NW] we bambae i no save lus samtaem, we Jisas Kraes, Masta mo Sevia blong yumi, hem i king long hem.”—2 Pita 1:10, 11.

¹⁸ Ol narafala sipsip oli glad tu from gudfala samting ya we ol Kristin we tabu spirit i makemaot olgeta bambae oli kasem. Ale oli sapotem ol Kristin ya. Ol narafala sipsip oli fren blong God, taswe oli wantem givim bes blong olgeta long wok blong God. Long Dei blong Jajmen, olgeta ya bambae oli wantem sapotem ol plan blong God wetem fulhat blong olgeta, taem Jisas i lidim olgeta oli go kasem wota blong laef. Long taem ya nao, bambae Jeova i luk we oli naf blong stap olsem ol man blong hem long wol ya gogo i no save finis.—Rom 8:20, 21; Rev. 21:1-7.

[Futnot]

?Yu Yu Rimemba?

• ?Olgeta samting blong Jisas i minim wanem?

• ?Olsem wanem ol man blong bigfala kampani oli givhan long ol brata we tabu spirit i makemaot olgeta?

• ?Wanem ol nambawan blesing mo gudfala fiuja we ol man long bigfala kampani oli gat janis blong kasem?

• ?Yu tingbaot Dei blong Jajmen, se bambae hem i olsem wanem?

[Kwestin]