Folem Fasin Blong Misinari Ya We i Nambawan Olgeta
Folem Fasin Blong Misinari Ya We i Nambawan Olgeta
“Yufala i mas folem fasin blong mi, olsem we mi mi stap folem fasin blong Kraes.”—1 KOR. 11:1.
1. ?From wanem yumi mas folem fasin blong Jisas Kraes?
APOSOL Pol i folem fasin blong misinari ya we i nambawan olgeta, Jisas Kraes. Mo Pol i talem long ol narafala Kristin se: “Yufala i mas folem fasin blong mi, olsem we mi mi stap folem fasin blong Kraes.” (1 Kor. 11:1) Afta we Jisas i wasem leg blong ol aposol blong hem blong tijim olgeta blong gat tingting daon, hem i talem long olgeta se: “Mi mi putum wan eksampol blong yufala, blong bambae yufala i save mekem sem fasin ya nomo we mi mi mekem long yufala.” (Jon 13:12-15) Tede, yumi ol Kristin, wok blong yumi i blong folem Jisas Kraes, long ol tok, ol wok, mo ol fasin blong yumi.—1 Pita 2:21.
2. ?Nating se Hed Kampani i no putumap yu yu kam wan misinari, yu save gat wanem tingting mo fasin yet?
2 Long laswan stadi, yumi kasem save se wan misinari, hemia wan we oli sanem hem olsem wan ivanjelis—wan man blong karem gud nius i go long ol narafala. Long saed ya, Pol i askem sam kwestin we oli pulum tingting blong yumi. (Ridim Rom 10:11-15.) Yu luk we aposol ya i askem se: “?Sipos man i no go talemaot nius blong God, bambae ol man oli save harem nius ya olsem wanem?” Biaen, Pol i talem tok blong Aesea se: ‘Samting ya i gud tumas, we ol man oli wokbaot blong talemaot gud nius.’ (Aes. 52:7) Nating se oli no putumap yu yu kam wan misinari mo sanem yu yu go long narafala kantri, be yu save wokem yet tingting blong ivanjelis mo yu save folem fasin blong Jisas we i wok strong blong talemaot gud nius. Las yia, i gat 6,957,852 man we oli “mekem wok blong ivanjelis” long 236 kantri.—2 Tim. 4:5, NW.
‘Mifala i Lego Evri Samting, Blong Kam Biaen Long Yu’
3, 4. ?Jisas i lego wanem blong kamdaon long wol ya? ?Mo yumi mas mekem wanem blong biaen long hem?
3 Blong Jisas i mekem wok we Jeova i givim long hem long wol, hem i lego laef blong hem long heven wetem bigfala paoa we hem i bin gat. Yes, hem i “lego olgeta fasin ya, nao i kam olsem man blong wok nomo.” (Fil. 2:7) Nomata wanem samting we yumi livim blong folem fasin blong Kraes, hemia i nating nomo taem yumi skelem wetem samting we Jisas i livim blong kamdaon long wol. Nating se i olsem, yumi save holemstrong long rod ya we yumi jusum finis, blong folem hem. Bambae yumi no luklukbak long ol samting long wol blong Setan mo wantem gobak long olgeta.—1 Jon 5:19.
4 Wan taem, aposol Pita i talem long Jisas se: ‘Mifala i lego evri samting, blong kam biaen long yu.’ (Mat. 19:27) Yes, taem Jisas i singaot Pita, Andru, Jemes, mo Jon, blong oli biaen long hem, kwiktaem nomo oli livim ol net blong olgeta. Oli lego bisnes blong olgeta blong pulum fis, mo oli mekem wok blong prij i kam bigfala wok long laef blong olgeta. Bighaf blong yumi i no lego evri samting we yumi gat blong folem Jisas. Be i tru se, yumi ‘blokem ol samting we yumi nomo i wantem,’ blong yumi save folem Kraes mo mekem wok blong Jeova wetem fulhat blong yumi. (Mat. 16:24) Mo from samting ya, yumi kasem ol bigfala blesing. (Ridim Matiu 19:29.) Sipos yumi gat tingting blong ivanjelis olsem Kraes, hat blong yumi i glad. Samting ya i tru moa, sipos yumi bin givhan smol blong halpem wan narafala blong kam klosap long God mo nambawan Pikinini blong hem.
5. Storian long saed blong desisen we wan man we i wok long narafala kantri i tekem, taem hem i kasem save long trutok blong Baebol.
5 Wan man Brasil we nem blong hem Valmir, i stap long kantri ya Surinam, mo i stap digim graon long medel blong kantri ya blong traem faenem gol. Man ya i wan alkolik mo i stap slip olbaot tu. Wan dei, hem i go long wan bigfala taon, i mitim ol Witnes blong Jeova, mo oli stat blong stadi Baebol wetem hem. Oli stadi tugeta evri dei, mo Valmir i jenisim plante fasin blong hem. I no longtaem, hem i tekem baptaes. Be hem i luk we wok blong hem i blokem hem blong folemgud niufala bilif blong hem. Ale hem i salem bisnes blong hem we i givim bigfala mane long hem, mo i gobak long Brasil blong givhan long famle blong hem blong faenem ol sas trutok blong Baebol. Yes, plante man we oli go wok long ol rij kantri mo oli faenem trutok long ol kantri ya, oli lego wok blong olgeta blong gobak long kantri blong olgeta. Oli mekem olsem from we oli wantem givhan long ol famle blong olgeta mo ol narafala, blong olgeta tu oli save faenem trutok. Ol man ya blong talemaot Kingdom oli rili gat tingting blong ivanjelis.
6. ?Yumi save mekem wanem sipos yumi no save muv i go long ples we i nidim moa man blong talemaot Kingdom?
6 Plante Witnes oli muv i go long narafala ples we i nidim moa man blong talemaot Kingdom. Samfala oli bin muv i go long narafala kantri tu. Maet i gat sam samting oli blokem yu blong yu no save muv i go long narafala ples. Be yu save folem fasin blong Jisas yet, sipos yu traehad oltaem blong mekem bes blong yu long wok blong prij.
Jeova i Givim Trening We Yumi Nidim
7. ?Wanem ol kos we oli blong trenem olgeta we oli wantem kamgud moa long wok blong talemaot Kingdom?
7 Jisas i bin kasem trening long Papa blong hem. Yumi tu yumi save kasem tijing we Jeova i stap givim. Jisas i talem se: “Ol profet bifo oli bin raetem wan tok we i talem se, ‘God bambae i tijim olgeta.’” (Jon 6:45; Aes. 54:13) Tede i gat ol kos we oli blong trenem yumi blong gat gudhan long wok blong talemaot Kingdom. Ating yumi evriwan i bin kasem help long Tiokratik Skul long kongregesen blong yumi. Ol paenia oli kasem blesing ya blong joen long Skul blong Ol Paenia. Plante we oli mekem wok blong paenia longtaem finis, oli bin gat janis blong joen long skul ya namba tu taem. Ol elda mo ol man blong givhan oli joen long Kingdom Ministri Skul we i halpem olgeta blong kamgud moa long fasin blong tij mo long wok we oli mekem blong givhan long ol narafala Kristin. Plante elda mo man blong givhan we oli no mared oli bin joen long Ministeriol Trening Skul, we i trenem olgeta blong givhan long ol narafala long wok blong prij. Mo plante brata mo sista we oli go mekem wok blong misinari long ol narafala kantri, oli bin kasem trening long Wajtaoa Baebol Skul blong Gilead.
8. ?Sam brata oli tinghae olsem wanem long trening we Jeova i givim long olgeta?
8 Plante Witnes blong Jeova oli bin jenisim sam samting long laef blong olgeta blong oli save joen long ol kos ya. Wan man, nem blong hem Yugu, i wantem joen long Ministeriol Trening Skul long Kanada. Masta blong Yugu i talem se hem i no save givim spel long hem blong i go long skul ya, ale Yugu i livim wok blong hem. Hem i talem se: “Mi mi no sore we mi lego wok ya. I moagud olsem, from we sipos hem i bin givim spel long mi jes blong mekem i gud long mi, ating bambae hem i wantem se mi stap olwe long wok ya blong soemaot tangkiu long hem. !Naoia mi mi fri blong go long eni ples we Jeova i wantem sanem mi!” Plante we oli wantem yusumgud trening we God i givim, oli lego samting we fastaem oli tinghae long hem.—Luk 5:28.
9. Talem wan stori we i soemaot wanem i save hapen taem man i kasem tijing blong Baebol mo i traehad bigwan.
9 Sipos man i kasem tijing blong Baebol mo i traehad bigwan tu, hem i save karem gudfala frut. (2 Tim. 3:16, 17) Tingbaot Saulo long Guatemala. Boe ya i bon wetem wan problem long bren blong hem. Wan tija i talem long mama blong hem se hem i no mas fosem boe ya blong lanem blong rid, from we sipos i mekem olsem, boe ya bambae i kam kros. Ale, taem Saulo i finis long skul, hem i no save rid nating. Be wan Witnes i tijim Saulo blong rid. Saulo i gohedgud gogo hem i kam naf blong mekem tok long Tiokratik Skul. Wan dei, mama blong Saulo i stap prij mo i mitim tija blong Saulo. Taem tija i harem se Saulo i save rid, hem i talem long mama blong hem blong karem hem i kam luk hem. Long nekis wik blong hem, tufala i kam, nao tija i askem long Saulo se: “?Bambae yu yu tijim mi long wanem samting?” Saulo i ridimaot wan haf blong buk ya ?Wanem Samting We Baebol i Rili Tijim? Tija i talem se: “Mi no save bilivim se naoia yu yu stap tijim mi.” Tija i no save blokem wota blong ae blong hem. Hem i putum han blong hem i goraon long Saulo mo i holemtaet hem.
Tijing We i Kasem Hat Blong Man
10. ?Wanem nambawan buk i stap we yumi save yusum blong tijim ol man long ol trutok blong Baebol?
10 Tijing we Jisas i givim long ol man, i stanap long samting we Jeova i talem stret long hem, mo long ol save we i stap long Tok blong God, Baebol. (Luk 4:16-21; Jon 8:28) Yumi folem fasin blong Jisas taem yumi mekem ol tok blong hem i wok long laef blong yumi, mo taem yumi obei long ol tok blong Baebol. Olsem nao, yumi evriwan i gat wan tingting nomo mo yumi talemaot sem toktok, samting ya i mekem se yumi joengud. (1 Kor. 1:10) Yumi talem bigfala tangkiu long ‘slef we i stret mo waes’ we i stap wokem ol buk long saed blong Baebol, blong givhan long yumi blong gat wan tingting nomo long ol tijing we yumi givimaot, mo blong mekemgud wok blong yumi blong talemaot gud nius. (Mat. 24:45, NW; 28:19, 20) Wan long ol buk ya, hemia Baebol Tijim, we naoia i stap long 179 lanwis.
11. ?Olsem wanem wan sista long Itiopia i yusum buk ya Baebol Tijim blong ansa long wan woman we i agensem trutok?
11 Taem yumi yusum buk ya Baebol Tijim blong stadi Baebol wetem ol man, hemia i save jenisim tingting blong sam man we oli agensem yumi. Wan sista we hem i wan paenia long Itiopia, nem blong hem Lula, hem i stap mekem Baebol stadi long wan woman. Wantaem nomo, wan famle blong woman ya i kam insaed mo i talem strong se oli no nidim stadi ya. Lula i ansa long kwaet fasin, hem i talem wan pijatok we i stap long japta 15 blong buk ya Baebol Tijim, long saed blong giaman mane. Ale, kros blong woman ya i godaon mo oli gohed blong stadi. !Long nekis stadi, woman ya we i bin kros i stap bakegen. !Be long taem ya, hem i askem sista blong mekem stadi long hem tu, mo i talem se hem i glad blong pem sista ya from! I no longtaem, hem i stap stadi tri taem evri wik, mo i gohedgud long trutok.
12. Talem wan stori we i soem olsem wanem ol yangfala oli save tijim ol narafala long ol trutok blong Baebol.
12 Ol yangfala oli save yusum buk ya Baebol Tijim blong givhan long ol narafala. Wan boe long Hawai we i gat 11 yia, nem blong hem Keanu, hem i stap ridim buk ya long skul. Nao wan boe long klas blong hem i askem long hem se: “?From wanem yu yu no mekem lafet long ol holide?” Keanu i openem buk ya long Diksonari mo i ridimaot haf ya “?Olsem Wanem Long Ol Holide?” Afta, hem i gobak long fas pej blong buk ya we i gat lis blong ol japta, mo i askem boe ya weswan japta we hem i intres long hem. Hem i statem wan Baebol stadi wetem boe ya. Long yia we i jes pas, ol Witnes blong Jeova oli mekem 6,561,426 Baebol stadi, mo plante long olgeta oli stadi long buk ya Baebol Tijim. ?Olsem wanem? ?Yu yu stap yusum buk ya long ol Baebol stadi blong yu?
13. ?Olsem wanem stadi blong Baebol i save gat bigfala paoa long ol man?
13 Tijing blong Baebol we buk ya Baebol Tijim i givim long ol man taem yumi stadi wetem olgeta, i save gat bigfala paoa long olgeta we oli wantem mekem wok blong God. Wan man mo woman long Nowei we tufala i spesel paenia, tufala i statem Baebol stadi wetem wan famle blong Sambia. Man mo woman Sambia, tufala i gat tri gel blong tufala, mo tufala i no moa wantem wan narafala pikinini. Taswe taem woman ya i gat bel bakegen, tufala i tekem desisen blong kilim pikinini ya long bel. Sam dei bifo we woman ya i go luk dokta, tufala i stadi long japta ya “Karem Tingting Blong God Long Saed Blong Laef.” Long japta ya i gat wan pija blong wan bebi we i stap yet long bel blong mama blong hem, ale pija ya i tajem filing blong tufala. Nao tufala i jenisim tingting blong tufala, tufala i no moa spolem pikinini ya. Tufala i gohed gud long stadi blong tufala, mo taem woman ya i karem wan smol boe, tufala i putum nem blong brata we i mekem stadi blong tufala long smol boe ya.
14. Talem wan stori blong soemaot se i gat gudfala frut i kamaot taem yumi mekem ol save we yumi tijim, i wok long prapa laef blong yumi.
14 Taem Jisas i tijim ol man, hem i mekem ol save ya we hem i tijim, i wok long prapa laef blong hem. Hemia i impoten. Plante man oli laekem tumas ol Witnes blong Jeova from we oli folem gudfala fasin ya blong Jisas. Long Niusilan, wan stilman i brekem lok blong wan trak mo i stilim basket blong wan bisnesman. Bisnesman ya i ripotem stil ya, nao polis i talem se: “Yu yu gat wan janis nomo blong kasembak basket blong yu, hemia sipos wan Witnes blong Jeova i faenem.” Mo hemia nao samting we i hapen. Wan Witnes we i stap wokbaot blong salem ol niuspepa i faenem basket ya. Taem bisnesman i harem nius ya, hem i go long haos blong Witnes ya. Hem i glad tumas blong luk se wan pepa we i impoten tumas i stap yet long basket ya. Witnes i talem long hem se: “I stret nomo we mi givimbak basket ya wetem evri samting insaed long hem, speseli from we mi mi wan Witnes blong Jeova.” Bisnesman ya i sapraes we i sapraes, wantaem nomo hem i tingbaot tok we polis i bin talem long hem long sem moning ya. I klia nomo se ol trufala Kristin oli folem ol tijing blong Baebol mo ol fasin blong Jisas.—Hib. 13:18.
Folem Fasin We Jisas i Mekem Long Ol Narafala
15, 16. ?Olsem wanem yumi save pulum ol man blong oli lesin long gud nius we yumi talemaot?
15 Fasin we Jisas i mekem long ol man i pulum olgeta blong lesin long tok we hem i talemaot. Olsem nao, ol puaman mo ol man we oli no gat nem, oli kam long Jisas from we oli luk se hem i lavem ol man mo hem i gat tingting daon. Hem i soemaot we hem i sore long olgeta we oli kam long hem, hem i talem ol tok we i kaen blong leftemap tingting blong olgeta, mo hem i tekemaot sik blong olgeta. (Ridim Mak 2:1-5.) I tru, yumi no save mekem merikel, be yumi save soemaot se yumi lavem ol man, yumi gat tingting daon mo yumi sore long olgeta. Hemia ol fasin we oli givhan blong pulum man i kam long trutok.
16 Wan samting we i hapen long Saot Pasifik i soemaot olsem wanem fasin sore i save pulum man. Long wan aelan blong Kiribati we i stap longwe long ol narafala aelan, wan spesel paenia we nem blong hem Tariua, i go long haos blong wan olfala man we nem blong hem Beere. Olfala man ya i no wantem lesin long gud nius. Be Tariua i luk we olfala ya i handikap, haf bodi blong hem i ded, ale hem i sore long man ya. Tariua i askem long hem se: “?Yu yu harem finis promes blong God long saed blong ol man we oli sik mo oli olfala?” Tariua i ridim wan haf blong profet tok blong Aesea long man ya. (Ridim Aesea 35:5, 6.) Man ya i sapraes, i talem se: “Mi mi ridim Baebol plante yia finis mo i gat wan misinari blong jos blong mifala we i stap kam luk mi plante yia finis, be mi neva luk vas ya long Baebol.” Beere i stat blong stadi Baebol, mo i gohedgud. Bifo, hem i handikap, i no save wokbaot. Be naoia, hem i baptaes finis, hem i stap lukaot long wan grup long bus, mo hem i naf blong wokbaot blong talemaot gud nius long evri ples long aelan ya.
Gohed Blong Folem Fasin Blong Kraes
17, 18. (a) ?Olsem wanem yu yu save kam wan gudfala ivanjelis? (b) ?Wanem ol blesing we oli stap blong olgeta we oli tinghevi long wok blong prij?
17 Ol gudfala stori blong prij we oli givim glad, oli soemaot bakegen mo bakegen se, yumi save kam ol gudfala ivanjelis sipos yumi gat ol fasin we Jisas i gat. !Taswe, i stret nomo we yumi folem fasin blong Kraes mo wokhad olsem ol ivanjelis!
18 Long faswan handred yia, Pita i askem long saed blong samfala we oli kam disaepol blong Jisas, se: “?Bambae mifala i kasem wanem?” Jisas i ansa se: “Man we i lego haos blong hem, no brata no sista blong hem, no papa no mama blong hem, no pikinini blong hem, no graon blong hem from we hem i man blong mi, hem bambae i no save sot long ol samting ya. Bambae hem i save kasem ol samting ya wan handred taem antap bakegen, mo bambae hem i gat laef we i no save finis.” (Mat. 19:27-29) !Bambae tok ya i kamtru long yumi sipos yumi gohed blong folem fasin blong Misinari ya we i Nambawan Olgeta, Jisas Kraes.
?Bambae Yu Yu Ansa Olsem Wanem?
• ?Olsem wanem Jeova i stap trenem yumi blong mekem wok blong ivanjelis?
• ?From wanem buk ya Baebol Tijim i gud blong yusum long wok blong prij?
• ?Olsem wanem yumi save folem Jisas long saed blong ol fasin we hem i mekem long ol narafala?
[Kwestin]
[Tok blong pija long pej 21]
Taem Jisas i singaot Pita, Andru, Jemes, mo Jon, wantaem nomo oli folem hem
[Tok blong pija long pej 23]
Ol buk olsem “Baebol Tijim” oli save givhan long yumi evriwan blong gat wan tingting nomo long saed blong ol tijing we yumi givimaot